Read mbula bwazza Matiu 4 Bible Online

Matiu 4 - mbula bwazza bible

Matiu 4

¹Pǝlǝa Bangŋo Mǝfele loasǝ Yesu um nǝi a ɓabondo ace mǝnana Shetan ɓǝ̀ kya karǝki ka.[10]

²Sǝ lang Yesu gilnamur pwari lumi-ine andǝ du lumi-ine ka, nzala wali kǝrkǝr.

³Mǝkarǝkiban pǝlǝa yiu abani sǝ ne wi ama, “Ɓǝ̀ a nda muna mala Ɓakuli ka, banggi atali mǝnia ɓǝa pǝlǝ nɗǝmo.”

⁴Sǝ Yesu nyesǝi wi ama, “À gilǝ a Malǝmce mala Ɓakuli ama: “ ‘Girlina na nǝmurǝì tsǝkiyi ɓwa sǝ nǝ̀ dum nǝ yilǝmu ka ɗang. Nda andǝ cau mǝnana kat kǝ pur a kun Ɓakuli ka.’[11] ”

⁵Pǝlǝa Shetan wari nǝ Yesu aɓa Urǝshalima nggeala mǝfele, sǝ kya tamsǝi a ɓwang Ndàmǝgule mala Ɓakuli,

⁶sǝ ne wi ama, “Ɓǝ̀ a nda Muna mala Ɓakuli ka ta zurro a nzali! Acemǝnana à gilǝ aɓa Malǝmce mala Ɓakuli ama, “ ‘Ɓakuli nǝ̀ tsǝk amǝturonjar male ɓǝ̀a tsǝkiro. À nǝ̀ eo a ɓabuia, ace mǝnana wu kǝa tul kusǝo arǝ tali raka.’[12] ”

⁷Sǝ Yesu pǝlǝi wi ama, “Malǝmce mala Ɓakuli bang gbal ama, “ ‘Ce a karǝki Mǝtalabangŋo Ɓakuli mo ɗang.’[13] ”

⁸Shetan nyar ɗǝm wari nǝ Yesu a ɓwang ɓe kǝ nkono nggea mǝdāre, pǝlǝa lǝmndǝki wi ala-murǝm kat mǝnana a ɓanza ka andǝ gulo andǝ gǝna mǝnana a ɓalǝia ka kat.

⁹Sǝ ne wi ama, “Ɓǝ̀ a wu nǝ ɓun a ɓadǝmbǝam sǝ a nǝ peri abanam ngga, mǝ nǝ po amǝnia yì agir ka kat.”

¹⁰Yesu ne wi ama, “Shetan, upi banam! Malǝmce mala Ɓakuli ka na ama, “ ‘Peri aban Mǝtalabangŋo Ɓakuli mo, Kǝ yì mwashat ɓǝrɓǝr na a nǝ kpate ka.’ ”[14]

¹¹Nda sǝ Shetan ɗekina Yesu ka, sǝ amǝturonjar yiu à yì bwali wi kam.

¹²Lang Yesu ongŋǝna ama murǝm Hirǝdus Antipas kùrna Yohana a ndàkurban ngga, lo ɗeki nzali Yahudi o a bu-nzali Galili.

¹³Banì sau a Nazarat ɗang, turo kya do a Kapanahum, a kun Garang Galili a bui mala amǝ Zebulu andǝ amǝ Naftali.

¹⁴Mǝnia ka pa anggo ace mǝnana ɓǝa lumsǝ cau mana pur a kun Ishaya mǝɓangna mala Ɓakuli ka ama:

¹⁵“Wu kwaki kir wun, wun amǝ nzali Zebulu andǝ Naftali. Wun aɓwana mǝnana wu do amur njargula ká a kun Garang, a nkaring Mur Jodan ngga. Wu kwaki kir wun, wun amǝ Galili, la mala aɓwana mana amǝ Yahudi na raka.

¹⁶Aɓwana mǝnana à do a pǝndǝa ka, à sǝna tǎlaban mǝgule. Yì aɓwana mǝnana à do a yinggǝli lú ka, tǎlaban sulǝna a bania.”[15]

¹⁷Lo a baku mǝno ka Yesu tita hamnǝ cau, kǝ na ama, “Wu pwanzali, wu pǝlǝ nzǝm wun arǝ acauɓikea ma'wun, acemǝnana Domurǝm mala kuli gbashina.”

¹⁸Yesu na ban gya a kun Garang Galili, sǝ mǝsǝì kpa arǝ aɓwana ɓari amǝ'eambǝu, Shiman mǝnana à tunǝki ama Bitǝrus ka andǝ mǝ'eambǝi Andǝru. À nda ban taula nǝ ndámbú aɓa Garang ace mǝnana yia ka bwal-nji nda turo malea.

¹⁹Yesu nea wia ama, “Wu yiu a tam, mǝ nǝ tsǝk wun, wu nǝ̀ pǝlǝ amǝ oari aɓwana acem.”

²⁰À lo tu à nying andámbú malea sǝ à o ate.

²¹Yesu nggǝ ká a dǝmbǝa ka, yi sǝn aɓea amǝ'eambǝu ɓari ɗǝm, Jemis muna mala Zabadi andǝ mǝ'eambǝi Yohana. À nda ɓa waru andǝ tárria Zabadi. À nda ban taliki andámbú malea. Pǝlǝa Yesu tunǝia.

²²À lo à fwa rǝia à nying waru andǝ tárria sǝ à o ate.

²³Yesu gya aɓa nzali Galili kat kǝ kanigir aɓalǝ andakpapi mala amǝ Yahudi, sǝ kǝ hamnǝ Cau Amsǝban mala Domurǝm mala Ɓakuli amur aɓwana. Twalî aɓwana ban ambalang arǝpangŋa andǝ akwano kat.

²⁴Cau male gya akiban aɓa bu-nzali Suriya kat. À yinǝi wi nǝ amǝkwano ɗàngɗáng: a mǝnana à nda ɓa rǝkwana kǝrkǝr, andǝ a mǝnana akukwar kutia rǝia, andǝ a mǝnana à ndanǝ kwano wukiaban, andǝ a mǝnana ɓe kǝ barea wu ka, yi twalia wia ban akwano malea kat.

²⁵Ɓwabunda pas mǝnana à pur a bu-nzali Galili, andǝ Dekapolis[16] ka, à pu ata Yesu. Aɓea gbal ka à purki arǝ anggea-là Urǝshalima, andǝ mala acili abu-nzali mala amǝ Yahudi andǝ aban mǝnana a nkaring Nggeasala Jodan ngga, kat à o ate.