Read mbula bwazza Matiu 21 Bible Online

Matiu 21 - mbula bwazza bible

Matiu 21

¹Lang Yesu andǝ alaggana male gbashina Urǝshalima ka à yì kar a muna la Betafaji mana amur Nkono mala anggun Olif ka. Yesu tur alaggana male ɓari.

²Banggia wia ama, “Wu kyane a muna-la mana a ɓadǝm wun ngga. Wu nǝ̀ ngga kum mǝndambǝritso à kùrni nǝ muni ate. Wu panzǝi wu yinamia.

³Ɓǝ̀ kǝɓwa na wun kǝ cau ka, wu ne wi ama, Mǝtalabangŋo kǝ earcea. Nǝ̀ ɗekia wunia tu.”

⁴Mǝnia ka pa anggo ace mana ɓǝa lumsǝ ɓangna mala Zakariya mǝnana ama:

⁵“Wu ne amǝ Urǝshalima ama, Wu sǝni, murǝm ma'wun nia kǝ yiu aban wun ngga! Yì ka, mǝ'nwangsǝ-muru na, kǝ yiu a nzǝm mǝndambǝritso. A nzǝm muna mǝndambǝritso sǝ kǝ gya.”[156]

⁶Pǝlǝa alaggana man wario à kya pak gir mǝnana Yesu turia ace ka.

⁷À kya yiu nǝ mǝndambǝritso andǝ muni. À makkia anggurbyau malea a nzǝmia, pǝlǝa Yesu eauwe do.

⁸Ɓwabunda kǝrkǝr sarǝki anggurbyau malea a tanjargula, acilia man ngga à kasǝki abu-nggun à nongsǝkia a tanjargula.

⁹Aɓwabunda mǝnana a ɓadǝmbǝi andǝ amana a nzǝmi ka à loasǝ gia ama, “Wu ɓwangsǝ Muna mala Dauda! Tsǝkbu mala Ɓakuli na muri, yì ɓwa mǝnana kǝ yiu aɓa lullǝ Mǝtalabangŋo ka! Ɓǝa ɓwangsǝki Ɓakuli akano a kuli!”[157]

¹⁰Lang Yesu kutina a Urǝshalima ka, nggeala kat lo came amur kusǝì. Ɓwapǝndǝa ɗiban ama, “Yana ɓwe nda man le?”

¹¹Aɓwabunda ear ama, “Mǝnia ka Yesu na, Mǝɓangna mala Ɓakuli mǝnana pur a Nazarat, a bu-nzali Galili ka.”

¹²Lang Yesu kutio aɓa Ndàmǝgule mala Ɓakuli ka, pǝr amǝkuro andǝ amǝ makkiagir, ramnggita atebǝl mala amǝ nggaɗi boalo, sukkia, andǝ abuno mala amǝ makkia kutumurǝm.

¹³Nea wia ama, “Malǝmce mala Ɓakuli bangŋa ama, “ ‘Ɓala mem ngga à nǝ̀ tunǝi ama ndà ace pak hiwi,’[158] sǝ wu nyesǝi duk mpu mala amǝ'ɓǝmbǝriban!”[159]

¹⁴Ante andǝ agbakǝre yiu abani aɓa Ndàmǝgule mala Ɓakuli, yi twalia wia ban akwano malea.

¹⁵Lang agbani pǝris andǝ amǝkani Nggurcau sǝn agir-ndali mǝnana pea, andǝ amuna mana à kǝ pak banɓoarnado aɓa Ndàmǝgule mala Ɓakuli ama, “Ɓwangsǝkiban ngga dumǝna mala Muna mala Dauda” ka, bumia lullo.

¹⁶Pǝlǝa à ɗi Yesu ama, “A nǝ́ nggǝ̀ ok cau mǝnana amuna mǝnia kǝ ne ka?” Earia wia ama, “E, Mǝ nda ǝn nggǝ oea ka, sǝ wun ngga wu ɓalli mbo aɓa Malǝmce mala Ɓakuli ama, “ ‘À tsǝk ɓwangsǝkiban a kun amuna mǝkeke andǝ abangna-muna?’[160] ”

¹⁷Pǝlǝa nyia puri ɓa nggeala o a Betani, a kam sǝ kya nongŋo.

¹⁸Nǝ dǝmbari ɗiɗyal Yesu nyari Betani nda ban ká a Urǝshalima ka, nzala wali.

¹⁹Mǝsǝì kpa arǝ nggun vwari a girǝi njargula, pǝlǝa sana wario a tǝrí. Sǝ kya kum kǝ ɓǝle ɗang, mbui na nǝmurǝì. Pǝlǝa ne nggun ama, “A pà nǝ́ ɓǝl ɗǝm ɗang!” Àkǝ̀ banì kara nggun ime.

²⁰Alaggana nǝ yia sǝni ka gir nî pakkia wia gir'ndali gandǝa à ɗiban ama, “Lang sǝ nggun vwari man kaurǝ ime anggo?”

²¹Yesu nea wia ama, “Ɓafo, ǝn nggǝ na wun, ɓǝ̀ wu ndanǝ paɓamuru sǝ wu tuti aɓa ɗenyicau raka, mǝnia yì gir à pakki nggun ngga nda mana nǝmurǝì wu nǝ̀ gandǝ pe ka ɗang. Ɓǝ̀ wu nǝ̀ nê mǝnia yì nkono ama, ‘Lo, kya kpa aɓa nggeamur’ ka, anggo sǝ nǝ̀ pa.[161]

²²Gir mǝnana kat wu zǝmbǝa aɓa hiwi nǝ paɓamuru ka, wu nǝ̀ kumi.”

²³Yesu kutio aɓa Ndàmǝgule mala Ɓakuli; lang nda ban kanigir ka agbani pǝris andǝ aɓwana-mǝgule mala amǝ Yahudi yiu abani sǝ à ɗi ama, “Nǝ́ yà bangŋo sǝ a kǝ pakki amǝnia yì agir ka, sǝ yana po bangŋo mala pakki agir nì?”

²⁴Yesu pǝlǝa earia wia ama, “Mǝ nǝ ɗi wun cau gbal mwashat, ɓǝ̀ wu panam eare ka sǝ mǝ nǝ bangga wun ko nǝ ya bangŋo sǝ ǝn nggǝ pakki amǝnia yì agir ka.

²⁵Batisǝma mala Yohana ka, pur nǝ kǝshe? Pur nǝ ban Ɓakuli le ko pur nǝ ban ɓwapǝndǝa?” À kutia pǝlǝki ce a rǝarǝia ama, “Ɓǝ̀ sǝm na ama, ‘Pur nǝ ban Ɓakuli’ ka, nǝ̀ bangga sǝm ama, ‘Sǝ palang sǝ wu ginǝ earnǝi?’

²⁶Sǝ ɓǝ̀ sǝm bang gbal ama, ‘Pur nǝ ban ɓwapǝndǝa’ ka ɓangciu kǝ pakka sǝm arǝ aɓwana, acemǝnana ɓwapǝndǝa kat sǝlǝna ama Yohana ka mǝɓangna mala Ɓakuli na.”

²⁷Ace mani ka à ne wi ama, “Sǝm sǝlǝ ɗang.” Yesu pǝlǝa nea wia ama, “Mim gbal ka pà mǝ nǝ na wun ko nǝ ya bangŋo sǝ ǝn nggǝ pakki amǝnia yì agir ka ɗang.

²⁸“Sǝ mana nda ɗenyicau ma'wun amur mǝnia yì cau mǝ nǝ bangga wun ngga? Ɓe ɓwa nakam nǝ amuna-burana ɓari. Wario aban muna-dǝmbǝa sǝ ne wi ama, ‘Munem, kya ɓaban kya pak turo kam yalung.’

²⁹“Muna pǝlǝa ne tarrí ama, ‘Pa mǝ nǝ ká ɗang.’ Sǝa ma nǝ nzǝmo ka ɓalki ɓabumi pǝlǝa wario.

³⁰“Tar amuna pǝlǝa kutio aban ɓaria muni sǝ kya ne wi kǝcau mǝ'mwashati. Yì ka, eari tarrí ama nǝ̀ ká, sǝ wari ɗang.

³¹“Aɓalǝ amuna mǝnia ɓari ka yana pak gir mǝnana tarrí earce ka?” Pǝlǝa à eari Yesu ama mǝdǝmbǝa na. Yesu pǝlǝa nea wia ama: Ən nggǝ bangga wun mǝsǝcau, amǝ'aki aboalo-cemi aɓa ɓǝmbǝriban andǝ aman-gung à nǝ̀ aka wun dǝmbǝa kutio a Domurǝm mala Ɓakuli.

³²Yohana Mǝbatisǝma yiu yi kania wun tanjar mǝɓafoe, sǝ wu earnǝi ɗang; sǝ amǝ'aki aboalo-cemi aɓa ɓǝmbǝriban andǝ aman-gung earnǝi. Kat andǝ mǝnana wu sǝn mǝnia ka, wu gine, pa wu nǝ̀ pwanzali, wu nǝ̀ nying acauɓikea ma'wun ɗang, sǝ wu earnǝ cau male ɗang.[162]

³³Wu kwaki kir wun arǝ ɓe kanicau. Ɓe mǝ'rya tsǝk ɓaban anap, kàrǝì nǝ nkandan, tǝm tūli kamnggi anap a ɓalǝi sǝ ɓak ban mǝdāre ace mǝ'yale. Nyinggi aɓea amǝ'rya a buia ɓǝa kǝ sǝnbi wi, pǝlǝa o a bǝri.[163]

³⁴Kunɓǝla mala anap yi karǝna ka, tur aɓea amuna-ɓala male ɓǝa kya aki wi ɓǝla anap a bu amǝyal ɓaban.

³⁵Amǝ'rya yi bwal amuna-ɓala man. Mwashat ka à walki, ɓe ka à wali wú, sǝ ɓe man ngga à ɓukki nǝ atali.

³⁶Mǝtala-ɓaban nyare tasǝ aɓea amuna-ɓala mana à lakki à kuti amǝdǝmbǝa ka. Kǝgir mǝ'mwashati na amǝ'rya man yi pakkia wia ka.

³⁷A masǝlǝate ka, pǝlǝa tur muni abania. A nê male ka à nǝ̀ pe muni gulo.

³⁸Lang amǝ'rya man nǝ yia sǝn muni ka, à nea rǝia ama, “Mǝliɓala nia kǝ yiu ka. Sǝm nǝ̀ yia wali ace mǝnana ɓǝ̀ ɓaban duk ma'sǝm!”

³⁹Pǝlǝa à yì bwali à turí a nzǝm nkandan ɓaban sǝ à wali wú.

⁴⁰Sǝ ɓǝ̀ mǝtala ɓaban yiu ado ka, mana gir nì na nǝ̀ yia pang nǝ amǝ'rya mǝnia ka?

⁴¹Agbani pǝris andǝ aɓwana-mǝgule eari wi ama, “Nǝ̀ yia wal lú amǝ'rya amǝ'ɓealɓikea man, sǝ nǝ̀ ak ɓaban nǝ̀ pea amǝ'rya mǝnana à nǝ̀ pe wi ɓǝlanggun ɓaban ɓǝ̀ kunɓǝle karǝna ka.”

⁴²Yesu pǝlǝa nea wia ama, “Wu ɓal cau mana Malǝmce mala Ɓakuli bang ngga re? Mǝnana ama, “ ‘Tali mana amǝɓa ginǝi ka, nda yi pǝlǝ mǝɓoarne kat ka. Mǝnia ka pé mala Ɓakuli na; Gir ndali na aban sǝm.’[164]

⁴³“Sǝ ǝn nggǝ na wun ama Domurǝm mala Ɓakuli ka à nǝ̀ é arǝ wun à nǝ̀ pe aɓwana mǝnana à nǝ̀ pak gir mana Ɓakuli earkiyice ka.

⁴⁴Ɓwa man kat kpa amur tali man ngga nǝ̀ ɓunggio. Sǝ ɓwa mana tali man kpa amuri ka nǝ̀ betǝki.”

⁴⁵Lang agbani pǝris andǝ amǝ Farisi yi ok akanicau mala Yesu, sǝ à yì sǝlǝ ama nda arǝ bangcau amuria ka,

⁴⁶à alte ama à nǝ̀ bwali, sǝ ɓangciu pakki wia arǝ aɓwana acemǝnana ɓwapǝndǝa pas earǝna ama Yesu ka mǝɓangna na.