Read mbula bwazza Matiu 23 Bible Online

Matiu 23 - mbula bwazza bible

Matiu 23

¹Pǝlǝa Yesu ne aɓwabunda andǝ alaggana male cau ama:

²Amalǝm Nggurcau mala Musa andǝ amǝ Farisi ka à ndà kǝ aɓwana mǝnana à ndanǝ rǝcandǝa mala bǝlki aɓwana ɓa Nggurcau mala Musa ka.

³Ace mani ka wu kpata gir mana à kania wun ngga, ɗǝm ngga wu pak gir mana à bangga wun ama ɓǝ̀ wu pak ka. Sǝa ma wu kǝa kpata aturo malea ɗang, acemǝnana gir mana à kǝ kani ka à kǝ pe ɗang.

⁴Pak ka à kǝ yiu nǝ acau mǝkwane sǝ à nǝ̀ tsǝk aɓwana ama ɓǝa pea. Sǝ yia nǝ nggearǝia ka à pà nǝ̀ pak ko mwashat ata mǝno yì agir ka ɗang.

⁵Ko man à kǝ pak le ka à kǝ lǝmndǝki ɓǝ̀ aɓwana sǝni. Pak ka amuna-luru malea mala tsǝk amǝ'mbu-malǝmce mala cau mala Ɓakuli ka à kǝ pea ɓǝa tanggî mala acili aɓwana sǝ à nǝ̀ kurkia a kundǝmbǝia andǝ amelbuia. Ankonggur kun adaura malea ka amǝsake na.[173]

⁶Ɓǝ̀ aɓwana rambǝa aban pakiɗire ka à kǝ earce ɓǝa pea wia aban-do mǝɓoarne. Ɓǝ̀ nda aɓa Ndakpapi ka, à earce abuno mǝnana à tsǝia ace aɓwana-mǝgule ka.

⁷À earce ɓǝ̀ aɓwana makkiakun nǝ pagulo aɓa limo, sǝ ɓǝa kǝ tunǝia ama, “Malǝm.”

⁸Wu kǝa eare ɓǝa tunǝ wun ama “Malǝm” ɗang. Wu ndaka amǝ'eamrǝarǝu kat. Malǝm ma'wun ngga nda mwashat ɓǝrɓǝr.

⁹Sǝ wu kǝa tunǝ kǝɓwa akani a ɓanza ama “Tarrú” ɗang, acemǝnana kǝ Tar wun na mwashat ɓǝrɓǝr a kuli.

¹⁰Sǝ ɓǝa kǝa tunǝ wun gbal ama “Ɓwamǝgule” ɗang acemǝnana kǝ ɓwamǝgule ma'wun nda Kǝrǝsti.

¹¹Ɓwa mǝnana gulo kuti aɓi aɓalǝ wun ngga nda ɓwa mǝnana nǝ̀ duk muna-ɓala ma'wun ngga.[174]

¹²Ɓwa mǝnana gusǝlǝ ɓamuri ka à nǝ̀ kyauwiki, sǝ ɓwa mǝnana kyamsǝ ɓamuri ka à nǝ̀ gusǝlǝi.[175]

¹³Caukwanban nǝ wun amǝ Farisi andǝ amǝkani Nggurcau mala Musa, wun amǝ'kunɓarina! Wu gir kun njar kutio a Domurǝm mala kuli arǝ aɓwana. Wun nǝ ɓamur rǝ wun ngga wu kuti ɗang, sǝ aɓwana mǝnana à earce ama à nǝ̀ kuti ka wu earia wia ɗang.

¹⁴[Caukwanban nǝ wun amǝ Farisi andǝ amǝkani Nggurcau mala Musa, wun amǝ'kunɓarina! Wu kǝ lǝmndǝ rǝ wun kǝla wu nda ka amǝ'ɓealɓoarne nǝ pakki ahiwi mǝsauwe, sǝ ɓafo ka wu nda mana wu kǝ kumsǝ kun aman-lú wu kǝ liki agirkuma malea arǝ ɓala malea ka. Ace mani ka Ɓakuli nǝ̀ pa wun tanni mana kutibanì ka kǝrkǝr.]

¹⁵Caukwanban nǝ wun amǝ Farisi andǝ amǝkani Nggurcau mala Musa, wun amǝ'kunɓarina! Wu kǝ twal gya mǝsauwe arǝ anzali andǝ mur anggeamur ace yinǝ ɓwa mwashat a tanjar ma'wun. Sǝ ɓǝ̀ wu yina nǝi ka pǝlǝa wu nyesǝi duk ɓwa-ká-lubǝsa kuti wun kusǝ ɓari.

¹⁶Caukwanban nǝ wun, wu ndaka ante mana à kǝ bwali ante gara ka! Wu kǝ kani aɓwana ama: “Ɓǝ̀ ɓwa kan nǝ Ndàmǝgule mala Ɓakuli ka kángir nî pà nǝ̀ bwali ɗang; sǝa ma ɓǝ̀ ɓwa kan nǝ zǝnariya mana aɓa Ndàmǝgule ka, kángir nî nǝ bwali.”

¹⁷Wun agǝm, ante! Azǝrfa andǝ Ndàmǝgule mǝnana tsǝk azǝrfa sǝ pak mǝfele ka, mǝyani kuti ɓi?

¹⁸Nyar ɗǝm ngga wu na ama, “Ɓǝ̀ ɓwa kan nǝ gyangŋan paɓoro ka kángir nî pà nǝ̀ bwali ɗang; sǝ ɓǝ̀ ɓwa kan nǝ ɓoro mana amur gyangŋan ngga nǝ̀ bwali.”

¹⁹Wun ante! Mǝyani gulo kuti ɓi: ɓoro mana amur gyangŋan ka le ko gyangŋan mana tsǝk ɓoro sǝ pak mǝfele ka?

²⁰Ɓwa mana kan nǝ gyangŋan ka, kannǝna nǝi andǝ gir mana amuri ka.

²¹Ɓwa mana kan nǝ Ndàmǝgule mala Ɓakuli ka, kannǝna nǝ nǝi andǝ Ɓakuli mana do a ɓalǝi ka.

²²Ɓǝ̀ ɓwa kan nǝ kuli ka kannǝna nǝ bunomurǝm mala Ɓakuli andǝ Ɓakuli mana do amur bunomurǝm ngga.[176]

²³Caukwanban nǝ wun amǝ Farisi andǝ amǝkani Nggurcau mala Musa, wun amǝ'kunɓarina! Wu kǝ pe Ɓakuli gauwe mwashat aɓalǝ agauwe lum mala agir mǝkeke kǝla ambukagir ɓaban ma'wun, sǝ wu burice agir mǝɓoarne mǝnana nggurcau kànì ka, kǝla bang mǝsǝcau, andǝ ɓwamuru, andǝ pak mǝɓoarne. Amǝnia ka à ndaka gir mǝnana ɓoaro ɓǝ̀ wu kǝ pea a tarǝia andǝ acilia mǝno ka.[177]

²⁴Wu ndaka ante mana à kǝ bwali ante gara ka! Wu tsǝk ɓamur rǝ wun wu kǝ kpata amuna nzongcau mala Nggurcau mana a bwal kǝ ban pepe raka, sǝ anzongcau amǝgulke mala Nggurcau ka, wu buricea sǝ wu sǝlǝ ɗang.

²⁵Caukwanban nǝ wun amǝ Farisi andǝ amǝkani Nggurcau mala Musa, wun amǝ'kunɓarina! Wu nda kǝla akwar andǝ atasau mana à lak nzǝmia pepe ka, sǝ ɓalǝ wun ngga lumsǝ nǝ aturo ɓealɓikea andǝ mɓali.

²⁶We ntei ɓwa Farisi! Tsǝk kiro arǝ gilǝki ɓabumo ɓǝ̀ duk nǝ ɓoarnsari, sǝ aɓwana nǝ̀ sǝn aturo ɓoarna mo, à nǝ̀ earnǝia.

²⁷Caukwanban nǝ wun amǝ Farisi andǝ amǝkani Nggurcau mala Musa, wun amǝ'kunɓarina! Wu nda kǝla aɓembe mana à tasǝ nzǝmia nǝ pyanti mǝpwasǝe ka; à ɓoar sǝna nǝ nza, sǝ ɓalǝia ka lumsǝ nǝ amú mala alú andǝ agir ɓyakǝno.[178]

²⁸Ana gbal, a nza ka aɓwana kǝ sǝn wun kǝla wu ndaka amǝ'ɓealɓoarna, sǝ a ɓabum wun ngga wu lumsǝ nǝ swarkiban andǝ ɓealɓikea.

²⁹Caukwanban nǝ wun amǝ Farisi andǝ amǝkani Nggurcau mala Musa, wun amǝ'kunɓarina! Wu kǝ ɓak aɓembe mala amǝ'ɓangna mana aká wun wal-luia, sǝ wu kǝ gilǝkice mala amǝ'cauɓoarna mana aká wun wal-luia ka.

³⁰Sǝ pak ka wu kǝ na ama, “Ɓǝ̀ sǝm ndanǝ do mala aká sǝm a pwaryan ngga, ɓǝ́ pà sǝm nǝ̀ pu nzǝm gir mǝnana aká sǝm pakkì amǝ'ɓangna, à wal-luia ka ɗang.”

³¹Bangŋe ma'wun mǝnana ana ka lǝmndǝ ama wu ndaka amǝkau mala aɓwana mǝnana à wal amǝ'ɓangna ka.

³²Wu lidǝmbǝa wu masǝlǝ kun cauɓikea mana aká wun tite ka!

³³Wun an'yau, wun amuna baffu! Lang sǝ wu nǝ̀ api ɓashi ká lu-bǝsa?[179]

³⁴Ace mani ka mǝ ndo mǝ nǝ tura wun ban nǝ amǝ'ɓangna, andǝ amǝ'sǝle, andǝ amǝkanigir. Aɓea atea ka wu nǝ̀ walia, wu nǝ̀ gballia a nggun; sǝ acilia ka wu nǝ̀ kwea aɓalǝ andakpapi sǝ wu nǝ̀ pǝrtea arǝ ala, wu nǝ̀ pea wia tanni.

³⁵Ace mani ka tangnakusǝu mǝɓane ace sukki nkila mala amǝ'ɓealɓoarna kat mana à walia a ɓanza ka, nǝ̀ nyare amur wun, tite arǝ Habila yí bwal ban Zakariya, muna mala Berikiya, mana wu wali a nre ban mǝfele andǝ gyangŋan ngga.[180]

³⁶Mǝsǝcau, amǝnia yì atanni kat ka à nǝ̀ kum aɓwana mana a nza man ngga.

³⁷Oi amǝ Urǝshalima, amǝ Urǝshalima, wun amǝ'wal-lú amǝ'ɓangna mala Ɓakuli, wun amǝ'ɓukki aɓwana mǝnana Ɓakuli turia aban wun ngga. Kusǝ shen Mǝ nda arǝ earce mǝ mǝn abuam amur wun kǝla mǝnana nggu kǝ mǝnggi akpamtari amur amuni ka, sǝ wu ginǝ nkang!

³⁸Adyan ngga, Ndàmǝgule ma'wun ngga à ginǝkina wuni, uena a tarǝì.[181]

³⁹Ən nggǝ na wun, twal a yalung ngga pa wu nǝ̀ sǝn mǝsǝam ɗǝm ɗang, she pwari mǝnana wu nǝ̀ na ama, “Tsǝkbu mala Ɓakuli na amur yì ɓwa mǝnana kǝ yiu aɓa lullǝ Mǝtalabangŋo ka.”[182]