Read mbula bwazza Matiu 9 Bible Online

Matiu 9 - mbula bwazza bible

Matiu 9

¹Yesu pǝlǝa eauwe a waru, yale a nkaring o a la male.

²Aɓea aɓwana yinǝi wi nǝ ɓe mǝrǝwuna a kala. Lang Yesu sǝn guliarǝu malea ka, ne mǝkwano ama, “Nwangsǝ ɓabumo, munem, à twalǝno ban acauɓikea mo.”

³Aɓea amǝkani Nggurcau nea rǝia ama, “Ɓwa mǝnia kǝ twal ɓamuri ama yì ka, Ɓakuli na!”

⁴Acemǝnana Yesu surǝ na rǝ ɗenyicau malea ka, banggia wia ama, “Palang sǝ wu kǝ pak ɗenyicau mǝɓane a ɓabum wun anggo?

⁵Mǝ ye na kwano kuti ɓì: ɓǝa na ama, ‘À twalǝno ban acauɓikea mo’ le, ko ɓǝa na ama, ‘Lo gya?’

⁶Sǝ ace mǝnana ɓǝ̀ wu sǝlǝ ama Muna mala Ɓwa ka ndanǝ rǝcandǝa a ɓanza nǝ̀ twal ban acauɓikea ka, mǝ nǝ lǝmndǝa wun.” Pǝlǝa Yesu pǝlǝa aban mǝrǝwuna sǝ ne wi ama, “Lo kar kala mo o a ɓala mo.”

⁷Sǝ ɓwabure par bui lo o a ɓala.

⁸Aɓwana mana à ram ngga, ɓangciu pakkia wia arǝ gir mana à sǝn ngga. À ɓwangsǝ Ɓakuli mǝnana pe aɓwana-mǝpǝnde ulang man yì rǝcandǝa ka.

⁹Yesu puro nǝ̀ kuti ka yi sǝn ɓeɓwa mana à tunǝki ama Matiu mǝ'ak boalo-cemi, aban do aɓa tara ak boalo-cemi. Yesu ne wi ama, “Yiu a tam.” Kara lo o ata Yesu.

¹⁰Lang Yesu na ban li a ɓala ka, amǝ'aki aboalo-cemi pas andǝ aɓea aɓwana mana amǝ Farisi twalia amǝ'cauɓikea na ka, à yì do ata Yesu andǝ alaggana male aban li.

¹¹Sǝ amǝ Farisi sǝn Yesu aban li andǝ aɓwana mǝnia ka, à ɗi alaggana male ama, “Ace man sǝ ɓwamǝgule ma'wun kǝ lili andǝ amǝ'ak boalo-cemi andǝ amǝ'cauɓikea?”[56]

¹²Yesu nǝ̀ ok man yì cau ka pǝlǝa earia wia ama, “Aɓwana mǝnana rǝia bang ngga kǝgir oasǝia arǝ mǝsonzǝo ɗang; amǝkwano na à alkiyita mǝpaɓuri ka.

¹³Wu kyane wu kya bǝl ɓa mǝnia yì nggurcau mana ama: ‘Sǝn mǝsǝswatǝr na ǝn earkiyice ka, ɗarǝa na ɗang.’ Ən yiu ace tunǝ amǝ'cauɓoarna ɗang, nda ace amǝ'cauɓikea.”[57]

¹⁴Àkǝ̀ pwari mǝno ka alaggana mala Yohana Mǝbatisǝma yiu aban Yesu sǝ à ɗi ama, “Man tsǝa sǝ sǝm sǝnǝ amǝ Farisi ka, sǝm nggǝ gilmur sǝ alaggana mo ka à kǝ gilmur ɗang?”

¹⁵Yesu nyesǝia wia ama: Lang sǝ agyajam mala bura-manfela nǝ̀ pak bumkiɗikea mǝnana nda abania peatu ka? Pwari nǝ̀ ngga yiu à nǝ̀ yia twal bura-manfela a rǝia; a pwarî sǝ à nǝ̀ gilmur.

¹⁶Kǝ ɓwa pà nǝ̀ kpakǝri eakǝna daura nǝ kasǝna nggurbyau mǝbǝshe ɗang. Ɓǝa pa anggo ka kasǝne mǝbǝshe nǝ̀ yia tsǝk eakǝna daurae nǝ̀ san kpǝm nǝ̀ wori man ɗiɗyal ka.

¹⁷Sǝ ɗǝm ngga, kǝɓwa pà nǝ̀ so bǝsa mùr-anap aɓalǝ asambǝram mǝ'e ɗang. Ɓǝ̀ soe ka asambǝrami nǝ̀ arkia, sǝ mur-anap ni nǝ̀ sukkio, sǝ asambǝrami nǝ̀ ueɓà. Bǝsa mur-anap ka à kǝ soe aɓalǝ asambǝram mǝbǝshe. Anggo sǝ yia kǝm ngga à nǝ̀ auwa.

¹⁸Lang Yesu na ban nea wia amǝnia yì acau ka, ɓe ɓwamǝgule ndakpapi mala amǝ Yahudi yiu yi kūndǝo a ɓadǝmbǝi ne wi ama, “Ɓoarnsarilem wu àkǝ̀ dyadyan. Yiu tsǝk buo a rǝì, sǝ mǝsǝì nǝ̀ sa nǝ̀ pak yilǝmu.”

¹⁹Yesu pǝlǝa lo o ate, andǝ alaggana male.

²⁰Nǝ̀ nggǝ ká ka, ɓe mɓwama mǝnana nkila kǝ kanggia rǝì apǝlǝkia lum-nong-ɓari ka, kar a nzǝmi yi je kun daura male.

²¹Ne ɓamuri ama, “Ɓǝ̀ mǝ nǝ kumô mǝ je daura male ka, rǝam nǝ̀ mala.”

²²Yesu pǝlǝ rǝì sǝni, sǝ ne wi ama, “Mɓwama, ɓangciu ɓǝ̀ kǝa pakko ɗang! Guliarǝu mo twalǝno ban kwano mo.” Àkǝ̀ banì mǝno sǝ rǝ mɓwame mala.

²³Kutio mala Yesu a ɓala mala mǝno yì ɓwamǝgule ka, yi sǝn amǝ'twang ntetu andǝ aɓwana mana à rambǝa à kǝ ɓua ka.

²⁴Pǝlǝa nea wia ama, “Wu mǝsǝe! Ɓoarnsarile wu nǝ wú ɗang. Nda a ntulo.” Kara à oali nǝ oalo.

²⁵Lang à tsǝngŋǝna aɓwana à purna a nza ka, Yesu kutio bwal ɓoarnsarile a garabui, sǝ lo dumnǝdo.

²⁶Mǝnia yì cau ka akiban kat aɓa mǝno yì bu-nzali ka.

²⁷Yesu purni ban mǝno nǝ̀ nggǝ o ka, aɓea ante ɓari lo aban ká ate. À loasǝ gia ama, “Muna mala Dauda[58], ɓwamur sǝm!”

²⁸Lang Yesu kutina a ɓala ka, ante mǝnia yiu abani, sǝ ɗia ama, “Wu earǝna nǝi ama mǝ nǝ gandǝ mǝn amǝsǝ wun le?” À eare ama, “E, Mǝtalabangŋo!”

²⁹Pǝlǝa je mǝsǝia sǝ na ama, “Kǝla mǝnana wu earǝna nǝi ka ɓǝ̀ dupa wun anggo.”

³⁰Àkǝ̀ banì, mǝsǝia mǝna. Sǝ Yesu nunkiria pepe ama, “Wu kǝa ne kǝɓwa ce ɗang.”

³¹Sǝa ma à puro à kya mesǝ ce Yesu a bu-nzali mǝno kat.

³²À nda ban puro à nǝ̀ o ka, aɓea ɓwana yiu nǝ ɓeɓwa mǝnana kukwar kutia rǝì sǝ kǝ gandǝ na cau raka aban Yesu.

³³Yesu pusǝ kukwar mǝnana a rǝì ka, àkǝ̀ banì ɓwa mǝnana kǝ gandǝ na cau ɗiɗyal raka, tita na cau. Ɓwabunda ndali sǝ à na ama, “Sǝm malaká sǝn kǝgir kǝla man aɓa Isǝrayila ɗang.”

³⁴Sǝ amǝ Farisi ka à yì bangŋa ama nǝ murǝm mala akukwar sǝ Yesu kǝ pusǝki akukwar.[59]

³⁵Yesu gya arǝ anggea-là andǝ amuna-là kat, aban kanigir aɓalǝ andakpapi mala amǝ Yahudi, kǝ hamnǝ Cau Amsǝban mala Domurǝm mala Ɓakuli, sǝ kǝ twalban akwano andǝ arǝpangŋa kat.[60]

³⁶Lang yi sǝn lakki mala aɓwabunda ka, mǝsǝswatǝr malea pakki wi, acemǝnana à nda aɓa tanni. Kǝ mǝpyaumǝsǝu pa amuria ɗang, kǝla anzur mǝnana yalu pa amuria raka.[61]

³⁷Pǝlǝa ne alaggana male ama, “Turo Wal-mǝsa ka nda kpǝm, sǝ amǝturo lakki ɗang.

³⁸Wu zǝmbǝi Mǝtala-ɓaban ɓǝ̀ tasǝ amǝturo ɓǝa yiu a ɓaban male.”[62]