Read mbula bwazza Matiu 26 Bible Online

Matiu 26 - mbula bwazza bible

Matiu 26

¹Lang Yesu malǝna banggi aɓwana amǝnia yì acau kat ka, pǝlǝa ne alaggana male ama,

²“Wu sǝlǝna ama ueo nongŋo ɓari sǝ Lamsan Yalimuru nǝ̀ tite. Aɓalǝ amǝno yia apwari mala Lamsan ngga sǝ ɓeɓwa nǝ̀ ngga mak Muna mala Ɓwa, a bu aɓimǝbura, sǝ à nǝ̀ ngga gballì a nggun-gangndi.”[192]

³A baku mǝno ka agbani pǝris andǝ aɓwana-mǝgule mala amǝ Yahudi yi rambǝa a palta mala pǝris mǝgule mana à tunǝki ama Kayafas ka,

⁴sǝ à kurkunarǝia ama à nǝ̀ bwal Yesu a sǝmbǝrǝa à nǝ̀ wal-lui.

⁵Pǝlǝa à nea rǝia ama, “Ɓǝ̀ sǝm ká pak gir man a pwari Lamsan Yalimuru ɗang, ɓǝ̀ sǝm pa anggo ka aɓwana nǝ̀ loasǝ munǝo a la.”

⁶Aɓa mǝno anggo ka Yesu na a Betani a ɓala mala mǝdakali man yì Shiman ngga.

⁷Dumǝna aban lili, pǝlǝa ɓe mɓwama yiu abani nǝ muru mǝ'rǝmɓoarne, mana boale pa bǝti raka, aɓa muna-du mǝnana à ɓè nǝ ɓe kǝ tali mana à tunǝki ama alabasta ka, yi solǝì Yesu a ɓamuri.

⁸Lang alaggana mala Yesu sǝn mǝnia yì gir ka bumia kiɗiki, à na ama, “Palang sǝ mɓwama man kiɗiki muru man ani?

⁹Ɓoaro male ka ɓǝa mangŋǝni amur boalo mǝgule, sǝ boale ka à nǝ̀ pe amǝtǝr.”

¹⁰Yesu sǝlǝnia cau mǝno kat pǝlǝa nea wia ama: Palang sǝ wu kǝ zurǝi bum mɓwama man? Yì ka, pangŋǝnam gir mana mǝɓoarne na ka.

¹¹Wu nda atarǝ wun wunǝ amǝtǝr ko a ya pwari ka, sǝ mim ngga pa mǝ nǝ pa ata wun ko a ya pwari ka ɗang.[193]

¹²Muru mǝnia mɓwama man soapam a rǝam ngga, soe ace gilǝki tsǝk luem.

¹³Ɓafo ǝn nggǝ bangga wun, ko a ya ban aɓa ɓanza kat à nǝ̀ hamnǝ Cau Amsǝban man kam ngga, à nǝ̀ bang ce gir mǝnia mɓwama man pe ka, ace ɗenyi nǝi.

¹⁴Pǝlǝa ɓe ɓwa mwashat ata alaggana male mǝnia lum-nong-ɓari, mǝnana à tunǝki ama Yahuda Iskariyoti ka, puro wario aban agbani pǝris

¹⁵sǝ ɗia ama, “Mana wu nǝ̀ eare wu nǝ̀ pam mana ɓǝ̀ ǝn pa wun Yesu a bu wun ngga?” Pǝlǝa à ɓal boalo zǝnariya mǝsǝì lumi-tārú sǝ à pe wi.

¹⁶Lo àkǝ̀ pwari mǝno ka Yahuda kutia alta njar mana nǝ̀ pana Yesu nǝi a buia ka.

¹⁷A pwari mana à tinata pakiɗire mala Bǝredi Mana à Tsǝki Yist raka, alaggana mala Yesu yiu abani sǝ à ɗi ama, “A ya ban sǝ a kǝ earce ɓǝ̀ sǝm gilǝkio girlina Lamsan Yalimuru?”

¹⁸Pǝlǝa nea wia ama, “Wu kya ɓa nggeala aban ɓeɓwa na kam, wu ne wi ama, ‘Malǝm ama pwari mana Ɓakuli tsǝki wi ka gbashina, nǝ̀ li girlina Lamsan Yalimuru a ɓala mo andǝ alaggana male.’ ”

¹⁹Alaggana mala Yesu o à kya pa kǝla mana banggia wia ka, à kya lam girlina Lamsan Yalimuru.

²⁰Lang adyan pwari kpana ka, yi do aban li andǝ alaggana male lum-nong-ɓari.

²¹À nda aban li ka, pǝlǝa nea wia ama, “Ɓafo ǝn nggǝ bangga wun, ɓeɓwa aɓalǝ wun nǝ̀ ngga mem.”

²²Ɓabumia zuriki kǝrkǝr sǝ ko yana ka tita ɗie ama, “Mǝ nda le Mǝtalabangŋo?”

²³Yesu nǝ̀ ear ka na ama, “Ɓwa mana oasǝ bui a kwar atam ngga, ɓwe na nǝ̀ ngga mem ngga.[194]

²⁴Muna mala Ɓwa ka nǝ̀ wú kǝla mǝnana à gilǝì amuri ka. Sǝa ma caukwanban na nǝ ɓwa mana nǝ̀ mak Muna mala Ɓwa ka! Kǝpǝna mǝnia yì ɓwa ka à ɓǝli raka.”

²⁵Pǝlǝa Yahuda, mana nda nǝ̀ ngga me ka ɗi ama, “Malǝm, Mǝ nda le?” Yesu eari wi ama, “E, a nda.”

²⁶À nda ban li girlina ka, Yesu twal bǝredi, pak yàwá pǝlǝa ɓwani, pe alaggana male sǝ nea wia ama, “Wu ang, wu li; mǝnia ka nggūrǝam na.”

²⁷Pǝlǝa twal kwap mala mur anap, pak yàwá sǝ pea wia, na ama, “Wu nu a ɓalǝi, wun kat.

²⁸Mǝnia ka nda nkilem mala kurcau mǝbǝshe, mǝnana à sukki ace twal ban acauɓikea mala aɓwana pas ka.[195]

²⁹Ən nggǝ bangga wun, pa mǝ nǝ nu mǝnia yì mur ɓǝlanggun anap ka ɗǝm ɗang she a mǝno yì pwari mǝnana mǝ nǝ nui bǝshe sǝnǝa wun a Domurǝm mala Tárram ka.”

³⁰Lang à tuna nggyal ka, à puro à o a nkono mala anggun Olif.

³¹Lang à nda amur nkono Olif ka, Yesu pǝlǝa ne alaggana male ama, “A ɓa dù man yalung ngga, wun kat wu nǝ̀ mǝsǝe, wu nǝ̀ ɗekiam. Mǝnia ka nda acemǝnana aɓa Malǝmce ka Ɓakuli bangŋa ama: “ ‘Mǝ nǝ wal yalgir, sǝ anzur mana a domwan ngga à nǝ̀ mesǝke.’[196]

³²Sǝ a nzǝm lo mem a ɓembe ka, mǝ nǝ aka wun dǝmbǝa aban ká a Galili.”

³³Bitǝrus eari wi ama, “Ko ɓǝ̀ aɓwana kat ɓangŋa à ɗekio ka, mim ngga pà mǝ nǝ ɓang ɗang.”

³⁴Yesu nyesǝi wi ama, “Mǝsǝcau, ǝn nggǝ banggo àkǝ̀ bu dù mǝnia ka, kaniama nggǔ nǝ̀ ɓua ka a wu nǝ tǝmcem kusǝ tārú.”

³⁵Bitǝrus bangŋa ama, “Ko ɓǝ̀ mǝ nǝ wu sǝnǝ we ka, pà mǝ nǝ ɓinǝo ɗang.” Sǝ acili alaggana gbal ka à bangŋa anggo.

³⁶Pǝlǝa Yesu andǝ alaggana male o a ɓe ban mana à tunǝki ama Gefsemani ka, sǝ nea wia ama, “Wu duk kani, mim ngga mǝ nǝ ká akano mǝ nǝ pak hiwi.”

³⁷Tunǝ Bitǝrus andǝ amuna mala Zabadi ɓari, Yohana andǝ Jemis ate, sǝ tita pak bumkiɗikea, sǝ ɓabumi zuriki.

³⁸Pǝlǝa nea wia ama, “Bumkiɗikea mǝnana a yilǝmem ngga gul kǝrkǝr kǝla nǝ̀ wal luem. Wu duk kani, wu dum nǝ amǝsǝ wun atam.”

³⁹Tùr a dǝmbǝa bǝti ka, kya kumsǝ nǝ ɓamǝsǝi a nzali, pak hiwi ama, “Dâ, ɓǝ̀ a wu nǝ ear ka, twalam mǝnia yì tanni ka. Sǝa ma mani ka gir mǝnana bumo kànì ka nda, mem na ɗang.”

⁴⁰Nyare yiu aban alaggana male yi kumia ka à nda ntulo. Nê Bitǝrus ama, “Pà wu nǝ̀ gandǝ do atam nǝ mǝsǝ wun bu-pwari mwashat ɗang mbo?

⁴¹Wu dum nǝ amǝsǝ wun, sǝ wu pak hiwi, ace mǝnana wu kǝa kuti aɓa karǝkiban raka. Bangŋo ma'wun kǝ earce nǝ̀ pak gir mǝɓoarne sǝ nggūrǝu ka pà nǝ́ rǝcandǝa ɗang.”

⁴²Nyar ɗǝm o kya pak ɓaria hiwi ama, “Dâ, ɓǝ̀ mǝnia yì tanni ka a pà nǝ́ twalami raka, she ɓǝ̀ ǝn nuni ka, kànì mo ɓǝ̀ pa.”

⁴³Nyare yiu abania, yi kumia ɗǝm ngga à nda ntulo; amburmǝsǝia dǝmbǝrikina.

⁴⁴Pǝlǝa nyia o kya pak tāruia hiwi; ɓǝsǝlǝ kǝ cau mǝ'mwashati.

⁴⁵Nyare yiu aban alaggana male sǝ banggia wia ama, “Wu nda a ntulo piu aban usǝlǝo? Wu sǝni, bu-pwari yina à ndo à nǝ̀ pà Muna mala Ɓwa a bu amǝ'cauɓikea.

⁴⁶Wu lo, sǝm nǝ̀ umi! Ɓwa mǝnana mak Muna mala Ɓwa ka ndya kǝ yiu ka!”

⁴⁷Nda ɓa na cau piu, Yahuda mǝnana nda aɓalǝ alaggana male man lum-nong-ɓari ka, yi tusǝo. Yiu andǝ aɓwana pas nǝ anggea-byau andǝ agara a buia. Agbani pǝris andǝ aɓwana-mǝgule mala amǝ Yahudi nǝ̀ tasǝia.

⁴⁸Yì ɓwa mǝnana mé ka angŋa dǝmbǝa kanǝnìa wia gir mǝnana nǝ̀ pa sǝ à nǝ̀ surǝì ka ama, “Ɓwa mǝnana mǝ nǝ makki kun, mǝ nǝ kùrrì ka, ɓwe na, wu bwali.”

⁴⁹Yahuda gya yi kútí kporong aban Yesu, ne wi ama, “Malǝm, ǝn nggǝ makko kun.” Pǝlǝa yi mǝn abui kùr Yesu zǝp.

⁵⁰Yesu banggi wi ama, “Ɓiam, pak gir mǝnana yinǝ we ka.” Pǝlǝa aɓwana mǝno yi gbami Yesu, à bwali kàngkàng.

⁵¹Anggo ka, ɓeɓwa aɓalǝ aɓwana mǝnana ata Yesu ka, kwetǝ nggeabyau male kwarǝna ɓe guro mala pǝris mǝgule nǝi, kasǝ mburkiri kpat.

⁵²Yesu ne wi ama, “Nyesǝ nggeabyau mo oasǝi a nde, acemǝnana ɓwa kat mana kǝ munǝ nǝ nggeabyau ka, nǝ nggeabyau sǝ à nǝ̀ wali.

⁵³Wu kǝ sǝni kǝla pà mǝ nǝ gandǝ zǝmbǝi Tárram, sǝ nǝ̀ tasǝam amǝturonjar pas àkǝ̀ dyadyan à nǝ̀ yia munǝo acem re?

⁵⁴Sǝ ɓǝ̀ ǝn pa anggo ka, lang sǝ cau mǝnana Malǝmce mala Ɓakuli bangŋi ama nǝ̀ pa ana ka nǝ̀ lumsǝo?”

⁵⁵Yesu nê ɓwabunda mǝnana yiua bwale ka ama, “Wu yiu nǝ anggea-byau andǝ agara ace bwalam kǝla mǝ nda mǝyàl-nzongcau? Ko aya pwari ka ǝn nggǝ do aɓa Ndàmǝgule mala Ɓakuli aban kanigir, sǝ wu bwalam ɗang.[197]

⁵⁶Sǝ mǝnia kat ka pâ ace lumsǝ cau mǝnana amǝ'ɓangna mala Ɓakuli gilǝa a Malǝmce male ka.” Nda alaggana male kat ɓangŋa à ɗeki nǝmurǝì ka.

⁵⁷Aɓwana mǝno à bwal Yesu ka à um nǝi aban pǝris mǝgule, yì Kayafas. Akano sǝ amǝkani Nggurcau mala Musa andǝ aɓwana-mǝgule yi dapia.

⁵⁸Bitǝrus ka kpata Yesu a nzǝmo kuko aban ká a ɓala mala Pǝris Mǝgule. Yi kutio sǝ do ata amǝyalban nǝ̀ sǝn gir mana à nǝ̀ pakki Yesu ka.

⁵⁹Yia agbani pǝris andǝ acili aɓwana-mǝgule ka à ndarǝ alte à nǝ̀ kum cau nyir amur Yesu mǝnana à nǝ̀ kumo à nǝ̀ wal-luí nǝi ka,

⁶⁰sǝ kat andǝ mani ama aɓwana pas puro à banggi acau nyir amuri ka, à kum ko mwashat ɗang. A masǝlǝate ka aɓea ɓwana ɓari puro.

⁶¹À na ama, “Mǝnia yì ɓwa ka bangŋa ama yì ka, nǝ̀ gandǝ arki Ndàmǝgule mala Ɓakuli sǝ nǝ̀ nyare nǝ̀ ɓè aɓa nongŋo tārú.”[198]

⁶²Pǝris mǝgule pǝlǝa lo cam nǝ came sǝ ne Yesu ama, “A panǝ cau mǝnana a nǝ bangŋa amur mǝno yì cau ka re? Mana nda ɓa mǝnia yì cau à kǝ ne a muro ka?”

⁶³Yesu duk kuni piu. Pǝris mǝgule ne wi ama, “Ən nggǝ kpapio wunǝ Ɓakuli Mǝyilǝmuì wu bangga sǝm ko a nda Kǝrǝsti, Muna mala Ɓakuli?”

⁶⁴Yesu eare ama, “E, kǝ nda a bang ngga, sǝ ǝn nggǝ bangga wun kat, “ ‘A dǝmbǝa ka wu nǝ̀ sǝn Muna mala Ɓwa dumǝna ata bu-mǝli mala Ɓakuli Mǝtalabangŋo, aban yiu aɓalǝ apǝrɓang a bumkuli.’[199]”

⁶⁵Kara Pǝris mǝgule bwal daura male sanni sǝ na ama, “Nyesǝna ɓamuri kǝla Ɓakuli! Ya cau nani sǝm alkiyite amuri nǝ̀ kuti mǝnia? Wu ongŋǝna cau ɓǝsǝki Ɓakuli mǝnana pur a kuni ka.

⁶⁶Mana nda ɗenyicau ma'wun?” À pǝlǝa à eari wi ama, “Karǝna ɓǝa wali ɓǝ̀ wú.”[200]

⁶⁷Pǝlǝa à takki ntara a ɓamǝsǝi sǝ à tulki nǝ abuia. Aɓea ɓwana ka à kwaki a takiri[201]

⁶⁸sǝ à na ama, “Bangga sǝm, we Kǝrǝsti, yana nda ɓwa mǝnana walo ka?”

⁶⁹Anggo ka Bitǝrus na nǝ́ nza aban do aɓa palta. Ɓe muna-ɓwama mǝturo-ɓala yiu abani, ne wi ama, “We gbal ka wu nda tarǝ wun wunǝ Yesu, Ɓwa Galili.”

⁷⁰Sǝ Bitǝrus ka makgir a ɓadǝmbǝ aɓwana kat ama, “Awo, ǝn surǝ gir mǝnana a banggiyi cau amuri ka ɗang.”

⁷¹Pǝlǝa puro a kun palta. Ɓe muna-ɓwama ɗàng sǝni pǝlǝa ne aɓwana mǝnana abani ka ama, “Ɓwa man ngga ɗiɗyal ka nda ata Yesu Ɓwa Nazarat.”

⁷²Bitǝrus nyare makgir ɗǝm nǝ kana ama: “Awo, ǝn surǝ ɓwe mǝno ɗang!”

⁷³Zuku ka aɓwana mǝno à nda ban came abanì ka à sungŋo aban Bitǝrus sǝ à ne wi ama, “Mǝsǝcau, we ka a nda aɓalǝia, acemǝnana lasǝo lǝmndǝ ama a nda ɓwa Galili.”

⁷⁴Pǝlǝa Bitǝrus kángir sǝ na ama, “Ɓǝ̀ Ɓakuli ɓǝ̀ kiɗikiam mǝnana ɓǝa na ama ǝn surǝ mǝnia yì ɓwa ka!” Anggo ka kara nggù ɓua.

⁷⁵Nda ɓalǝ Bitǝrus kasǝa arǝ cau mǝnana Yesu banggi wi ka ama, “Kaniama nggǔ nǝ ɓua ka, a nǝ na kusǝ tārú ama a surǝam ɗang.” Pǝlǝa puro a nza kya ɓua, ɓua mǝkwanbanì.