Read mbula bwazza Matiu 25 Bible Online

Matiu 25 - mbula bwazza bible

Matiu 25

¹A baku mǝno ka à nǝ̀ kànì Domurǝm mala kuli arǝ ansarina lum mǝnana à twal apitǝla malea sǝ à puro à nǝ̀ ká kullímúr bura-manfela ka.[185]

²Aman tongno atea ka à kwar ɗang, sǝ aman tongno ka à kwaro.

³Aman à kwar raka à twal apitǝla malea sǝ à twal ɓe muru a buia ɗang.

⁴Sǝ aman à kwar ka à twal apitǝla malea andǝ muru arǝ adu a buia.

⁵Bura-manfela ka banì sauwa yiu tu ɗang, nda ntulo aki ansarina man gandǝa à koa ntulo kat.

⁶Nǝ ɓa dù ka à ok tunǝban ama, “Bura-manfela nia kǝ yiu ka! Wu puro, wu yi kullì!”

⁷Pǝlǝa ansarina mǝnia lo kat sǝ à kutia gilǝki apitǝla malea.

⁸Ansarina mana à kwar raka à banggi aman à kwar ka ama, “Wu ɗarǝa sǝm muru ma'wun; apitǝla ma'sǝm nia à kǝ wu ka.”

⁹Pǝlǝa amǝkware earia wia ama, “Awo, muru ka pà nǝ̀ karǝ sǝm sǝnǝa wun ɗang. Ndikǝna wu kya ban amǝme wu kur ma'wun.”

¹⁰Lang à nda njar aban ká kur muru ka, bura-manfela yi tusǝo. Ansarina mana à do aɓa gilǝrǝu ka à kutio ata bura-manfela aban li girlina isǝban. Pǝlǝa à gir kunɓala.

¹¹Zuku ka acili ansarina nyarǝna. À wal kunɓala sǝ à loasǝ gia à na ama, “Ɓwamǝgule! Ɓwamǝgule! Mǝnba sǝm kunɓala!”

¹²Bura-manfela earia wia ama, “Ɓafo, ǝn surǝ wun ɗang.”[186]

¹³Ace mani ka, wu do aɓa tsǝk mǝsǝ wun, acemǝnana wu surǝ pwari ko bu-pwari mala yiu mem ɗang.

¹⁴Sǝ ɗǝm ngga Domurǝm mala kuli ka nǝ̀ yia pa kǝla ɓeɓwa mana lo nǝ̀ oa bǝri ka, tunǝ amǝ'turo-ɓala male sǝ nyinggia wia agirkuma male a buia.[187]

¹⁵Man mwashat ata amǝ'turo-ɓala male ka pe wi luru mǝsǝboalo tongno, sǝ ɓe ka pe wi luru ɓari, sǝ ɓe man ngga pe wi luru mwashat. Kārǝí arǝ rǝcandǝa mana sǝni ko yana atea nǝ̀ gandǝ pak nǝ boale ka. Pǝlǝa bwal njar o.

¹⁶Mǝturo-ɓala mǝnana à pe wi luru mǝsǝboalo tongno ka wario kya nggaliki nǝi, pǝlǝa kum mur luru tongno amur amǝno.

¹⁷Mǝturo-ɓala mǝnana ak luru mǝsǝboalo ɓari ka wari gbal kya kum mur luru ɓari amur amǝno.

¹⁸Mala mǝnia yì mǝturo-ɓala ak luru mǝsǝboalo mwashat ka puro o kya tǝm nzali, sǝmbǝrǝ boalo mala mǝtala-ɓala male kam.

¹⁹Ɓwamǝgule mala amuna-ɓala ka banì sauwa a bǝri, sǝ kya nyare yiu kutia kpata kusǝ gir mana amǝ'turo-ɓala mǝno pang nǝ aboalo male mana a buia ka.

²⁰Ɓwabura mana à pe wi luru mǝsǝboalo tongno ka yiu nǝ aɓea aluru tongno mana kum amur amǝno ka. Bangŋa ama, “Ɓwamǝgule, a pam luru mǝsǝboalo tongno, sǝ ǝn nggaliki nǝi. Sǝni, ndya ǝn kum aɓea tongno amur amǝno ka.”

²¹Ɓwamǝgule male ne wi ama, “À pangŋǝna pepe, a nda mǝturo-ɓala mǝɓoarne andǝ mǝ'mǝsǝcau nì! A lǝmndǝ mǝsǝcau arǝ agir bǝti. Mǝ nǝ nyinggo agir pas a buo. Yiu li banɓoarnado mala mǝtala-ɓala mo!”

²²Ɓwabura mǝnana à pe wi luru mǝsǝboalo ɓari ka yiu gbal sǝ na ama, “Ɓwamǝgule, a pam luru mǝsǝboalo ɓari. Sǝni, ndya ǝn kum mur luru ɓari amur amǝno a pam ngga.”

²³Ɓwamǝgule male ne wi ama, “A pangŋǝna pepe, a nda mǝturo-ɓala mǝɓoarne andǝ mǝ'mǝsǝcau nì! A lǝmndǝ mǝsǝcau arǝ agir bǝti. Mǝ nǝ nyinggo agir pas a buo. Yiu li banɓoarnado mala mǝtala-ɓala mo!”

²⁴Mǝturo-ɓala mana ak luru mǝsǝboalo mwashat ka yiu sǝ na ama, “Ɓwamǝgule, ǝn surǝo. We ka, a nda ɓwa mǝkwane kǝrkǝr. A kǝ cancane aban mǝnana we ka a ɓeal kam raka, a kǝ ramngya aban mǝnana we ka a kwak mǝsǝɓeale kam raka.

²⁵Ɓangciu pakkam nda ǝn kya sǝmbǝrǝ boalo mo a nzali ka. Sǝni, ndya ka, ak gir mo.”

²⁶Mǝtala-ɓala male eari wi ama, “We mǝturo mǝɓealɓike, mǝnkundǝrì! A sǝlǝna she ama ǝn nggǝ cancane aban mǝnana ǝn ɓeal kam raka, sǝ ǝn nggǝ ramngya aban mǝnana ǝn kwak mǝsǝɓeale kam raka?

²⁷Sǝ ɓǝ̀ nda anggo ka, ɓoaro male ka a tsǝngŋǝna boalo mem aban amǝbanki, sǝ nyare mem kǝla man ngga ɓǝ ǝn kumǝna boalo mem nǝ mur amuri.”

²⁸Pǝlǝa mǝtala-ɓala na ama, “Wu ak luru mǝsǝboalo mǝno ka a rǝì, wu pe ɓwa mana nǝ aluru lum ngga.

²⁹Ɓwa mana ndanǝi ka à nǝ̀ tsǝki wi ɓe amuri, sǝ nǝ̀ kum kpǝm. Sǝ ɓwa mana pa nǝi raka, nggearǝ mǝnana a bui bǝti ka à nǝ̀ é a rǝì.[188]

³⁰Sǝ wu ramta mǝnia yì mǝturo-ɓala mǝɓane ka a nza aɓa pǝndǝa, aban mana nǝ̀ ngga ɓua sǝ nǝ̀ nggǝ nǝmnggi munabui ka.”[189]

³¹A pwari mana Muna mala Ɓwa nǝ̀ yiu aɓa gulo male, andǝ amǝturonjar kat ate ka, nǝ̀ yia do amur bunomurǝm male.[190]

³²Ɓwapǝndǝa man kat a ɓanza ka nǝ̀ rambǝa a ɓadǝmbǝi, sǝ nǝ̀ gau aɓwana aɓalǝ aɓwana kǝla mana yalgir kǝ gau anzur aɓalǝ ambulpǝndǝa ka.

³³Nǝ̀ tsǝk anzur ata bui mǝli, sǝ ambulpǝndǝa ka ata bui mǝnggare.

³⁴Sǝ Murǝm nǝ̀ ne aman a bui mǝli ka ama, “Wu yiu, wun aɓwana mana tsǝkbu mala Tárram na mur wun ngga. Wu yi ak Domurǝm mana à gilǝki ace wun pur a tita ɓanza ka.

³⁵Acemǝnana nzala walam, wu pam girlina. Mǝsamur walam, wu pam murnuna. Mǝ nda bǝri, wu em a ɓala.

³⁶Mǝ ndanǝ ɓatam, wu pam agir-nggurǝu. Mǝ nda ɓa rǝkwana, wu tsǝkiram. Mǝ nda ɓa ndàkurban, wu yiua makkam kun.”

³⁷Sǝ amǝ'ɓealɓoarna nǝ̀ eari wi ama, “Mǝtalabangŋo, a ya pwari sǝ sǝm sǝno nǝ nzala sǝ sǝm po girlina, ko nǝ mǝsamur sǝ sǝm po murnuna?

³⁸A ya pwari sǝ sǝm kumǒ a nda bǝri sǝ sǝm yinǝo a ɓala, ko nǝ ɓato sǝ sǝm po agir-nggurǝu?

³⁹A ya pwari sǝ sǝm kumǒ nǝ rǝkwana ko aɓa ndàkurban sǝ sǝm yiua sǝno?”

⁴⁰Pǝlǝa Murǝm nǝ̀ nyesǝia wia ama, “Ɓafo, ǝn nggǝ bangga wun, gir mana kat wu pakki mwashat ata aɓwana mem, ko nggearǝ mǝnana à kǝ sǝni nda ɓwa mǝkyauwe mala aɓi ka, Mǝ nda wu pakkam ngga.”

⁴¹Pǝlǝa nǝ̀ ne aɓwana mana a bui mǝnggare ka ama, “Wu upi banam, wun mǝnana Ɓakuli su wun ngga! Wu kya ɓa bǝsa mǝnana li male pà nǝ̀ mal raka, mǝnana à pe ace Shetan andǝ amǝturonjar male ka.

⁴²Acemǝnana nzala walam, wu pam girlina ɗang. Mǝsamur walam, wu pam murnuna ɗang.

⁴³Mǝ nda bǝri, wu em a ɓala ɗang. Mǝ ndanǝ ɓatam, wu pam agir-nggurǝu ɗang. Mǝ ndanǝ rǝkwana, ɗǝm ngga mǝ nda aɓa ndàkurban, wu yi makkam kun ɗang.”

⁴⁴Sǝ yia gbal ka à nǝ̀ ear ama, “Mǝtalabangŋo, a ya pwari sǝ sǝm kumǒ nǝ nzala, ko a ndanǝ mǝsamur, ko a nda bǝri, ko a ndanǝ ɓato, ko nǝ rǝkwana, ko aɓa ndàkurban, sǝ sǝm ginǝ ɗenyi nǝ we?”

⁴⁵Yì ka, nǝ̀ earia wia ama, “Ɓafo, ǝn nggǝ bangga wun, gir mana kat wu ginǝ pakki mwashat ata aɓwana mem, ko nggearǝ mǝnana à kǝ sǝni nda ɓwa mǝkyauwe mala aɓi ka, Mǝ nda wu ginǝ pakkam ngga.”

⁴⁶Pǝlǝa amǝnia ka à nǝ̀ tasǝia ɓǝa kutio aɓa tanni mana málá male pà kàm raka, sǝ amǝ'cauɓoarna ka à nǝ̀ kutia ɓa yilǝmu mana masǝlǝate pà kàm raka.[191]