Read mbula bwazza Matiu 18 Bible Online

Matiu 18 - mbula bwazza bible

Matiu 18

¹A nzǝm mǝno bǝti ka alaggana mala Yesu yiu abani sǝ à ɗi ama, “Yana gulo kuti ban kat a Domurǝm mala kuli?”[134]

²Yesu pǝlǝa tunǝ ɓe muna mǝkyauwe sǝ tamsǝi aɓalǝia.

³Sǝ na ama: Mǝsǝcau, ǝn nggǝ bangga wun, ɓǝ̀ wu nggaɗya wu do kǝla amuna mǝkeke raka, pa wu nǝ̀ kuti a Domurǝm mala kuli ɗang.[135]

⁴Sǝ ɓwa mǝnana kat nwangsǝ ɓamuri kǝla muna mǝkyauwe man ngga nda ɓwamǝgule kat a Domurǝm mala kuli.

⁵Koya ɓwa sǝ ak muna mǝkyauwe kǝla mǝnia acem ngga, Mǝ nda akiyiam ngga.

⁶Ɓǝ̀ kǝɓwa tsǝk mwashat ata amuna mǝkeke mǝnia mǝnana à earnǝ mim sǝ pak cauɓikea ka, kǝpǝna ɓǝa ɗurri ɓwe taligo a meali sǝ ɓǝa turi aɓa nggeamur mǝlime.

⁷Caukwanban na nǝ ɓanza ace agir mǝnana à kǝ tsǝk aɓwana ɓǝa pak cauɓikea ka! Agir tamban ngga à nǝ̀ yiu púp. Sǝa ma caukwanban na nǝ ɓwa mǝnana à kǝ pur nǝbani ka!

⁸Ɓǝ̀ buo ko kusǝo kǝ tsǝo a kǝ pak cauɓikea ka, kasǝi turi. Kǝpǝna wu kuti a yilǝmu nǝ bu-kasǝa ko kusǝu-kasǝa amur mǝnana wu dum nǝ abuo ɓari ko akusǝo ɓari sǝ ɓǝa turo aɓa bǝsa mǝnana pà nǝ̀ linggi raka.

⁹Ɓǝ̀ mǝsǝo kǝ tsǝo a kǝ pak cauɓikea ka, ui turi. Kǝpǝna wu kuti a yilǝmu nǝ mǝsǝu mwashat amur mǝnana wu dum nǝ amǝsǝo ɓari sǝ ɓǝa turo a lu-bǝsa ka.[136]

¹⁰Wu tsǝk kir wun, wu kǝa burice mwashat ata amuna mǝkeke mǝnia ka ɗang. Ən nggǝ na wun mǝsǝcau amǝturonjar malea a koya pwari ka à nda a ɓadǝm Tárram mǝnana a kuli ka.

¹¹[Muna mala Ɓwa yiu ace amsǝ aɓwana mǝnana à ɓwarki tanjar ka.][137]

¹²Lang sǝ wu sǝni, ɓǝ̀ ɓwa nanǝ anzur gbǝman sǝ mwashat ɓwarki ta ɓi ka, pà nǝ̀ nying amǝnia lumi-tongno-nong-ine bwamdǝ tongno-nong-ine ka amur nkono sǝ nǝ̀ oa alta mǝnana ɓwàr ka re?

¹³Sǝ ɓǝ̀ yi kumǝni ka, ǝn nggǝ na wun mǝsǝcau ban nǝ ɓoari wi ace nzur mǝnia mwashat ka nǝ̀ kuti mǝnana ndanǝi ace acili amǝno à ɓwarki raka.

¹⁴Anggo gbal sǝ Tar wun mǝnana a kuli ka eare ama ɓǝ̀ mwashat ata amǝkeke mǝnia ka ɓǝ̀ ɓwàr raka.

¹⁵Ɓǝ̀ mǝ'eambǝo pakko cauɓikea ka, kya bani nǝmurǝo lǝmndǝì wi cauɓikea male, a nre wun ɓari. Ɓǝ̀ oako ka, a nyesǝna mǝ'eambǝo a tanjar.[138]

¹⁶Sǝ ɓǝ̀ pà nǝ̀ oako raka, tunǝ ato ɓwa mwashat ko ɓari abani. Acemǝnana mǝsǝcau ka à kǝ oe a kun aɓwana ɓari ko tārú.

¹⁷Ɓǝ̀ ginǝ ok ka, kyan nǝi aban Ikǝlisiya. Sǝ ɓǝ̀ ginǝ oaki Ikǝlisiya ka, nyesǝi kǝla mǝ ɗwanyi surǝ Ɓakuli ko mǝ'cauɓikea.

¹⁸Ən nggǝ na wun mǝsǝcau gir mǝnana kat wu kùrrì a ɓanza ka à nǝ̀ kùrrì a kuli, sǝ gir mǝnana kat wu panzǝi a ɓanza ka à nǝ̀ panzǝi a kuli.[139]

¹⁹Sǝ ǝn nggǝ na wun mǝsǝcau ama, ɓǝ̀ aɓwana ɓari ata wun akani a ɓanza à nǝ̀ eare amur koya gir mǝnana wu nǝ̀ zǝm ngga, Tárram mǝnana a kuli ka nǝ̀ pakka wuni.

²⁰Ɓǝ̀ aya ban sǝ aɓwana ɓari ko tārú kpapi aɓa lullǝam ngga, Mǝ nda aɓalǝia.

²¹Pǝlǝa Bitǝrus yiu aban Yesu sǝ ɗi ama, “Mǝtalabangŋo, kusǝ shen sǝ ɓǝ̀ mǝ'eambǝam camarǝ pakkam cauɓikea ka ɓǝ̀ ǝn twali wi banì? Kusǝ tongno-nong-ɓari na le?”

²²Yesu eari wi ama: Awo, kusǝ tongno-nong-ɓari na ɗang, lumi tongno-nong-ɓari kusǝ tongno-nong-ɓari na![140]

²³Ace cau mǝnia ka à nǝ̀ kànì Domurǝm mala kuli arǝ ɓe murǝm mǝnana earce nǝ̀ bǝlki kusǝ agǝna male mǝnana a bu amǝ'turo-ɓala male ka.

²⁴Lang tinata bǝlki kusǝ agǝne ka à kya yinǝ ɓe ɓwabura a ɓadǝmbǝi, mǝnana li tangna boalo kǝrkǝr.

²⁵Sǝ ace mǝnana ɓwabure gandǝ mbwe raka, ɓwamǝgule male tsǝa ɓǝa me, yì andǝ mami andǝ amuni andǝ agirkuma male kat, ɓǝa mbwena tangne nǝi.

²⁶Mǝturo-ɓala man pǝlǝa ɓun amur ankuni a ɓadǝmbǝi sǝ zǝmbǝa ama, “Ɓwamǝgule, pakkam munyi, mǝ nǝ mbweko boalo mo kat.”

²⁷Murǝm yi sǝn mǝsǝswatǝr mala mǝturo-ɓala man nda sǝ twaliban tangne sǝ nyi ɓǝ̀ o.

²⁸Lang mǝturo-ɓala man purna a nza ka, yi kum ɓi mǝturo-ɓala mǝnana kǝ kpate tangna boalo bǝti ka. Pǝlǝa kpe a mǝsǝ'meali kàngkàng ne wi ama, “Mbwem gir mǝnana ǝn nggǝ kpato ka.”

²⁹Ɓi mǝturo-ɓala ɓun amur ankuni sǝ zǝmbǝi wi ama, “Pakkam munyi, mǝ nǝ mbweo.”

³⁰Ɓwabure ɓine. O kya tsǝa a oasǝ ɓi a ndàkurban ama she ɓǝ̀ mbwena tangna mǝnana kǝ kpate ka.

³¹Aɓi amǝturo sǝn gir man ngga bumia kìɗìkì, pǝlǝa à kya banggi ɓwamǝgule malea ce kat.

³²Ɓwamǝgule tunǝi ne wi ama, “We mǝɓealɓikea, ǝn twalo ban tangna mo acemǝnana a zǝmbǝam ngga.

³³Ɓoaro wu sǝn mǝsǝswatǝr mala ɓio mǝturo kǝla mǝnana ǝn sǝn mo ka re?”

³⁴Bum ɓwamǝgule lul kǝrkǝr, pǝlǝa tasǝ te a ndàkurban ɓǝa pe tanni, she ɓǝ̀ mbwena tangna mǝnana amuri kat ka.

³⁵Anggo gbal sǝ Tárram mǝnana a kuli ka nǝ̀ pang nǝ ko yana ka aɓalǝ wun, yi mǝnana ɓǝ̀ wu twali amǝ'eam wun ban acauɓikea malea nǝ ɓabum wun mwashat raka.