Read mbula bwazza Luka 21 Bible Online

Luka 21 - mbula bwazza bible

Luka 21

¹Lang Yesu loasǝ mǝsǝì ka, sǝn amǝ kume à nda rǝ turki aɓoro malea aɓa akwati boalo mǝnana aɓa Ndàmǝgule mala Ɓakuli ka.

²Ɗǝm ngga mǝsǝì kpa arǝ ɓe man-lú, mǝtǝr, aban tur amǝsǝ-boalo mǝkeke ɓari.

³Pǝlǝa Yesu na ama, “Mǝsǝcau, ǝn nggǝ bangga wun ama mǝnia yì man-lú mǝtapwasǝa ka, nda tur gir mǝnana kuti malea ka kat.

⁴Acemǝnana aɓwana mǝnia kat ka à tu aɓa kume malea mǝnana kpǝm ngga, sǝ yì ka, aɓa tǝ̀r male sǝ pa gir kat mǝnana ndanǝi ace do male ka.”

⁵Aɓea alaggana male na aban naki acau amur ɓoarjam mala Ndàmǝgule mala Ɓakuli mǝnana à gilǝki nǝ atali mǝɓoarkijami, andǝ aɓoro mǝnana à tàrria ace pe Ɓakuli ka. Pǝlǝa Yesu na ama,

⁶“Ɓǝ̀ mala agir mǝnana wu kǝ sǝnia à nda ka, ɓe pwari nǝ̀ yiu mǝnana kǝ ɓe tali pa kàm à nǝ̀ ɗeki aban came amur ɓe ka ɗang. Ko mǝyani ka à nǝ̀ rambǝi à nǝ̀ turi a nzali.”

⁷Pǝlǝa à ɗi Yesu ama, “Malǝm, amǝnia yì agir ka a ya pwari sǝ à nǝ̀ kumban? Ɗǝm ngga mana gir nì nǝ̀ lǝmndǝ ama à mala à nǝ̀ kumban?”

⁸Sǝ Yesu pǝlǝia wia ama: Wu parkir wun ɓǝa kǝa swarki wun ɗang. Acemǝnana aɓwana pas à nǝ̀ yiu aɓa lullǝam, à nǝ̀ nggǝ bangŋa ama, yia ka à nda ka Kǝrǝsti, ɗǝm ngga à nǝ̀ na ama, “Pwari gbashina!” Wu kǝa kpata cau malea ɗang.

⁹Ɓǝ̀ wu ok cau mala a'lwa andǝ amunǝo ka, cala ɓangciu pakka wun ɗang. Amǝnia yì agir ka dumǝna púp à nǝ̀ ak dǝmbǝa kumban, sǝ masǝlǝata ɓanza malaká yiu peatu ɗang.

¹⁰Pǝlǝa lidǝmbǝa aban nea wia ama: Nzali nǝ̀ lo nǝ lwa arǝ ɓe nzali, sǝ domurǝm nǝ̀ lo arǝ ɓe domurǝm.

¹¹Agǝggǝli mǝcande mala nzali nǝ̀ kumban, nzala nǝ̀ kpa, akwano ɓanza ɗàngɗáng nǝ̀ puro arǝ aban pas. Agir karmuru andǝ agir-lǝmndǝa mǝgulke à nǝ̀ pur nǝ kuli.

¹²Sǝ kaniama amǝnia yì agir nǝ̀ kumban ngga, à nǝ̀ bwalki wun, à nǝ̀ pa wun tanni. À nǝ̀ ká nǝ wun a ɓashi arǝ andakpapi, à nǝ̀ kur wun arǝ andakurban, à nǝ̀ ká nǝ wun aban amurǝma andǝ anggwamna, acemǝnana wu nda ka amǝ kpatam ngga.

¹³Mǝnia ka nǝ̀ pa wun dǝmbǝu hamnǝ Cau Amsǝban mem.

¹⁴[159] Wu twali a ɓabum wun ama, pa wu nǝ̀ do nǝ ɓalǝ kasǝkya arǝ cau mǝnana wu nǝ̀ na aban ɓashi ka ɗang.

¹⁵Acemǝnana mǝ nǝ pa wun acau andǝ sǝlǝe mǝnana kǝɓwa pà kàm ata amǝɓinǝ múr wun mǝnana nǝ̀ gandǝ cam a kun wun, ko nǝ̀ makgir cau ma'wun ngga ɗang.

¹⁶Nggearǝ aɓwana mǝnana à ɓǝl wun, andǝ amǝ'eam wun, aɓǝla andǝ agyajam ma'wun, à nǝ̀ pa wun nzǝmia, à nǝ̀ wal-lú ka aɓea ɓwana aɓalǝ wun.

¹⁷Aɓwana kat nǝ̀ ɓinǝmǝsǝ wun acemǝnana wu ndaka amǝkpatam ngga.

¹⁸Sǝ ko nyang múr wun mwashat ka pà nǝ̀ kpa a nzali ɗang.

¹⁹Mǝsǝkang-kangŋa ma'wun na nǝ̀ amsǝ wun, nǝ̀ pa wun yilǝmu mǝnana málá male pà kàm raka.

²⁰Ɓǝ̀ wu sǝnǝna asoje à yì karina Urǝshalima ka, wu sǝlǝ ama kpa male gbashina.

²¹Sǝ anggo ka aɓwana mǝnana a nzali Yahudi ka ɓǝa ɓangŋa ɓǝa eauwe amur ankono, aɓwana mǝnana aɓa là ka ɓǝa puro, sǝ aɓwana mǝnana a bondo ka ɓǝa kǝa kutio aɓa là ɗang.

²²Acemǝnana mǝnia yì pwari ka mala mbweban nutanni na, ace lumsǝ agir mǝnana kat à gilǝì aɓa Malǝmce mala Ɓakuli ka.[160]

²³Aɓalǝ apwari mǝno ka, gir mǝsǝswatǝr na nǝ amamǝna mǝnana nǝ amuna a bumia, andǝa mǝnana à kǝ pea muna kiura ka! Nggea tanni kǝrkǝr nǝ̀ yiu amur mǝnia yì nzali, sǝ bumlulla mala Ɓakuli nǝ̀ sulǝo amur amǝnia yì aɓwana ka.

²⁴À nǝ̀ wal-lú aɓea ɓwana atea nǝ nggeabyau, sǝ aɓea ɓwana ka à nǝ̀ bwalia guro à nǝ̀ umnǝia arǝ anzali kat mala ɓanza. Aɓwana mana amǝ Isǝrayila na raka à nǝ̀ parki Urǝshalima aɓata rǝcandǝa malea, à nǝ̀ pak ce acau male ɓà, ba lumsǝo mala apwari mana Ɓakuli kasǝa acea, yia aɓwana mana amǝ Isǝrayila na raka.[161] [162]

²⁵Agir-lǝmndǝa nǝ̀ purkio aɓa pwari, andǝ zongŋo andǝ anlero. A ɓanza ka ɓwapǝndǝa kat nǝ̀ do nǝ ɓalǝkasǝkya andǝ gakia mala ɗenyicau, à nǝ̀ pǝlǝ nǝ ɓalǝia ɓà nǝ ɓangciu arǝ songnǝo mala nggeamur andǝ eaki-nkono male.[163]

²⁶Ɓwapǝndǝa nǝ̀ wukiaban ace ɓangciu, ɓalǝia nǝ̀ kasǝkya arǝ gir mǝnana nǝ̀ sulǝo amur ɓanza ka, acemǝnana à nǝ̀ dǝurǝki anggea gir mǝgulke mǝnana a kuli ka.

²⁷Anggo ka à nǝ̀ sǝn Muna Mala Ɓwa aban yiu aɓa pǝrɓang nǝ rǝcandǝa andǝ ɓoarɓwa mǝgule.[164]

²⁸Ɓǝa mǝnia yì agir tinata kum ban ngga, wu lo, wu loasǝ mur wun a kuli, acemǝnana pwari akmúr wun gbashina.

²⁹Pǝlǝa Yesu nea wia mǝnia yì kanicau ka: Wu sǝn nggun vwari andǝ acili anggun.

³⁰Ɓǝa tinata to mbuia ka, wun nǝ ɓamur rǝ wun ngga wu nǝ̀ sǝni sǝ wu nǝ̀ sǝlǝ ama mbulo gbashina.

³¹Anggo gbal, ɓǝ̀ wu sǝnǝna amǝnia yì agir à ndaban pakki ka, wu sǝlǝ ama Domurǝm mala Ɓakuli ka gbashina.

³²Ən nggǝ na wun mǝsǝcau ama, tà mǝnia yì nza ka pà nǝ̀ mal ɗang she ɓǝ̀ amǝnia yì agir ka ɓǝa kumǝna ban ngga.

³³Kuli andǝ nzali ka tea nǝ̀ mala, sǝ Cau mem ngga te pà nǝ̀ mal ɗang ko bǝti.

³⁴Wu parkir wun wu kǝa eare ɓǝ̀ ɗenyicau ma'wun lumsǝ nǝ likiagir, wal-wale andǝ pisǝ ɓalǝu arǝ alta agir ɓanza, gandǝa mǝno yì pwari ka nǝ̀ yia yasǝlǝ wun ngga ɗang.

³⁵Kǝla gbǝli, nǝ̀ yiu amur aɓwana mǝnana a ɓanza kat ka.

³⁶Wu dum nǝ mǝsǝ wun ko aya pwari, nǝ́ pak hiwi ace mǝnana ɓǝ̀ wu api amǝnia yì agir mana à mala à nǝ̀ kumban, sǝ ɗǝm ngga ɓǝ̀ wu kum kusǝu came a ɓadǝm Muna mala Ɓwa ka.

³⁷Ko aya pwari ka Yesu na aban kanigir aɓa Ndàmǝgule mala Ɓakuli, sǝ nǝ pwarikpana ka nǝ̀ o a múr mǝ'nkono mǝnana à tunǝki ama Nkono Olif ka nǝ̀ ngga nong nggam.[165]

³⁸Sǝ nǝ bu dǝmbari ka aɓwana kat kǝ yiu a ok kanigir male a Ndàmǝgule mala Ɓakuli.