Read mbula bwazza Markus 14 Bible Online

Markus 14 - mbula bwazza bible

Markus 14

¹Anongŋo ɓari a dǝm Lamsan mala Yalimuru andǝ Lamsan mala Bǝredi mǝnana Yis pa a rǝì raka, agbani pǝris andǝ amalǝm Nggurcau mala Musa ka, à nda ban alta njar aɓa sǝmbǝrǝa, mǝnana à nǝ̀ bwalǝna Yesu nǝi à nǝ̀ wal-luí ka.[91]

²À eare ama, “Ɓǝ̀ kǝa pa a pwari pakiɗire ɗang, ɓǝ̀ ana raka ɓwapǝndǝa nǝ̀ lo arǝ sǝm.”

³Aɓa mǝno anggo ka Yesu na aɓa Betani, nda aban lili a ɓala mala Shiman mǝnana mǝdakali na ɗiɗyal ka. Ɓe mɓwama kutio nǝ muna-bang mǝnana à ɓe nǝ tali alabasta ka, nǝ muru mǝ'rǝmɓoarne a ɓalǝi, mǝnana boale pa bǝti raka. Muruì ka nard[92] na nǝmurǝì à zurǝi andǝ kǝgir ɗang. Mɓwama man yi ɓun girkun muna-bang pǝlǝa solǝì Yesu muruì a ɓamuri.[93]

⁴Aɓea aɓwana mǝnana ata Yesu aban li ka, bumia kiɗiki, à ne a rǝarǝia ama, “Ace mana sǝ à kiɗiki muru mǝnia ka anggo?

⁵Acemǝnana mǝnia yì muru ka à nǝ̀ gandǝ me amur gir mǝnana kuti boalo dinari gbǝman tārú, sǝ boale ka à nǝ̀ gakia amǝtǝr!” À munǝki arǝ mɓwama mǝno kǝrkǝr.

⁶Sǝ Yesu ka na ama: Wu ɗeki mɓwama man ɗǝong. Ace mana sǝ wu kǝ peki le? Yì ka, pangŋǝnam gir mǝɓoarne.

⁷Wu nda a tarǝ wun wunǝ amǝtǝr pwari-pwari. Wu nǝ̀ gandǝ pakkia wia pepe ko aya pwari bum wun kànì ka. Sǝ mim ngga, pà wu nǝ̀ kumam ko aya pwari ka ɗang.[94]

⁸Yì ka, pangŋǝna gir mǝnana gandǝi ka, ak dǝmbǝa soapam muru a nggūrǝam, acau mala cem a ɓembe.

⁹Ɓafo, ǝn nggǝ bangga wun, ɓǝ̀ aya ban a ɓanza kat mǝnana à nǝ̀ hamnǝ Cau Amsǝban nggam ngga, gir mǝnana mǝnia yì mɓwama pe ka, à nǝ̀ ɗenyi nǝi, à nǝ̀ na ce.

¹⁰Pǝlǝa Yahuda Iskariyoti, mwashat aɓalǝ alaggana mana lum-nong-ɓari ka, puro wario aban agbani pǝris, nǝ̀ ngga mak Yesu.

¹¹Banɓoaria agbani pǝris nǝ ok mǝnia yì cau ka, pǝlǝa à eare ama à nǝ̀ pe wi boalo. Yì gbal ka tita alta njar mǝnana nǝ̀ pea wia Yesu nǝi ka.

¹²Nda a pwari mǝnana à tinata Lamsan mala Bǝredi mana Yis pa a rǝì raka, kǝ pwari mǝnana à kasǝkiyi meal mǝgam mala Lamsan Yalimuru nǝi ka. Alaggana mala Yesu ɗi ama, “Aya ban sǝ a kǝ earce ɓǝ̀ sǝm nggea gilǝkio ban ace li girlina Yalimuru?”

¹³Pǝlǝa tasǝ aɓea alaggana male ɓari, nea wia ama, “Wu kya a nggea-la, ɓǝ̀ wu nǝ̀ ngga kuti ka, wu nǝ̀ gasǝ wunǝ ɓe ɓwabura nǝ bàng-mùr a kwari, wu kya ate.

¹⁴Ɓǝ̀ aya ɓala sǝ kuti ka, wu ne mǝtala ɓalae ama, ‘Malǝm kǝ ɗiban ama, kurǝm mala abǝri mǝnana mǝ nǝ li girlina Yalimuru kam sǝnǝa alaggana mem ngga ndake?’

¹⁵Nǝ̀ lǝmndǝa wun kurǝm kuli mǝgule, mana à gilǝkina ɓālǝi pepe ka. Wu kya pakka sǝm girlina kam.”

¹⁶Pǝlǝa alaggane o, à kya kutio a nggeale, sǝ à kya kum agir kǝla mǝnana Yesu nea wia ka, sǝ à pak girlina Yalimuru kam.

¹⁷Nǝ pwari kpǝra ka, Yesu yiu andǝ alaggana male mana lum-nong-ɓari ka.[95]

¹⁸Lang à yì dumǝna aban li ka, Yesu na ama, “Ɓafo, ǝn nggǝ bangga wun, ɓwa mwashat aɓalǝ wun aban li atam, nǝ̀ ngga mem.”

¹⁹Bumia kiɗiki, sǝ koyan aɓalǝia ka ɗi ama, “Mǝ nda le?”

²⁰Yì ka, earia wia ama, “Mwashat aɓalǝ wun lum-nong-ɓari, mǝnana kǝ oasǝ bui atam ado a kwar ka, nda.

²¹Muna mala Ɓwa ka nǝ̀ wu púp, kǝla mana à gilǝì amuri aɓa Malǝmce ka. Sǝa ma, caukwanban na nǝ ɓwa mǝnana nǝ̀ mak Muna mala Ɓwa ka! Nǝ̀ ɓoaribanì, yi mǝnana mǝnia yì ɓwa ka à ɓǝli raka!”

²²Lang à nda amur li girlina ka, Yesu twal bǝredi, sǝ pak yàwá, sǝ ɓwani, pea alaggana male, nea wia ama, “Wu é wu she, nggūrǝam ma.”

²³Pǝlǝa twal kwap, pak yàwá, sǝ pea wia, à nu àkǝ̀ ɓālǝi yia kat.

²⁴Pǝlǝa nea wia ama, “Mǝnia ka nda nkilem mana à sukki ace aɓwana pas ka. Nda nkila mana tsǝkiyi bǝsa kurcau mǝnana Ɓakuli pangnǝ aɓwana male, aɓa turo ka.[96]

²⁵Ən nggǝ na wun ɓafo, pa mǝ nǝ nu mur ɓǝlanggun anap man ɗǝm ɗang, she a pwari mǝno, mǝ nǝ nui bǝshe a domurǝm mala Ɓakuli ka.”

²⁶Anzǝm mana à tuna nggyal ka, à puro à o a Nkono Olif.

²⁷A njar aban o ka Yesu nea wia ama, “Wun kat wu nǝ̀ ɓangŋa wu nǝ̀ nyem, acemǝnana à gilǝa a muram aɓa Malǝmce ama, “ ‘Ɓakuli nǝ̀ wal yalgir, sǝ anzur ka à nǝ̀ mesǝke.’[97]

²⁸Sǝa ma anzǝm mǝnana ǝn longŋǝni ɓembe nǝ yilǝmu ka, mǝ nǝ aka wun dǝmbǝa aban ká a Galili, sǝm nǝ̀ ngga je kam.”[98]

²⁹Bitǝrus pǝlǝi wi ama, “Ko ɓǝa aɓwana kat à nǝ̀ ɓangŋa à nǝ̀ nyio ka, mem ngga pà mǝ nǝ ɓang ɗang!”

³⁰Yesu ne wi ama, “Ɓafo, ǝn nggǝ no ama, yalung, nǝ bu du mǝnia ka, kaniama ɓǝ̀ nggu ɓua kuni ɓari ka, we nǝ nggearǝo a nǝ makgirem kusǝ tārú ama, a surǝam ɗang.”

³¹Bitǝrus ɓinǝcau kpekpe ama, “Ko ɓǝa na ama dupǝnam púp ama mǝ wu sǝnǝ we ka, pà mǝ nǝ makgir surǝo ɗang.” Acilia alaggana kat gbal ka à na kǝ cau mǝ'mwashati.

³²Pǝlǝa Yesu andǝ alaggana male o a ɓe kǝ ban nakam à tunǝki ama Gefsemani aɓalǝ anggun olif. Yesu ne alaggana male ama, “Wu duk kani, mǝ nǝ ngga pak hiwi.”

³³Twal Bitǝrus, andǝ Jemis, andǝ Yohana ate, sǝ tita bumkiɗikea kǝrkǝr, ban pakki wi ɓa.

³⁴Pǝlǝa nea wia ama, “Yilǝmem na aɓa tanni kǝla ɓǝ̀ puri rǝam. Wu duk kani nǝ mǝsǝ wun atam.”

³⁵Kutio o a dǝmbǝa anggo, kya kpa nzali, sǝ pak hiwi ama ɓǝ̀ nǝ̀ gandǝnǝ pa ka, pwari tanni mǝnana kǝ yiu ka ɓǝ̀ sharibani.

³⁶Na ama, “Dâ[99], gir kat abano ka kǝ gandǝ pa. Ən nggǝ zǝmbǝo, gǝsham mǝnia yì kwap mala tanni ka. Kat andǝ amani ka, ɓǝ̀ kànì mala ɓabumo ɓǝ̀ pa, mem na ɗang.”

³⁷Pǝlǝa nyare yiu aban alaggana male yi kumia ka à nda a ntulo. Ne Bitǝrus ama, “Shiman, a nda ntulo le? A pà nǝ gandǝ do nǝ mǝsǝo atam ko bu-pwari mwashat ɗang?

³⁸Wu dum nǝ mǝsǝ wun, wu pak hiwi, ace mǝnana ɓǝ̀ wu kǝa kutio aɓa karǝkiban ɗang. Bangŋo ka earǝna, sǝ nggūrǝu ka, yauwiki.”

³⁹Yesu nyar ɗǝm a kusǝì, o kya pak hiwi; ɓǝsǝlǝ kǝ cau mǝ'mwashati.

⁴⁰Lang nyare yiu aban alaggana male ka, yi kumia ɗǝm a ntulo, acemǝnana mǝsǝia dǝmbǝrikina. À surǝ cau mǝnana à nǝ̀ ne wi ka ɗang.

⁴¹Lang nyar abania tāruia ka, banggia wia ama, “Wu nda a ntulo piu aban usǝlǝo le? Karǝna! Pwari pangŋǝna! Wu sǝni, Muna mala Ɓwa ka à mangŋǝni aban amǝ'cauɓikea.

⁴²Wu lo, ɓǝ̀ sǝm o! Mǝ'mem ngga, ndya kǝ yiu ka!”

⁴³Anggo kun Yesu malaká pwal ɗang, Yahuda, mwashat aɓalǝ aman lum-nong-ɓari ka nǝ̀ yia tusǝo. Ndanǝ aɓwana ate pas nǝ akafe andǝ agbǝlang gara abuia, aɓwana mana agbani pǝris, andǝ amalǝm Nggurcau mala Musa andǝ aɓwana-mǝgule tasǝia ka.

⁴⁴Ɓwa mǝnana me, yì Yahuda ka, angŋa dǝmbǝa kanǝnìa wia ama, “Ɓwa mǝnana mǝ nǝ kùrrì zǝp ka, nda kǝ ɓwe. Wu bwali, wu ta bui kàngkàng, wu um nǝi.”

⁴⁵Yiu mala Yahuda ka yi kuti nǝ kutio aban Yesu, ne wi ama, “Malǝm!” Sǝ kùrrì zǝp.

⁴⁶Pǝlǝa acilia aɓwana mǝno yi gbami Yesu à bwali taptap.

⁴⁷Sǝ ɓeɓwa mwashat aɓalǝ aɓwana mǝnana ata Yesu ka, kwetǝ kafe male, kwarǝna guro mala pǝris mǝgule nǝi, kasǝ kiri kpat.

⁴⁸Pǝlǝa Yesu nea wia ama, “Wu yiu nǝ akafe andǝ agbǝlang gara ace bwalam kǝla mǝ nda mǝɓǝmbǝriban?

⁴⁹Ko aya pwari ka mǝ nda sǝnǝa wun, aban kanigir aɓa Ndàmǝgule mala Ɓakuli, mana tsǝa sǝ wu bwalam ɗang? Sǝa ma mǝnia ka pa anggo acemǝnana ɓǝa lumsǝ cau mala Malǝmce.”[100]

⁵⁰Pǝlǝa alaggana male ɓangŋa, à ɗeki.

⁵¹Ɓe lagga nakam kǝ kpa atea a nzǝmo, yì ka, daura pa a rǝì ɗang, she kǝ girkumsǝo na mǝnana a rǝì ka. Aburana mǝno ɓariki ama à nǝ̀ bwali,

⁵²kara panzǝ lagir, ɓangŋa, um nǝ ɓate.

⁵³À warinǝ Yesu a ɓala mala pǝris mǝgule, ban mǝnana agbani apǝris, andǝ akapana, andǝ amalǝm Nggurcau mala Musa, yi ram nggam ngga.

⁵⁴Bitǝrus ka kpate kuko, kya kutio chatchat aɓa ɓala mala Pǝris Mǝgule. A kam ngga, kya do ata amǝyalban aban dandǝ rǝì a kun bǝsa.

⁵⁵Akano a ɓalǝi ka, agbani pǝris andǝ amǝɓashi mala amǝ Yahudi kat, à nda aban alta cau mǝnana nǝ̀ pur a kun Yesu mǝnana à nǝ̀ pangŋǝna turo nǝi ace wal-luí ka, sǝ ko à kum ɗang.

⁵⁶Aɓwana pas yi naki anyir amuri, sǝ kat andǝ amani ka, kunia yiu mwashat ɗang.

⁵⁷A masǝlǝate ka, aɓea aɓwana lo a came, a na mǝnia yì nyir ka amur Yesu, ama,

⁵⁸“Sǝm oe bangŋa ama, ‘Mǝ nǝ arki Ndàmǝgule mala Ɓakuli mǝnana a ɓe nǝ bu ka, sǝ anzǝm nongŋo tārú ka, mǝ nǝ ɓak ɓe mǝnana à ɓe nǝ bu raka.’ ”[101]

⁵⁹Ko a nggearǝ ɓa mani mǝno ka, kunia yiu ɗàngɗáng.

⁶⁰Pǝlǝa pǝris mǝgule lo came amuria, sǝ ɗi Yesu ama, “A pà nǝ bǝl kuno re? A panǝ cau mana a wu nǝ na amur acau mana à nakiyi a muro ka re?”

⁶¹Sǝ Yesu ka duk kuni piu, na kǝ cau ɗang. Nyare pǝris mǝgule ɗi ama, “A nda Kǝrǝsti, yì Muna mala Ɓakuli le?”

⁶²Yesu ear ama, “Mǝ nda! “Sǝ pà nǝ̀ sau ɗang wu nǝ̀ sǝn Muna mala Ɓwa aban do, a buno mala rǝcandǝa, a bu-mǝli mala Ɓakuli, aban yiu aɓalǝ apǝrɓang nǝ kuli.”[102]

⁶³Pǝris mǝgule kara bwal daura male sanni kǝr, ace lǝmndǝ karmuru male, sǝ ɗiban ama, “A yá ulang amǝnakun ɗǝm sǝm alkiyi tea?

⁶⁴Wu ongŋǝna cauɓana mǝnana ne amur Ɓakuli ka, sǝ mana wu na?” Yia kat ka à kasǝi ɓashi lú, ama karǝna ɓǝ̀ wú.[103]

⁶⁵Aɓea aɓwana atea à tita takki wi ntara a rǝì, à kur amǝsǝì, sǝ à tulki nǝ abuia, à na ama, “Bangga sǝm, ko yana walo!” Sǝ amǝyalban bwali à kwe a takiri, aban umne.

⁶⁶Bitǝrus ka nda piu nǝ nzali a banfana aɓa ɓala. Ɓe muna mɓwama, muna-ɓala mala pǝris mǝgule, yiu.

⁶⁷Lang nǝ̀ sǝn Bitǝrus aban do a kun bǝsa ka, sǝni kyap-kyap, sǝ ne wi ama, “We gbal ka a nda ata Yesu Ɓwa Nazarat!”

⁶⁸Bitǝrus pǝlǝa tǝmce, na ama, “Ən surǝ gir mǝnana a nakiyi cau amuri ka ɗang.” Pǝlǝ kusǝì ka puro nǝ kunɓala. Kara nggu ɓua.

⁶⁹Lang muna mɓwama, muna-ɓala sǝni kano ka, ne aɓwana mǝnana à cam abanì ka ama, “Mǝnia yì ɓwa ka, nda atea!”

⁷⁰Bitǝrus nyare tǝmce ɗǝm. Zuku ka aɓwana mǝnana à cam abanì ka, à ne Bitǝrus ama, “Mǝsǝcau, a nda aɓalǝia, acemǝnana a nda ɓwa Galili!”

⁷¹Bitǝrus ka kutia kángir ama, “Ɓǝ̀ suban yiu a muram ɓǝ̀ nyir na ǝn nakiyi ka; mǝnia yì ɓwa wu nakiyi ce ka ǝn surǝì ɗang!”

⁷²Banì sau ɗang, nggu ɓua ɓaria kuni. Kara ɓalǝ Bitǝrus kasǝ arǝ cau mǝnana Yesu ne wi ama, “Kaniama ɓǝ̀ nggu ɓua kuni ɓari ka, a nǝ bang kusǝ tārú ama a surǝam ɗang.” Sǝ Bitǝrus kpa ɓua.