Read mbula bwazza Matiu 19 Bible Online

Matiu 19 - mbula bwazza bible

Matiu 19

¹Lang Yesu malǝna banggi acau mǝnia ka, nying bu-nzali Galili sǝ o a bui mala amǝ Yahudi a nkaring Nggeasala Jodan.

²Ɓwabunda pas o ate, sǝ amǝ rǝkwana mana aɓalǝia ka twalia wia ban akwano malea akano.

³Aɓea amǝ Farisi yiu aban Yesu, à yiua tambe. À yì ɗi ama, “Nggearǝì ka, Nggurcau eari ɓwa ɓǝ̀ pǝr mami ace ko man ngga le?”

⁴Sǝ pǝlǝia wia ama, “Wu ɓalli mbo aɓa Malǝmce ama, ‘A tite ka Mǝpusǝ-banza pak ɓwabura andǝ mɓwama,’[141]

⁵sǝ bangŋa ama, ‘Ace mǝnia ka ɓwabura nǝ̀ nying tarrí andǝ ngge sǝ nǝ̀ lanzǝ arǝ mami. Yì andǝ mami ka à dumǝna ɓwa mwashat?’[142]

⁶Lǝmndǝ ama yia ka à pa ɓari ɗǝm ɗang, à nda mwashat. Ace mani ka aɓwana mana Ɓakuli kpapinia ka kǝɓwa ɓǝ̀ kǝa gauwia ɗang.”

⁷Pǝlǝa à ɗi ama, “Ɓǝ̀ nda anggo ka, mana tsǝa sǝ Musa bangŋa ama ɓwabura nǝ̀ gandǝ pe mami takada gau doɓala sǝ nǝ̀ pǝri ɓǝ̀ o?”[143]

⁸Yesu pǝlǝia wia ama, “Musa eare ɓǝ̀ wu pǝr amālá wun ace ɓamurcandǝa ma'wun. Sǝ a share ɓanza ka, gir nî pa anggo ɗang.

⁹Sǝ ǝn nggǝ na wun ama, ko yana mǝnana pǝr mami sǝ pa ace nongnǝban a nza nǝ doɓala raka, sǝ kya al ɓe ɓwama ka, nda arǝ pak cauɓikea mala nongnǝban a nza nǝ doɓala[144].”[145]

¹⁰Alaggana male pǝlǝa à ne wi ama, “Ɓǝ̀ ce na anggo a nre ɓwabura andǝ mɓwama ka, kǝpǝna ɓǝ̀ ɓwa ɓǝ̀ kǝa al-nɓwama ɗang.”

¹¹Pǝlǝa Yesu nyesǝia wia ama, “Koyan sǝ nǝ̀ ak mǝnia yì kanigir ka ɗang, she aɓwana mǝnana Ɓakuli pa ce nì acea ka.

¹²Aɓea ɓwana ka à pà nǝ̀ gandǝ al mɓwama ɗang acemǝnana à ɓǝlia ka abaran na; aɓea ka aɓwana nǝ̀ tsǝia sǝ à pǝlǝ abaran, sǝ aɓea ka à twalî ɓamuria à nǝ̀ do anggo ace pakkiagir mala Domurǝm mala Ɓakuli nǝmurǝì. Ɓwa mǝnana nǝ̀ gandǝ ak mǝnia yì kanigir ka ɓǝ̀ é.”

¹³Aɓea ɓwana yiu nǝ amuna aban Yesu ace mǝnana ɓǝ̀ tsǝkbu amuria sǝ ɓǝ̀ pakkia wia hiwi ka. Pǝlǝa alaggana mala Yesu lo, à sà arǝ aɓwana mǝno à yiu nǝ amuna ka.

¹⁴Sǝ Yesu na ama, “Wu nying amuna amǝkeke ɓǝa yiu abanam, wu kǝa pǝrkia ɗang, acemǝnana Domurǝm mala kuli ka nda ace aɓwana kǝla amuna mǝnia ka.”

¹⁵Lang Yesu tsǝngŋǝna bu amur amuna ka, pǝlǝa upi banì.

¹⁶Ɓe ɓwa yiu aban Yesu sǝ ɗi ama, “Malǝm, ya gir mǝɓoarne na mǝ nǝ pa sǝ mǝ kum yilǝmu mǝnana málá male pà kàm raka?”

¹⁷Yesu nyesǝi wi ama, “Ace mana sǝ a kǝ ɗiem amur gir mǝnana mǝɓoarne na ka. Kǝ Ɓakuli nǝmurǝì nda mǝɓoarne. Sǝ ɓǝa earce a nǝ kum yilǝmu mǝnana málá male pà kàm raka, dumǝna púp a nǝ kpata anzongcau male.”

¹⁸Ɓwabure ɗi ama, “Amǝ ye na?” Yesu eari wi ama, “Kǝa wal-lú ɗang, bwal rǝo arǝ amamǝna, kǝa iun'i ɗang, kǝa na nyir amur aɓwana ɗang,[146]

¹⁹pe tárro andǝ nggo gulo, sǝ earce ɓio mǝkunɓala kǝla ɓamuro.”[147]

²⁰Lagga mǝno ne wi ama, “Ən kpana ta anzongcau mǝnia kat. Mana ueo ɗǝm?”

²¹Yesu nyesǝi wi ama, “Ɓǝ̀ a nǝ lumsǝ nǝ cauɓoarna ka, o kya makki agirkuma mo, boale ka pe amǝtǝr, a nǝ kum gǝna a kuli. Sǝ wu yiu wu yi kpatam.”

²²Lang lagga ok cau mǝnia ka, nyare o nǝ bumkiɗikea, acemǝnana yì ka, mǝkume na kǝrkǝr.

²³Pǝlǝa Yesu ne alaggana male ama, “Ən nggǝ na wun mǝsǝcau, ndanǝ kwano ɓǝ̀ mǝkume ɓǝ̀ pa ɓamuri ɓǝ̀ kutio a Domurǝm mala kuli.

²⁴Ən nggǝ bangga wun ɗǝm, pa ɓamuru mala mǝkume aɓata yalmuru mala Ɓakuli ka, kwano kuti kutio mala kalakadambi a tūli nlerǝman.”

²⁵Lang alaggana male ok mǝnia yì cau ka, à ndali kǝrkǝr sǝ à ɗi ama, “Ɓǝ̀ nda anggo ka, yana ɓwe na nǝ̀ auwa?”

²⁶Yesu sǝnia kyap-kyap sǝ na ama, “Aban ɓwapǝndǝa ka mǝnia ka pà nǝ̀ pak ɗang, sǝ aban Ɓakuli ka ko ya gir ka nǝ̀ gandǝ pa.”

²⁷Pǝlǝa Bitǝrus nyesǝi wi ama, “Sǝm nyingŋǝna agir kat sǝm nda ban kpato, mana ado sǝm nǝ̀ kumo?”

²⁸Yesu nea wia ama: Ən nggǝ na wun mǝsǝcau, a pwari mana bǝsa ɓanza nǝ̀ yiu ka, Muna mala Ɓwa nǝ̀ do a bunomurǝm mǝɓoarɓwe male. Sǝ wun mǝnana wu kǝ kpatam ngga, wu nǝ̀ do amur abuno-murǝm lum-nong-ɓari gbal. Wu nǝ̀ pakki atau mala amǝ Isǝrayila lum-nong-ɓari ɓashi.[148]

²⁹Sǝ ɓwa mǝnana kat nying ɓala ko amǝ'eambǝu andǝ amǝnggaula, ko tarrû, ko nggeau, ko amuna, ko anzali, ace lullǝam ngga, nǝ̀ kumia kusǝ gbǝman. Sǝ nǝ̀ kum yilǝmu mǝnana málá male pà kàm raka.

³⁰Sǝa ma aɓwana pas mana aɓwana kǝ twalia tyang-tyang ngga, à nǝ̀ ngga pǝlǝa amana à buricea ka, sǝ aɓwana pas mana à kǝ buricea ka à nǝ̀ ngga duk aɓwana mana à nǝ̀ twalia tyang-tyang ngga.[149]