Read mbula bwazza Matiu 17 Bible Online

Matiu 17 - mbula bwazza bible

Matiu 17

¹A nzǝm nongŋo tongno-nong-mwashat ka Yesu twal Bitǝrus, Jemis andǝ Yohana mǝ'eam Jemis, sǝ à o amur ɓe nkono mǝdāre. A nda kano nǝmurǝia ka,

²kara rǝ Yesu twalo nggaɗi a ɓamǝsǝia. Ɓamǝsǝi ta kǝla pwari, agir-nggurǝi pǝlǝ amǝpwasǝe pwapwat.

³Kara Musa andǝ Iliya puro à came, à kǝ na cau nǝ Yesu.

⁴Pǝlǝa Bitǝrus ne Yesu ama, “Mǝtalabangŋo, ndanǝ ɓoaro mǝnana sǝm ndakani ka. Ɓǝ̀ a nǝ ear ka mǝ nǝ gilǝ agumli tārú; mwashat aceo, mwashat ace Musa sǝ mwashat ace Iliya.”

⁵Ndarǝ na cau piu ka, kara pǝrɓang mǝpwasǝe pwatpwat yi gir muria, sǝ giu pur aɓa pǝrɓang na ama, “Mǝnia ka nda Munem mǝnana ǝn earkiyi ace raka; mǝnana ban kǝ ɓoaram a rǝì pepe ka. Wu ok cau male!”[129]

⁶Lang alaggana male ok mǝnia yì giu ka, ǝn'o pakkia wia kǝrkǝr, pǝlǝa à kpa à kumsǝ ɓamǝsǝia a nzali.

⁷Sǝ Yesu yiu yi tsǝk bui a rǝia, sǝ nea wia ama, “Wu lo, ɓangciu ɓǝ̀ kǝa pakka wun ɗang.”

⁸À nǝ̀ loasǝ mǝsǝia ka, Yesu na kara à sǝni nǝmurǝì ka.

⁹Lang à ndaban sulǝi mur nkono ka Yesu kwarkiria ama, “Wu kǝa ne kǝɓwa ce gir mǝnana wu sǝn ngga ɗang she ɓǝa loasǝna Muna mala Ɓwa a ɓembe ka.”

¹⁰Alaggana male pǝlǝa à ɗi ama, “Sǝ ɓǝ̀ nda anggo ka, palang sǝ amǝkani nggurcau kǝ na ama she ɓǝ̀ Iliya angŋǝna dǝmbǝa yina ka sǝ Kǝrǝsti nǝ̀ yiu?”[130]

¹¹Pǝlǝa Yesu eare ama, “Mǝsǝcau na à bang ngga, Iliya nǝ̀ ak tadǝmbǝa nǝ̀ yiu, nǝ̀ yia gilǝki agir kat.

¹²Sǝ ǝn nggǝ na wun ama Iliya ka yina, sǝ à sǝlǝ ama yì na ɗang, sǝ à pangŋǝni wi gir mǝnana bumia earkiyice ka. Anggo gbal sǝ Muna mala Ɓwa nǝ̀ nu tanni a buia.”[131]

¹³Nda sǝ alaggana male yi sǝlǝ ama ndarǝ bang cau amur Yohana Mǝbatisǝma ka.

¹⁴Lang à sulǝni mur nkono aban ɓwabunda a nzali ka, ɓeɓwa yi kūndǝo a ɓadǝm Yesu

¹⁵sǝ na ama, “Mǝtalabangŋo, ǝn nggǝ zǝmbǝo, sǝn mǝsǝswatǝr mala laggalem. Ndanǝ kwano wukiaban mǝnana kǝ pe wi tanni kǝrkǝr ka. Kusǝ pas ɓǝ̀ loapi wi ka kǝ kpa aɓa bǝsa ko mur.

¹⁶Ən yinǝi aban alaggana mo sǝ à gandǝ twalban kwane ɗang.”

¹⁷Yesu pǝlǝa na ama, “Wun aɓwana mala nza mala kìɗìkì andǝ amǝ'ɗwanyi paɓamuru aban Ɓakuli! Nǝ̀ ngga ká a ya pwari sǝ mǝ nǝ do ata wun sǝ wu nǝ̀ kànì pak ɓe kǝgir? Nǝ̀ ngga ká a ya pwari sǝ mǝ nggǝ twal gandǝrǝu nǝ ɗwanyi earnǝ cau ma'wun a rǝam? Wu yinǝ mune abanam.”

¹⁸Yesu pǝlǝa sà arǝ kukwar mǝnana arǝ muna ka. Pǝlǝa kukwar puri rǝì. Àkǝ̀ banì rǝ mune mala.

¹⁹Nǝ nzǝmo ka alaggana mala Yesu yiu abani nǝmurǝì sǝ à ɗi ama, “Mana tsǝa sǝ sǝm gandǝ pusǝ kukwar nì ɗang?”

²⁰Yesu nea wia ama: Nda acemǝnana paɓamuru ma'wun ngga gatti. Sǝa ma ǝn nggǝ na wun mǝsǝcau, ɓǝa bangŋa ama wu earnǝ Ɓakuli bǝti kǝla kyauwe mala mǝsǝ musta ka, wu nǝ̀ gandǝ ne mǝnia yì nkono ka ama, “Turî ban mǝnia, o kano” sǝ yì ka, nǝ̀ turó. Ɓe kǝgir pà kàm nǝ̀ gandǝ wun ɗang.

²¹[Sǝa ma ulang mǝnia yì kukwar ka kǝ ear puro ɗang she nǝ hiwi andǝ gilmur.][132]

²²Lang alaggana male yi ramǝna kat a Galili ka, Yesu nea wia ama, “Ɓe ɓwa no nǝ̀ ngga mak Muna mala Ɓwa aban aɓwana,

²³sǝ à nǝ̀ ngga wal-lui. A tāruia nongŋo ka nǝ̀ lo nǝ yilǝmu.” Kara ban ɓiki alaggana male kǝrkǝr.

²⁴Lang Yesu andǝ alaggana male bwalǝna Kapanahum ngga, amǝcemi ɓa Ndàmǝgule mala Ɓakuli yiu aban Bitǝrus sǝ à ɗi ama, “Mǝtala-ɓala ma'wun ngga kǝ mbwe boalo cemi mala Ndàmǝgule re?”[133]

²⁵Bitǝrus earia wia ama, “E, kǝ mbwe.” Pǝlǝa kutio a ɓala nǝ̀ ngga ne Yesu ce. Malaká loasǝ kuni ɗang Yesu ak dǝmbǝa ɗi ama, “Sǝ we Shiman ka lang sǝ a sǝni? A bu a yana sǝ amurǝm ɓanza aki boalo-cemi? A bu amǝtala la le ko a bu abǝri?”

²⁶Bitǝrus eari wi ama, “A bu abǝri.” Pǝlǝa Yesu ne wi ama, “Lǝmndǝ ama amǝtala la ka, à pa aɓa mbwe ɗang.

²⁷Sǝ ace mǝnana ɓǝ̀ sǝm ka lul bumia raka, kyane a kun nggeamur kya tur nli. Nji mǝnana a nǝ tita bwale ka, mǝn kuni, a wu nǝ kum boalo kam. Twali kya mbwe na boalo-cemi ma'sǝm nǝi, mem andǝ mo.”