Read mbula bwazza Matiu 20 Bible Online

Matiu 20 - mbula bwazza bible

Matiu 20

¹Yesu lidǝmbǝa nǝ kanigir male ama: À nǝ̀ kànì Domurǝm mala kuli arǝ ɓe mǝtala ɓaban mǝnana pur nǝ dǝmbari ɗiɗyal ace alta amǝturo ɓǝa kya pakki wi turo a ɓaban male ka.

²Yì ka, eare nǝ̀ pea wia dinari mwashat ace turo pwari mwashat. Pǝlǝa tasǝia a ɓaban male.

³A bu-pwari tongno-nong-ine nǝ dǝmbari ka, yi kum aɓea aɓwana aban came ɓa a kun limo.

⁴Pǝlǝa nea wia ama, “Wun gbal ka wu kya turo a ɓaban mem, mǝ nǝ mbwe wun gir mǝnana ɓoaro ɓǝa pa wun ngga.”

⁵Pǝlǝa à bwal njar à wario. Nyare pur ɗǝm nǝ pwarizǝkia andǝ wulio mala pwari kya pwan aɓea amǝturo.

⁶A bu-pwari tongno mala pwarikpǝra ka, nyare puro kya kum aɓea aɓwana ɗǝm aban came à kǝ pak kǝgir ɗang. Sǝ ɗia ama, “Mana tsǝa sǝ pwari kpa wun kani aban came ɓa wu kǝ pak kǝgir ɗang?”

⁷À eari wi ama, “Kǝ ɓwa pa sǝm turo mǝnana sǝm nǝ̀ pak ka ɗang.” Pǝlǝa nea wia ama, “Wu kyan gbal a turo a ɓaban mem.”

⁸Lang pwari kpana ka, mǝtala ɓaban ne ɓwa mǝnana tsǝi ɓǝ̀ kǝ sǝnbi wi ɓaban ngga ama, “Tunǝ amǝturo, mbwea tangnakusǝia. Tite amur amǝ'nzǝmo sǝ wu kya mur amǝdǝmbǝa.”[150]

⁹Aɓwana mana à twalia a bu-pwari tongno mala pwarikpǝra ka, ko yana ka à mbwe dinari mwashat.

¹⁰Amana à twalia nǝ dǝmbari ka à yiu nǝ tsǝkɓalǝu ama malea nǝ̀ kuti mala aɓwana mǝno ka. Sǝ kǝ boalo mǝ'mwashati na à pea wia ka.

¹¹Lang à angŋǝna boalo ka, à tita nggwani arǝ mǝtala ɓaban.

¹²À bangŋa ama, “Aɓwana mǝnana à twalia turo nǝ nzǝmo ka, à pak turo bu-pwari mwashat, kǝ ndo ka, sǝ à mbwe sǝm, sǝm karǝ sǝnǝia, sǝm mǝnana pwari wal sǝm málá amur sǝm aban turo ka.”

¹³Pǝlǝa eari ɓeɓwa mwashat atea ama, “Ɓiam, ǝn lio ɗang. A ear amur dinari mwashat re?

¹⁴Twal gir mǝnana à mbweo ka o. Nǝ eare mem sǝ ǝn mbweo kǝla mana ǝn mbwe ka amǝ'nzǝmo ka.

¹⁵Pa mǝ nǝ gandǝ pak gir mana ǝn earce ka nǝ boalo mem re? A kǝ pak mɓali ace ɓoaro mem le?”

¹⁶Anggo sǝ amǝ'nzǝmo à nǝ̀ pǝlǝ amǝdǝmbǝa, sǝ amǝdǝmbǝa nǝ̀ pǝlǝ amǝ'nzǝmo.[151]

¹⁷Lang Yesu na ban o a Urǝshalima ka, tunǝ alaggana male lum-nong-ɓari a giriban, sǝ nea wia ama:

¹⁸Sǝm ndo sǝm nggǝ eauwe aban ká a Urǝshalima ka, sǝ Muna mala Ɓwa ka à nǝ̀ ngga me aban agbani pǝris andǝ amǝkani Nggurcau. À nǝ̀ pakki wi ɓashi mǝnana nǝ̀ ká nǝi a lú ka.

¹⁹À nǝ̀ tasǝi a bu aɓwana mǝnana amǝ Yahudi na raka[152] mǝnana à nǝ̀ ɓǝsǝki, à nǝ̀ kwe, sǝ à nǝ̀ gballì a nggun-gangndi ka. A tāruia nongŋo ka nǝ̀ lo nǝ yilǝmu!

²⁰Nggea ka muna mala Zabadi yiu aban Yesu nǝ amuni Yohana andǝ Jemis, sǝ yi kūndǝo a nzali sǝ zǝm ɓwamuru.

²¹Yesu ɗi ama, “Mana a earkiyice?” Pǝlǝa na ama, “Mǝ nda aban zǝmbǝa ama alaggalem mǝnia ɓari ka, wu tsǝk mwashat ɓǝ̀ do a buo mǝli, sǝ ɓe mǝnia ka a buo mǝnggare a Domurǝm mo.”

²²Yesu nyesǝia wia ama, “Wu surǝ gir mǝnana wu zǝmnggi ka ɗang. Wu nǝ̀ gandǝ nu tanni mǝnana ado mǝ nǝ nu ka le?” À ear ama, “E, sǝm nǝ̀ gandǝi.”

²³Yesu nea wia ama, “Ɓafo, wu nǝ̀ gandǝ nu tanni mǝnana mǝ nǝ nu ka, sǝa ma pa ban-do a buam-mǝlì ko mǝnggare ka pà aɓa rǝcandǝa mem ɗang. Amǝnia yì aban ngga nda ace aɓwana mǝnana Tárram gilǝkia wia ka.”

²⁴Lang acili alaggana mala Yesu mǝnia lum ok ce ka, bumia lul arǝ amǝ'eambu mǝnia ɓari ka.

²⁵Yesu pǝlǝa tunǝia abanarǝia sǝ na ama, “Wu sǝlǝa ama amurǝma mala mǝnia yì ɓanza ka à kǝ lǝmndǝ gulo amur aɓwana malea, sǝ aɓwana-mǝgule malea kǝ lǝmndǝia wia rǝcandǝa.

²⁶Sǝ ma'wun ngga, anggo sǝ nǝ̀ pak ɗang. Ɓǝ̀ ya ɓwa na earce nǝ̀ duk ɓwamǝgule ata wun ngga, dumǝna púp nǝ̀ nyesǝ ɓamuri nda muna-ɓala aban wun.[153]

²⁷Sǝ ɓwa mǝnana earce nǝ̀ duk murǝm ngga, dumǝna púp nǝ̀ duk guro ma'wun.

²⁸Nda kǝla Muna mala Ɓwa, mǝnana yiu ace dumsǝ aɓwana aguro raka. Yiu ace duk guro sǝ nǝ̀ pa yilǝmi ace amsǝ[154] aɓwana pas.”

²⁹Lang Yesu andǝ alaggana male à ndarǝ puri ɓa là Jeriko ka, aɓwana pas kana atea.

³⁰Ante ɓari à nda ban do a girǝi njargula. Lang à ok ama Yesu na kǝ kuti ka, à loasǝ gia ama, “Mǝtalabangŋo, Muna mala Dauda[155], sǝn mǝsǝswatǝr ma'sǝm!”

³¹Ɓwabunda sà a rǝia ama ɓǝa duk kunia piu. Sǝ à ɓine à loasǝ gia bang-bang ama, “Mǝtalabangŋo, Muna mala Dauda, sǝn mǝsǝswatǝr ma'sǝm!”

³²Yesu pǝlǝa came sǝ ɗia ama, “Mana wu earkiyice ɓǝn pakka wun?”

³³À banggi wi ama, “Ɓwamǝgule, sǝm nggǝ earce ɓǝ̀ mǝsǝ sǝm sǝnban.”

³⁴Yesu sǝn mǝsǝswatǝr malea sǝ tsǝk bui a mǝsǝia. Kara mǝsǝia mǝnna àkǝ̀ banì, pǝlǝa a o ate.