Read mbula bwazza Markus 16 Bible Online

Markus 16 - mbula bwazza bible

Markus 16

¹Lang Sabbat, pwari usǝlǝo kutina ka, Maryamu Ɓwa Magdala, andǝ Maryamu nggea Jemis, andǝ Salomi, à kúr muku ɓǝlanggun mǝɓoarne ace mǝnana à nǝ̀ ká à nǝ̀ hasǝi lú Yesu ka.

²Nǝ dǝmbari ɗiɗyal a pwari Ladi, pwari nǝ̀ eau ani ka, à bwalǝna njargula aban ká a ɓembe.

³Pǝlǝa à kǝ ɗiki rǝarǝia ama, “Yana nǝ̀ gǝsha sǝm tali mǝnana a girna kun ɓembe nǝi ka?”

⁴Lang à nǝ̀ loasǝ mǝsǝia ka, kara à sǝn nggea tali mǝgule man ngga à gǝshini.

⁵À nǝ̀ kutio a ɓembe ka, à sǝn ɓe lagga nǝ daura mǝpwasǝe dumǝna ata bu-mǝli. Ɓangciu pakkia wia.

⁶Pǝlǝa nea wia ama, “Wu kǝa ɓang ɗang. Wu nda ban sǝnban Yesu Ɓwa Nazarat, mǝnana à gballì ka. Longŋǝna! Pa kani ɗang. Wu sǝn ban mǝnana à nongsǝi kam ngga.

⁷Ado ka wu kyane wu kya ne alaggana male andǝ Bitǝrus ama nda nǝ̀ aka wun dǝmbǝa ká a bu-nzali Galili. Akano ka wu nǝ̀ ngga sǝni, kǝla mǝnana na wun ngga.”[114]

⁸Amamǝna man puro à nying ɓembe nǝ mire aban o nǝ rǝɓǝla, ban pakkia wia ɓa. À ne kǝɓwa ce ɗang, acemǝnana ɓangciu pakkia wia.

⁹[Lang Yesu longŋǝna nǝ yilǝmu a pwari Ladi ka, yi pusǝrǝi aban Maryamu Ɓwa Magdala mǝnana pusǝ akukwar tongno-nong-ɓari a rǝì ka.

¹⁰Pǝlǝa wario kya ne aɓwana mǝnana à nda te ɗiɗyal, lang à nda ban ɓua, à nda rǝ pak bumkiɗikea ka.

¹¹Sǝa ma lang à o ama Yesu na nǝ yilǝmu, sǝ yì, yì Maryamu ɓwa Magdala sǝnǝni ka, à ear ɗang.

¹²Anzǝm man ngga, Yesu yi pusǝrǝi aban aɓea alaggana male ɓari nǝ ɓamǝsǝu mǝnana à surǝì nǝi raka, aban ká aɓe muna-la.

¹³À nyare à yì ne aɓea, sǝ yia gbal ka à eare ama mǝsǝcau na ɗang.

¹⁴Nǝ nzǝmo ka Yesu yi pusǝrǝi aban alaggana man lum-nong-mwashat ka aban li girlina a tarǝia. Pǝlǝa nunkiria ace ɗwanyi earnǝ cau andǝ murcandǝa malea mǝnana à ɓinǝ akcau mala aɓwana mǝnana à sǝni anzǝm loapi ɓembe male ka.

¹⁵Pǝlǝa nea wia ama: Wu kyane aɓa ɓanza kat, wu hamnǝ Cau Amsǝban aban ɓwapǝndǝa kat.[115]

¹⁶Ɓwa mǝnana ak Cau Amsǝban, paɓamuri, sǝ à pakki wi batisǝma ka, nǝ̀ auwa, sǝ ɓwa mǝnana ɓinǝ ak Cau Amsǝban, paɓamuri raka, ɓashi nǝ̀ sulǝ amuri.

¹⁷Aɓwana mǝnana à paɓamuria abanam ngga, amǝnia yia agir'lǝmndǝa ka à nǝ̀ kpatea: Aɓa lullǝam à nǝ̀ pusǝ akukwar, à nǝ̀ nakia cau nǝ abǝsa kun.

¹⁸À nǝ̀ kpa an'yau nǝ buia, sǝ ɓǝa nu barya ka, pà nǝ̀ pakkia wia kǝgir ɗang. À nǝ̀ tsǝk buia amur amǝkwano, sǝ amǝkwano ka rǝia nǝ̀ kum rǝcandǝa.

¹⁹Anzǝm mǝnana Mǝtalabangŋo Yesu nania cau ka, kara à twali à um nǝi a kuli, kya do a bu-mǝli mala Ɓakuli.[116]

²⁰Pǝlǝa alaggana male puro à oa hamnǝ cau a koya ban ngga. Mǝtalabangŋo pak turo nǝia sǝ tsǝa aɓwana earnǝ cau malea nǝ agir-ndali mǝnana à kǝ gyata ce ka.]