Read mbula bwazza Luka 13 Bible Online

Luka 13 - mbula bwazza bible

Luka 13

¹A pwari mǝno ka, aɓea ɓwana nakam àkǝ̀ banì, à ne Yesu cau mala amǝ Galili mǝnana à ndarǝ gir'nkila aban Ɓakuli sǝ Bilatus tsǝa à wal-luia ka.

²Pǝlǝa Yesu nea wia ama: Wu kǝ sǝni kǝla amǝnia yì amǝ Galili à walia ka à nda ka amǝnana à kuti acili amǝ Galili nǝ cauɓikea ka le?

³Awo! Ən nggǝ na wun, ɓǝ̀ wu nying pakki acauɓikea, wu nyare aban Ɓakuli raka, wu nǝ̀ wú kat gbal.

⁴Ko aɓwana mǝnana lum-bwamndǝ-tongno-nong-tārú mǝnana ndakuli mǝdāre kpa a muria à wú a Silowam ngga, wu kǝ sǝni kǝla à kutiban nǝ cauɓikea a Urǝshalima kat le?

⁵Awo! Ən nggǝ na wun, ɓǝ̀ wu nying pakki acauɓikea wu nyare aban Ɓakuli raka, wu nǝ̀ wú kat gbal.

⁶Pǝlǝa Yesu nea wia mǝnia yì kanicau ka ama: Ɓe ɓwa na nǝ nggun vwari a ɓaban male. Waria alta ɓǝle sǝ ko kya kum ɗang.

⁷Sǝ ne ɓwa mǝnana kǝ yal ɓaban ngga ama, “Pǝlǝa tārú yalung mǝ ndarǝ nyarki kani ace alta ɓǝla vwari mǝnia ka, sǝ ko ǝn kum ɗang. Kasǝi turi! Ace mana sǝ nǝ̀ nggǝ kiɗiki nzali ɓà?”

⁸Sǝ mǝyal ɓaban ne wi ama, “Mǝtala-ɓala, ɗeki ɓǝ̀ pǝlǝa mǝnia ka ɓǝ̀ malâ, mǝ nǝ kwarki nzali mǝnana a tǝte ka, sǝ mǝ nǝ soapi wi ciunda.

⁹Ɓǝ̀ pusǝ ɓǝle aɓa pǝlǝa mǝnana kǝ yiu ka, yàwá! Ɓǝ̀ ɓǝl ɗǝm raka, sǝ wu kasǝi.”

¹⁰A pwari usǝlǝo mala amǝ Yahudi ka, Yesu na aban kani aɓwana gir aɓa ɓe ndakpapi.

¹¹Ɓe mɓwama nakam kukwar gbakǝri pǝlǝa lum-bwamndǝ-tongno-nong-tārú. Kàrrì kàngkàng, gandǝ sarǝ rǝì ɗang ko bǝti.

¹²Lang Yesu nǝ̀ sǝni ka, pǝlǝa tunǝi ama ɓǝ̀ yiu a dǝmbǝa, sǝ ne wi ama, “Mɓwama, à panzǝno a bu mǝnia yì kwano mo ka.”

¹³Pǝlǝa tsǝk abui a rǝì, anggo ka, kara sarǝ pǝrapǝra, kǝ ɓwangsǝki Ɓakuli.

¹⁴Sǝ ɓwamǝgule ndakpapi ka bumi lullo, acemǝnana Yesu twalban rǝkwana a pwari usǝlǝo ka. Ne aɓwana mana à ram ngga ama, “Anongŋo nakam tongno-nong-mwashat ace turo. Wu yiu ɓǝa twala wun ban arǝkwana ma'wun aɓalǝ amǝno yì apwari ka, wu kǝa yiu a pwari usǝlǝo ɗang.”[113]

¹⁵Mǝtalabangŋo pǝlǝi wi ama, “Wun amǝ'kunɓarina! Ko yan aɓalǝ wun ngga kǝ panzǝ jamnda ko mǝndambǝritso male a domwan kǝ um nǝi a pe wi mur a pwari usǝlǝo re?

¹⁶Sǝ ado ka, mǝnia yì mɓwama, Mǝkà Ibǝrayim, mǝnana Shetan kùrrì pǝlǝa lum-bwamndǝ-tongno-nong-tārú ka, à pà nǝ̀ panzǝi a pwari usǝlǝo re?”

¹⁷Lang bangŋǝna anggo ka, kara kǝsǝkya pakki aɓimǝbura. Sǝ aɓwana ka banɓoaria wia nǝ agir-ndǝlǝki mǝnana pea ka.

¹⁸Pǝlǝa Yesu ɗiban ama, “Domurǝm mala Ɓakuli ka nda kǝla mana? Mǝ nǝ kani arǝ mana?

¹⁹Nda kǝla mǝsǝ musta mǝnana ndya mǝní bǝti, mǝnana ɓeɓwa twali kya ɓeali a ɓaban male ka. Gulo kya pǝlǝa nggun sǝ amuna-nyal mana a kuli ka à yì bwal ndà arǝ abuí.”

²⁰Nyare ɗiban ama, “Arǝ mana sǝ mǝ nǝ kani Domurǝm mala Ɓakuli?

²¹Nda kǝla yis mǝnana ɓe mɓwama twal bǝti, sùrǝì andǝ muku alkama tasau tārú, pǝlǝa loakio aki ɓālǝi kat ka.”

²²Yesu kutio arǝ ala andǝ amuna-là aban kani aɓwana gir, dǝshi muri aban ká Urǝshalima.

²³Pǝlǝa ɓeɓwa ɗi ama, “Mǝtalabangŋo, aɓwana bǝti na à nǝ̀ amsǝia ka le?” Yesu nea wia ama:

²⁴Wu ɓariki wu kutio a kunkurǝm mǝnana ɓwear ka, ǝn nggǝ na wun, acemǝnana aɓwana pas à nǝ̀ ɓariki ama à nǝ̀ kutio, sǝ à pà nǝ̀ gandǝi ɗang.

²⁵Sǝ ɓǝ̀ mǝtala-ɓala longŋǝna sǝ girǝna kunɓala ka, wu nǝ̀ cam nǝ nza sǝ wu nǝ̀ nggǝ walki kunɓala aban zǝmbǝa ama, “Ɓwamǝgule, mǝnba sǝm kunɓala!” Sǝ yì ka, nǝ̀ eare ama, “Ən surǝ wun ɗang, sǝ ǝn surǝ ban mǝnana wu pur kam ngga ɗang!”

²⁶Sǝ wu nǝ̀ na ama, “Sǝm li, sǝ sǝm nu, sǝnǝa wun, sǝ a kanì aɓwana gir arǝ anreɓala ma'sǝm.”

²⁷Sǝ nǝ̀ eara wun ama, “Ən surǝ wun ɗang, sǝ ǝn surǝ ban mǝnana wu pur kam ngga ɗang. Wu upi banam, wun amǝ'ɓealɓikea!”[114]

²⁸[115] Akàm wu nǝ̀ nggǝ ɓua nǝ nǝmnggi munabu wun, ɓǝ̀ wu sǝna Ibǝrayim, andǝ Ishaku andǝ Yakupu andǝ amǝ'ɓangna mala Ɓakuli kat aɓa Domurǝm mala Ɓakuli, sǝ wun ngga à ɗekina wun nǝ nza ka.

²⁹Ɓwapǝndǝa nǝ̀ pur nǝ njartakuli, nǝ njarnzali, nǝ njarnza andǝ njarkunmur, à nǝ̀ yia do aban lili a Domurǝm mala Ɓakuli.[116]

³⁰A pwari mǝno ka, aɓea aɓwana mǝnana à kǝ gusǝlǝ cea ado ka à nǝ̀ kyauwikia, sǝ aɓea aɓwana mǝnana à kǝ kyauwikia ado ka à nǝ̀ gusǝlia.[117]

³¹Anggo ka aɓea amǝ Farisi yiu aban Yesu à yì ne wi ama, “Nying ban mǝnia ka, o a ɓe ban ɗàng. Hirǝdus kǝ earce wal-luio.”

³²Pǝlǝa Yesu nea wia ama: Wu kyane wu kya ne mǝno yì mǝ'nyamshaminu ka ama, “Mǝ nǝ pusǝ akukwar, mǝ nǝ twali aɓwana ban rǝkwana yalung andǝ li, sǝ a tāruia nongŋo ka, mǝ nǝ masǝlǝta turo mem.

³³Kat andǝ amani ka, mǝ nda amur gya yalung andǝ li sǝ liawo. Mǝsǝcau ka à nǝ̀ wal-lú kǝ mǝɓangna mala Ɓakuli sǝ pà aɓa Urǝshalima ɗang re!”

³⁴Wun amǝ Urǝshalima! Wun amǝ Urǝshalima! Wun mǝnana wu kǝ wal-lú amǝ'ɓangna mala Ɓakuli ka. Aɓwana mǝnana à turia aban wun ngga wu kǝ ɓukkia nǝ atali, ɓǝa wu. Kusǝ shen Mǝ nda ban earce ram wun aban mǝ'mwashati, kǝla mǝnana nggu kǝ ramnggi amuni aɓa mkpamtari ka, sǝ wu ear ɗang.

³⁵Wu sǝni, Ndàmǝgule ma'wun ngga, Ɓakuli ginǝkina wuni, nongŋǝna a tarǝì. Ən nggǝ na wun, pà wu nǝ̀ nyare wu nǝ̀ sǝnam ɗǝm ɗang. She pwari mǝnana wu nǝ̀ bangŋa ama, “Ɓwangsǝban mala Ɓakuli na amur ɓwa mǝnana kǝ yiu aɓa lullǝ Mǝtalabangŋo ka!”[118]