Read mbula bwazza Luka 10 Bible Online

Luka 10 - mbula bwazza bible

Luka 10

¹Anzǝm mǝnia ka, Mǝtalabangŋo twal aɓea ɓwana lumi-tongno-nong-ɓari nǝ mǝsǝì ɓari ata amǝkpate, sǝ tasǝia ɓari-ɓari ɓǝa aki dǝmbǝa o arǝ ala andǝ aban mǝnana yì ka, nǝ̀ ká kam ngga.

²Nea wia ama: Turo pwan gir ɓaban ngga ndakam kǝrkǝr, sǝ amǝturo ka à lakki ɗang. Ace mani ka, wu zǝmbǝi Mǝtala ɓaban ɓǝ̀ tasǝ amǝturo a ɓaban.[75]

³Wu kyane! Ən nggǝ tasǝ wun kǝla amuna-nzur aɓalǝ anvwa-bondo.[76]

⁴[77] Wu kǝa twal boalo, ko luru gya, ko ankura, a bu wun ɗang, sǝ wu kǝa makki kǝɓwa kun a njargula ɗang.

⁵Ko ya ɓala na wu kuti kam ngga, wu tite nǝ na ama, “Ɓǝ̀ dorǝpwala sulǝo a ɓala man.”

⁶Ɓǝ̀ mǝ'earce dorǝpwala na a ɓalae ka, makkun ma'wun ɓǝ̀ do amuri. Sǝ ɓǝ̀ pà kàm raka, makkun ma'wun ɓǝ̀ nyare ata wun.

⁷Wu do a ɓalae, wu li, wu nu koya gir à pà wun kam ngga, acemǝnana mǝturo ka ɓoaro ɓǝ̀ kum tangnakusǝi. Wu kǝa wu turkio arǝ aɓala ɗang.[78]

⁸Ɓǝ̀ ya la wu kuti kam, sǝ à ak wun ngga, wu li ko mana à pà wun ngga.

⁹Wu twalia wia ban arǝkwana mǝnana abanì ka, sǝ wu nea wia ama, “Domurǝm mala Ɓakuli yina aban wun tu.”

¹⁰[79] La mǝnana wu kuti kam, sǝ à ak wun raka, wu puro arǝ akula malea wu na ama,

¹¹“Ko nggearǝ tu la ma'wun mǝnana a kusǝ sǝm ngga, sǝm nggǝ kǝtǝrikia wuni. Sǝ wu sǝlǝ ama: Domurǝm mala Ɓakuli ka yina aban wun tu!”

¹²Ən nggǝ na wun, a pwari ɓashi ka, ɓashi mala Ɓakuli amur mǝno yì la ka nǝ̀ cande nǝ̀ kuti mala amǝ Sodom.[80]

¹³Caukwanban nǝ we, Korazin! Caukwanban ne we gbal Beseda! Ɓǝa agir-ndǝlǝki mǝnana à pakkia aɓalǝ wun, à pangŋǝnia a Taya andǝ Sidon ngga, ɓǝ à pwanǝna nzali ɗiɗyal, à makkina agir keban a rǝia, nǝ tapì aɓa tu.[81]

¹⁴Gir kwanrǝu mana nǝ̀ yiu amur wun a pwari ɓashi ka, nǝ̀ ɓike nǝ̀ kuti mǝnana nǝ̀ yiu amur amǝ Taya andǝ amǝ Sidon ngga.

¹⁵Sǝ we Kapanahum ngga! A kǝ́ sǝni kǝla à nǝ̀ loasǝo aban ká kuli le? Awo! À nǝ̀ turo a nzali àkǝ̀ ɓa tuli-lú![82]

¹⁶Wun amǝ kpatam, ɓwa mǝnana kwaki kiri arǝ wun ngga, nda ban kwaki kiri a rǝam, ɓwa mǝnana ginǝ wun ngga, ginǝnam, sǝ ɓwa mǝnana ginǝam ngga, ginǝna Tárram mǝnana tasǝam ngga.

¹⁷Amǝkpata Yesu mǝnana lumi-tongno-nong-ɓari mǝsǝì ɓari ka à nyar nǝ bumpwasǝa à yiu à yì na ama, “Mǝtalabangŋo, nggearǝ akukwar ka à kǝ oka sǝm aɓa lullǝo!”

¹⁸Pǝlǝa Yesu pea wia eare ama, “Ən sǝn Shetan pur a kuli aban kpa kǝla linzama mala mbulo.

¹⁹Ən pana wun rǝcandǝa wu parki an'yau andǝ agenye sǝ wu limurǝm amur bangŋo mala ɓi'wun mǝbura, kǝgir pà nǝ̀ kum wun ɗang.[83]

²⁰Sǝ ban ɓǝ̀ kǝa ɓoara wun ama akukwar kǝ oka wun ɗang, wu pak bumpwasǝa ama alullǝ wun ngga à gilǝnia a kuli.”

²¹Amǝno yì pwari ka, Yesu lumsǝ nǝ bumpwasǝa aɓa Bangŋo Mǝfele sǝ bangŋa ama, “Ən ɓwangsǝkio we Dâ, Mǝtala kuli andǝ nzali, acemǝnana a sǝmbǝrǝ amǝnia yì agir ka arǝ amǝ'sǝle andǝ amǝsurǝe, sǝ a lǝmndǝia aban amuna mǝkeke. E, Dâ, mǝnia ka nda gir mǝnana pwasǝ bumo ka.”

²²“Girbunda kat ka Tárram nyingŋǝnam mia a buam. Kǝɓwa surǝ koyan nda Muna ɗang, she kǝ Ɓakuli Tarrû nǝmurǝì, sǝ kǝɓwa pà kàm surǝ koyan nda Tarrû ɗang, she kǝ Muni, andǝ aɓwana mǝnana Muni tarkia ama nǝ̀ lǝmndǝi abania ɓǝa surǝì ka.”[84]

²³Pǝlǝa pǝlǝ rǝì aban alaggana male, nea wia zàng ama, “Amǝsǝu mǝnana à kǝ sǝn gir mǝnana wu kǝ sǝni ka, à ndanǝ earmuru aban Ɓakuli!

²⁴Ən nggǝ na wun ama, amǝ'ɓangna mala Ɓakuli andǝ amurǝma ka, à kǝ earce ama à nǝ̀ sǝn gir mǝnana wu kǝ sǝni ka, sǝ à kumo à sǝni ɗang. À kǝ̀ earce ok cau mǝnana wu kǝ oe ka, sǝ à kumo à oe ɗang!”

²⁵[85] A ɓe kǝ pwari ka, ɓe mǝsǝlǝ Nggurcau mala Musa lo nǝ̀ karǝki Yesu. Pǝlǝa ɗi ama, “Malǝm, mana mǝ nǝ pa sǝ mǝ nǝ kum yilǝmu mǝnana málá male pà kàm raka?”

²⁶Yesu eari wi ama, “Mana ɗe à gilǝa aɓa Nggurcau? Lang sǝ a kǝ ɓalli?”

²⁷Ɓwe eare ama, “ ‘Earce Ɓakuli mo nǝ ɓabumo kat, nǝ yilǝmo kat, nǝ rǝcandǝa mo kat, nǝ ɗenyicau mo kat’[86]; sǝ wu ‘earce ɓeo mǝkunɓala kǝla mǝnana a earce ɓamuro ka.’[87] ”

²⁸Yesu eari wi ama, “A bangŋa mǝsǝcau. We ka, pa anggo, a wu nǝ auwa.”[88]

²⁹Sǝ yì ka, earce nǝ̀ lǝmndǝ ama ɓwarki raka, pǝlǝa ɗi Yesu ama, “Yana nda ɓeam?”

³⁰Yesu ne wi ama: Ɓe ɓwa lo a Urǝshalima aban ká Jeriko, kara amǝ'ɓǝmbǝriban kasǝa akuni. À swarki agir-nggurǝi, à walki ueo bǝti ɓǝ wuna, sǝ à o à ɗeki.

³¹Anggo ka ɓe Pǝris twalǝna kǝ njargule aban ká. Mǝsǝì nǝ̀ yia kpa a rǝì ka, kara kyanggi wi o a o male.

³²Sǝ anggo gbal ka ɓeɓwa Lawi[89] twal kǝ njari, lang yiu yi bik banì ka mǝsǝì kpa a rǝì, kara twal ɓe njar ɗang.

³³[90] Ɓe mǝkunɗangna, ɓwa Samariya kar àkǝ̀ njargule, nǝ̀ yia sǝn ɓwa man ngga, mǝsǝswatǝr bwali.

³⁴Pǝlǝa kyang abani, soapi wi muru andǝ mùr-anap amur anpenye, sǝ marǝki wi anpenye nǝ bugir. Twali ci anzǝm mǝndambǝritso male. Warini a ban-sulǝo kya ɗenyi nǝi.

³⁵Ban fana ka pusǝ boalo, dinari[91] ɓari pe mǝɗenyi nǝ ban-sulǝo, ne wi ama, “Ɗenyi nǝ mǝnia yì mǝkwano ka. Gir mǝnana kat a kasǝi amuri kuti mǝnia ka mǝ nǝ yia mbweo ɓǝn nyarǝna ka.”

³⁶A masǝlǝate ka Yesu ɗi ama, “Ata aɓwana mǝnia tārú ka, mǝyani a ɗenyicau mo, nda lǝmndǝ dokunɓala arǝ ɓwa mǝnana kpa a bu amǝ'ɓǝmbǝriban ngga?”

³⁷Mǝsǝlǝ Nggurcau eare ama, “Ɓwa mǝnana lǝmndǝì wi ɓwamuru ka.” Yesu ne wi ama, “Kyane kya pa anggo.”

³⁸[92] Lang Yesu andǝ alaggana male bwalǝna njar ka, à yì bik ɓe muna-la aban mǝnana ɓe mɓwama, lullǝi ama Marta, gingsǝia, ea a ɓala male ka.

³⁹Marta ka ndanǝ mǝ'eambǝi muna-ɓwama lullǝi ama Maryamu, yi do a ɓadǝm Mǝtalabangŋo Yesu aban ok kanigir male.

⁴⁰Sǝ Marta ka nyesǝ ɗenyicau male arǝ aturo mǝnana ɓoaro ɓǝa pea ka. Pǝlǝa yiu aban Yesu yi ɗi ama, “Mǝtalabangŋo, kǝgir oasǝo arǝ aturo mǝnana mǝ'eambǝam nyinggam a kikilam ngga re? Ne wi ɓǝ̀ bwalàm.”

⁴¹Mǝtalabangŋo Yesu ne wi ama, “Marta, Marta, ɓabumo pi sǝ a kǝ pe rǝo tanni arǝ agir pas.

⁴²Sǝ kǝgir mwashat na à earkiyi ce ka, nda kǝ mǝɓoarne mǝnia Maryamu twali ka, sǝ kǝɓwa pà nǝ̀ é a rǝì ɗang.”