Read mbula bwazza Luka 22 Bible Online

Luka 22 - mbula bwazza bible

Luka 22

¹Ado ka, pwari Ɗire mala Bǝredi mana kǝ lo raka, mǝnana à tunǝki ama “Ɗire Yalimuru” ka gbashina.[166]

²Agbani pǝris andǝ amalǝm Nggurcau mala Musa came arǝ alta njargula mǝnana à nǝ̀ walna Yesu nǝi aɓa sǝmbǝrǝa ka, acemǝnana ɓangciu kǝ pakkia wia arǝ aɓwana malea.

³Pǝlǝa Shetan kutio arǝ Yahuda mǝnana à tunǝki ama Iskariyoti ka. Yì ka, nda aɓalǝ alaggana mala Yesu mana lum-nong-ɓari ka.

⁴Yahuda wario aban agbani pǝris andǝ aɓwana-mǝgule mala amǝ yal Ndàmǝgule mala Ɓakuli, à na cau andǝia, amur njar mǝnana nǝ̀ pana Yesu nǝi a buia ka.

⁵Banɓoaria wia, kara à eare ama à nǝ̀ pe wi boalo.

⁶Yì ka, eare, pǝlǝa kutio a alta njar mǝnana nǝ̀ kumo sǝ nǝ̀ pea wia Yesu nǝi a pwari mǝnana ɓwabunda pà kàm raka.

⁷Lang Lamsan mala Bǝredi mana kǝ lo raka tinate, a pwari walki anzur mala Ɗire Yalimuru ka,

⁸Yesu tasǝ Bitǝrus andǝ Yohana, nea wia ama, “Wu kyane wu kya gilǝkia sǝm girlina mala Ɗire Yalimuru mǝnana sǝm nǝ̀ li ka.”

⁹À ɗi ama, “A ya ban sǝ ɓǝ̀ sǝm kya pak turo girline?”

¹⁰Nea wia ama, “Kutio ma'wun a nggeala ani ka, wu nǝ̀ je wunǝ ɓe ɓwabura nǝ bàng-mùr amuri. Wu kya ate a ɓala mǝnana nǝ̀ kuti kam ngga.

¹¹Wu ne mǝtala-ɓalae ama, ‘Malǝm nǝ̀ tur sǝm ɓǝ̀ sǝm ɗio ama: Bansulǝo mǝnana nǝ̀ li girlina Ɗire Yalimuru kam andǝ alaggana male ka, nda a ya ban?’

¹²Nǝ̀ lǝmndǝa wun rǝ ɓe ndakuli mǝgule, à gilǝkina ɓālǝi. A kam sǝ wu nǝ̀ pak turo girlina.”

¹³Pǝlǝa à wario à kya kum girbunda kǝla mǝnana Yesu nea wia ka. Pǝlǝa à pak turo girlina Ɗire Yalimuru.

¹⁴Lang pwari karǝna ka, Yesu andǝ amǝ'mishan male do aban li girlina.

¹⁵Pǝlǝa nea amǝ'mishan male ama, “Ən earǝna ce li girlina Ɗire Yalimuru mǝnia ka kǝrkǝr sǝnǝa wun, sǝ ɓǝn kutio a tanni!

¹⁶Sǝ ǝn nggǝ na wun, pa mǝ nǝ li ɗǝm ɗang, she ɓǝ̀ kya lumsǝna a Domurǝm mala Ɓakuli ka.”

¹⁷Pǝlǝa Yesu twal kwap mala mur ɓǝlanggun anap, sǝ pakki Ɓakuli yàwá, sǝ na ama, “Wu ak mǝnia ka, wu gaki arǝ wun.

¹⁸Ən nggǝ na wun ama, twal ado ka pà mǝ nǝ nu mur ɓǝlanggun anap ɗǝm ɗang, she ɓǝ̀ Domurǝm mala Ɓakuli yina ka.”

¹⁹Pǝlǝa twal bǝredi, pakki Ɓakuli yàwá, ɓwani, sǝ pea wia, nea wia ama, “Mǝnia ka nda nggūrǝam, mǝnana ǝn pa ace wun ngga, wu kǝ pak mǝnia ka, ace ɗenyi nǝ mim.”

²⁰Anzǝm girlina ka, twal ɓe kwap mala mùr ɓǝlanggun anap a bui, sǝ na ama, “Kwap mǝnia ka, nda bǝsa kurcau a nre Ɓakuli andǝ aɓwana male, mǝnana à kurrì nǝ nkilem mana à sukki ace wun ngga.[167]

²¹Sǝ wu sǝni! Ɓwa mǝnana nǝ̀ kurkuro nǝ mim ngga nda aɓalǝ sǝm aban li kani atam![168]

²²Lú mala Muna mala Ɓwa ka nǝ̀ pa kǝla mǝnana Ɓakuli kani ka, sǝ caukwanban na nǝ ɓwa mǝnana me ka!”

²³Alaggana tita ɗiki rǝarǝia ko yana ɓwe na aɓalǝia mǝnana nǝ̀ pak mǝnia yì gir ka.

²⁴Makgir pǝlǝa lo a nrea amur ko yana aɓalǝia nda ɓwamǝgule malea kat.[169]

²⁵[170] Yesu nea wia ama: Amurǝma mala amǝɓanza ka à kǝ lǝmndǝ rǝcandǝa amur aɓwana, sǝ amǝ'lǝmndǝ gulo amur aɓwana ka à kǝ tunǝ ɓamuria ama, “agyajam mala ɓwapǝndǝa.”

²⁶Sǝ wun ngga, anggo sǝ wu nǝ̀ pak ɗang. Ma'wun ngga, ɓwa mǝnana gula wun kat ka nda nǝ̀ dupa wun kǝla muna kat ka, gbani gbal ka nda rítǎu.[171]

²⁷Yana nda ɓwamǝgule, ɓwa mǝnana do aban li ka le, ko ɓwa mǝnana kǝ gaki girlina ka? Nda ɓwa mǝnana do aban li ka re? Sǝ mim ngga ǝn do aɓalǝ wun kǝla mǝ gau girlina.[172]

²⁸Wu ndaka aɓwana mǝnana wu came a nzǝmam aɓa karǝkiban mǝnana kumam ngga.

²⁹Ace mani ka, ǝn pana wun garamurǝm, kǝla mǝnana Tárram pam ngga.

³⁰Wu nǝ̀ li sǝ wu nǝ̀ nu atam a Domurǝm mem, sǝ wu nǝ̀ do amur abuno-murǝm aban ɓashia atau mala Amǝ Isǝrayila mǝnia lum-nong-ɓari ka.[173]

³¹Yesu banggi Bitǝrus ama, “Shiman, Shiman! Kwaki kiro! Shetan kǝ alte ama nǝ̀ sarǝki wun kǝla sarǝ mǝsǝsa.

³²Sǝ mim ngga ǝn pangŋa hiwi aceo we Shiman, ace mǝnana paɓamuru mo ɓǝ̀ kǝa kpa ɗang. Sǝ ɓǝa longŋa ka, ɓak ɓabum amǝ'eambǝo.”

³³Bitǝrus eari wi ama, “Mǝtalem, ǝn shamna bumam mǝ nǝ o ato a ndàkurban, sǝ mǝ nǝ wu ato!”

³⁴Yesu pǝlǝi wi ama, “Ən nggǝ no we Bitǝrus, yalung mǝnia ka kaniama nggu nǝ̀ ɓua ka, a nǝ tǝmcem kusǝ tārú ama a surǝam ɗang!”

³⁵Yesu pǝlǝa ɗi alaggana male ama, “A pwari mǝno ǝn tur wun wu kya hamnǝ cau mem, sǝ wu pànǝ ndaboalo, ko luru-gya, ko ankura raka, wu ɗwanyi kǝgir le?” À eare ama “Awo!”[174]

³⁶Pǝlǝa nea wia ama, “Sǝ ado ka, koyana sǝ ndanǝ ndaboalo ko luru ka, ɓǝ̀ twali. Sǝ ɓwa mǝnana pànǝ nggeabyau raka, ɓǝ̀ mak daura-murɓe ɓǝ̀ kuro.

³⁷Mǝ ndaban bangga wun ama cau mǝnana à gilǝì aɓa Malǝmce ama, ‘À oasǝi ata amǝ'cauɓikea’[175] ka, nǝ̀ lumsǝo a muram pup. E, gir mǝnana à gilǝì a muram ngga nda kǝ yiu a lumsǝo ka.”

³⁸Pǝlǝa alaggana male ne wi ama, “Mǝtalabangŋo! Sǝni! Anggea-byau nia ɓari ka.” Pǝlǝa Yesu banggia wia ama, “Karǝna ana!”

³⁹Yesu lo o amur Nkono Olif kǝla mǝnana pakkiyi pwari-pwari ka. Pǝlǝa alaggana male o a te.

⁴⁰À kya bwalǝna banì ka, Yesu nea wia ama, “Wu pak hiwi, ace mǝnana ɓǝ̀ wu kǝa kpa aɓa karǝkiban raka.”

⁴¹Pǝlǝa upia wia zak, kya kūndǝo pak hiwi,

⁴²ama, “Dâ, ɓǝ̀ a wu nǝ ear ka, twalam mǝnia yì kwap mala tanni ka: sǝ mǝnia ka kane mem ma ɗang, ɓǝ̀ do ama kane mo na.”

⁴³Kara mǝturonjar sulǝo abani, ɓak ɓabumi.

⁴⁴Sǝ acemǝnana nda aɓa bumkiɗikea mǝgule ka, kutio arǝ hiwi nǝ rǝcandǝa. Piban mǝnana pur a rǝì ka kǝ surkio kǝla nkila.

⁴⁵Lang Yesu loapi ban hiwi ka, nyare aban alaggana male kya kumia a ntulo, acemǝnana à nda aɓa bumkiɗikea, mǝnana ɓunggi rǝia ka.

⁴⁶Pǝlǝa nea wia ama, “Mana tsǝa sǝ wu kutia nong'ntulo? Wu lo, wu pak hiwi, ace mǝnana ɓǝ̀ wu kǝa kpa aɓa karǝkiban ɗang.”

⁴⁷Kuni malaká pwal arǝ cau ɗang, kara ɓwabunda yi tusǝna. Yahuda, mwashat aɓalǝ alaggana Lum-nong-ɓari ka, nǝ̀ yinǝia. Pǝlǝa sung aban Yesu, mǝn abui kùrrì nui a nki.

⁴⁸Yesu pǝlǝa ɗi ama, “Yahuda, a ndarǝ kurkuro nǝ Muna Mala Ɓwa nǝ nuban a nkiu?”

⁴⁹Lang alaggana mala Yesu mǝnana ate sǝn gir mǝno nǝ̀ kumban ngga, pǝlǝa à ɗi ama, “Ɓǝ̀ sǝm pak turo nǝ anggea-byau ma'sǝm le, Mǝtalabangŋo?”

⁵⁰Kara mwashat aɓalǝ alaggana mala Yesu kwar guro mala Pǝris Mǝgule, kasǝ kiri mǝli kpat.

⁵¹Pǝlǝa Yesu na ama, “Ɓǝ̀ go anggo!” Pǝlǝa je kir ɓwabure, twali wi banì.

⁵²Yesu pǝlǝa ne agbani pǝris andǝ aɓwana-mǝgule mala amǝyal Ndàmǝgule mala Ɓakuli, mǝnana à yiu a rǝì ka ama, “Wu yiu a rǝam nǝ anggea-byau andǝ agara-kwalta kǝla mǝ nda ɓwamǝgule mala amǝ'soakitau?

⁵³Ko aya pwari ka mǝ nda ata wun aɓa Ndàmǝgule mala Ɓakuli, sǝ wu loasǝ kun wun a rǝam ɗang. Sǝ bu-pwari man she ka ma'wun na, andǝ mala rǝcandǝa mala pǝndǝa.”[176]

⁵⁴À bwal Yesu, sǝ à dǝshina ɓala mala Pǝris Mǝgule nǝi. Sǝ Bitǝrus ka, tarǝte kǝ o atea.

⁵⁵Amǝyal palta ka à bwalǝna bǝsa a cengge à dumǝna akuni. Pǝlǝa Bitǝrus yi do atea.

⁵⁶Ɓe muna-ɓwama, mǝturo-ɓala sǝni aban do a kun bǝsa. Sǝni kyap-kyap sǝ na ama, “Mǝnia yì ɓwa ka, nda ate.”

⁵⁷Bitǝrus pǝlǝa tǝmce ama, “Mɓwama, ǝn surǝ ɓwe ɗang.”

⁵⁸Zuku ka, ɓeɓwa sǝn Bitǝrus sǝ na ama, “We ka, a nda tea!” Bitǝrus eare ama, “Ɓwabura! Mǝ nda ɗang!”

⁵⁹Anzǝm kǝla bu-pwari mwashat ka, ɓeɓwa cam kingging ama, “Ɓafo, mǝnia yì ɓwa ka nda ate, acemǝnana yì gbal ka ɓwa Galili na.”

⁶⁰Bitǝrus ama, “Ɓwabura! Ən surǝ cau mǝnana a banggiyi ka ɗang!” Kuni malaká pwal ɗang, kara nggu ɓua.

⁶¹Mǝtalabangŋo pǝlǝ mǝsǝì sǝn Bitǝrus. Ɓalǝ Bitǝrus kasǝa arǝ cau mǝnana Mǝtalabangŋo ne wi ama: “Kaniama nggu nǝ̀ ɓua a bu du man yalung ngga, a nǝ tǝmce surǝam kusǝ tārú.”

⁶²Pǝlǝa puro a nza kya ɓwa kǝrkǝr.

⁶³Aɓwana mǝnana à cia ɓǝa yal Yesu ka, à oali, oalban kyauwikiban sǝ à walki.

⁶⁴À kur amǝsǝì; pǝlǝa à tullì sǝ à ɗi ama, “Na sǝm, yana mǝnana tullo ka, we mǝɓangna?”

⁶⁵À naki wi acau mǝkwanrui sǝ à kǝ sanggì.

⁶⁶Lang ban fana ka, aɓwana-mǝgule, amǝkurcau mala amǝ Yahudi, agbani pǝris andǝ amalǝm Nggurcau mala Musa, yi rambǝa, pǝlǝa à yinǝ Yesu a ɓadǝmbǝia.

⁶⁷À ne wi ama, “Ɓǝ̀ a nda Kǝrǝsti,[177] Mǝ'amsǝban mǝnana Ɓakuli turi ka, na sǝm.” Yesu earia wia ama, “Ɓǝ̀ ǝn bangga wun ngga, pà wu nǝ̀ earnǝ mim ɗang.

⁶⁸Sǝ ɓǝ̀ ǝn ɗi wun ngga, pà wu nǝ̀ pam eare ɗang.

⁶⁹Twal ado aban ká ka, Muna Mala Ɓwa nǝ̀ do a bu-mǝli mala Ɓakuli mǝnana Karmur gulo kat ka.”

⁷⁰Pǝlǝa yia kat à sàrǝi ama, “A ndarǝ bangŋa ama a nda Muna mala Ɓakuli le?” Pǝlǝa pea wia eare ama, “Kǝ ndo wu na ka, Mǝ nda.”

⁷¹Pǝlǝa à na ama, “Ya cau ɗǝm sǝm alta oe? Sǝm ongŋǝni àkǝ̀ mburkuni!”