Read mbula bwazza Matiu 22 Bible Online

Matiu 22 - mbula bwazza bible

Matiu 22

¹Yesu ne aɓwana cau ɗǝm nǝ akanicau ama:

²Domurǝm mala Ɓakuli ka à nǝ̀ kànì arǝ pakiɗire mana ɓe murǝm tunǝo ace isǝ mālá muni ka.

³Tur amuna-ɓala male ɓǝa kya ne aɓwana mǝnana à tunǝia ka ɓǝa yiua pakiɗire isǝban. À ginǝ yiu.

⁴Nyare tur aɓea amuna-ɓala male ɓǝa kya ne aɓwana mǝnana à tunǝia ka ama, “Ən malǝna pak girlina kat. Ən walǝna ajamnda andǝ alo-nda amǝnyangge mem. Girbunda kat ka à malǝna pe. Wu yiua pakiɗire isǝban!”

⁵Amǝnia yì aɓwana à tunǝia ka à tsǝk kiria ɗang, à kutia pakkia agir malea mana ɓoaria wia ka. Ɓe ɓwa ka o a ɓaban male, sǝ ɓeɓwa ka o aban kurkuro male.

⁶Acilia man ngga à bwal amuna-ɓala male à pakkia wia mǝɓane sǝ à wal-luia.

⁷Bum murǝm man lul kǝrkǝr; tasǝ asoje male à yì wal amǝwalkialu man, sǝ à pisǝ la malea.

⁸Pǝlǝa tunǝ amuna-ɓala male sǝ nea wia ama, “Girbunda kat mala pakiɗire isǝban ngga à malǝna pe. Sǝ aɓwana mǝnana ǝn tunǝia ka à kārǝa à nǝ̀ yiu aban isǝban ɗang.

⁹Ado ka wu kyane amur agauwata anjarɓala sǝ wu tunǝ aɓwana kat mǝnana wu kumia a kàm ngga, ɓǝa yiua pakiɗire.”

¹⁰Nda amuna-ɓala man puro à o arǝ agauwata anjarɓala sǝ à tunǝki aɓwana kat mǝnana à kum ngga, amǝɓane andǝ amǝɓoarne. À yì lumsǝ ɓala isǝban.

¹¹Lang murǝm kutio nǝ̀ sǝn abǝri ka mǝsǝì kpa arǝ ɓeɓwa na kam mana tur daura isǝban a rǝì raka.

¹²Pǝlǝa murǝm ɗi ama, “Ɓiam, a kar lang sǝ a yiu kani daura isǝban pa a rǝo ɗang?” Yì ka, kum cau mǝnana nǝ̀ na ka ɗang.

¹³Murǝm ne amuna-ɓala ama, “Wu taka bui andǝ akusǝi, wu turi a nza aɓa pǝndǝa. Akano sǝ nǝ̀ ɓua nǝ̀ nggǝ nǝmnggi munabui.”[165]

¹⁴Ɓakuli tunǝ aɓwana pas sǝ bǝti na à dum nǝ mǝsǝcau ɓǝ̀ Ɓakuli tària ka.

¹⁵Amǝ Farisi o à kya kur kunarǝia amur njargula mǝnana à nǝ̀ bwali nǝi kam aɓa nacau ka.

¹⁶Pǝlǝa à tur amuna-ɓala malea andǝ aɓea ɓwana mala Hirǝdus abani. À na ama, “Malǝm, sǝm sǝlǝna ama we ka a nda ɓwa mǝɓafoe, ɗǝm ngga a kǝ kani tanjar mala Ɓakuli nǝ mǝsǝcau. A kǝ tar ɓwa ɗang, acemǝnana aɓwana kat abano ka à nda mwashat.

¹⁷Bangga sǝm, a sǝne mo ka, ɓoaro ɓǝ̀ sǝm pe Kaisar, Murǝm mala amǝ Roma boalo-cemi le ko ɓoar ɗang?”

¹⁸Yesu surǝna rǝ ɗenyicau malea mǝɓane kat pǝlǝa ɗia ama, “Wun amǝ'kunɓarina, ace mana sǝ wu kǝ earce tambam?

¹⁹Wu lǝmndǝam mǝsǝboalo mana à mbwekina boalo cemi nǝi ka!” À pǝlǝa à pe wi mǝsǝboale.

²⁰Sǝ ɗia ma, “Lullǝ yana andǝ foto mala yana arǝ mǝsǝboalo mǝnia ka?”

²¹À eari wi ama, “Mala Kaisar na.” Pǝlǝa nea wia ama, “Gir mǝnana mala Kaisar na ka wu pe Kaisar, sǝ mǝnana mala Ɓakuli na ka wu pe Ɓakuli.”

²²Lang à oe anggo ka, à ndali; kara à ɗeki à bwal njar malea à o.

²³Àkǝ̀ pwari mǝno ka amǝ Saduki mǝnana à nakiyi ama loapi ɓembe pà kàm raka à yiu aban Yesu à yì ɗi ama,[166]

²⁴“Malǝm, Musa bangŋa ama ɓǝ̀ ɓwa wu pànǝ muna raka mǝ'eambǝi ɓǝ̀ al mami ɓǝ̀ ɓǝli lú amuna.

²⁵Aban sǝm ɗiɗyal ka aɓea aɓwana tongno-nong-ɓari à nda amǝ'eambǝu. Mǝdǝmbǝa malea al mɓwama sǝ wu ko kum muna andǝi ɗang. Ɓwa mǝnana kpa a nzǝmi ka pǝlǝa twal mɓwame.

²⁶Anggo gbal sǝ kum ɓaria andǝ tāruia, kya bwal bu tongno-nong-ɓaria.

²⁷A nzǝm lú malea kat ka, pǝlǝa mɓwame wu.

²⁸Sǝ ado ka, a pwari loapi ɓembe ka, yana aɓalǝia nda bura mɓwama, yì mana yia kat ka à dumǝna nǝi ka?”

²⁹Yesu pǝlǝa earia wia ama, “Wu ɓwarkio ace ɗwanyi surǝ Malǝmce andǝ rǝcandǝa mala Ɓakuli.

³⁰A pwari loapi ɓembe ka alban pà kàm ɗǝm ɗang. Ko yana le ka nǝ̀ do kǝla amǝturonjar mana a kuli ka.

³¹Sǝ amur loapi ɓembe ka, wu ɓal cau mana Ɓakuli bangga wun ngga re? Na ama,

³²‘Mǝ nda Ɓakuli mala Ibǝrayim, mala Ishaku, andǝ mala Yakupu.’ Ɓakuli ka mala alú na ɗang, mala aɓwana mana nǝ yilǝmu ka nda.”[167]

³³Lang aɓwabunda ok mani ka, à ndali nǝ kanigir male.

³⁴Lang amǝ Farisi ongŋǝna ama Yesu gandǝna amǝ Saduki ka, à ram rǝia à yiu.

³⁵Ɓe ɓwa aɓalǝia mǝnana surǝ Malǝmce mala Musa pepe ka, ɗi ama:

³⁶“Malǝm, ata anzongcau mǝnana aɓa Nggurcau mala Musa ka, mǝ yani na kuti aɓea?”

³⁷Yesu ne wi ama: “Earce Mǝtalabangŋo, Ɓakuli mo nǝ ɓabumo mwashat, nǝ yilǝmo kat andǝ ɗenyicau mo kat.”[168]

³⁸Mǝnia ka nda nzongcau mǝdǝmbe andǝ mǝgule mǝnana kuti aɓea kat ka.

³⁹Mǝnana kpate ka nda kǝla yì, ama: “Earce ɓeomǝkunɓala kǝla mǝnana a earce ɓamuro ka.”[169]

⁴⁰Nggurcau kat andǝ Akanigir mala amǝ'ɓangna mala Ɓakuli ka, à do amur anzongcau mǝnia ɓari ka.

⁴¹Lang amǝ Farisi ramǝna abanɓwáná ka, Yesu ɗia ama,

⁴²“Mana nda ɗenyicau ma'wun amur Mezaya?[170] Muna mala yana?” À eare ama, “Muna mala Dauda[171] na.”

⁴³Yesu nea wia ama, “Ɓǝ̀ muna mala Dauda na ka, palang sǝ Dauda, nǝ́ kanì mala Bangŋo mala Ɓakuli a bumi ka, tunǝi ama ‘Mǝtalabangŋo?’ Acemǝnana yì Dauda ka bangŋa ama,

⁴⁴“ ‘Mǝtalabangŋo ne Mǝtalem ama: Do a buam mǝli, she ɓǝ̀ ǝn tsǝngŋǝna aɓeo-amǝbura aɓata kusǝo ka.’[172]

⁴⁵Sǝ ɓǝ̀ Dauda tunǝ Mezaya ama ‘Mǝtalabangŋo’ ka, palang sǝ Mezaya nǝ̀ pǝlǝ muni?”

⁴⁶Kǝɓwa gandǝ nyesǝi wi cau ɗang, sǝ àkǝ̀ pwari nì ka, kǝɓwa nyare ɗi ɗǝm ɗang.