Read mbula bwazza Markus 15 Bible Online

Markus 15 - mbula bwazza bible

Markus 15

¹Nǝ dǝmbari ɗiɗyal ka, agbani pǝris andǝ akapana, andǝ amalǝm Nggurcau mala Musa, andǝ amǝɓashi kat, à yì ear amur cau mwashat. À ta bu Yesu, à um nǝi aban Bilatus.

²Bilatus ɗi Yesu ama, “A nda murǝm mala amǝ Yahudi le?” Yesu eari wi ama, “E, kǝ ndo a ne ka.”

³Agbani pǝris yiu nǝ acau ɗàngɗáng amuri.

⁴Pǝlǝa Bilatus nyare ɗi ama, “A pa wu nǝ na kuno re? Mana a wu nǝ na amur mǝnia yì acau ɗàngɗáng à kǝ nea a muro ka!”

⁵Yesu nyare loasǝ kuni ɗǝm ɗang. Gir nî pe Bilatus ndali.

⁶A koya Lamsan Yalimuru ka, Bilatus kǝ panzǝ pursǝna mwashat mǝnana aɓwana zǝmbǝa ace ka.

⁷Ɓe pursǝna nakam lullǝi ama Barabbas, à kùrrì acemǝnana yì andǝ aɓea amǝ'candǝmuru ka, à wal lú a pwari zunggǝli mala la.

⁸Ɓwabunda kutio aban Bilatus, à yì zǝmbǝi wi ama, ɓǝ̀ pak gir mǝnana pakkiyia wia ka.

⁹Bilatus ɗiban ama, “Wu earce mǝ panzǝa wun Murǝm mala amǝ Yahudi le?”

¹⁰Yì ka, sǝlǝna ama, ace mwararǝu sǝ agbani pǝris yiu nǝ Yesu abani.

¹¹Sǝ agbani pǝris soakita ɓwapǝndǝa ama ɓǝa ne Bilatus ɓǝ̀ panzǝ Barabbas a kun Yesu.

¹²Bilatus pǝlǝa ɗia ama, “Sǝ mana ado mǝ pakki man yì ɓwa wu tunǝki ama murǝm mala amǝ Yahudi ka?”

¹³A lo gǝu ama, “Gballì a nggun-gangndi!”

¹⁴Bilatus ɗia ama, “Ace mana? Ya cauɓikea na pak le?” À nyare à loasǝ gia kǝrkǝr ama, “Gballì a nggun-gangndi!”

¹⁵Sǝ acemǝnana Bilatus earce ama nǝ̀ pwasǝ bumia ka, pǝlǝa panzǝia wia Barabbas. Tsǝa à kwak Yesu, pǝlǝa pea asoje mala amǝ Roma ɓǝa kya gballì a nggun-gangndi.

¹⁶Asoje um nǝ Yesu a palta a ban-mǝgule mala nggwamna, pǝlǝa à yì rambǝ acili asoje kat.

¹⁷À makki wi daura murǝm a rǝì, à marǝ mbulan nǝ zwe, à oasǝi wi a ɓamuri.

¹⁸Pǝlǝa à tita tunǝki ama, “Ɓǝ̀ rǝo pwalo, murǝm mala amǝ Yahudi!”

¹⁹À walki a ɓamuri nǝ gara. À tapi ntara, à kūndǝo amur ankunia kǝla à nda ban pe wi gulo.

²⁰Anzǝm mǝnana à pangŋǝni wi amǝnia yia agir oalban ngga, à swár daura murǝm mana à oasǝi wi ka, pǝlǝa à turi wi amale yì adaura. Sǝ à pusǝì aban ká gballe.

²¹Ɓe ɓwa Sayirin na ban kutio, lullǝi ama Shiman, tar a Alizanda andǝ Rufus,[104] pur nǝ muna-la aban yiu a nggeala. Asoje ci púp ɓǝ̀ twal nggun-gangndi mala Yesu.

²²À warinǝ Yesu aban mǝnana à tunǝki ama Golgota, ɓālǝi ama, “Ban mǝnana nda kǝla nkpoula Ɓamuru” ka.

²³À pe wi mùr-anap mana à zurǝì andǝ mǝr[105] ka ama ɓǝ̀ nu, sǝ ginǝki.

²⁴Pǝlǝa à gballì amur nggun-gangndi. À ko caca, à gaki agir-nggurǝu male.[106]

²⁵A bu-pwari tongno-nong-ine mala dǝmbari sǝ à gballì.

²⁶Cauɓikea mana à bangŋa ama pak ka, à gilǝì a kuli amuri arǝ nggun-gangndi ama: “MURƏM MALA AMƏ YAHUDI”

²⁷À gballì a tarǝia andǝ amǝ'ɓǝmbǝriban ɓari, man a bui mǝli sǝ man a bui mǝnggare.[107] [108]

²⁸

²⁹Aɓwana, amǝgya kutio kǝ sanggì, à kǝ piki muria, à kǝ na ama, “Kui! We ɓwa mǝnana a nǝ arki Ndàmǝgule mala Ɓakuli, sǝ a nǝ ɓe aɓa nongŋo tārú ka.[109]

³⁰Sulǝî mur nggun-gangndi, amsǝ ɓamuro!”

³¹Ana gbal sǝ agbani pǝris andǝ amalǝm Nggurcau mala Musa, à kǝ nakia rǝia akun oalban arǝ Yesu ama, “Amsǝ aɓwana, sǝ gandǝ amsǝ ɓamuri ɗang!

³²Ɓǝ̀ yì nda Kǝrǝsti, Murǝm mala amǝ Isǝrayila ka, ɓǝ̀ sulǝi mur nggun-gangndi adyan! Ɓǝ̀ sǝm sǝni, sǝ sǝm nǝ̀ paɓamur sǝm abani.” Aɓwana mǝnana à gballia andǝia ka, yia gbal ka à sanggì.

³³Lang pwari zǝkina ka, pǝndǝa yi gir ban kat bwal bu-pwari tārú mala pwarikpǝra.

³⁴Nǝ bu-pwari tārú mala pwarikpǝra ka, Yesu mǝn kuni bang ama, “Eloi, Eloi, lama sabatani?” Ɓālǝi ama, “Ɓakuli mem, Ɓakuli mem, palang sǝ a turam nzǝmo?”[110]

³⁵Lang aɓea aɓwana mana à cam abanì, à oe ka, à na ama, “Wu oe, nda ban tunǝki Iliya.”

³⁶Ɓe ɓwa ɓangŋa kya par soso aɓa mur-anap mǝhangŋe, sǝ ci a kun tondong, pǝlǝa lǝmndǝì Yesu ama ɓǝ̀ nu. Pǝlǝa ɓwe bangŋa ama, “Ɗeki, sǝm nǝ̀ sǝni, yakǝla Iliya nǝ̀ yiu nǝ̀ yia sulǝi.”[111]

³⁷Yesu mak'zwalo bang-bang, pǝlǝa yilǝmi puro.

³⁸Kara lagir mǝtangŋe mǝnana à kasǝna ban mǝfele nǝi, mana aɓa Ndàmǝgule mala Ɓakuli ka, san aɓalǝu ɓari, twal a kuli yi zur a nzali.[112]

³⁹Ɓwamǝgule mala asoje mǝnana came pǝlǝ ɓamǝsǝi nǝ ban Yesu ka, lang ok ɓua mala Yesu, sǝ sǝn wu male ka, bangŋa ama, “Ɓafo, mǝnia yì ɓwa ka, Muna mala Ɓakuli na!”

⁴⁰Aɓea amamǝna cam abanì zak, à kǝ sǝnban. Maryamu Ɓwa Magdala, Maryamu nggea Jemis mǝkyauwe andǝ Yisǝfu, sǝ Salomi à nda aɓalǝ amamǝne.[113]

⁴¹A Galili ka, amǝnia yia amamǝna ka, à nda à pakki Yesu gbasha ka. Aɓea amamǝna mǝnana à yiu a tarǝia a Urǝshalima ka à ndakam gbal.

⁴²Agir mǝnia ka, à yì pa a pwari Jumma, mǝnana nda pwari gilǝrǝu ace pwari Sabbat, pwari usǝlǝo ka, nǝ pwarikpǝre.

⁴³Yisǝfu ɓwa Arimatiya, mana nda aɓalǝ amǝkurcau mala amǝ Yahudi, sǝ yì nǝ ɓamuri ka, ndaban kundǝ yiu mala domurǝm mala Ɓakuli ka, wario nǝ mǝsǝkang-kangŋa aban Bilatus, kya zǝm lú Yesu.

⁴⁴Lang Bilatus ongŋǝna ama Yesu wuna ka, gir nî pe wi ndali. Pǝlǝa tunǝ ɓwamǝgule mala asoje ɗi ko Yesu wuna.

⁴⁵Lang ongŋǝna a kun ɓwamǝgule mala asoje ama Yesu wuna ka, pǝlǝa pe Yisǝfu lú Yesu.

⁴⁶Yisǝfu pǝlǝa kúr anggurbyau tsǝkban, yiu yi sulǝ lú, marǝki nǝ anggurbyau, sǝ ci a ɓembe mǝnana à tǝmi a bum tali ka. Ramta tali girna kuni nǝi.

⁴⁷Maryamu Ɓwa Magdala andǝ Maryamu nggea Yisǝfu sǝn ban mǝnana à ci kam ngga.