Read mbula bwazza Matiu 7 Bible Online

Matiu 7 - mbula bwazza bible

Matiu 7

¹Wu kǝa pakki aɓwana ɓashi ɗang, ace mǝnana Ɓakuli ɓǝ̀ kǝa pakka wun ɓashi raka.

²Kǝla mǝnana wu kǝ ɓashia aɓwana ka, anggo sǝ Ɓakuli nǝ̀ ɓashia wun; sǝ kǝla mǝnana wu kǝ pang nǝ aɓwana ka, anggo sǝ Ɓakuli nǝ̀ pang nǝ wun.[47]

³Ace mana sǝ a kǝ sǝn kǝkar mǝnana a mǝsǝ ɓeo ka, sǝ a sǝn gbǝlanggun mǝnana aɓa mo yì mǝsǝu ka ɗang?

⁴Ɓǝ̀ a na raka, lang sǝ a nǝ ne ɓeo ama came mǝ pusǝ kǝkar a mǝsǝo, sǝ we ka nggea gbǝlanggun na gaurǝ a mǝsǝo ka?

⁵We mǝ'kunɓarina, pusǝ gbǝlanggun mǝnana a mǝsǝo ka peatu, sǝ a wu nǝ sǝnban pepe mǝnana a nǝ pusǝî ɓeo kǝkar mana a mǝsǝì ka.

⁶Gir mǝnana à tarrì ace Ɓakuli ka wu kǝa pe anvwa ɗang. Ɓǝ̀ wu pa anggo ka, à nǝ̀ kàrra à nǝ̀ nǝmnggi wun. Wu kǝa turi atǝmbǝrǝm-ɓala agir mǝɓoarne ma'wun ɗang. Ɓǝ̀ wu pa anggo ka, à nǝ̀ parkia a ɓakusǝia.

⁷Wu zǝmbǝa aban Ɓakuli, nǝ̀ pa wun; wu alte a bu Ɓakuli, wu nǝ̀ kumo; wu wali Ɓakuli kunkurǝm, nǝ̀ mǝnba wun.

⁸Ɓwa mǝnana kat zǝm ngga à nǝ̀ pe wi; ɓwa mǝnana alte ka nǝ̀ kumo; sǝ ɓwa mǝnana wal kunkurǝm ngga, à nǝ̀ mǝnmbi wi.

⁹Yana ata wun mǝnana ɓǝ̀ muni zǝmbǝi nɗǝmo ka, nǝ̀ pe wi tali?

¹⁰Ko ɓǝ̀ zǝmbǝi nji ka, nǝ̀ pe wi n'yau ka?

¹¹Kat andǝ ɓealɓikea ma'wun ngga wu sǝlǝ pe amuna ma'wun aɓoro mǝɓoarne, sǝ nǝ Tár wun mǝnana a kuli ka? Ndanǝ ɓabum mana ɓoaro kutibanì ka nǝ̀ pe aɓwana mǝnana à zǝmbǝi wi ka, agir mǝɓoarne!

¹²Aɓa gir kat ka, pakki aɓwana agir mǝnana a earkiyice ama ɓǝa pakko ka. Mǝnia ka nda ɓa Nggurcau mala Musa andǝ kanigir mala amǝ'ɓangna mala Ɓakuli.[48]

¹³Wu kuti nǝ kunɓala mǝɓweari, acemǝnana kunɓala ká lu-bǝsa ka mǝtangŋe na, sǝ tanjari ka kwan ɗang. Aɓwana pas sǝ à kǝ kuti a njari.

¹⁴Sǝ kunɓala ká yilǝmu ka mǝɓweari na, sǝ tanjari ka mǝkwane na. Aɓwana mǝnana à kǝ kumi ka, à lakki ɗang.

¹⁵Wu tsǝk kir wun arǝ amǝ'ɓangna mǝ'nyirì. Pak ka à kǝ ɓosǝki rǝia kǝla anzur, sǝ mǝsǝrǝia ka anvwa bondo mǝlulle na.

¹⁶Wu nǝ̀ surǝia arǝ aturo malea. Zwe pa nǝ̀ pusǝ ɓǝla anap ɗang. Sǝ imdi pa nǝ̀ ɓǝl vwari ɗang.

¹⁷Anggo gbal ko ya nggun mǝɓoarne ka kǝ pusǝ ɓǝle mǝɓoarne, sǝ nggun mǝɓane ka kǝ pusǝ ɓǝle mǝɓane.

¹⁸Nggun mǝɓoarne pa nǝ̀ pusǝ ɓǝle mǝɓane ɗang, sǝ nggun mǝɓane pa nǝ̀ pusǝ ɓǝle mǝɓoarne ɗang.

¹⁹Nggun mǝnana kat pusǝ ɓǝle mǝɓoarne raka à nǝ̀ kasǝi à nǝ̀ turi a bǝsa.[49]

²⁰Anggo ka wu nǝ̀ surǝ amǝ'ɓangna mǝ'nyirì arǝ aturo malea.[50]

²¹Aɓwana na kat mǝnana à kǝ tunǝam ama, “Mǝtalabangŋo, Mǝtalabangŋo” ka, sǝ à nǝ̀ kutio a Domurǝm mala kuli ka ɗang, she ɓwa mǝnana kǝ pak gir mana Tárram mana a kuli ka earkiyice ka.

²²A masǝlǝata apwari ka aɓwana pas nǝ̀ yiu à nǝ̀ nam ama, “Mǝtalabangŋo, Mǝtalabangŋo, nǝ lullǝo sǝ sǝm hamnǝ cau re, sǝ nǝ lullǝo sǝ sǝm pusǝki akukwar, sǝm pakki agir-ndǝlǝki pas re?”

²³Pǝlǝa mǝ nǝ banggia wia ama, “Ən surǝ wun pale ɗang. Wu upi banam, wun amǝ'ɓealɓikea!”[51]

²⁴Ace mani ka, ɓwa mana kat kǝ ok amǝnia yì acau mem sǝ kǝ kpatea kǝ pea ka, à nǝ̀ kànì arǝ ɓwa mǝsǝle mǝnana ɓak ɓala male amur tali ka.

²⁵Mbulo nya, mur lo akiban, gung-mbulo ɓua wal arǝ mǝnia yì ɓala ka. Sǝ ɓalae kpa ɗang, acemǝnana kusǝɓa ka à kwakite amur tali.

²⁶Sǝ ɓwa mana kat kǝ ok amǝnia yì acau mem sǝ kǝ kpatea raka à nǝ̀ kànì arǝ gǝmɓwa mǝnana ɓak ɓala male amur sala ka.

²⁷Mbulo nya, mur lo akiban, gung-mbulo ɓua wal arǝ mǝnia yì ɓala ka. Sǝ ɓalae kpa, nggea kpa mǝcande!

²⁸Lang Yesu malǝna naki amǝnia yì acau ka, aɓwabunda pak ndali arǝ kanigir male,

²⁹acemǝnana kanigir male ka ndanǝ rǝcandǝa. Pa kǝla mala amǝkani Nggurcau malea ɗang.[52]