Read mbula bwazza Luka 14 Bible Online

Luka 14 - mbula bwazza bible

Luka 14

¹Aɓe Sabbat, pwari usǝlǝo mala amǝ Yahudi ka, Yesu kutio aban lili a ɓala mala ɓe ɓwamǝgule Farisi. Kara aɓwana tsǝki wi mǝsǝu.

²Àkǝ̀ ɓadǝmbǝi ka ɓeɓwa nakam, nǝ kwano tú.

³Yesu ɗi amǝ Farisi andǝ amǝsurǝ Nggurcau ama, “Nggurcau mala Musa eare ama ɓǝa twalban rǝkwana a pwari Sabbat le, ko ɓǝa kǝa twal ɗang?”

⁴Ban pwal atea ɗǝong. Pǝlǝa Yesu tsǝk bui arǝ ɓwabure, twali wi ban rǝkwana, sǝ tasǝi ɓǝ̀ o.

⁵Pǝlǝa ɗia ama, “Yan aɓalǝ wun mǝnana ɓǝ̀ muni ko jamnda male kpa a tūli a pwari Sabbat ka, pà nǝ̀ pusǝì a kaurǝa raka?”[119]

⁶Sǝ yia ka ko à kum cau na amur mǝnia ka ɗang.

⁷Lang Yesu sǝn aɓea abǝri mǝnana à tunǝia aban li girlina à nǝ̀ nggǝ alta ban-do mǝɓoarne ka, pǝlǝa nea wia mǝnia yì kanicau ka. Ɓangŋa ama:

⁸[120] Ɓǝ̀ ɓwa tunǝo aban pakiɗire isǝban ngga, kǝa alta buno mǝɓoarne ɗang, acemǝnana yakǝla à tunǝna ɓeɓwa mǝnana kutio nǝ ɓoarɓwa ka.

⁹Sǝ ɓǝ̀ nda anggo ka, ɓwa mǝnana tunǝ wun kǝm ngga nǝ̀ yia no ama, “Lo, nyinggi mǝnia yì ɓwa ka ban.” Nǝ kǝsǝkya sǝ a nǝ nyare aban yiu a ban-do mǝnana a nzǝmo ka.

¹⁰Ɓǝa tunǝo ka, kya do a buno mǝnana a nzǝmo ka. Ɓwa mǝnana tunǝo ka ɓǝ̀ yiu sǝ ɓǝ̀ yi no ama, “Gyajam, lo kya dǝmbǝa.” Anggo ka a nǝ kum gulo aban aɓeo abǝri mǝnana à tunǝ wun wunǝia ka.

¹¹Acemǝnana koya ɓwa na mana twal ɓamuri ka, à nǝ̀ nyesǝi ɓà, sǝ ɓwa mǝnana nongsǝ ɓamuri ka, à nǝ̀ gusǝlǝi.[121]

¹²Yesu pǝlǝa ne ɓwa mǝnana tunǝban ngga ama: Ɓǝ̀ a tunǝban ace ligirlina banɓoarnado ko pakiɗire ka, ce a tunǝ agyajam mo, ko amǝ'eambǝo, ko aɓǝla mo, ko aɓeo amǝ murkala amǝ kume ɗang. Ɓǝ̀ a pa anggo ka, yia ka à nǝ̀ tunǝo gbal a malea, sǝ anggo ka lǝmndǝna ama à mbweno a kuni.

¹³Ɓǝ̀ a nǝ tunǝban ace ligirlina banɓoarnado ka, tunǝ amǝtǝr, amǝkusǝu-wuna, agbakǝre, andǝ ante.

¹⁴Anggo sǝ a nǝ kum tsǝkbu mala Ɓakuli. Acemǝnana à pà nǝ̀ gandǝ mbweo raka, a nǝ ngga kum mbweban mo a pwari mǝnana amǝ'ɓealɓoarna nǝ̀ loapi ɓembe nǝi ka.

¹⁵Lang ɓeɓwa mǝnana ata Yesu aban lili nǝ̀ ok ana ka, ne Yesu ama, “Ɓwa mǝnana nǝ̀ lili banɓoarnado a Domurǝm mala Ɓakuli ka, ndanǝ tsǝkbu!”

¹⁶Yesu eari wi ama: Ɓe ɓwa nakam pak girlina banɓoarnado mǝgule. Turkiban arǝ aɓwana pas.

¹⁷Lang pwari ligirlina karǝna ka, tasǝ guro male ɓǝ̀ kya ne aɓwana mana à tunǝia li ka ama, ɓǝa yiu, ko mana le ka à malǝna pe.

¹⁸Sǝ yia kat ka à alkita anjar puro. Mǝdǝmbǝa na ama, “Ən nggǝ loa kur ɓaban, mǝ nǝ ká sǝne. Pà mǝ nǝ bwal ɗang, pakkam munyi.”

¹⁹Ɓe ɓwa ka na ama, “Ən kur anda-rya lum, ǝn nggǝ um nǝ o a mwamia, pà mǝ nǝ bwal ɗang, ida pakkam munyi.”

²⁰Ɓe ɓwa na ɗǝm ama, “Ən loa isǝ mɓwama, pà mǝ nǝ gandǝ ká ɗang.”

²¹Guro nyare yi ne mǝtala-ɓala male acau mǝno kat. Mǝtala-ɓala ka bumi lullo, pǝlǝa banggi guro male ama, “Nyare o amur anjargula andǝ anreɓala, kyane kya tunǝki amǝtǝr, amǝ kusǝ-wuna, ante andǝ agbakǝre.”

²²Pǝlǝa guro nyare yi ne wi ama, “Ɓwamǝgule, gir mǝnana a na ce ka à pangŋǝni, sǝ cili ban nakam.”

²³Pǝlǝa mǝtala-ɓala ne guro ama, “Puro o amur anjargula mǝgulke andǝ amǝkeke, kya ɓuaki arǝ aɓwana ɓǝa yiu, ace mǝnana ɓala mem ɓǝ̀ yi lumsǝ ka.

²⁴Ən nggǝ na wun, aɓwana mǝnana à turia ban ngga, kǝɓwa pà kàm atea nǝ̀ ok girlina mem a kuni ɗang!”

²⁵Aɓwabunda pas na ban ká andǝa Yesu, sǝ pǝlǝ rǝì nea wia ama:

²⁶Ɓwa mǝnana kat kǝ earce kpatam, sǝ ginǝ tarrí andǝ ngge, andǝ mami, andǝ amuni, andǝ amǝ'eambǝi aburana andǝ amamǝna raka, pà nǝ̀ gandǝ duk mǝkpatam ɗang. E, ɓwa pà nǝ̀ duk mǝkpatam ɗang ɓǝ̀ ɓwe ginǝ ce nggearǝ yilǝmi acem raka.[122]

²⁷Sǝ ɓǝ̀ ɓwa twal nggun-gangndi male yiu atam raka, pà nǝ̀ gandǝ duk mǝkpatam ɗang.[123]

²⁸Yana ata wun mǝnana earce nǝ̀ ɓak ndakuli mǝdāre, sǝ pà nǝ̀ do peatu nǝ̀ ɓalbumi nǝ̀ sǝni ko ndanǝ boalo mǝnana nǝ̀ malǝna mǝno yì turo nǝi ka ɗang?

²⁹Ɓǝ̀ pa anggo raka sǝ kwakina ta kusǝɓǎ, sǝ gandǝ masǝlǝe raka, ko yana sǝ sǝni ka, nǝ̀ oali.

³⁰À nǝ̀ nggǝ bangŋa ama, “Mǝnia yì ɓwa ka tita ɓǎ sǝ gandǝ male ɗang.”

³¹Ya murǝm nani nǝ asoje á-lum, nǝ̀ ká lwa arǝ ɓe murǝm mǝnana nǝ asoje á-lumi-ɓari ka, sǝ pà nǝ̀ do peatu nǝ̀ ɓalbumi nǝ̀ sǝni ko nǝ̀ gandǝ came a kun ɓi, mǝnana nǝ asoje á-lumi-ɓari ka ɗang?

³²Sǝ ɓǝ̀ pà nǝ̀ gandǝi raka, ɓǝ̀ ɓì na kuko ka, nǝ̀ gbara nǝ̀ turban ɓǝa zǝmbǝa ace gilǝki cau.

³³Anggo gbal ɓǝ̀ koyan aɓalǝ wun sǝ nying girbunda male kat raka, pà nǝ̀ gandǝ duk mǝkpatam ɗang.

³⁴Tuɓamur ka gir mǝɓoarne na, sǝ ɓǝ̀ cyauwe male purini rǝì ka, mana nǝ̀ ci sǝ nǝ̀ cau ɗǝm?

³⁵Pànǝ ɓoaro ko a ɓaban ko a gigi ɗang; ueo sukkio mǝnana à nǝ̀ sukki ka. Ɓwa mǝnana ndanǝ kir okban ngga, ɓǝ̀ o!