Read mbula bwazza Luka 9 Bible Online

Luka 9 - mbula bwazza bible

Luka 9

¹Yesu tunǝ amǝ'mishan male mǝnana lum-nong-ɓari ka, sǝ pea wia rǝcandǝa andǝ gara amur akukwar kat sǝ ɓǝa twalban rǝkwana.

²Pǝlǝa tasǝia ɓǝa kya hamnǝ ce Domurǝm mala Ɓakuli, sǝ ɓǝa twali aɓwana ban rǝkwana.

³[64] Nea wia ama, “Wu kǝa twal kǝgir a bu wun ace gya ma'wun ɗang. Wu kǝa twal gara-gya, ko luru, ko girlina, ko boalo, ko aɓea agir-nggurǝu ɗang.

⁴Koya ɓala wu sulǝ kam ngga, wu kǝa ɗeki ɓalae ɗang, she ɓǝ̀ wu nyingŋǝna le ka.

⁵Sǝ ɓǝ̀ aɓwana ak wun raka, ɓǝ̀ wu nǝ̀ nying le ka wu kǝtǝri tu mǝnana a kusǝ wun ngga, acemǝnana ɓǝ̀ nakun wun amuria.”

⁶Pǝlǝa à lo à ara arǝ amuna-là aban hamnǝ Cau Amsǝban andǝ twali aɓwana ban rǝkwana a koya ban.

⁷Hirǝdus, murǝm Galili ok ce agir mǝnana à kǝ pak kat ka, muri zurǝì, acemǝnana aɓea aɓwana kǝ̀ na ama, Yohana na à loasǝi a ɓembe ka.

⁸Aɓea ɓwana ka à kǝ na ama Iliya mǝɓangna mala Ɓakuli na yi pusǝrǝi ka, nyare aɓea ka ama, ɓe kǝ mǝɓangna mala Ɓakuli mǝnana a pwaryan ngga nda long nǝ yilǝmu ka.

⁹Hirǝdus ka bangŋa ama, “Yohana ka ǝn tsǝa à kasǝ meali, sǝ yana ɓwe nda mǝnia ɗǝm ǝn nggǝ oki amǝnia yia acau amuri ka?” Pǝlǝa alta sǝn Yesu.

¹⁰Lang amǝ'mishan nyarǝna ka, à yì banggi Yesu agir kat mǝnana à pak ka. Pǝlǝa umia, yia nǝmurǝia, a ɓe la mǝnana à kǝ tunǝi ama Beseda ka.

¹¹Ɓwabunda ok ce, kara à pwan rǝia à o ate. Yesu gingsǝia, sǝ nea wia cau amur Domurǝm mala Ɓakuli, sǝ aɓwana mǝnana à yiu sǝ à nda aɓa rǝkwana ka, twalia wia ban arǝkwana malea.

¹²Lang pwari mala nǝ̀ kpa ka, alaggana mala Yesu man lum-nong-ɓari ka, à sung abani à yì ne wi ama, “Ɗeki ɓwabunda ɓǝa o arǝ amuna-là, ɓǝa kya alta girlina andǝ ban nongŋo, acemǝnana ban mǝnia sǝm ndakam ngga ɓabondo na.”

¹³Sǝ Yesu ka nea wia ama, “Wu pea wia girlina ɓǝa li.” Pǝlǝa à ne Yesu ama, “Kǝgir mǝnana sǝm ndanǝi ka, kǝ bǝredi tongno na andǝ amǝnji ɓari. She ɓǝ̀ do ama ɓǝ̀ sǝm kya kur girlina ace ɓwabunda man kat ka.”

¹⁴Aburana mǝnana abanì ka à bwal á-tongno. Pǝlǝa Yesu ne alaggana male ama, “Wu tsǝia ɓǝa do mbop-mbop lumi-tongno-tongno.”

¹⁵Anggo sǝ alaggana tsǝia, koyana le ka dum nǝ do.

¹⁶Yesu twal abǝredi mǝnia tongno andǝ anji ɓari ka, pǝlǝa loasǝ muri a kuli pak yàwá, sǝ ɓwanggia, pe alaggana male ɓǝa gaki ɓwabunda.

¹⁷Ya kat à li à ɗǝmnggya. Alaggana pwan cili aɓwanggine mǝnana à ueo ka arǝ ago lum-nong-ɓari.

¹⁸Ɓe pwari nakam Yesu ka nda ban pak hiwi nǝmurǝì, sǝ alaggana male yiu ate, pǝlǝa ɗia ama, “Ɓwabunda kǝ na ama, Mǝ nda yana?”

¹⁹À eari wi ama, “Aɓea ɓwana ama a nda Yohana Mǝbatisǝma, aɓea ka ama a nda Iliya, mǝɓangna mala Ɓakuli, sǝ aɓea ka ama a nda ɓe mǝɓangna mala Ɓakuli ata mǝnana a pwaryan ngga, mǝnana nyare yiu nǝ yilǝmu ka.”[65]

²⁰Yesu nyare ɗia ama, “Sǝ wun, a bangŋe ma'wun ngga, mǝ nda yana?” Bitǝrus eare ama, “A nda Kǝrǝsti[66] Mǝ'amsǝban mǝnana Ɓakuli turi ka.”[67]

²¹Yesu nunkiria nǝ rǝcandǝa ama, ɓǝa kǝa ne kǝɓwa ɗang.

²²Pǝlǝa na ama, “Dumǝna púp Muna mala Ɓwa nǝ̀ kum tanni arǝ agir pas, sǝ akapana, andǝ agbani pǝris, andǝ amalǝm Nggurcau ka à nǝ̀ ginǝi. À nǝ̀ wal-lui, sǝ aɓa tāruia nongŋo ka nǝ̀ lo nǝ yilǝmu.”

²³Pǝlǝa nea aɓwana kat ama, “Ɓwa mǝnana kat kǝ earce yiu atam ngga, nǝ̀ ɓinǝ ɓamurì,[68] nǝ̀ twal nggun-gangndi male ko aya pwari ka nǝ̀ kpatam.

²⁴Ɓwa mǝnana kǝ earce amsǝ yilǝmi ka, nǝ̀ ɗwanyibanì, sǝ ɓwa mǝnana turta yilǝmi acem ngga, nǝ̀ amsǝi.[69]

²⁵Mana gir nì nǝ̀ puri ɓwa yi mǝnana ɓǝ̀ kum ɓanza kat, sǝ ɗwanyi yilǝmi ko yilǝmi kiɗiki ka?

²⁶Ɓǝ̀ kǝsǝkya kǝ pakki ɓwa a rǝam andǝ cau mem ngga, kǝsǝkya nǝ̀ pakki Muna mala Ɓwa a rǝì, a pwari mǝnana nǝ̀ yiu nǝi, aɓa ɓoarɓwa male andǝ ɓoarɓwa mala Tarrí andǝ mala amǝturonjar mǝfele ka.

²⁷Ən nggǝ bangga wun mǝsǝcau, aɓea ɓwana mǝnana à nda ban came kani ka, à pà nǝ̀ wu ɗang, she ɓǝa sǝnǝna Domurǝm mala Ɓakuli ka.”

²⁸[70] Kǝla anzǝm nongŋo tongno-nong-tārú, mǝnana Yesu nakiyi acau man ngga, tunǝ Bitǝrus andǝ Yohana andǝ Jemis, pǝlǝa à eauwe amur ɓe nkono ace pak hiwi.

²⁹Lang nda rǝ pak hiwi ka, ɓamǝsǝi twalo nggaɗi, sǝ agir-nggurǝu male ka à pwasǝ tyal-tyal, kǝla tǎlaban mala linzama.

³⁰Kara aɓwana ɓari, Musa andǝ Iliya yiu, à kǝ na cau nǝi.

³¹À pusǝ rǝia aɓa ɓoarɓwa mala kuli, aban na cau andǝ Yesu. À bang cau amur lú male, mǝnana nǝ̀ yia lumsǝo a Urǝshalima ka.

³²Sǝ Bitǝrus andǝ aɓi ka à kongŋa malea a nggea ntulo. Lang mǝsǝia nǝ̀ sa ka, à sǝn ɓoarɓwa mala Yesu andǝ aɓwana mǝnia ɓari aban came andǝi ka.

³³Lang amǝnia yì aɓwana na ban nying Yesu à nǝ̀ o ka, Bitǝrus pǝlǝa ne wi ama, “Ɓwamǝgule, ndanǝ ɓoaro mǝnana sǝm nda kani ka. Sǝm nǝ̀ gilǝ agumli tārú, mwashat ka nda aceo, mwashat ace Musa, sǝ mǝnia mwashat ka nda ace Iliya.” Sǝ yì ka, surǝ cau mǝnana nakiyi ka ɗang.

³⁴Nda aban na cau piu ka, pǝrɓang sulǝo gir muria, pǝlǝa ɓangciu pakkia wia mǝnana pǝrɓang yi gir muria ka.

³⁵Gi Ɓakuli pur nǝ ɓa pǝrɓang na ama, “Mǝnia ka Munem na, nda mǝnana ǝn tarì ka, wu kwaki kir wun a rǝì.”[71]

³⁶Lang giu nanacau ka, kara à sǝn Yesu nǝmurǝì. Alaggana man bwal ce a rǝarǝia, à ne kǝɓwa ce gir mǝnana à sǝn aɓalǝ anongge ka ɗang.

³⁷Ban fana ka, lang Yesu andǝ alaggana mǝnia tārú sulǝni mur nkono ka, ɓwabunda yiu rambǝa aban Yesu.

³⁸Ɓe ɓwa aɓa ɓwabunda loasǝ gi ama, “Malǝm! Ən nggǝ zǝmbǝo, ɓwamur munem, kǝ̀ nda kǝ̀ munem mwashat!

³⁹Ɓe bangŋo mǝɓane kǝ lo à rǝì, sǝ kǝ ci kǝ yasǝlǝban nǝ mak zwalo bang-bang. Kǝ turi aɓa dǝurǝki rǝì wak gandǝa ntara nǝ̀ gupi a kuni. Kani lo a rǝì anggo, pà nǝ̀ eare nǝ̀ nyi ɗang she ɓǝ̀ sokkina te pà nî tanni kǝ̀rkǝ́r ka.

⁴⁰Ən zǝmbǝi alaggana mo ɓǝa pusǝì, sǝ à gandǝi ɗang.”

⁴¹Sǝ Yesu pǝlǝia wia ama, “Wun a nza man ngga wu nda wu pak murcandǝa sǝ wu ɗwanyi paɓamuru aban Ɓakuli ka! Banem nǝ̀ sau lang aban do sǝnǝa wun sǝ wu nǝ̀ kànì pak ɓe kǝgir? Nǝ̀ ngga ká a ya pwari sǝ mǝ nǝ nggǝ twal gandǝrǝu nǝ wun?” Pǝlǝa ne ɓwabure ama, “Yinǝ munio kani.”

⁴²Lang muna longŋǝna aban yiu ka, kara kukwar loasǝi gwarrì a nzali, turi aɓa mǝɓulɓul mǝkǝrkǝr nì. Pǝlǝa Yesu pyau kukwar, kukwar puri rǝ muna, sǝ Yesu nyesǝi pe tarrí.

⁴³Yia kat ka à ndali nǝ gulo mala rǝcandǝa mala Ɓakuli. Lang ɓwabunda kat nda rǝ ndali nǝ agir mǝnana Yesu pe ka, ne alaggana male ama,

⁴⁴“Wu kwaki kir wun arǝ cau mǝnana mǝ nǝ bangga wun ado ka: Muna mala Ɓwa ka à ndo à nǝ̀ me a ɓabu aɓwana amǝɓinǝ mǝsǝì.”

⁴⁵Sǝ alaggana ka à surǝ ɓa mǝnia yì cau ka ɗang. Ceì sǝmbǝrǝia wia à gandǝ bwalte ɗang, sǝ ɓangciu pakkia wia ɓǝa ɗi amuri.

⁴⁶Makgir lo aɓalǝ alaggana mala Yesu amur koyana aɓalǝia nda ɓwamǝgule kat.

⁴⁷Yesu surǝna ɗenyicau malea, pǝlǝa loasǝ ɓe muna tamsǝi a nkanggari,[72]

⁴⁸sǝ nea wia ama, “Koyana sǝ ɓǝ̀ ak muna kǝla mǝnia ace lullǝam ngga, angŋǝnam, sǝ ɓwa mǝnana em ngga, angŋǝna Tárram mǝnana tasǝam ngga. Ɓwa mǝnana kutibanì kat a nongsǝmuru aɓalǝ wun ngga, nda ɓwamǝgule ma'wun kat.”

⁴⁹Pǝlǝa Yohana ne wi ama, “Ɓwamǝgule, sǝm sǝn ɓeɓwa aban pusǝ akukwar nǝ lullǝo sǝ sǝm ne wi ɓǝ̀ came, ɓǝ̀ kǝa pe ɗang, acemǝnana pà aɓalǝ sǝm ɗang.”

⁵⁰Yesu ne wi ama, “Wu kǝa tamsǝi ɗang, ɓwa mǝnana pà a nggaro nǝ wun raka, ma'wun na.”

⁵¹Lang pwari mǝnana Yesu nǝ̀ nyarni aban o a kuli gbashina ka, Yesu tsǝk muri aban ká a Urǝshalima.

⁵²Pǝlǝa tasǝ amǝ'na-turban à aki dǝmbǝa aban ká a ɓe muna-la mala amǝ Samariya ɓǝa kya gilǝki ban-sulǝo.

⁵³Sǝ àkǝ̀ la mǝno ka kǝɓwa gingsǝi ɗang, acemǝnana yì ka, tsǝk muri aban ká nǝ Urǝshalima.

⁵⁴Alaggana male, Jemis andǝ Yohana, à sǝni anggo ka pǝlǝa à ɗiban ama, “Mǝtalabangŋo, ɓǝ̀ sǝm tunǝ bǝsa a kuli ɓǝ̀ yi pisǝ aɓwana mǝnia ka le?”[73]

⁵⁵Yesu pǝlǝ rǝì sà arǝ Jemis andǝ Yohana.

⁵⁶Pǝlǝa à kutio à o a ɓe muna-la.

⁵⁷À nda ban ká a njargula ka, ɓeɓwa ne Yesu ama, “Mǝ nǝ kpato ko ayaban a nǝ ká kam ngga.”

⁵⁸Yesu ne wi ama, “Amǝ'nzǝgban ngga à ndanǝ atuli malea, sǝ amuna-nyal mǝnana a kuli ka à ndanǝ anda, sǝ Muna mala Ɓwa ka pànǝ ban mǝnana nǝ̀ usǝlǝ kam ngga ɗang.”

⁵⁹Pǝlǝa ne ɓeɓwa ama, “Yiu atam.” Sǝ ɓwe ne wi ama, “Mǝtalabangŋo, cam peatu, mǝ kya tsǝkban tárram.”

⁶⁰Yesu ne wi ama, “Ɗeki alú ɓǝa tsǝk alú malea, sǝ we ka kyane kya hamnǝ Domurǝm mala Ɓakuli.”

⁶¹Nyare ɓeɓwa bangŋa ama, “Mǝ nǝ kpato, Mǝtalabangŋo, sǝa ma cam peatu mǝ nyare mǝ kya tsǝk amǝɓala mem a ndà.”[74]

⁶²Yesu ne wi ama, “Ɓwa mǝnana nda ban rya nǝ andá, sǝ kǝ kar mǝsǝi a nzǝmi ka, kārǝa nǝ̀ kum Domurǝm mala Ɓakuli ɗang.”