Read mbula bwazza Matiu 11 Bible Online

Matiu 11 - mbula bwazza bible

Matiu 11

¹A nzǝm mana Yesu yi malǝna ne alaggana male lum-nong-ɓari amǝnia yì akwarkiru ka, pǝlǝa nying ban mǝno kutio o nǝ̀ ngga kanigir andǝ hamnǝ cau arǝ ala mala amǝ Galili.

²Yohana Mǝbatisǝma ka nda a ndàkurban sǝ ok ce agir mana Kǝrǝsti kǝ pea ka, pǝlǝa tur alaggana male

³ɓǝa kya ɗi ama, “A nda Mǝ'amsǝban mǝnana sǝm kundǝkiyi muri ka le, ko ɓǝ̀ sǝm tsǝk mǝsǝ sǝm arǝ ɓeɓwa ɗang?”

⁴Yesu nyesǝia wia ama, “Wu nyare wu kya ban Yohana wu kya banggi wi cau mala agir mana wu kǝ sǝnia sǝ wu kǝ oea ka.

⁵Ante kǝ sǝnban, agbakǝre kǝ gya, à kǝ twali amǝdakali ban akwano bǝsa malea, amǝkir'ara kǝ okban, à kǝ loasǝ alú, sǝ à kǝ hamnǝ Cau Amsǝban aban amǝtǝr.[77]

⁶Tsǝkbu mala Ɓakuli na amur aɓwana mana à kum ɓe kǝgir annda a rǝam raka.[78]”

⁷Lang alaggana mala Yohana purna à nǝ̀ nggǝ o ka, Yesu tita ne aɓwana cau amur Yohana ama: Mǝnana wu puro wu wario a ɓabondo aban Yohana ka, mana ɗe wu wari a sǝne? Wu wari a sǝn ndǝrdangŋa mǝnana gung kǝ dǝurǝki ka le?

⁸Ɓǝ̀ pa ana raka, mana wu puro wu wari a sǝne? Wu wari a sǝn ɓwa mana oasǝ agir-nggurǝu mǝɓoarne a rǝì ka le? Awo, aɓwana mǝnana à oasǝkiyi agir-nggurǝu mǝɓoarne a rǝia ka à nda aɓalǝ apalta mala amurǝma.

⁹Sǝ mana ɗe wu wari a sǝne? Mǝɓangna na le? E, ǝn nggǝ bangga wun yì ka, kuti mǝɓangna.

¹⁰Yì nda ɓwa mǝnana à gilǝ mǝnia yì cau amuri ka ama: “Mǝ nǝ tur mǝturonjar mem a ɓadǝmbǝo, mǝnana nǝ̀ yia gilǝkio njar ace yiu mo ka.”[79]

¹¹Ən nggǝ na wun mǝsǝcau: Ata ɓwapǝndǝa kat ka à malaká ɓǝl kǝɓwa a ɓanza man mǝnana kum gulo kuti mala Yohana Mǝbatisǝma ka ɗang; sǝa ma ɓwa mǝkyauwe kat a Domurǝm mala kuli ka, kuti Yohana nǝ gulo.

¹²Lo a nza mala Yohana Mǝbatisǝma yi bwal a dyan ngga, Domurǝm mala Kuli ka kǝ nu tanni kǝrkǝr a bu aɓwana, sǝ amǝ bumpina ka à kǝ̀ é nǝ rǝcandǝa.

¹³Amǝ'ɓangna mala Ɓakuli kat andǝ malǝmce Nggurcau mala Musa ka à hamna nǝ cau amur Domurǝm mala Ɓakuli yi pur a pwari mala Yohana.[80]

¹⁴Sǝ ɓǝ̀ wu nǝ̀ eare wu nǝ̀ ak cau mǝnia ka, Yohana ka nda Iliya mǝnana à bangŋa ama nǝ̀ yiu ka.[81]

¹⁵Ɓwa mana kat ndanǝ akiru okban ngga ɓǝ̀ ok cau.

¹⁶Arǝ mana sǝ mǝ nǝ kani amǝ'nza man? À nda kǝla amuna mana à do aɓa limo sǝ à kǝ akia rǝia tunǝkiban nǝ cau ama:

¹⁷“Sǝm twangga wun ntetu, sǝ wu tanggwam ɗang; sǝm tuka wun nggyal ɓua lú, sǝ wu ɓua ɗang.”

¹⁸Yohana yiu, liki kǝgir ɗang, sǝ nuki kǝgir gbal ɗang. À yì bangŋa ama, “Ndanǝ kukwar a rǝì.”

¹⁹Muna mala Ɓwa yiu kǝ li sǝ kǝ nu, à yì bangŋa ama, “Mǝligula na sǝ mǝ'ɓiki nu mur anap na, gyajam mala amǝ'aki aboalo-cemi andǝ acilia amǝ'cauɓikea ka.” Sǝ sǝlǝe mala Ɓakuli ka à kǝ surǝì arǝ turo male.

²⁰Yesu kutia naki acau nǝ bumkiɗikea amur ala mana kya pakki agir-ndali kam kuti acili aban kat ka, acemǝnana à ɓinǝ pwanzali ɓǝa nying acauɓikea malea ka. Na ama:

²¹Wun amǝ Korazin, ban nǝ ɓikea wun! Wun amǝ Beseda, ban nǝ ɓikea wun! Ɓǝ̀ ama agir-ndali mǝnana ǝn pea aɓalǝ ala ma'wun ngga à nda ǝn pea arǝ ala mala amǝ Taya andǝ amǝ Sidon ngga, ɓǝa oasǝkina asangginagir a rǝia sǝ à songŋǝna tú amuria ɗiɗyal mana nǝ̀ lǝmndǝ ama à nyingŋǝna acauɓikea malea ka.[82]

²²Sǝ mim ngga ǝn nggǝ na wun ama gir mǝnana nǝ̀ kum wun a pwari ɓashi ka, nǝ̀ ɓike nǝ̀ kuti gir mana nǝ̀ kum amǝ Taya andǝ amǝ Sidon ngga.

²³Sǝ we Kapanahum ngga, ama à nǝ̀ loasǝo a kuli le? Awo, a nggearǝ nzali a tuli-lú sǝ à nǝ̀ yinǝ we. Ɓǝ̀ ama agir-ndali mana ǝn pakkia a ɓalǝo ka ǝn pangŋǝnia a Sodom ngga ɓǝ yalung ngga ndakam piu.[83]

²⁴Sǝ ǝn nggǝ no ama, gir mǝnana nǝ̀ kumo a pwari ɓashi ka nǝ̀ ɓike nǝ̀ kuti gir mǝnana nǝ̀ kum nzali Sodom ngga.[84]

²⁵A pwari mǝno ka Yesu na ama: Ən nggǝ ɓwangsǝo, we Dâ, mǝtala kuli andǝ nzali, ace mǝnana a sǝmbǝrǝ agir mǝnia ka arǝ amǝ'sǝlǝgir andǝ amǝ sǝlǝcau, sǝ a lǝmndǝia a banfana aban amǝ'ɗwanyi-sǝle.

²⁶E, Dâ, anggo sǝ ɓoarô ama ɓǝ̀ pa.

²⁷Tárram Ɓakuli panam agir kat aɓa buam. Kǝ ɓwa surǝam yì Muni ɗang, she kǝ yì Ɓakuli Tárram; sǝ kǝɓwa surǝ Ɓakuli yì Tárram ɗang, she kǝ mim Muni andǝ aɓwana mana ǝn tarkia mǝ nǝ lǝmndǝ Ɓakuli Tárram abania ka.[85]

²⁸Wu yiu abanam, wun kat mǝnana wu kǝ tanni sǝ twalo dǝmbǝrya wun ngga, mǝ nǝ pà wun usǝlǝo.

²⁹Wu pa ɓamur rǝ wun aɓata nzongcau mem, kǝla mana nda-rya kǝ pa ɓamuri aɓata nggun-rya ka. Acemǝnana mǝ nda ɓukɓuk, nǝ nwangsǝmuru a ɓabum ngga, wu kànì a rǝam, sǝ yilǝmi wun nǝ̀ kum usǝlǝo.[86]

³⁰Nggun-rya mem ngga nda halku, sǝ twalo mem ngga nda hapǝlam.