Read mbula bwazza Luka 11 Bible Online

Luka 11 - mbula bwazza bible

Luka 11

¹Ɓe pwari mwashat Yesu na ban pak hiwi a ɓe ban. Lang malǝna ka, ɓeɓwa ata alaggana male ne wi ama, “Mǝtalabangŋo, kania sǝm pak hiwi, kǝla mǝnana Yohana kani alaggana male ka.”

²Yesu nea wia ama, “Ɓǝ̀ wu nǝ̀ pak hiwi ka, wu na ama: “ ‘We Tar sǝm mǝnana a kuli ka, lullǝo ka ɓǝa gusǝlǝi, Domurǝm mo ɓǝ̀ yiu.

³Pà sǝm girlina mala yalung andǝ mala koya pwari ka.

⁴Twala sǝm ban acauɓikea ma'sǝm, kǝla mana sǝm gbal ka sǝm nggǝ twali aɓwana mǝnana à kǝ pakka sǝm cauɓikea, banì ka. Kǝa ká nǝ sǝm aɓa karǝkiban ɗang.’ ”

⁵Pǝlǝa Yesu nea wia ama: Ɓǝà bangŋa ama ɓeɓwa ata wun ngga ndanǝ gyajam, sǝ wario abani nǝ ɓadu kya ne wi ama, “Ɓeam, pam tangna bǝredi tārú.

⁶Ɓe gyajam mem twal bǝri yiu abanam, sǝ ǝn panǝ kǝgir mǝ nǝ pe wi ɗang.”

⁷Sǝ gyajam male eari wi nǝ ɓakurǝm ama, “Kǝa tāki kiram ɗang! Kunkurǝm ngga à gìrnì, sǝ mim sǝnǝ amunem ngga sǝm nongŋa nǝ nongŋo, pà mǝ nǝ gandǝ lo mǝ nǝ po kǝgir ɗang.”

⁸Ən nggǝ na wun ama, ko ɓǝ̀ pà nǝ̀ gandǝ lo nǝ̀ pe wi bǝredi, acemǝnana yì ka, gyajam male na ka, raka, sǝ ace pitau mala ɓwa mǝno ka, nǝ̀ lo nǝ̀ pe wi gir mǝnana earce nǝ̀ kārǝí ka.

⁹Ace mani ka ǝn nggǝ na wun ama: Wu zǝmbǝa, à nǝ̀ pa wun. Wu alte, wu nǝ̀ kumo. Wu wal kunkurǝm, à nǝ̀ mǝnba wuni.

¹⁰Acemǝnana ɓwa mana kat zǝm ngga, à nǝ̀ pe wi, ɓwa mana alte ka, nǝ̀ kumo. Sǝ ɓwa mǝnana gbal kat wal kunkurǝm ngga, à nǝ̀ mǝnmbi wi.

¹¹Wun aɓwana mǝnana wu nda ka tárru ka, yana aɓalǝ wun mǝnana ɓǝ̀ muni zǝmbǝi wi nji, nǝ̀ pe wi n'yau ka?

¹²Ko ana raka, ɓǝ̀ zǝmbǝi wi nki-nggu ka, kara nǝ̀ pe wi genye?

¹³Sǝ ɓǝ̀ wun, amǝ'ɓealɓikea, wu sǝlǝ pe amuna ma'wun aɓoro mǝɓoarne ka, sǝ koshi Tar wun mana a kuli ka! Yì ka, aɓa njar mǝnana wori mǝno ka nǝ̀ pea aɓwana mǝnana à zǝmbǝi wi ka, Bangŋo Mǝfele!

¹⁴A ɓe kǝ pwari ka, Yesu na rǝ pusǝ kukwar arǝ ɓeɓwa mǝnana kǝ gandǝ na cau raka. Lang kukwar nì purna ka, ɓwa mǝnana kǝ na cau raka, kara na cau, ɓwabunda ndali.

¹⁵Sǝ aɓea aɓwana aɓalǝia na ama, “Kwei, yi mǝnana gbal nǝ Baalzabul, murǝm mala akukwar sǝ kǝ pusǝ akukwar ka.”[93]

¹⁶Aɓea ɓwana kǝ earce tambi Yesu gbǝli, pǝlǝa à ne wi ama ɓǝ̀ lǝmndǝia wia gir'ndali mǝnana nǝ̀ lǝmndǝ ama yì ka, pur nǝ ban Ɓakuli ka.[94]

¹⁷Sǝ Yesu sǝlǝna rǝ ɗenyicau malea, pǝlǝa nea wia ama: Nzali murǝm mǝnana kat gaki ka, pà nǝ̀ cam ɗang, sǝ ɓala mǝnana gaki ka, pà nǝ̀ cam ɗang.

¹⁸Sǝ ɓǝ̀ Shetan gau rǝì ka, palang sǝ domurǝm male nǝ̀ came? Ən bangŋa anggo, acemǝnana wu na ama nǝ Baalzabul sǝ ǝn nggǝ pusǝ akukwar.

¹⁹Sǝ ɓǝ̀ ǝn nggǝ pusǝ akukwar nǝ Baalzabul ka, amǝkpata wun ngga, nǝ mana sǝ à kǝ pusǝia? Ɓǝ̀ nda ana ka, à dumǝna wun amǝɓashi nǝ ɓamuria.

²⁰Sǝ ɓǝ̀ nǝ rǝcandǝa mala Ɓakuli sǝ ǝn nggǝ pusǝ akukwar ka, Domurǝm mala Ɓakuli yina aban wun.

²¹Ɓǝ̀ ɓwaburaɓwa mǝnana kùrna rǝì nǝ girbura na kǝ yal ɓala male ka, kǝgir pà nǝ̀ je ɓala male ɗang.

²²Sǝ ɓǝ̀ ɓeɓwa mǝnana kuti nǝ rǝcandǝa yiu a rǝì, yi gandǝi ka, nǝ̀ ak agirbura mǝnana gulikiyi a rǝia ka, sǝ nǝ̀ pwan girkuma a rǝì.

²³Ɓwa mǝnana pà atam raka, ɓiam-mǝbura na, sǝ ɓwa mǝnana bwalam ramngge raka, nda aban mesǝki.[95]

²⁴Ɓǝ̀ kukwar puri rǝ ɓwa ka, kǝ gali arǝ aban ima, ace alta ban usǝlǝo. Sǝ ɓǝ̀ kum raka, nǝ̀ ne ɓamuri ama, “Mǝ nǝ nyare a ɓala mǝnana ǝn ɗeki ka.”

²⁵Sǝ ɓǝ̀ yi kumi à esǝkini, ɓoarnansari gǝraɗau ka,

²⁶pǝlǝa nǝ̀ nyare nǝ̀ ngga yiu nǝ aɓea kukwar tongno-nong-ɓari mǝnana à kuti nǝ ɓealɓikea ka, à nǝ̀ yia kutio à nǝ̀ dukam. Do mala ɓwe adyan ngga nǝ̀ ɓiki kǝrkǝr nǝ̀ kuti mǝdǝmbe.

²⁷Yesu na rǝ naki amǝnia yì acau ka, kara ɓe mɓwama aɓa ɓwabunda loasǝ gi ama, “Tsǝkbu mala Ɓakuli na amur nggeau mǝnana ɓǝlo sǝ à nu kiure ka!”

²⁸Yesu pa eare ama, “E, ɓafo, sǝa ma, tsǝkbu pwala mala Ɓakuli ka nda amur aɓwana mǝnana à kǝ ok cau male, sǝ à kǝ kpate ka!”

²⁹Lang ɓwabunda nǝ̀ nggǝ lakki ka, Yesu na ama: Nza mǝnia ka mǝɓealɓike na, kǝ earce sǝn gir'ndali. Sǝ kǝ gir'lǝmndǝa mǝpandali pà kàm à nǝ̀ pe wi ɗang she kǝ gir'lǝmndǝa mala Yunana.[96]

³⁰Kǝla mǝnana Yunana duk gir'lǝmndǝa aban amǝ Nineva ka, anggo sǝ Muna mala Ɓwa nǝ̀ do aban mǝnia yì nza ka.[97]

³¹A pwari ɓashi ka, mamurǝm mala amǝ Sheba nǝ̀ came andǝ aɓwana mǝnana a nza man ngga, sǝ nǝ̀ yinǝ kasǝ-ɓashi amuria, acemǝnana yì ka, lo a masǝlǝata nzali ɓanza kuko sǝ yiu ace sǝn sǝlǝe mala Solomon. Sǝ ado ka Ɓwa mǝnana kuti Solomon ngga ndya ka.[98]

³²A pwari ɓashi mala Ɓakuli ka amǝ Nineva nǝ̀ came andǝ aɓwana mǝnana a nza man ngga, sǝ à nǝ̀ yinǝ kasǝ-ɓashi amuria. Acemǝnana yia amǝ Nineva ka à pwanzali à ɗeki buia arǝ acauɓikea malea, nǝ hama mala Yunana, sǝ ado ka Ɓwa mǝnana kuti Yunana ka ndya ka![99]

³³Ɓwa pà nǝ̀ tsǝk bǝsa a pitǝla sǝ nǝ̀ sǝmbǝrǝi, ko nǝ̀ kumsǝi wi nkenye ɗang. She nǝ̀ gyari a kuli, ace mǝnana aɓwana mǝnana à kǝ kuti a ɓala ka ɓǝa sǝn tǎlaban.

³⁴Mǝsǝo nda pitǝla mala rǝo. Ɓǝ̀ mǝsǝo na bang ngga, rǝo kat ka nǝ̀ lumsǝ nǝ tǎlaban. Sǝ ɓǝ̀ amǝsǝo ɓoar raka, rǝo kat ka lumsǝna nǝ pǝndǝa.

³⁵Sǝ we ka, tsǝk kiro, ɓǝ̀ tǎlaban mo ɓǝ̀ kǝa duk pǝndǝa ɗang.

³⁶Sǝ ɓǝ̀ rǝo kat ka lumsǝ nǝ tǎlaban, kǝ pǝndǝa pa kàm ko bǝti raka, nǝ̀ ta kat kǝla mǝnana pitǝla kǝ po tǎlaban ngga.

³⁷Anzǝm mǝnana Yesu malǝna naki acau ka, ɓeɓwa Farisi tunǝi arǝ girlina. Pǝlǝa Yesu wario kya do nǝ̀ li girlina.

³⁸Lang ɓwa Farisi sǝn Yesu tita li girlina sǝ lak bui kǝla mǝnana nggurcau malea bang raka, kara ndali kǝrkǝr nǝ mani.

³⁹Pǝlǝa Mǝtalabangŋo ne wi ama: Wun amǝ Farisi ka wu kǝ lak nzǝm kwar andǝ nzǝm tasau, sǝ ɓabum wun ngga lumsǝ nǝ mɓali andǝ ɓealɓikea.

⁴⁰Wun amǝ ɗwanyi sǝlǝe! Nggearǝ Ɓakuli mǝnana pak ɓālǝi ka nǝ̀ pak nzǝmi mbo?

⁴¹Ɓe wu nǝ̀ pe amǝtǝr agir mǝnana wu ndanǝia ka, ko mana ma'wun kat ka nǝ̀ dupa wun nǝ ɓoarnsari.

⁴²Caukwanban nǝ wun, amǝ Farisi! Acemǝnana wu kǝ pa mwashat aɓa lum mala ambuzang andǝ ambulara andǝ acilia agirpwala, sǝ wu burice kpata gir aɓa mǝsǝcau andǝ earce Ɓakuli. Amǝnia ka à ndaka agir mǝnana wu nǝ̀ pa rǝcandǝa a rǝia ka, sǝ acili agir mǝno ka wu nǝ̀ pea gbal.[100]

⁴³Caukwanban nǝ wun, amǝ Farisi! Acemǝnana wu kǝ earce aban-do mǝɓoarne aɓalǝ andakpapi andǝ makkun aɓalǝ alimo.

⁴⁴Caukwanban nǝ wun! Acemǝnana wu nda kǝla aɓembe mǝnana à ɓǝa raka, gandǝa aɓwana kǝ gya amuria, à kǝ pǝndǝkea, aɓa ɗwanyi sǝlǝe.

⁴⁵Ɓe ɓwa aɓalǝ amǝ'sǝlǝgir Nggurcau mala Musa eari wi ama, “Malǝm, ɓǝ̀ a bangŋa ana ka, a sangŋa sǝm gbal!”

⁴⁶Yesu pa eare ama: Wun amǝsurǝ Nggurcau mala Musa, caukwanban nǝ wun! Acemǝnana wu kǝ parì aɓwana twalo mǝnana à pà nǝ̀ gandǝ twale raka, sǝ wun nǝ ɓamurǝ wun ngga, ko munabu wun mwashat ka wu pà nǝ̀ loasǝi ama wu nǝ̀ tsǝkia wia ɗang.

⁴⁷Caukwanban nǝ wun! Acemǝnana wu gilǝki ce aɓembe mala amǝ'ɓangna mala Ɓakuli, sǝ aká wun na à wal-luia.

⁴⁸Anggo ka wu earǝna nǝ gir mǝnana aká wun pe ka. Yia na à wal-lú amǝ'ɓangna mala Ɓakuli ka, sǝ wu nda wu gilǝki ɓak aɓembe malea ka.

⁴⁹Mǝnia ka nda cau mǝnana Ɓakuli bangŋa amur wun ngga, “Mǝ nǝ tura wun ban nǝ amǝ'ɓangna andǝ amǝ'mishan, aɓea ka wu nǝ̀ wal-luia sǝ acilia ka wu nǝ̀ pea wia tanni.”

⁵⁰Ace mani ka, nkila mala amǝ'ɓangna mala Ɓakuli mǝnana à sukki ɗiɗyal, twal a tita ɓanza ka, à nǝ̀ ɗice a bu aɓwana mǝnana a nza man ngga.

⁵¹Tite nǝ nkila mala Habila yi bwal ban nkila mala Zakariya, mǝnana à wali anre gyangŋan andǝ Ban Mǝfele ka. Ɓafo ǝn nggǝ bangga wun, à nǝ̀ ɓashia aɓwana mǝnana a nza man ngga acea kat![101]

⁵²Caukwanban nǝ wun, wun amalǝm Nggurcau! Wu ak kunɓala mala sǝlǝgir. Wun nǝ ɓamur rǝ wun ngga wu kuti ɗang, sǝ wu kasǝkun aɓwana mǝnana à kǝ earce kutio ka!

⁵³Lang Yesu nyingŋǝna banì ka, amǝ Farisi andǝ amalǝm Nggurcau mala Musa tita ɓinǝ mǝsǝì, à cam a rǝì nǝ ɗike amur acau pas.

⁵⁴À kǝ̀ alta bwale aɓa cau mǝnana nǝ̀ pur a kuni ka.