Read mbula bwazza Luka 19 Bible Online

Luka 19 - mbula bwazza bible

Luka 19

¹Yesu ara aɓa nggeala Jeriko, ndaban kuti a ɓalǝi.

²Ɓe ɓwa nakam lullǝi ama Zaka, ɓwamǝgule mala amǝcemi na sǝ yì ka, mǝkume na.

³Yì ka, ɓariki nǝ̀ sǝni ko yana nda Yesu. Ɓwabunda na kam pas mǝnana yia gbal ka à kǝ̀ earce sǝn Yesu ka. Sǝ yi Zaka, acemǝnana nkpandal na ka, gandǝ sǝnban aɓa ɓwabunda ɗang.

⁴Pǝlǝa ɓangŋa, ak dǝmbǝa, kya eauwe a nggun vwari nǝ̀ sǝni, acemǝnana àkǝ̀ banì sǝ Yesu nǝ̀ pǝlǝa.

⁵Lang Yesu yi bwalǝna banì ka, loasǝ mǝsǝì a kuli sǝ ne wi ama, “Zaka, fa rǝo sulǝi nggun! Yalung ngga, she mǝ nǝ sulǝ a ɓala mo.”

⁶Pǝlǝa sulǝo a kaurǝa gingsǝ Yesu nǝ bumpwasǝa.

⁷Ɓwapǝndǝa mǝnana kat sǝn mǝnia ka, tita nggwani ama, “Ɓwabura man ngga kya sulǝna a ɓala mala mǝ'cauɓikea!”

⁸Zaka pǝlǝa lo sǝ ne Mǝtalabangŋo ama, “Mǝtalabangŋo, sǝni, mǝ nǝ gau girkuma mem aɓalǝu, mǝ nǝ pe amǝtǝr kāmbe mwashat, sǝ ɓǝ̀ ǝn mbǝrina kǝɓwa ka, mǝ nǝ nyesǝi ɓwe gir nî kusǝ ine.”

⁹Pǝlǝa Yesu ne wi ama, “Yalung ngga amsǝban yina a ɓala mǝnia ka, acemǝnana mǝnia yì ɓwa gbal ka mǝ'kà Ibǝrayim na.[142]

¹⁰Muna mala Ɓwa ka, yiu àkǝ̀ ce alta gir mǝnana ɓwàr ka, nǝ̀ amsǝi.”[143]

¹¹[144] Lang à nǝ̀ nggǝ kwaki kiria arǝ mǝnia yì acau ka, Yesu lidǝmbǝa nǝ nea wia ɓe kanicau, acemǝnana anggo ka à gbashina ban Urǝshalima, sǝ à kǝ sǝni kǝla Domurǝm mala Ɓakuli ka ndo nǝ̀ yiu àkǝ̀ dyadyan mǝno ka.

¹²Pǝlǝa na ama: Ɓe mǝtaumurǝm wario a ɓe nzali mǝsauwe nǝ̀ ngga ak garamurǝm, sǝ nǝ̀ nyare.

¹³Kaniama nǝ̀ o ka tunǝ ata amǝturo male lum, gakia wia mǝsǝboalo zǝnariya luru lum sǝ nea wia ama, “Boalo mǝnia ka wu kǝ nggaliki nǝi, she ɓǝn nyarǝna ka.”

¹⁴Sǝ aɓwana male ka à ɓinǝi, pǝlǝa à tasǝ aɓea aɓwana ate ɓǝa kya na ama, “Sǝm earce mǝnia yì ɓwa ka ɓǝ̀ duk murǝm ma'sǝm ɗang.”

¹⁵Kat andǝ amani ka, mǝnia yì ɓwa ka à kya pe wi garamurǝm, sǝ nyare a kusǝì yiu. Pǝlǝa turban ata amǝ'turo-ɓala mǝnana pākia wia boalo ka, acemǝnana nǝ̀ surǝ gir mana à kum aɓa nggaliki ka.

¹⁶Mǝdǝmbǝa yiu yi na ama, “Ɓwamǝgule, luru mǝsǝboalo mo ka, ǝn kumǝna luru lum amuri.”

¹⁷Pǝlǝa mǝtala-ɓala male ne wi ama, “Yàwá, mǝturo mem mǝɓoarne! Acemǝnana a lǝmndǝ mǝsǝcau amur mǝnia bǝti ka, a nǝ duk mǝla amur anggea-là lum.”

¹⁸Ɓaria ɓwa yiu yi na ama, “Ɓwamǝgule, luru mǝsǝboalo mo ka, ǝn kumǝna luru tongno amuri.”

¹⁹Mǝtala-ɓala male ne wi ama, “We ka, a nǝ bwal anggea-là tongno.”

²⁰Pǝlǝa ɓe guro yiu yi na ama, “Ɓwamǝgule, luru mǝsǝboalo mo nia ka, ǝn karrì aɓa bugir ǝn sǝmbǝrǝi pepe.

²¹Ɓangciu pakkam a rǝo, acemǝnana cau mo kwano na ɗang. A kǝ twalgir mǝnana a wu nǝ̀ tsǝk raka, a kǝ wal gir mǝnana a wu nǝ̀ ɓeal raka.”

²²Mǝtala-ɓala male eari wi ama, “Mǝ nǝ kùrro nǝ acau mǝnana à pur a kuno ka, we mǝturo-ɓala mǝɓealɓike! A sǝlǝna she ama cau mem kwano na ɗang, ǝn nggǝ twal gir mǝnana mǝ nǝ tsǝk raka, sǝ ǝn nggǝ pwan agir mǝnana mǝ nǝ ɓeal raka?

²³Sǝ palang sǝ a ɓinǝ ká tsǝkam boalo mem a banki, ace mǝnana ɓǝn nyare yiu ka, mǝ nǝ yia é nǝ mur amuri?”

²⁴Pǝlǝa nea aɓwana mana à came abanì ka ama, “Wu ak luru mǝsǝboalo mǝnana a bui ka, wu pe ɓwa mǝnana ndanǝ luru lum ngga.”

²⁵Sǝ à ne wi ama, “Ɓwamǝgule, yì ka, ndanǝ male yì luru lum mala mǝsǝboalo zǝnariya!”

²⁶Pǝlǝa eare ama, “Ən nggǝ na wun ama, ɓwa mǝnana ndanǝi ka, à nǝ̀ tsǝki ɓi amuri, sǝ ɓwa mǝnana pa nǝi raka, nggearǝ mǝno bǝti a bui ka à nǝ̀ é a rǝì.[145]

²⁷Sǝ amǝno yì amǝɓinǝ muram mǝnana à ear ama mǝ duk murǝm amuria raka, wu yinǝia kani, wu yi wal-luia a ɓadǝmbǝam!”

²⁸Anzǝm mana Yesu bangŋǝna mǝnia yì acau ka, pǝlǝa dupia wia a dǝmbǝa aban ká a Urǝshalima.

²⁹Lang gbashina Betafaji andǝ Betani aban nkono Olif ka, pǝlǝa tasǝ aɓea alaggana male ɓari.

³⁰Nea wia ama, “Wu kya a muna-la mǝnana a dǝm wun ngga. Kutio ma'wun ngga wu nǝ̀ kum mǝndambǝritso à kùrni, mǝnana kǝɓwa malaká eauwe a nzǝmi raka. Wu panzǝi, wu yinǝi.

³¹Ɓǝ̀ kǝɓwa ɗi wun ama ace mana sǝ wu kǝ panzǝi le ka, wu nǝ̀ ne wi ama Ɓwamǝgule ma'sǝm[146] kǝ earce.”

³²Yia mǝnana à turia ka à wario à kya kumi kǝla mǝnana Yesu nea wia ka.

³³À ndarǝ panzǝ mǝndambǝritso ka, amǝtale ɗia ama, “Ace mana sǝ wu kǝ panzǝ mǝndambǝritso?”

³⁴À eare ama, “Mǝtalabangŋo[147] kǝ earce.”

³⁵À yiu nǝ mǝndambǝritso aban Yesu. À makki agir-koarǝu malea a nzǝmi, pǝlǝa à eamsǝ Yesu amuri.

³⁶Nda ban o ka, ɓwapǝndǝa sarǝki agir-koarǝu malea amur njargula.

³⁷Lang yi bwalǝna ban mǝnana njargula dili kam aban ká Nkono Olif ka, bundo mala amǝkpate mǝnia ka, à tita loasǝ gia nǝ bumpwasǝa aban ɓwangsǝki Ɓakuli, ace agir-ndǝlǝki mǝnana à sǝn ngga.

³⁸À kǝ bangŋa ama, “Ɓwangsǝban ɓǝ pa aban murǝm mǝnana kǝ yiu aɓa lullǝ Mǝtalabangŋo ka!”[148] “Dorǝpwala na kam a kuli sǝ gulo ka aban Ɓakuli!”

³⁹Aɓea amǝ Farisi mǝnana aɓa ɓwabunda ka à ne Yesu ama, “Malǝm, sà arǝ alaggana mo ɓǝa pwalo!”

⁴⁰Yesu nea wia ama, “Ən nggǝ bangga wun, ɓǝà duk ɗǝong ngga, atali nǝ akia wia ɓwangsǝkiban.”

⁴¹Lang Yesu yi gbashina Urǝshalima mǝsǝì nǝ̀ kpa a rǝì ka, kara túr kuni a ɓua ace,

⁴²na ama, “Eare mem ngga, we Urǝshalima, yalung ngga a surǝna rǝ gir mǝnana nǝ̀ yipo nǝ dorǝpwala ka. Sǝ ado ka à sǝmbǝrǝni, mǝsǝo pà nǝ̀ gandǝ sǝne ɗang.

⁴³Aɓea pwari na à kǝ yiu ka, mǝnana aɓeo amǝbura nǝ̀ yia ɓak nggea zǝ̀kì mǝcande, à nǝ̀ gumbǝlio aɓalǝu, sǝ à nǝ̀ gìr a muro a ko ya bui ka.

⁴⁴À nǝ̀ yia arkio, à nǝ̀ sukkio a nzali, we wunǝ aɓwana mǝnana a ɓalǝo ka. À pà nǝ̀ ɗeki kǝ tali aban came amur ɓe ɗang, acemǝnana a surǝ pwari mǝnana Ɓakuli yiu nǝi ace amsǝo ka ɗang.”

⁴⁵Pǝlǝa Yesu kutio, pǝr amǝkurkuro a Ndàmǝgule mala Ɓakuli.

⁴⁶Nea wia ama, “À gilǝni ama, ‘Ɓala mem ngga nǝ̀ duk ɓala hiwi’[149]; ‘sǝ wun ngga wu nyesǝi duk npu mala amǝ'ɓǝmbǝriban!’[150] ”

⁴⁷Ko aya pwari ka Yesu na aban kanigir aɓa Ndàmǝgule mala Ɓakuli. Agbani Pǝris andǝ amalǝm Nggurcau mala Musa sǝ akapana mǝnana aɓa ɓwapǝndǝa ka, à kǝ alte à nǝ̀ wal-lui.[151]

⁴⁸Sǝ à kumbi ban ɗang, acemǝnana acau male pwan ɗenyicau mala ɓwapǝndǝa kat.