Read mbula bwazza Luka 16 Bible Online

Luka 16 - mbula bwazza bible

Luka 16

¹Yesu ne alaggana male ɓe kanicau ɗǝm ama: Ɓe mǝkume na nǝ ɓwa mǝnana kǝ ɗenyi nǝ agirkuma male ka. À kya oasǝki muri ama mǝnia yì ɓwa ka kǝ kiɗiki kume male.

²Pǝlǝa tunǝi ɗi ama, “Ya cau na man ǝn nggǝ o a muro ka? Bǝlam ɓa turo mo, acemǝnana a pà nǝ duk mǝɗenyi nǝ agirkuma mem ɗǝm ɗang.”

³Mǝɗenyi nǝ agirkuma pak ɗenyicau ama, “Mana ado mǝ nǝ pa? Mǝtala-ɓala mem no nǝ̀ pǝram arǝ turo. Ən panǝ rǝcandǝa mǝ nǝ rikrya ɗang, sǝ kǝsǝkya kǝ pakkam arǝ zǝmnggi agir.

⁴Ado ka, ǝn surǝna rǝ gir mǝnana mǝ nǝ pak ka, ace mǝnana ɓǝa pǝrnam arǝ turo ka, aɓwana nǝ̀ em arǝ aɓala malea ka.”

⁵Pǝlǝa tunǝ amǝtangna mala mǝtala-ɓala male mwashat-mwashat. Ɗi mǝdǝmbǝa ama, “Shen na mǝtala-ɓala mem kǝ kpato?”

⁶Pǝlǝa eari wi ama, “Du muru gbǝman tongno-nong-tārú na.” Mǝɗenyi nǝ agirkuma ne wi ama, “Twal malǝmce tangne, do a kaurǝa gilǝ gbǝman ine.”

⁷Pǝlǝa ɗi ɓaria ama, “Shen sǝ à kǝ kpato?” Yì ka, eare ama, “Mǝssa tasau á-mwashat.” Oaso ne wi ama, “Twal malǝmce tangne, nyesǝi gilǝ gbǝman-tongno-nong-tārú.”

⁸Mǝtala-ɓala ɓwangsǝ mǝɗenyi nǝ agirkuma mǝ'ɗwanyi mǝsǝcau nì mǝno ace kutan male. Acemǝnana aɓwana amǝkpata ɓanza mǝnia ka à ndanǝ kutan aɓa do malea a rǝarǝia à kuti aɓwana mǝnana amǝkpata Ɓakuli na ka.

⁹Yesu lidǝmbǝa nǝ cau ama: Ən nggǝ bangga wun, wu pak turo nǝ gǝna mala ɓanza, wu bwal agyajam nǝi, ace mǝnana ɓǝ̀ gǝne umna ka, Ɓakuli nǝ̀ ak wun gbal arǝ aɓala mǝnana à pà nǝ̀ kiɗiki raka.

¹⁰Ɓwa mǝnana à gandǝ earnǝi arǝ gir mǝkyauwe ka à nǝ̀ earnǝi arǝ mǝgule gbal. Sǝ ɓwa mǝnana pànǝ mǝsǝcau arǝ mǝkyauwe raka, pà nǝ̀ dum nǝ mǝsǝcau arǝ mǝgule gbal ɗang.

¹¹Sǝ ɓǝà pà nǝ̀ earnǝ wun nǝ bwal gǝna ɓanza raka, yana nǝ̀ earnǝ wun arǝ gǝna mǝɓafoe?

¹²Sǝ ɓǝà earnǝ wun nǝ kume mala ɓeɓwa raka, yana nǝ̀ pà wun kume mǝnana ma'wun na ka?

¹³Kǝ muna-ɓala pà nǝ̀ pakki amǝtala-ɓala ɓari turoɓala ɗang. Ko nǝ̀ ginǝmǝsǝ man mwashat ka sǝ nǝ̀ earce ɓe, ko ana raka, nǝ̀ pa ɓamuri ata ɓwa man mwashat ka, sǝ nǝ̀ burice ɓe. Pa wu nǝ̀ pa ɓamur wun aban Ɓakuli andǝ boalo yia kǝm ɗang.[126]

¹⁴Sǝ yia amǝ Farisi mǝnana amǝ earce boalo na ka, à nǝ̀ ok mǝnia yì acau ka, à sonzǝkì Yesu ngge.

¹⁵Pǝlǝa Yesu nea wia ama: Wu ndaka aɓwana mǝnana wu kǝ lǝmndǝì acili aɓwana ama wu ndaka amǝɓoarne, sǝ Ɓakuli ka surǝna ɓabum wun. Gir mǝnana ɓwapǝndǝa gusǝlǝi kǝrkǝr ka mǝɓeami na aban Ɓakuli.

¹⁶Nggurcau mala Musa andǝ amalǝmce mala amǝ'ɓangna mala Ɓakuli ka à nǝ̀ bwalkiyia wun gara ba yiu mala Yohana Mǝbatisǝma. Lo arǝ abaku mǝno ka sǝ à camarǝ hamnǝ cau Mǝɓoarne mala Domurǝm mala Ɓakuli, sǝ ko yan ngga kǝ ɓariki kǝrkǝr nǝ kutio kam.[127]

¹⁷Ndǝrmya mala kuli andǝ nzali ka, nda halku amur mǝnana ɓe kǝcau ndok ɓǝ̀ ndǝrmi aɓa Nggurcau mala Ɓakuli.[128]

¹⁸Ɓwa mǝnana pǝr mami sǝ al ɓe ka nda rǝ pak cauɓikea nongnǝban a nza nǝ doɓala, sǝ ɓwa mǝnana al mɓwama mana à pǝri ka nda rǝ pak cauɓikea nongnǝban a nza nǝ doɓala.[129]

¹⁹Ɓe mǝkume nakam mǝnana agir-nggurǝu male ka boalea candǝ kǝrkǝr, sǝ koya pwari ka kǝ do aɓa rǝpwala.

²⁰À kǝ̀ nongsǝ ɓe mǝtǝr a kunɓala male, lullǝi ama Liazaro, mǝnana npenye aki rǝì kat ka.

²¹Rǝi kǝ ɓǝla arǝ li gir mǝnana ɓwano kpa a ɓadǝm mǝkume ka. Nggearǝ anvwa ɗǝm à yiu à kǝ lenzǝki anpenye male.

²²A masǝlǝate ka mǝtǝr man yi wú, amǝturonjar mala Ɓakuli yi twali à um nǝi aban Ibǝrayim. Mǝkume gbal ka wú pǝlǝa à tsǝkbani.

²³Akano a ɓanza mala alú,[130] aban mana kya kuti kam aɓa kwanban mala tanni mǝkǝrkǝr nì ka, loasǝ mǝsǝì sǝn Ibǝrayim kuko andǝ Liazaro a kanggari.

²⁴Pǝlǝa tunǝ Ibǝrayim ama, “Dâ Ibǝrayim, sǝn mǝsǝswatǝr mem sǝ wu tasǝ Liazaro ɓǝ̀ oasǝ munabui a mùr ɓǝ̀ lipam ta'mealam nǝi, acemǝnana mǝ nda aɓa tanni kǝrkǝr aɓa bǝsa mǝnia!”

²⁵Sǝ Ibǝrayim eari wi ama, “Munem, ɗenyi ama do mo a ɓanza ka a kum agir mo amǝɓoarne, sǝ Liazaro ka kum agir mǝɓane, sǝ ado ka ndya kum banɓoarnado kani ka, sǝ we ka a nda aɓa tanni mǝkwanbanì kǝrkǝr.

²⁶Ko ɓǝ̀ cè mǝnia na raka, nre sǝm sǝnǝa wun ngga nggea tūli nakam, acemǝnana aɓwana mana à earce lo kani à nǝ̀ ká aban wun ngga, ɓǝa kǝa gandǝi ɗang. Sǝ aɓwana mana gbal à nǝ̀ lo kano aban yiu aban sǝm ngga ɓǝa kǝa gandǝi ɗang.”

²⁷Mǝkume na ama, “Sǝ ɓǝ̀ nda na ka ǝn nggǝ zǝmbǝo, Dâ tur Liazaro a ɓala mala tárram,

²⁸acemǝnana mǝ ndanǝ amǝ'eambu tongno. Ɓǝ̀ kya nunkiria, ace mǝnana ɓǝa kǝa yiu a mǝnia yì ban tanni nggea mǝɓike ka ɗang.”

²⁹Ibǝrayim eari wi ama, “A Musa andǝ amǝ'ɓangna mala Ɓakuli na kano abania, ɓǝa kwaki kiria a rǝia.”

³⁰Mǝkume ne wi ama, “Awo, Dâ Ibǝrayim, ɓǝ̀ ɓwa lo a ɓembe sǝ wario abania ka, à nǝ̀ pwanzali, à nǝ̀ ɗeki buia arǝ acauɓikea malea.”

³¹Pǝlǝa Ibǝrayim ne wi ama, “Ɓǝa ok à Musa andǝ amǝ'ɓangna mala Ɓakuli raka, ko ɓǝ̀ ɓwa lo a ɓembe ka à pà nǝ̀ oe ɗang!”