Read mbula bwazza Luka 1 Bible Online

Luka 1 - mbula bwazza bible

Luka 1

¹Aɓwana pas twalî ɓamuria à nǝ̀ gilǝ cau amur agir mǝnana Ɓakuli pea aɓalǝ sǝm ngga.

²Cau mǝnana à gilǝ ka nda kǝ̀ mǝnana à oe a kun aɓwana mǝnana à sǝn agir nì nǝ mǝsǝia a nggea dǝmbe, sǝ à hamnǝ ce ka.

³Ace mani ka, we Ɓwamǝgule Tiyofulus, ǝn bǝl atǝ́r ace pepe, sǝ ǝn sǝni ka ɓoaro ɓǝ̀ ǝn gilǝo wia kǝla mǝnana à kwaɗi rǝia ka.

⁴Ən pak mǝnia ka ace mǝnana wu surǝ mǝsǝcau mala agir mǝnana à kanio ka.

⁵A do'nza mala Hirǝdus, murǝm mala nzali Yahudi ka, ɓe pǝris nakam lullǝi ama Zakariya a bui mala Abija. Mami ka lullǝi ama Alisabatu; yì gbal ka nda a tau mala Haruna.

⁶Yia kǝm ngga amǝ'ɓealɓoarna na a ɓadǝm Ɓakuli. À kǝ kpata anzongcau andǝ angguracau mala Mǝtalabangŋo, à eare ama à nǝ̀ ɓwarkio àkǝ̀ ɓè ɗang.

⁷Sǝ yia ka ko à pànǝ muna ɗang, acemǝnana Alisabatu ka nkombi na, sǝ yia kǝm ngga à ena.

⁸A ɓè pwari mwashat Zakariya na ban pak turo male mala Pǝris a ɓadǝm Ɓakuli, aɓalǝ anonggeo mǝnana tau malea na nǝ turo ka.

⁹A kane mala kuncau mala turo pǝris ka, Zakariya na twalban kpa amuri nǝ̀ kutio aɓa Ndàmǝgule mala Ɓakuli nǝ̀ loasǝ yele-mǝ'rǝm-ɓoarne, ace pa ɓoro aban Ɓakuli ka.

¹⁰Lang pwari loasǝ yele ace pa ɓoro aban Ɓakuli karǝna ka, ɓwapǝndǝa rambǝa a nza aban pak hiwi.

¹¹Mǝturonjar mala Ɓakuli yi pusǝrǝi abani, cam nǝ bu-mǝli mala gyangŋan mala loasǝ yele-mǝ'rǝm-ɓoarne.

¹²Lang Zakariya loasǝ mǝsǝì sǝni ka, ɓangciu pakki wi, yàl hǝrkit.

¹³Pǝlǝa mǝturonjar ne wi ama: Zakariya, ce a ɓang ɗang! Ahiwi mo ka Ɓakuli ongŋǝnia, mamo Alisabatu nǝ̀ ɓǝlô muna sǝ a wu nǝ pe wi lullǝu ama Yohana.

¹⁴Bumo nǝ̀ pwasǝo, a nǝ dum nǝ banɓoarnado, sǝ aɓwana pas ka bumia nǝ̀ pakiɗire ace ɓǝle.

¹⁵Mǝnia yì muna ka, nǝ̀ duk ɓwamǝgule a ɓadǝm Mǝtalabangŋo. Ɓǝ̀ kǝa nu mba ko ɓe kǝgir mǝnana nǝ̀ walban ngga ɗang. Yì ka, nǝ̀ lumsǝ nǝ Bangŋo mala Ɓakuli, a bum ngge.[1]

¹⁶Nǝ̀ tsǝk amǝ Isǝrayila pas à nǝ̀ nyare aban Mǝtalabangŋo Ɓakuli malea.

¹⁷Nǝ̀ aki Mǝtalabangŋo dǝmbǝa, nǝ̀ pak turo aɓa bangŋo andǝ rǝcandǝa, ulang mala Iliya mǝɓangna mala Ɓakuli. Nǝ̀ yinǝ dotarǝu mala atárru andǝ amunia. Nǝ̀ nyesǝ amǝ'mgbikiru ɓǝa kum sǝlǝe mala amǝ ɓealɓoarna, ace tsǝk aɓwana ɓǝa gilǝki rǝia ace yiu mala Mǝtalabangŋo.

¹⁸Pǝlǝa Zakariya ɗi mǝturonjar ama, “Lang sǝ mǝ nǝ sǝlǝ ama gir mǝnana a bang ngga anggo sǝ nǝ̀ pa? Acemǝnana mim ngga ǝn ena, sǝ mamam gbal ka ena.”

¹⁹Mǝturonjar eari wi ama, “Mǝ nda Jibǝrayilu mǝnana camnggiyi a ɓadǝm Ɓakuli ka. Ɓakuli tasǝam ɓǝ̀ ǝn yi banggo mǝnia yì cau mǝɓoarne ka.[2]

²⁰Sǝ ado ka, acemǝnana a earnǝ cau mem raka, mǝnana nǝ̀ yia duk mǝsǝcau a pwari male ka, kuno girna; a pa wu nǝ na cau ɗang, she pwari mǝnana amǝnia yì agir dumǝna mǝsǝia ka.”

²¹Anggo ka, ɓwapǝndǝa na arǝ kundǝ Zakariya, à kǝ ndali, lang sǝ banì sauwa anggo kǝrkǝr aɓa Ndàmǝgule mala Ɓakuli.

²²Lang purna ka, gandǝ nea wia cau ɗang. Kara à sǝlǝ ama sǝnǝna gir aɓa bangŋo, aɓa Ndàmǝgule mala Ɓakuli. Acemǝnana camarǝ lǝmndǝkia wia cau nǝ bui, sǝ ko gandǝ mǝn kuni na kǝ cau ɗang.

²³Lang anonggeo mala turo mala Zakariya malǝna ka, pǝlǝa nyare a ɓala.

²⁴Anzǝm man ngga mami Alisabatu kum muna a bumi. Zongŋo tongno ko sǝn nza ɗang, kǝ na ama,

²⁵“Mǝtalabangŋo nǝ̀ pakkam mǝnia ka. Aɓalǝ anonggeo man ngga lǝmndǝnam ɓwamuru male, sǝ twalnam ban kǝsǝkya aɓalǝ aɓwana.”

²⁶Aɓa tongno-nong-mwashatia zongŋo mala kum muna-bum mala Alisabatu ka, Ɓakuli tur mǝturonjar Jibǝrayilu a ɓè la aɓa nzali Galili mǝnana à tunǝki ama, Nazarat ka.

²⁷Turi nǝ cau aban ɓe nsari lullǝi ama Maryamu, mǝnana ɓeɓwa lullǝi ama Yisǝfu, Mǝkà Dauda pur amuri nǝ̀ ali ka.[3]

²⁸Mǝturonjar kutia bani ne wi ama, “Ɓǝ̀ rǝo pwalo! We mǝnana a ndanǝ ɓwamuru mala Ɓakuli ka, Mǝtalabangŋo na to.”

²⁹Mǝnia yì cau mǝturonjar ne ka, pe Maryamu ɗenyicau kǝrkǝr, kara kutia ndali ama, ya ulang makkun na man.

³⁰Pǝlǝa mǝturonjar ne wi ama, “Maryamu, ɓangciu ɓǝ̀ kǝa pakko ɗang, a kumǝna ɓwamuru aban Ɓakuli.

³¹A wu nǝ kum muna a bumo, a nǝ ɓǝl muna ɓwabura, sǝ a nǝ tsǝki wi lullǝu ama Yesu.

³²Nǝ̀ duk ɓwamǝgule, sǝ à nǝ̀ tunǝi ama Muna mala Ɓakuli mana Karban nǝ Gulo kat ka. Mǝtalabangŋo Ɓakuli nǝ̀ pe wi bunomurǝm mala kè Dauda.[4]

³³Nǝ̀ duk gbani amur amǝ Isǝrayila tatǝk, sǝ domurǝm male ka masǝlǝate pà kàm ɗang.”

³⁴Pǝlǝa Maryamu ne mǝturonjar ama, “Lang sǝ mǝnia ka nǝ̀ pǎ, yi mǝnana mǝ nda nsari, ǝn surǝ ɓwabura raka?”

³⁵Mǝturonjar eari wi ama, “Bangŋo mala Ɓakuli nǝ̀ sulǝ a muro. Rǝcandǝa mala Ɓakuli mana Karban nǝ Gulo kat ka, nǝ̀ yia zuppi a muro, sǝ Muna Mǝfele mǝnana a nǝ ɓǝli ka, à nǝ̀ tunǝi ama, Muna mala Ɓakuli.

³⁶Nggearǝ ɓǝla mo Alisabatu ka, ndanǝ muna a bumi aɓa ě male. Yì mǝnana nkombi na ka, gongŋǝna nǝ azongŋo tongno-nong-mwashat.

³⁷Kǝgir pà kàm mǝnana Ɓakuli pa nǝ̀ pè raka.”[5]

³⁸Maryamu eari wi ama, “Mǝ nda guro mala Mǝtalabangŋo. Ɓǝ̀ ce ɓǝ̀ do kǝla mǝnana a na ka.” Mǝturonjar pǝlǝa o ɗeki.

³⁹Anzǝm anonggeo bǝti ka Maryamu lo tsuk-tsuk aban o a ɓè la aɓalǝ ankono mala nzali Yahudi.

⁴⁰Kya kutio a ɓala mala Zakariya, pǝlǝa makki Alisabatu kun.

⁴¹Lang Alisabatu ok makkun mala Maryamu ka, muna mǝnana a bumi ka yàl hǝrkit, sǝ Alisabatu lumsǝ nǝ Bangŋo Mǝfele.

⁴²Sǝ loasǝ gi kǝrkǝr, banɓoarnado ci na ama: A ndanǝ tsǝkbu mala Ɓakuli aɓalǝ amamǝna, sǝ muna mǝnana a nǝ ɓǝl ka, ndanǝ tsǝkbu mala Ɓakuli gbal!

⁴³Lang sǝ múrɓoarna mem yipam anggo, yi mǝnana nggeau mala Mǝtalem yiu a banam ngga.

⁴⁴Lang ǝn ok makkun mo ka, muna mǝnana a bumam ngga yàl nǝ banɓoarnado.

⁴⁵A ndanǝ tsǝkbu mala Ɓakuli, ace eare mǝnana a ear ama, cau mala Mǝtalabangŋo abano ka, nǝ̀ yia lumsǝo.

⁴⁶Maryamu na ama: “[6]Yilǝmem ngga kǝ ɓwangsǝki Mǝtalabangŋo;

⁴⁷sǝ ɓabumam kǝ pak banɓoarnado ata cau mala Ɓakuli Mǝ'amsǝam,

⁴⁸acemǝnana yì ka, ɗenyina nǝ mim, guro male kat andǝ amani ama ǝn pa a kun kǝgir raka! Twal ado aban o a dǝmbǝa ka, aɓwana arǝ anza kat à nǝ̀ tunǝam ama mǝ'kúm tsǝkbu mala Ɓakuli.

⁴⁹Acemǝnana Ɓakuli mana Karban kat ka, pangŋǝnam agir mǝgulke. Lullǝi ka nda Ɓwa Mǝfele.

⁵⁰Kǝ lǝmndǝ mǝsǝswatǝr male aban aɓwana mǝnana à kǝ ɓanggi wi ka, twal a do'nza aban ká ɓe.

⁵¹Pangŋǝna aturo mǝgulke nǝ murbui, sǝ mesǝkina amǝ'gusǝlǝ muru andǝ aɗenyicau malea kat.

⁵²Yi sulǝna amurǝma amur abuno-murǝm malea, sǝ loasǝna amǝ nyesǝmuru.[7]

⁵³Amǝ'nzala ka ɗǝmsǝnia nǝ agir mǝɓoarne, sǝ amǝkume ka tasǝna takwaria ɓǝa o nǝ ɓabuia.

⁵⁴Bwalǝni guro male Isǝrayila kam, aɓa ɗenyi nǝ mǝsǝswatǝr male,

⁵⁵kǝla mǝnana pàcau aban aká sǝm, à Ibǝrayim andǝ amǝkè, málá male pà kàm ɗang!”[8]

⁵⁶Maryamu do ata Alisabatu zongŋo tārú, nda sǝ nyarǝna umna a la ka.

⁵⁷Lang pwari gbashi mala Alisabatu karǝna ka, yi gbashi muna ɓwabura.

⁵⁸Aɓi amǝkunɓala, andǝ aɓǝla ok ama, Mǝtalabangŋo lǝmndǝni Alisabatu ɓwamuru mǝgule, gbashina muna ka, à yì bwali wi pak banɓoarnado.

⁵⁹A tongno-nong-tāruia nongŋo ka, à yiu ace kasǝî muna ɓate[9]. À earce ama à nǝ̀ tsǝki wi lullǝ tarrí Zakariya.[10]

⁶⁰Sǝ nggè kasǝa ama, “Awo, ɓǝa tunǝi ama, Yohana.”

⁶¹Sǝ à ne wi ama, “Kǝɓwa pà kàm aɓalǝ aɓǝla ma'wun nǝ mǝna yì lullǝu ka ɗang.”

⁶²Pǝlǝa à ne tar muna cau nǝ bu, ɓǝ̀ na ko ya lullǝu na nǝ̀ tunǝna muna nǝi.

⁶³Sǝ zǝmbǝa ama, ɓǝa yinǝi wi nǝ kpamgbang gilǝgir. Koyan ngga ndali, mǝnana gilǝ ama “Lullǝi nda Yohana” ka.

⁶⁴Anggo ka, kara kun Zakariya mǝnna, lasǝi panzǝa, pǝlǝa tita na cau, kǝ ɓwangsǝki Ɓakuli.

⁶⁵Amǝkunɓala kat ka muria kàrria. Sǝ aɓwana mǝnana arǝ ala mǝnana amur ankono mala nzali Yahudi ka, à camarǝ naki ce amǝnia yì agir ka.

⁶⁶Ɓwa mǝnana kat ok ce ka, ndali sǝ ɗiban a ɗenyicau male ama, “Mǝnia yì muna ka, nǝ̀ yia duk ya ulangyi nani? Acemǝnana bu Ɓakuli na muri.”

⁶⁷Zakariya, tar Yohana ka lumsǝ nǝ Bangŋo Mǝfele. Pǝlǝa ɓangnǝ ɓangna, bangcau mala Ɓakuli, ama:

⁶⁸Nokiban ngga dumǝna mala Mǝtalabangŋo Ɓakuli mala amǝ Isǝrayila. Acemǝnana yina ace bwali aɓwana male kam, sǝ angŋǝna muria, pusǝnia a gung.

⁶⁹Yi pa sǝm Mǝ'amsǝban mǝnana ndanǝ rǝcandǝa ka, a tau-murǝm mala guro male Dauda.

⁷⁰Pe kǝla mǝnana bangŋa a kun amǝ'ɓangna male mǝfele ɓara-ɓara ka.

⁷¹Pe anggo ace mǝnana ɓǝ̀ amsǝ sǝm a bu aɓi sǝm amǝbura, andǝ aɓwana mǝnana kat à ɓinǝ mǝsǝ sǝm ngga.

⁷²Pak mǝnia ka ace lǝmndǝì atár sǝm mǝsǝswatǝr, sǝ ɓǝ̀ ɗenyi nǝ kurcau male mǝfele.

⁷³Nǝ mǝnia yì kurcau ka kánmbi tár sǝm Ibǝrayim ama nǝ̀ amsǝ sǝm a bu aɓi sǝm amǝbura, ace mǝnana ɓǝ̀ sǝm pak turo male nǝ mǝsǝkang-kangŋa,

⁷⁴

⁷⁵aɓa do mǝfele andǝ ɓealɓoarna a ɓadǝmbǝi a do yilǝmu ma'sǝm kat.

⁷⁶Sǝ we munem ngga, à nǝ̀ tunǝo ama mǝɓangna mala Ɓakuli mana Karban nǝ Gulo kat ka. A nǝ aki Mǝtalabangŋo dǝmbǝa, ace gilǝki wi atanjar male,[11]

⁷⁷ace pe aɓwana male surǝ amsǝban nǝ njar mala kum twalbani mala acauɓikea malea.

⁷⁸Ace mǝsǝswatǝr andǝ ɓuɓɓuka mala Ɓakuli ma'sǝm ngga, nǝ̀ tsǝk kwaro mala ban ɓǝ̀ mǝnna amur sǝm nǝ kuli,

⁷⁹ace pà tǎlaban aban aɓwana mǝnana à do aɓa pǝndǝa andǝ yinggǝli lú ka, ace yal kusǝ sǝm aɓa ká tanjar mala dorǝpwala.[12]

⁸⁰Muna, yì Yohana ka, camarǝ gulo sǝ dumnǝ rǝcandǝa aɓa bangŋo. Do male ka nda a ɓabondo kya bwal a pwari pusǝrǝi aban amǝ Isǝrayila.