Read mbula bwazza Matiu 2 Bible Online

Matiu 2 - mbula bwazza bible

Matiu 2

¹À ɓǝl Yesu a Betalami, a nzali Yahudi, a baku mǝnana Hirǝdus nda murǝm ngga. Tu anzǝm ɓǝl Yesu ka, amǝ'sǝle amur anlero pur nǝ takuli sǝ à yiu a Urǝshalima,

²à yì ɗiban ama, “Murǝm mala amǝ Yahudi mǝnana à loa ɓǝle ka, nda ake? Sǝm sǝn nlero mala ɓǝle a takuli, nda sǝm yiua peri abani ka.”

³Lang murǝm Hirǝdus ok mǝnia yì cau ka, ban ɓiki wi andǝ aɓwana kat a Urǝshalima mǝnana à ok ce ka.

⁴Pǝlǝa tunǝ agbani pǝris andǝ amǝkani Nggurcau rambǝia, sǝ ɗia ce ban mǝnana à nǝ̀ ɓǝl Kǝrǝsti kam ngga.

⁵Sǝ à ne wi ama, “A Betalami a bu-nzali Yahudi. Mǝnia ka nda cau mǝnana mǝɓangna mala Ɓakuli gilǝ ka:

⁶“ ‘We Betalami, a nzali Yahudi, a gatti pale ɗang a ta amurǝma mala nzali Yahudi. Acemǝnana a ɓalǝo sǝ murǝm nǝ̀ puro, mǝnana nǝ̀ yal aɓwana mem amǝ Isǝrayila ka.’[4]”

⁷Hirǝdus pǝlǝa tunǝ amǝ'sǝlǝgir mǝnia ka aɓa sǝmbǝrǝa sǝ ɗia pepe pwari mana à sǝna nleroe nǝi ka.

⁸Pǝlǝa nea wia ama, “Wu kyane a Betalami wu kya alta ban mune ɓukɓuk, ɓǝ̀ wu kumǝni ka, wu nyare wu yi banggam, mim gbal ka mǝ nǝ ká peri abani.”

⁹Lang à ongŋǝna cau mala murǝm ngga, à pǝlǝa à bwal njar malea aban o. Sǝ à nda rǝ o ka, kara à sǝn nlero mǝnana à sǝni ɗiɗyal a takuli ka, puro akia wia dǝmbǝa aban ká, sǝ yi came amur ban mǝnana mune pak kam ngga.

¹⁰Banɓoaria wia kǝrkǝr arǝ sǝn mǝnia yì nlero ka.

¹¹À nǝ̀ kutio a ɓala ka, à sǝn muna andǝ ngge Maryamu, sǝ à ɓun a ɓadǝmbǝi, à peri. Pǝlǝa à panzǝki agǝna malea sǝ à pe wi aɓoro zǝnariya, andǝ lubban andǝ mǝr.

¹²Ɓakuli nun kiria a lorǝo ama ɓǝa kǝa nyar aban Hirǝdus ɗang. Pǝlǝa à twal ɓe njargula ɗang à nyare a nzali malea.

¹³Lang amǝ'sǝle amur anlero umna ka, mǝturonjar mala Mǝtalabangŋo pusǝrǝi aban Yisǝfu a lorǝo sǝ banggi wi ama, “Lo twal muna andǝ ngge wu ɓangŋa wu o a nzali Masar. Wu duk kano she ɓǝn bangŋǝno ama wu nyar ka, acemǝnana Hirǝdus na nǝ̀ ngga alta muna ama nǝ̀ wali.”

¹⁴Sǝ Yisǝfu lo twal muna andǝ ngge àkǝ̀ bu dui sǝ à o a nzali Masar.

¹⁵Akano sǝ kya do ba lú mala Hirǝdus. Mǝnia ka yi lumsǝ cau mala Mǝtalabangŋo mana pur a kun mǝɓangna male ama, “Aɓa nzali Masar sǝ ǝn tunǝ munem.”[5]

¹⁶Lang Hirǝdus yi sǝlǝ ama amǝno yì amǝ'sǝlǝgir ɓosǝkini ka, bumi lul kǝrkǝr. Pǝlǝa tasǝ asoje a Betalami andǝ ala mana a nkanggari ka à wal amuna-burana mǝkeke kat mǝnana pǝlǝa malea ɓari andǝ a mǝnana à bwal raka, kārǝí arǝ pwari mǝnana ongŋǝna ce nǝi a kun amǝ'sǝlǝgir ka.

¹⁷Aɓa mǝno anggo ka sǝ cau mǝnana pur a kun Irmya mǝɓangna ka yi lumsǝo, mana ama:

¹⁸“À ok ɓuà mala ɓeɓwa a Rama, ɓuà keban andǝ bumkiɗikea mǝkǝrkǝr nì. Rahila na kǝ ɓuà ace amuni ka. Ɓinǝ girikiban, acemǝnana à wukina kat.”[6]

¹⁹A nzǝm lú mala Hirǝdus ka, mǝturonjar mala Mǝtalabangŋo pusǝrǝi aban Yisǝfu a lorǝo a nzali Masar.

²⁰Mǝturonjar ne wi ama, “Lo twal muna andǝ ngge, nyare a nzali Isǝrayila, ace mǝnana Hirǝdus andǝ aɓwana mana à alkiyita yilǝmi muna ka à wukina.”

²¹Pǝlǝa Yisǝfu lo twal muna andǝ ngge, sǝ à nyare a nzali Isǝrayila.

²²Sǝ lang Yisǝfu ok ama Arkilawus na duk murǝm Yahudi a nzǝm lú mala tarrí Hirǝdus ka, ɓangciu pakki wi arǝ ka a Yahudi. Sǝ mǝturonjar nunkiri a lorǝo ka, pǝlǝa o a bui mala amǝ Galili.

²³Nda à wario à kya do a ɓekǝ la mǝnana à tunǝki ama Nazarat ka. Mǝnia ka nda lumsǝ cau mala amǝ'ɓangna mala Ɓakuli mana ama, “À nǝ̀ tunǝi ama ɓwa Nazarat.”