Read mbula bwazza Markus 1 Bible Online

Markus 1 - mbula bwazza bible

Markus 1

¹Ani sǝ Cau Amsǝban mala Yesu Kǝrǝsti, Muna mala Ɓakuli tite.

²Kǝla mana à gilǝì aɓa malǝmce mala Ishaya, mǝɓangna mala Ɓakuli ka, Ɓakuli bangŋa ama: “Mǝ ndya ǝn nggǝ tur mǝturonjar mem ɓǝ̀ ako dǝmbǝa, ɓǝ̀ yi gilǝkio tanjargula.”[1]

³“Giu mala ɓǝɓwa kǝ tunǝban a ɓabondo ama, ‘Wu gilǝki tanjar ace Mǝtalabangŋo! Wu tamsǝi wi atanjar pǝrapǝra ɓǝ̀ ging nggam!’ ”[2]

⁴Mǝnia yì mǝturonjar ka nda Yohana Mǝbatisǝma. Puro yiu kǝ hamnǝ Cau Amsǝban aban aɓwana a ɓabondo ama, “Wu pwanzali wu ɗeki bu wun arǝ acauɓikea ma'wun, Ɓakuli nǝ̀ twala wun bania, sǝ dumǝna púp ɓǝa pakka wun batisǝma.”

⁵Ɓwabunda pur arǝ acilia ala aɓa nzali Yahudi, andǝ ɓa Urǝshalima aban yiu a sǝne sǝ à nǝ̀ ok hama male. À kǝ bang acauɓikea malea, sǝ Yohana kǝ pakkia wia batisǝma a kun Nggeasala Jodan.

⁶Agir-nggurǝu male yì Yohana ka, à pea nǝ nggu kalakadambi, sǝ nggur-ɓunu male ka nggu-bangŋa na. Girlina male ka doshi na andǝ mur'nyi mǝnana kumo ɓun kano a ɓabondo ka.[3]

⁷Kǝ hama, kǝ bangŋa ama, “Ɓe ɓwa nà kǝ yiu a nzǝmam ngga. Gulo kutiam kǝrkǝr, ko anggur nkura kusǝì ka ǝn kārǝa mǝ nǝ kūndǝo mǝ nǝ panzǝia ɗang.

⁸Nǝ mur sǝ ǝn nggǝ pakka wun batisǝma, sǝ yì ka, nǝ̀ pakka wun batisǝma nǝ Bangŋo Mǝfele!”

⁹Aɓalǝ amǝno yì anonggeo ka, Yesu pur a Nazarat, a bu-nzali Galili. Yohana yi pakki wi batisǝma a Nggeasala Jodan.

¹⁰Yesu na aban eapi mur ani ka, kara sǝn kuli mǝna. Bangŋo Mǝfele sulǝo aban yiu amuri kǝla kutu.

¹¹Gi Ɓakuli pur nǝ kuli na ama, “A nda Munem mǝnana ǝn earkiyi ace raka, mǝnana ban kǝ ɓoaram a rǝì ka.”[4]

¹²Zuku ka, Bangŋo loasǝ Yesu aban ká a ɓabondo.

¹³Nda kano a ɓabondo, nongŋo lumi-ine, Shetan na aban karǝke. Yesu ka nda nǝmurǝì andǝ anyam ɓabondo mana abanì ka. Amǝturonjar mala Ɓakuli yiu à yì bwali wi kam.

¹⁴Anzǝm mana à bwalǝna Yohana à oasǝni a ndàkurban ngga, Yesu o a nzali Galili, kǝ hamnǝ Cau Amsǝban mala Ɓakuli.

¹⁵Kǝ bangŋa ama, “Pwari karǝna! Domurǝm mala Ɓakuli gbashina tu! Wu pwanzali wu ɗeki bu wun arǝ acauɓikea ma'wun, wu earnǝ Cau Amsǝban wu é!”[5]

¹⁶Lang Yesu na ban gya a kun Nggeamur Galili ka, mǝsǝì kpa arǝ Shiman andǝ mǝ'eambǝi Andǝru, aban taula nǝ andámbú, acemǝnana yia ka amǝbwalki anji na.

¹⁷Yesu nea wia ama, “Wu yiu atam, mǝ nǝ tsǝk wun wu nǝ̀ duk amǝbwalki aɓwana.”

¹⁸Àkǝ̀ banì kara à ɗeki andámbú malea, à kpate.

¹⁹Nǝ̀ tur a dǝmbǝa bǝti anggo ka, nyare sǝn Jemis, muna mala Zabadi a tarǝia andǝ mǝ'eambǝi Yohana. Yia ka à nda aɓa waru aban gilǝki andámbú malea.

²⁰Yesu tunǝia. Pǝlǝa à ɗeki tárria yì Zabadi aɓa waru andǝ aɓwana mǝnana à twalia ace nun ndāmbú ka, à o ate.

²¹Yesu andǝ alaggana male wario a Kapanahum. Pwari Sabbat karǝna ka Yesu kutio a ndakpapi, tita kanigir kam.

²²Kanigir male pakkia wia ndali, acemǝnana kǝ kania wia gir nǝ sǝlǝe andǝ rǝcandǝa, pa kǝla mala amalǝm Nggurcau ɗang.[6]

²³Àkǝ̀ banì mǝno ka, ɓeɓwa nakam nǝ bangŋo mǝɓane a rǝì aɓa ndakpapi, lo mak'zwalo, kǝ na ama,

²⁴“We Yesu ɓwa Nazarat, mana a earkiyice arǝ sǝm? A yiua kiɗiki sǝm, a nǝ mal sǝm le? Ən surǝo, a nda Ɓwa Mǝfele mala Ɓakuli!”

²⁵Yesu sà arǝ kukwar, ne wi ama, “Duk kuno piu, puri rǝ ɓwa man!”

²⁶Bangŋo mǝɓane dǝkǝrǝki nǝ rǝcandǝa, mak'zwalo, pǝlǝa puri rǝi.

²⁷Ɓwapǝndǝa ndali kǝrkǝr gandǝa à kǝ ɗiki rǝarǝia ama, “Mana aman? Ɓe kǝ bǝsa kanigir na nǝ rǝcandǝa! Nggearǝ abangŋo mǝɓane ka, kǝ sàrǝia sǝ à kǝ oki wi.”

²⁸Àkǝ̀ dyadyan cau male akiban a bu-nzali Galili kat.

²⁹Yesu nǝ̀ puri ndakpapi ani ka, yì, andǝ Jemis andǝ Yohana, à kutio a ɓala mala Shiman andǝ Andǝru.

³⁰Nkil Shiman mǝɓwame ka nda aban nongŋo, ɓauwa eari wi ɗang, pǝlǝa à banggi Yesu cau mala rǝkwana male.

³¹Yesu kuti abani kya bwali a garabui loasǝi. Ɓauwa puri rǝì, pǝlǝa lo pea wia girlina.

³²Nǝ mǝno yì pwari kpana ka, amǝ le yiu nǝ amǝkwano, andǝ aɓwana mǝnana nǝ akukwar aɓa nyamia ka, abani.

³³Ɓwapǝndǝa mana a la kat ka à dapi a kunɓala.

³⁴Yesu twalban arǝkwana ɗàngɗáng arǝ aɓwana. Sǝ pusǝ akukwar pas, sǝ ko earia wia ɓǝa na cau ɗang, acemǝnana à sǝlǝna ama yì ka, Muna mala Ɓakuli na.

³⁵Nǝ dǝmbari ɗiɗyal, ban malaká fa pepe ɗang, Yesu puri ɓa la o aban mǝnana kǝɓwa pà kàm raka, kya pak hiwi.

³⁶Shiman andǝ aɓi à puro aban alte.

³⁷Lang à kya kumǝni ka, à ne wi ama, “Koyana le ka nda ban alto!”

³⁸Yesu earia wia ama, “Wu fa sǝm nǝ̀ kánì arǝ acili amuna-là mana akani tu ka. Mǝ nǝ ngga hamnǝ Cau Amsǝban kam gbal, acemǝnana nda kǝgir mǝnana yinǝ mim ngga.”

³⁹Pǝlǝa gya aɓa nzali Galili kat, kutio arǝ andakpapi malea aban hamnǝ Cau Amsǝban, sǝ kǝ pusǝ akukwar arǝ aɓwana.[7]

⁴⁰Ɓe ɓwa mǝdakali yiu yi kūndǝo a ɓadǝm Yesu, zǝmbǝi wi ama, “Ɓǝ̀ a nǝ ear ka, a nǝ gandǝ twalam ban mǝnia yì kwano ka ɓǝ̀ rǝam ɓoarnsari.”

⁴¹Mǝsǝswatǝr bwal Yesu kǝrkǝr, pǝlǝa lǝmndǝ bui jena rǝì nǝi, ne wi ama, “Ən earǝna, ɓǝ̀ rǝo mala!”

⁴²Àkǝ̀ banì kara dakali malǝna, rǝì ɓoarnansari.

⁴³Yesu ne wi cau nunkiri, pǝlǝa tasǝi ɓǝ̀ o.

⁴⁴Ne wi ama, “Kǝa ne kǝɓwa ce ɗang. A kun mani ka, kutio kya lǝmndǝ ɓamuro aban pǝris ɓǝ̀ pelǝkio. Sǝ ace mǝnana ɓǝ̀ ko yan ngga ɓǝ̀ sǝlǝ ama rǝo malǝna ka, kyane kya pa ɓoro-bu a Ndàmǝgule kǝla mǝnana Musa kasǝa ace sonzǝo mala rǝo ka.”[8]

⁴⁵Sǝa ma lang purna ka, kara tita mesǝ ce a koya ban ngga. Gir nî tsǝa Yesu gandǝ kutio a ɓe kǝ la a ɓamǝsǝ aɓwana ɗang, ak rǝì arǝ aban mǝnana kǝɓwa pà kàm raka. Kat andǝ amani ka, ɓwapǝndǝa pur a koya ban ngga aban yiu abani.