Read mbula bwazza Luka 6 Bible Online

Luka 6 - mbula bwazza bible

Luka 6

¹A ɓe pwari Sabbat, pwari usǝlǝo mala amǝ Yahudi, Yesu ar aɓalǝ aɓaban-mǝsa. Alaggana male kǝ harki kir mǝssa sǝ à kǝ bik a ɓabuia à kǝ she.[46]

²Aɓea amǝ Farisi bangŋa ama, “Palang sǝ wu kǝ pak gir mǝnana ɓoaro ɓǝa pe a pwari usǝlǝo raka?”

³Yesu earia wia ma, “Wu malaká ɓal gir mǝnana murǝm Dauda pe, yi mǝnana yì andǝ aɓwana mana ate nzala walia ka re?

⁴Mǝnana Dauda kutio a Nda mala Ɓakuli, twal bǝredi mǝfele, mǝnana nzongcau tsǝa ama kǝ apǝris na nǝmurǝia à nǝ̀ li ka, pǝlǝa li sǝ pe aɓwana mǝnana ate ka à li.”[47]

⁵Pǝlǝa Yesu nea wia ama, “Muna mala Ɓwa ka Mǝtalabangŋo na amur Pwari Sabbat.”

⁶A ɓe pwari Sabbat ɗǝm ngga Yesu kutio a Ndakpapi aban kanigir. Ɓe ɓwa nakam mǝnana bui mǝli wu ka.

⁷Amǝ Farisi andǝ amalǝm Nggurcau mala Musa camarǝ alta cau mǝnana à nǝ̀ tsǝki Yesu a rǝì ka. À tsǝki wi mǝsǝu à nǝ̀ sǝni ko nǝ̀ twalban rǝkwana a pwari Sabbat, pwari usǝlǝo.

⁸Sǝ Yesu ka surǝna rǝ ɗenyicau malea, pǝlǝa ne mǝbuwuna ama, “Lo, yiu cam a ɓadǝm ɓwapǝndǝa kat.” Nda lo came abanì.

⁹Pǝlǝa Yesu nea wia ma, “Ən nggǝ ɗi wun, mǝ ye na Nggurcau mala Musa eara sǝm ɓǝ̀ sǝm pe a pwari Sabbat? Ɓǝa pak mǝɓoarne le ko ɓǝa pak mǝɓane, ɓǝa amsǝ yilǝmu le ko ɓǝa kiɗiki?”

¹⁰Pǝlǝa sǝnia kàrìban kat sǝ ne mǝbuwuna ama, “Sarǝ buo.” Pǝlǝa sarǝ bui, kara bui sonzǝ àkǝ̀ banì.

¹¹Sǝa ma amǝ Farisi andǝ amalǝm Nggurcau mala Musa ka bumia lul kǝrkǝr, à tita banggia rǝia gir mǝnana à nǝ̀ pak nǝ Yesu ka.

¹²Aɓalǝ anonggeo mǝno ka, Yesu o a bum nkono nǝ̀ ká pak hiwi. Bankwari aban hiwi aban Ɓakuli.

¹³Ban fana ka tunǝ alaggana male rambǝia pǝlǝa tàr lum-nong-ɓari mǝnana tunǝia ama amǝ'mishan ngga.

¹⁴À nda ka Shiman (mǝnana tsǝki wi lullǝu ama Bitǝrus ka), andǝ Andǝru (mǝ'eam Bitǝrus), andǝ Jemis, andǝ Yohana, andǝ Filip, andǝ Batalomi,

¹⁵andǝ Matiu, andǝ Toma, andǝ Jemis (muna mala Alfiyus), andǝ Shiman (mǝnana à tunǝki ama ɓwa mana earkiyi ace la male raka),

¹⁶andǝ Yahuda (muna mala Jemis), sǝ Yahuda Iskariyoti (mǝnana yi kurkuro nǝ Yesu ka).

¹⁷Lang à sulǝni mur nkono ka, Yesu yi came a ɓe palban. Aɓea alaggana male nakam pas aban rambǝa. Aɓwabunda pas mǝnana à purkio aɓa nzali Yahudi, andǝ Urǝshalima andǝa mǝnana a bu-nzali mala amǝ Taya andǝ Sidon mana a kun nggeamur ka, à ndakam gbal.

¹⁸À yiu ace ok cau male andǝ kum sonzǝban mala arǝkwana malea. Amǝnana gbal akukwar kǝ pea wia tanni ka, akukwar puri rǝia kat.

¹⁹Aɓwana kat ɓariki ama à nǝ̀ je rǝì, acemǝnana rǝcandǝa kǝ puro a rǝì kǝ sonzǝia kat.

²⁰Yesu loasǝ mǝsǝì sǝn amǝte sǝ nea wia ama: Wu ndanǝ tsǝkbu mala Ɓakuli wun amǝ'tǝ̀r, acemǝnana Domurǝm mala Ɓakuli ka ma'wun na.

²¹Wu ndanǝ tsǝkbu mala Ɓakuli, yì wun mǝnana wu kǝ ok nzala ado ka, acemǝnana à nǝ̀ ɗǝmsǝ wun. Wu ndanǝ tsǝkbu mala Ɓakuli, wun man wu kǝ ɓua ado ka, acemǝnana wu nǝ̀ ngga oalo.

²²Wu ndanǝ tsǝkbu mala Ɓakuli, wun mana ɓwapǝndǝa kǝ ɓinǝ mǝsǝ wun, à kǝ tar wun kǝla amǝɓane, à kǝ sanggi wun, à kǝ tunǝa wun ɓealɓikea, ata cau mem ngga![48]

²³Wu pak bumpwasǝa a mǝno yì pwari ka, wu yalke nǝ banɓoarnado, acemǝnana a kuli ka tangnakusǝ wun ngga mǝgule na. Anggo sǝ atárria pakki amǝ'ɓangna mala Ɓakuli.[49]

²⁴Sǝa ma caukwanban na nǝ wun, wun amǝkume, acemǝnana wu angŋa dǝmbǝa wu kumǝna ma'wun yì girikiban!

²⁵Caukwanban na nǝ wun mǝnana wu ɗǝmna ado ka, acemǝnana nzala nǝ̀ wal wun. Caukwanban na nǝ wun mana wu kǝ oal ado ka, acemǝnana wu nǝ̀ keban, wu nǝ̀ ɓua.

²⁶Caukwanban na nǝ wun mǝnana koyan ngga kǝ ɓwangsǝ wun ngga, acemǝnana anggo sǝ akea a pwaryan ɓwangsǝ amǝ'ɓangna mǝ'nyir nì.

²⁷Sǝa ma ǝn nggǝ bangga wun, wun mǝnana wu kǝ oem ngga: Wu earce aɓi wun amǝbura, aɓwana mǝnana à kǝ ɓinǝ mǝsǝ wun ngga, wu pakkia wia mǝɓoarne.

²⁸Aɓwana mǝnana à kǝ su wun ngga, wu tsǝkia wia bu. Aɓwana mǝnana ce wun kǝ shiria ka, wu pakkia wia hiwi.

²⁹Ɓǝ̀ ɓwa kweo a takiro ka, pǝlǝi wi ɓe takiro gbal. Sǝ ɓǝ̀ ɓwa ak nggea daura mo a rǝo ka, ce a ginǝi wi ɓǝ̀ twal muna-daura mo ɗang.

³⁰Ɓwa mǝnana kat zǝmbǝo ka, pe wi. Sǝ ɓǝ̀ koyan twalgir mǝnana mona ka, kǝa na ama a nǝ é ɗang.

³¹Pakki aɓwana gir mǝnana a kǝ earce ama ɓǝa pakko ka.[50]

³²Sǝ ɓǝa aɓwana mǝnana à kǝ earce wun, à nda wu earki cea ka, ya tsǝkbu na wu nǝ̀ kumo a ɓalǝi? Ko nggearǝ “amǝ'cauɓikea” ka à kǝ earce aɓwana mǝnana amǝ'earcea na ka.

³³Sǝ ɓǝ̀ kǝ aɓwana mǝnana à kǝ pakka wun pepe, à nda wu nǝ̀ pakkia wia mǝɓoarne ka, ya tsǝkbu na wu nǝ̀ kumo a ɓalǝi? Ko nggearǝ “amǝ'cauɓikea” ka anggo sǝ à kǝ pa.

³⁴Sǝ ɓǝa aɓwana mǝnana wu pākia wia tangna ka, à nda kǝ amǝnana wu kǝ tsǝkɓalǝ wun a rǝia ama à nda à nǝ̀ gandǝ mbwe wun tangne ka, ya tsǝkbu na wu nǝ̀ kumo a ɓalǝi? Ko nggearǝ “amǝ'cauɓikea” ka à kǝ pea “amǝ'cauɓikea” tangna acemǝnana ɓǝa yi mbwea kat gir mǝnana à pa ka.

³⁵Wun ngga, wu earce aɓi wun amǝbura, wu pakkia wia mǝɓoarne. Wu pea wia tangna, sǝ wu kǝa tsǝkɓalǝu ama à nǝ̀ mbwe wun ɗang. Sǝ tangnakusǝ wun nǝ̀ gulo, sǝ wu nǝ̀ duk amuna mala Tar wun Ɓakuli mǝnana Karban nǝ Gulo kat ka. Acemǝnana yì ka, kǝ lǝmndǝ ɓwamuru male, ko aban amǝtǝmbu andǝ amǝ'ɓealɓikea.

³⁶Wu duk amǝ sǝn mǝsǝswatǝr, kǝla mǝnana Tar wun ngga ndanǝ mǝsǝswatǝr ka.

³⁷Wu kǝa wu sǝn cauɓikea mala aɓwana ɗang, sǝ wun gbal ka à pà nǝ̀ sǝn cauɓikea ma'wun ɗang. Wu kǝa ɓashi aɓwana ɗang, sǝ à pà nǝ̀ ɓashia wun gbal ɗang. Wu twalbani, sǝ à nǝ̀ twala wun banì.

³⁸Wu pǎ, sǝ à nǝ̀ pa wun gbal. Kārè mǝɓoarne mǝnana à pàrrí, sǝ à dǝkǝri kǝ sukki ka, nda à nǝ̀ sola wun ngga. Acemǝnana tasau mana wu kārǝia aɓwana nǝi ka nda à nǝ̀ kārǝa wun nǝi ka.

³⁹Yesu nyare nea wia mǝnia yì kanicau ka: Nte nǝ̀ gandǝ bwali nte gara le? Yia kǝm ngga à pà nǝ̀ kpa a tūli re?[51]

⁴⁰Mǝ'eaulǝki gir ka kuti malǝm male ɗang. Sǝ ɓwa mǝnana à kanǝnì wi gir pepè ka, nǝ̀ pa kǝla malǝm male.[52]

⁴¹Palang sǝ mǝsǝo ueo arǝ kǝkar mǝnana a mǝsǝ ɓeo ka, sǝ a tsǝkiro arǝ gbǝlang nggun mǝnana a mo yì mǝsǝu ka ɗang?

⁴²Palang sǝ a wu ne mǝ'eambǝo ama, “Mǝ'eambǝam, came mǝ pyaupo kǝkar mǝnana a mǝsǝo ka,” yi mǝnana a gandǝ sǝn gbǝlang nggun mana a mo yì mǝsǝu raka? We mǝswarki ɓamuru! Pusǝ gbǝlang nggun mǝnana a mǝsǝo ka peatu, sǝ a nǝ gandǝ sǝnban pepè mǝnana a nǝ pyau kǝkar mǝnana a mǝsǝ ɓeo ka.

⁴³Nggun mǝɓoarne pà nǝ̀ pusǝ ɓǝle mǝɓane ɗang. Sǝ nggun mǝɓane pà nǝ̀ pusǝ ɓǝle mǝɓoarne gbal ɗang.

⁴⁴Koya nggun ngga à kǝ surǝì arǝ ɓǝle. Aɓwana kǝ tūki ɓǝla-vwari arǝ nggun-zwe ɗang, ko ɓǝla-nɓau aɓalǝa ankwarki ɗang.

⁴⁵Ɓwa mǝɓoarne ka, mǝɓoarne mǝnana lumsǝ ɓabumi ka, nda kǝ puro a kuni ka. Sǝ ɓwa mǝɓane ka kǝ pusǝ mǝɓane mǝnana lumsǝ ɓabumi ka. Gir mǝnana lumsǝ ɓabum ɓwa ka, nda kǝ pur a kuni ka.[53]

⁴⁶Ace mana sǝ wu kǝ tunǝam ama, “Mǝtalabangŋo, Mǝtalabangŋo,” sǝ wu kǝ pak gir mǝnana ǝn bangga wun ngga ɗang?

⁴⁷Ɓwa mǝnana kǝ yiu abanam, kǝ kwaki kiri arǝ cau mem, sǝ kǝ tsǝi aɓa turo ka, mǝ nǝ lǝmndǝa wun lang sǝ ɓwe pa.

⁴⁸Yì ka, nda kǝla ɓwa mǝnana nǝ̀ ɓak ɓala male ka, tǝm tūli mǝlime, sǝ kwakita kusǝɓǎ amur tali. Lang mur longŋa yiu akiban ngga, murɓangŋa yi wal ɓǎ man, sǝ ko dǝurǝ ɗang, acemǝnana à kwakite amur tali.

⁴⁹Sǝ ɓwa mǝnana ok cau mem sǝ tsǝi aɓa turo raka, nda kǝla ɓwa mǝnana ɓak ɓala amur sala, ko tǝm kusǝì raka. Lang murɓangŋa yi wal mǝnia yì ɓala ka, kara ɓala kanggea kpa gbǝrǝrǝm.