Read mbula bwazza Markus 5 Bible Online

Markus 5 - mbula bwazza bible

Markus 5

¹Yesu andǝ alaggana male yi eauwe a nkaring nggeamur, a bu-nzali mala amǝ Gerasin.

²Yesu nǝ̀ eapi waru ani ka, ɓeɓwa nǝ kukwar aɓa nyami pur nǝ ɓalǝ aɓembe, yi kasǝa kuni.

³Mǝnia yì ɓwa ka, aki rǝì a nreka aɓembe. Kǝ ɓwa gandǝ bwale kùrrì dumsǝi aban mǝ'mwashati ɗang, ko ɓǝ̀ a nsolo sǝ à oasǝi ka.

⁴Kusǝ pas pak ka à nǝ̀ taka abui andǝ akusǝi nǝ nsolo andǝ anko, sǝa ma nǝ̀ ɓunggia gucik-gucik. Kǝ ɓwa pà kàm nǝ rǝcandǝa bwale ɗang.

⁵Du andǝ pwari ndaban gali a nreka aɓembe andǝ mur ankono, kǝ makki'zwalo, sǝ kǝ canggi rǝì nǝ atali.

⁶Lang mǝsǝì nǝ̀ kpa arǝ Yesu kuko ka, kara sarǝa a mire, kya kūndǝo amur ankuni a ɓadǝmbǝi.

⁷Mak'zwalo bang-bang na ama, “Yesu, Muna mala Ɓakuli mana Karban Kat ka! Mana a kǝ earce pak nǝ mim? Ən zǝmbǝo nǝ lullǝ Ɓakuli ama kǝa pam tanni ɗang!”[20]

⁸Bangŋa anggo acemǝnana Yesu angŋa dǝmbǝa nani wi ama, “We bangŋo mǝɓane, puri ɓa rǝ ɓwa mǝnia ka.”

⁹Pǝlǝa Yesu ɗi bangŋo ama, “Lullǝo a mana?” Eare ama, “Lullǝam nda pas, acemǝnana sǝm nda pas aɓa rǝ ɓwa mǝnia ka!”

¹⁰Pǝlǝa abangŋo mǝɓane mǝnana a rǝ ɓwabure ka à camarǝ ɓuaki arǝ Yesu ama ɓǝ̀ kǝa pǝria ɓǝa ɗeki mǝno yì bu-nzali ka ɗang.

¹¹Àkǝ̀ bania tu a pal nkono ka, atǝmbǝrǝm-ɓala na kam pas aban likiali.

¹²Abangŋo mǝɓane zǝmbǝi Yesu ama, “Eara sǝm ɓǝ̀ sǝm kutio arǝ atǝmbǝrǝm-ɓala.”

¹³Yesu eari wia ɓǝa kyane. Pǝlǝa abangŋo mǝɓane man puri rǝ ɓwabure, à kya kutio aɓa nyam atǝmbǝrǝm-ɓala. Sǝ kara atǝmbǝrǝm-ɓala yia kat, mǝnana lakki malea na á-ɓari ka, à giɓi nǝ mire a pal nkono à kya ɓunno a kun gwanyi mǝdāre, à sukkio aɓa nggeamur, à ko kat abanì.

¹⁴Amǝyal atǝmbǝrǝm-ɓala ɓangŋa à kya na ce a la andǝ amuna-là aɓa bu-nzali banì. Ɓwabunda puro yiu a sǝn gir mǝnana kumban ngga.

¹⁵Lang à yina aban Yesu ka, à yì kum ɓwa mǝnana nǝ akukwar a ɓa'nyami ɗiɗyal ka dumǝna nǝ agir-nggurǝu a rǝì, nyarǝna aɓa ɗenyicau male pepe. Gir nî pea wia ɓangciu kat.

¹⁶Aɓwana mǝnana à sǝn gir nî mana kumban ngga, à kani aɓwana ce puro mala akukwar andǝ gir mana kum atǝmbǝrǝm-ɓala ka.

¹⁷Pǝlǝa aɓwana tita ɓuaki arǝ Yesu ɓǝ̀ puri bu-nzali malea.

¹⁸Lang Yesu na aban eauwe a waru ka, ɓwa mǝnana a pusǝî wi akukwar a rǝì ka yiu yi zǝmbǝi wi ama nǝ̀ o ate.

¹⁹Yesu eari wi ɗang, ne wi ama, “O a ɓala, aban aɓwana mo, kya banggia wia ce turo mǝgule mǝnana Mǝtalabangŋo pakko, andǝ ɓwamuru mǝnana lǝmndǝo ka.”

²⁰Pǝlǝa ɓwabure kutio o, kǝ hamnǝ ce nggea turo mǝgule mǝnana Yesu pakki wi ka, arǝ ala lum mǝnana à tunǝkia ama Dekapolis ka. Ɓwapǝndǝa mǝnana ok mǝnia yì cau ka, a ndali.

²¹Yesu andǝ alaggana male eauwe a waru a nyare a ɓe nkaring nggeamur. Lang à yì kpashi ka, ɓwabunda yi rambǝa à kàrǝì, a kun nggeamur.

²²Ɓe ɓwamǝgule mala ndakpapi, lullǝi ama Jarus, yiu abani. Nǝ̀ yia sǝn Yesu ka, pǝlǝa kpa a ɓadǝmbǝi,[21]

²³ɓuakia rǝì kǝrkǝr ama, “Muna-ɓwama mem ngga rǝì eari wi ɗang, mala nǝ̀ wu. Ən nggǝ zǝmbǝo, yiu yi tsǝk buo a rǝì; twali wi ban rǝkwana male, ɓǝ̀ auwa!”[22]

²⁴Yesu pǝlǝa wario ate. Ɓwapǝndǝa pas kana aban ká ata Yesu, gandǝa à kǝ nggiki.

²⁵Ɓe mɓwama na kam aɓalǝ aɓwana, mǝnana apǝlǝkia lum-nong-ɓari nkila na aban sukkio a rǝì.

²⁶Kat andǝ amani ama amǝ sonzǝo pas pe wi ɓuri, mal gǝna male kat ata ɓuri ka, ko rǝì mal ɗang; kara rǝpangŋa male kǝ kánǝká a dǝmbǝa nǝ ɓike.

²⁷Lang ongŋǝna ce Yesu ka, pǝlǝa yiu yi kar nǝ nzǝmi aɓalǝ aɓwana sǝ je daura male,

²⁸nǝ ɗenyicau a ɓabumi ama, “Ko ɓǝ̀ daura male na ǝn je ka, rǝam nǝ̀ mala.”

²⁹Àkǝ̀ banì kara sukkio mala nkila male kasǝa. Sǝ oè gbal a rǝì ama rǝì malǝna, à panzǝni aɓa tanni.

³⁰Anggo ka kara Yesu sǝlǝ ama rǝcandǝa purna a rǝì. Pǝlǝ rǝì aban ɓwabunda, sǝ ɗiban ama, “Yana je daura mem?”

³¹Alaggana male eari wi ama, “A kǝ sǝn ɓwapǝndǝa mana kǝ nggikio ka, a nyare a ɗiban ama, ‘Yana jem le?’ ”

³²Yesu lidǝmbǝa nǝ sǝnban ɓwa mǝnana pak mǝnia yì gir ka.

³³Mɓwama man sǝlǝna rǝ gir mǝnana kumi ka, puro yiu nǝ ɓangciu yi kpa a ɓadǝmbǝi, nǝ rǝɓǝla, bǝli wi mǝsǝcau kat.

³⁴Yesu ne wi ama, “Munem, guliarǝu mo a rǝam twalǝno ban rǝkwana. O aɓa rǝpwala. Tanni mo malǝna.”[23]

³⁵Kun Yesu malaká pwal ɗang, aɓea ɓwana mǝnana à pur nǝ ɓala mala Jarus, ɓwamǝgule mala ndakpapi ka, à nǝ̀ yia tusǝo. À yì ne wi ama, “Munio pangŋǝna lú, kǝa pe Malǝm tanni ɓa ɗang.”

³⁶Yesu tsǝkia wia kir ce ɗang, pǝlǝa ne ɓwamǝgule ndakpapi ama, “Cala ɓangciu pakko ɗang. Makɓalǝo a rǝam.”

³⁷Pǝlǝa Yesu tamsǝ ɓwabunda. Eari kǝɓwa ɓǝ̀ kya ate ɗang, she Bitǝrus, andǝ Jemis sǝ Yohana, mǝ'eam Jemis.

³⁸Lang à bingŋǝna ɓala mala Jarus, yì ɓwamǝgule ndakpapi ka, Yesu kya kum ban ngga zurina kǝrkǝr nǝ loasǝban mala ɓwapǝndǝa aban ɓua andǝ makki'zwalo.

³⁹Yi kutio a ɓala, pǝlǝa ɗia ama, “Mana pur arǝ wun sǝ wu kǝ ɓua, wu mesǝke ani watsak? Muna ka wu ɗang, nda a ntulo!”

⁴⁰Kara à oali nǝ oalo. Yesu pǝlǝa pǝria pusǝia a nza kat, sǝ tunǝ tar muna andǝ ngge, andǝ alaggana male mǝnana ate ka, à kutio aɓa ndà aban mǝnana muna nong nggam ngga.

⁴¹Kya bwali a garabui sǝ ne wi ama, “Talita kum!” Ɓālǝi ama, “Muna-ɓwama, lo!”[24]

⁴²Kara mǝnia yì muna-ɓwama, mǝnana apǝlǝa male na lum-nong-ɓari ka, lo sǝ tita gya! Ko yan ngga ndali kǝrkǝr.

⁴³Yesu tsǝkia wia nzongcau mǝcande ama ɓǝa kǝa ne kǝɓwa ce ɗang. Pǝlǝa banggia wia ɓǝa pe muna-ɓwame girlina ɓǝ̀ li.[25]