Read mbula bwazza Luka 23 Bible Online

Luka 23 - mbula bwazza bible

Luka 23

¹Yia kat ka à lo à warinǝ Yesu a ɓadǝm Bilatus.

²Pǝlǝa à tita tsǝki wi acau a rǝì ama, “Sǝm kum mǝnia yì ɓwa ka aban soakita aɓwana, ama ɓǝa kǝa pe Kaisar, murǝm mǝgule mala amǝ Roma, boalo-cemi ɗang. Ɗǝm ngga kǝ na ama, yì ka, nda Kǝrǝsti[178], Mǝ'amsǝban mǝnana Ɓakuli turi ka, sǝ kǝ ne rǝì ama murǝm na.”

³Pǝlǝa Bilatus ɗi Yesu ama, “A nda murǝm mala amǝ Yahudi le?” Yesu eare ama, “Nda kǝla mǝnana à na ka.”

⁴Pǝlǝa Bilatus ne agbani pǝris andǝ aɓwana ama, “Ən kum kǝgir mǝɓane arǝ mǝnia yì ɓwa ka ɗang.”

⁵Pǝlǝa à ginǝ kpekpe ama, “Kanigir male aɓa nzali Yahudi kǝ tsǝk aɓwana ɓǝa loasǝ munǝo arǝ amǝ'talanzali Roma. Tita mǝnia yì gir ka a Galili, ndya yi bwalǝna ban man kat.”

⁶Lang Bilatus nǝ̀ o anggo ka, pǝlǝa ɗiban ama, “Ɓwe ka ɓwa Galili na le?”

⁷Lang sǝlǝna ama Yesu ka puro a nzali mǝnana aɓata yalban mala murǝm Hirǝdus ka, pǝlǝa tasǝi aban Hirǝdus, mǝnana yì gbal ka nda a Urǝshalima àkǝ̀ ɓalǝ anongge mǝno ka.

⁸Lang Hirǝdus sǝn Yesu ka, banɓoari wi kǝrkǝr, acemǝnana banì sauwuna nda ban alta sǝn Yesu. Aɓa cau mǝnana oa amuri ka, tsǝkbumi ama nǝ̀ sǝn Yesu aban pak gir'ndali.

⁹Pǝlǝa ɗiki nǝ aɗiban pas, sǝ kǝ do mala Yesu kuni piu.

¹⁰Agbani pǝris andǝ amalǝm Nggurcau mala Musa mǝnana abanì ka, à lo nǝ rǝcandǝa aban tsǝki Yesu acau a rǝì ɗàngɗáng.

¹¹Hirǝdus andǝ asoje male pak ceì ɓa, à nyesǝi gir oalo na. À makki wi adaura murǝm a rǝì pǝlǝa à nyesǝi aban Bilatus.

¹²Àkǝ̀ bu-pwari mǝno ka Hirǝdus andǝ Bilatus ka à duk agyajam, acemǝnana ɗiɗyal ka à earki mǝsǝarǝia ɗang.

¹³Bilatus tunǝ agbani pǝris, andǝ aɓwana-mǝgule, andǝ acilia aɓwana.

¹⁴Nea wia ama, “Wu yinǝ mǝnia yì ɓwa ka abanam, wu na ama kǝ soakita aɓwana ɓǝa lo munǝo. Ən ɗiki kani amǝsǝ wun, sǝ aɓalǝ acau mǝnana wu bangŋa amuri ka, ǝn kum ko kǝcau mwashat mǝnana mǝsǝcau na ka ɗang.

¹⁵Hirǝdus gbal ka kumi nǝ kǝ cauɓikea ɗang, ndya nyesǝi aban sǝm ngga, kǝla mǝnana ado wu kǝ sǝni ka, kǝ ɓe gir pà kàm pè mǝnana ɓoro ɓǝa wal-lui ace ka ɗang.

¹⁶Ace mani ka mǝ nǝ kwe sǝ mǝ nǝ ɗeki ɓǝ̀ o.”

¹⁷[A koya Pwari Lamsan Yalimuru ka, dumǝna púp Bilatus nǝ̀ panzǝia wia ɓwa mwashat ata aɓwana mǝnana à kùrria ka.]

¹⁸Ɓwabunda kat loasǝ gia ama, “Wal-lú mǝnia yì ɓwa ka! Panzǝa sǝm Barabbas!”

¹⁹(Barabbas ka ɓeɓwa na à oasǝi a ndàkurban ace loasǝ munǝo mǝnana kumban aɓa Urǝshalima, sǝ ace wal-lú ɗǝm.)

²⁰Bilatus ka kǝ earce ama nǝ̀ nying Yesu ɓǝ̀ o, nda sǝ nyare zǝmbǝia wia.

²¹Kara à came arǝ loasǝ gia ama, “Ɓǝa gballì a nggun! Ɓǝa gballì a nggun!”

²²Bilatus nyar tāruia ka nea wia ama, “Ace mana le? Ya cauɓikea na mǝnia yì ɓwa ka pa? Ən kum kǝ mǝɓane mǝnana ɓǝa wal-lui ace ka ɗang. Ace mani ka mǝ nǝ kwe sǝ mǝ nǝ nyi ɓǝ̀ o.”

²³Kara à loasǝ gia kǝrkǝr ama she ɓǝa gballì Yesu a nggun, gandǝa cau malea kya parban.

²⁴Bilatus gandǝa eare ama ɓǝa pakkia wia gir mǝnana bumia kani ka.

²⁵Panzǝia wia ɓwa mǝnana à earce ka ɓǝ̀ o, yì ɓwa mana à turi a ndàkurban ace loasǝ munǝo andǝ wal-lú ka. Sǝ twal Yesu pea wia ɓǝa pakki wi gir mǝnana bumia kànì ka.

²⁶Lang à nunggina Yesu aban o ka, à kya kum Shiman ɓwa Sayirin, pur nǝ ɓabondo nǝ̀ ká aɓa là. À bwali à parri wi nggun-gangndi a muri, sǝ à ci ɓǝ̀ twali, ɓǝ̀ kpa nǝi ata Yesu.

²⁷Ɓwabunda kǝrkǝr kpate aban o andǝ amamǝna mǝnana à kǝ ɓua, à kǝ keban ace ka.

²⁸Yesu pǝlǝ rǝì nea wia ama: Wun amamǝna mala amǝ Urǝshalima, wu kǝa ɓua acem ɗang, wu ɓua ace ɓamur rǝ wun andǝ amuna ma'wun.

²⁹Acemǝnana ɓe pwari nǝ̀ yiu mana wu nǝ̀ na ama, “Tsǝkbu na amur amamǝna mǝnana à nkombi na, mǝnana à ɓǝl àkǝ muna raka, andǝ akiura mǝnana kǝ muna nuia àkǝ̀ pwari raka!”

³⁰A pwari mǝno ka, “Aɓwana nǝ̀ ne ankono mǝdārike ama, ‘Wu kpa amur sǝm!’ Sǝ à nǝ̀ ne amuna nkono ama, ‘Wu kumsǝo amur sǝm!’ ”[179]

³¹Ɓǝ̀ ɓwapǝndǝa kǝ pak amǝnia yì agir, mǝnana nggun na andǝa pwale ka, lang sǝ nǝ̀ pa, yi mǝnana ɓǝ̀ imǝna ka?

³²Aɓea aɓwana ɓari, yia kǝm ngga amǝ'ɓealɓikea na, à warinia à nǝ̀ ngga wal-luia andǝ Yesu.

³³Lang à yì bwalǝna ban mǝnana à tunǝki ama, Nkpoula Ɓamuru ka, pǝlǝa à gballì Yesu kam amur nggun-gangndi, a tarǝia andǝ amǝ'ɓealɓikea mǝnia ɓari ka, mwashat ata bui mǝli, sǝ man mwashat ka, ata bui mǝnggare.

³⁴Pǝlǝa Yesu na ama, “Dâ, twalia wia banì, acemǝnana à surǝ gir mana à pakki ka ɗang.” Pǝlǝa à ko caca amur agir-nggurǝu male, à gakia rǝia.

³⁵Ɓwapǝndǝa came aban sǝnban, sǝ aɓwana-mǝgule oali, ama, “Kǝ amsǝ aɓea aɓwana, ɓǝ̀ amsǝ ɓamuri, ɓǝ̀ yì ka, nda Kǝrǝsti, Mǝ'amsǝban mǝnana Ɓakuli tarì ka!”

³⁶Nggearǝ asoje gbal ka, à oali, sǝ à lo à yì pe wi mùr ɓǝlanggun anap mǝhangŋe.

³⁷Sǝ à na ama, “Ɓǝ̀ a nda murǝm mala amǝ Yahudi ka, amsǝ ɓamuro.”

³⁸Amuri a kuli arǝ kpamgbang ngga, à gilǝ amǝnia yì acau ka: “ƁWA MƏNIA KA NDA MURƏM MALA AMƏ YAHUDI.”

³⁹Mwashat ata amǝ'ɓealɓikea mǝnana à gballia a kano ka, lo ne Yesu cau kyauwikiban gbal ama, “A nda Kǝrǝsti mbak? Amsǝ ɓamuro sǝ wu amsǝ sǝm!”

⁴⁰Ɓi mǝɓealɓikea gimbi ne wi ama, “We ka, a ɓanggi Ɓakuli re, yi mǝnana kǝ ɓashi mǝ'mwashati mala lú na à kasǝo ka?

⁴¹Ma'sǝm ngga à kasǝa sǝm ɓashi amur mǝsǝcau gir mǝnana sǝm pe ka. Sǝ mǝnia yì ɓwa ka pak kǝ mǝɓane ɗang.”

⁴²Pǝlǝa na ama, “Yesu, ɗenyi nǝ mim ɓǝa kutina a Domurǝm mo ka.”

⁴³Yesu eari wi ama, “Ɓafo na ǝn nggǝ no ka, yalung ngga a nda atam a la do banɓoarna mala Ɓakuli.”[180]

⁴⁴Lang pwari bwalǝna ɓongnwu ka, pǝndǝa yi gir ban, ba bu-pwari tārú mala pwari kpana.

⁴⁵Lagir mǝnana à kasǝna ban Mǝfele nǝi a Ndàmǝgule mala Ɓakuli ka, kara zanza a ɓalǝu.

⁴⁶Pǝlǝa Yesu loasǝ gi bang-bang ama, “Dâ! A ɓabuo sǝ ǝn nggǝ pa bangŋo mem!” Lang bangŋǝna anggo ka, kara yilǝmi puro.[181]

⁴⁷Ɓwamǝgule soje sǝn gir mǝnana kum ban ngga, ɓwangsǝ Ɓakuli, na ama, “Ɓafo na, mǝnia yì Ɓwa ka Mǝɓealɓoarna na.”

⁴⁸Lang ɓwabunda mǝnana rambǝa ace sǝn gballì Yesu, sǝn gir mǝnana kum ban ngga, à wal kikilia, à pǝlǝ nzǝmia à o nǝ bumkiɗikea.

⁴⁹Sǝ aɓwana mǝnana à surǝ Yesu, andǝ amamǝna mǝnana à pur andǝi a Galili ka, à cam zak, sǝ à kǝ sǝn amǝnia yì agir ka.[182]

⁵⁰Ɓe kǝɓwa nakam lullǝi ama, Yisǝfu, ɓwa Arimatiya mala nzali Yahudi. Yì ka, nda aɓalǝ amǝ kurcau mala amǝ Yahudi, ɓwa mǝ'ɓealɓoarne na. Yì ka, gir mǝnana aɓwana-mǝgule mala amǝ Yahudi pak ka, earnǝ kǝ ɓe atea ɗang. Yì ka, ndarǝ kundǝ yiu mala Domurǝm mala Ɓakuli.

⁵¹

⁵²Yì nda mana wario aban Bilatus kya zǝm lú Yesu ka.

⁵³Pǝlǝa kya sulǝ lú, marǝki aɓa nggurbyau pwasǝa, sǝ ci a ɓembe mǝnana à tǝmǝni aɓa tali, yi mǝnana à malaká tsǝk kǝɓwa kam raka.

⁵⁴Pwari mǝno ka nda pwari gilǝkirǝu[183] ace Sabbat, mǝnana mala nǝ̀ tite ka.

⁵⁵Amamǝna mana à yiu andǝ Yesu nǝ Galili ka à o ata Yisǝfu, à kya sǝn ɓembe andǝ nongsǝo mǝnana à nongsǝ luí a ɓembe ka.

⁵⁶Pǝlǝa à nyare à o a la, à kya alta amuru andǝ amuku agir mǝ'rǝmɓoarne. Sǝ à usǝlǝo a Pwari Sabbat, acemǝnana ɓǝa kpata Nzongcau ka.[184]