Read mbula bwazza Yohana 1 Bible Online

Yohana 1 - mbula bwazza bible

Yohana 1

¹Kaniama Ɓakuli nǝ̀ pusǝ ɓanza ka, Cau ni na kam, sǝ mǝno yì Cau ka à nda tàrǝia andǝ Ɓakuli; sǝ yì, yì Cau ka Ɓakuli na.

²A tite ka à nda andǝ Ɓakuli.

³Nǝ yi sǝ Ɓakuli pusǝ agir kat. Kǝgir pà kàm mwashat mana à pusǝì mǝnana nǝ yi sǝ à pusǝì raka.

⁴Yì nda tǝr yilǝmu, sǝ mǝnia yì yilǝmu ka yiu nǝ tǎlaban aban ɓwapǝndǝa.

⁵Sǝ yì tǎlaban ngga kǝ ta aɓa pǝndǝa sǝ pǝndǝa ka gandǝ bwalte ɗang![1]

⁶[2] Ɓe ɓwa yiu, mǝnjar mǝnana Ɓakuli turi ka, lullǝi ama Yohana.

⁷Yiu yi ne ɓwapǝndǝa cau amur mǝnia yì tǎlaban ngga, ace mǝnana ɓǝ̀ ɓwapǝndǝa kat ok mǝnia yì cau ka, ɓǝ̀ é.

⁸Yohana nǝ ɓamuri ka nda tǎlabanì ɗang; yì ka, yiu ace na cau amur tǎlabanì.

⁹Tǎlaban mǝ'mǝsǝcau nì, mǝnana kǝ ta aban ɓwapǝndǝa kat ka, ndo kǝ yiu a ɓanza ka.

¹⁰Yì Cau ka nda a ɓanza, sǝ kat andǝ amani ama nǝ yi sǝ à pusǝ ɓanza ka, ɓanza surǝì ɗang.

¹¹Yiu aban aɓwana mǝnana amale na ka, sǝ amale é ɗang.

¹²Sǝ aɓwana mǝnana kat à é, à pa ɓamuria abani ka, pania wia rǝcandǝa ɓǝa duk amuna mala Ɓakuli.

¹³Ɓǝlban malea ka, mala nkila na andǝ nggūrǝu ɗang. Pa aɓa kpapi mala mɓwama andǝ ɓwabura ɗang. Mǝnia ka pe mala Ɓakuli na.

¹⁴Mǝnia yì Cau ka yi duk ɓwamǝpǝnde, sǝ yi duk zuku aɓalǝ sǝm. Sǝm sǝna gulo male, gulo mala kǝ̀ Muna mwashat ɓǝrɓǝr, mana pur nǝban Tarrí Ɓakuli ka, lumsǝo nǝ ɓwamuru andǝ mǝsǝcau.

¹⁵Yohana ne aɓwana cau amuri nǝ giu mǝcande ama, “Mǝnia ka nda ɓwa mǝnana ǝn na wun cau amuri nǝma nda ban yiu a nzǝmam ngga, sǝ yì ka, kutiam nǝ gulo, acemǝnana yì ka, ndakam ɗiɗyal sǝ à yì ɓǝlam.”

¹⁶Aɓa ɓwamuru andǝ mǝnbu male sǝ tsǝka sǝm bu kat, kǝ pa sǝm agir mǝɓoarne a nzǝmarǝia.

¹⁷Ɓakuli pa sǝm Nggurcau nǝ bu Musa, sǝ nǝ bu Yesu Kǝrǝsti sǝ pa sǝm ɓwamuru andǝ mǝsǝcau.

¹⁸Kǝ ɓwa sǝn ma Ɓakuli àkǝ̀ pwari ɗang, she kǝ Muni mǝnana à nda mwashat andǝ yi, sǝ nda a nkanggari ka. Yì na tsǝa sǝ sǝm surǝ Tarrí ka.

¹⁹Aɓwana-mǝgule mala amǝ Yahudi mǝnana a Urǝshalima ka à túr apǝris andǝ amǝ'lawi ɓǝa kya ɗi Yohana ama, yì ka, nda yana le?

²⁰Yohana sǝmbǝrǝia wia kǝgir ɗang, banggia wia mǝsǝcau ama, “Mǝ nda Kǝrǝsti[3] ɗang.”

²¹À ɗi ama, “Sǝ we ka a nda yana? A nda Iliya le?”[4] Yohana earia wia ama, “Awo, mǝ nda yì ɗang.” Sǝ à ɗi ama, “A nda mǝɓangna mala Ɓakuli mǝnana sǝm nggǝ kundǝmuri ka le?” Earia wia ama, “Awo.”

²²A masǝlǝate ka à ɗi ama, “Na sǝm cau mǝnana ɓǝ̀ sǝm nyesǝi aɓwana mǝnana à tur sǝm ngga. A kǝ twali ɓamuro ama a nda yana?”

²³Yohana earia wia nǝ cau mala Ishaya mǝɓangna mala Ɓakuli ama, “Mǝ nda gìu mǝnana kǝ hama a ɓabondo ka, ama, ‘Wu tsǝk njargula ɓǝ cam kporong ace Mǝtalabangŋo.’ ”[5]

²⁴Aɓea amǝ Farisi mǝnana à turia ka,

²⁵à ɗi Yohana ama, “Sǝ ɓǝ̀ a nda Kǝrǝsti,[6] ko Iliya, ko mǝno yì mǝɓangna mala Ɓakuli raka, palang sǝ a kǝ pakki aɓwana batisǝma?”

²⁶Yohana earia wia ama, “Ən nggǝ pakki aɓwana batisǝma nǝ múr, sǝ ɓeɓwa na came aɓalǝ wun mǝnana wu surǝì raka,

²⁷yì ka, nda ɓwa mǝnana kǝ yiu a tam tu ka, ǝn kārǝa mǝ nǝ panzǝ anggur-nkura male ɗang.”

²⁸Mǝnia yì gir ka à pè a Betani, a nkaring Nggeasala Jodan, àkǝ̀ ban mǝnana Yohana pakkiyi batisǝma kam ngga.

²⁹Ɓe ban fana ka, Yohana sǝn Yesu aban yiu nǝ bani, sǝ pǝlǝa na ama, “Wu sǝn Mǝgam mala Ɓakuli, mǝnana twalkiyi cauɓikea mala ɓanza ka!

³⁰Mǝnia ka nda ɓwa mǝnana ǝn na ce ama, ‘Ɓe ɓwa na kǝ yiu a tam ngga. Yì ka, kutiam nǝ gulo, acemǝnana yì ka, ndakam ɗiɗyal sǝ à yì ɓǝlam.’

³¹Nggearǝ mim ngga ǝn surǝì ɗiɗyal ɗang, sǝ tǝr yiu mem mǝnana ǝn nggǝ pakki aɓwana batisǝma nǝ mur ka nda ace mǝnana ɓǝa lǝmndǝì amǝ Isǝrayila rǝì ka.”

³²Pǝlǝa Yohana bang gir mǝnana surǝì amuri ka ani: “Ən sǝn Bangŋo mala Ɓakuli kǝla kutu, sulǝ nǝ kuli yi do amuri.

³³Ɓǝ́ pà mǝ nǝ surǝì ɗang, ɓǝ̀ Ɓakuli mǝnana tasǝam ama ɓǝn yi pakki aɓwana batisǝma nǝ múr ka na nam raka. Nam ama, ‘Ɓwa mǝnana a sǝni Bangŋo mem sulǝo yi do amuri ka, nda ɓwa mǝnana nǝ̀ pakki aɓwana batisǝma nǝ Bangŋo Mǝfele ka.’

³⁴Ən sǝni sǝ ǝn bangcau amuri ama, yì ka, nda Muna mala Ɓakuli.”

³⁵Ɓe ban fana ka, Yohana na kano ɗǝm andǝ aɓea alaggana male ɓari.

³⁶Lang nǝ̀ sǝn Yesu aban kutio ka, na ama, “Wu sǝn Mǝgam mala Ɓakuli!”

³⁷Lang alaggana mǝnia ɓari à ongŋǝni náná anggo ka, kara à o ata Yesu.

³⁸Yesu nǝ̀ pǝlǝ rǝì ka, kara sǝnia aban yiu ate, sǝ ɗia ama, “Mana wu earki ce?” À eare ama, “Rabbi a ya ban sǝ a pa?” (Rabbi ka ɓālǝi nda Malǝm.)

³⁹Yesu earia wia ama, “Wu yiu wu yi sǝni.” À pǝlǝa à wario à kya sǝn ban-do male. Sǝ à kya do ate ba du. Anggo ka bu-pwari ine nǝ pwarikpǝra na.

⁴⁰Ɓe ɓwa mwashat ata mǝnia yì aɓwana ɓari mǝnana à ok cau mǝnana Yohana na ka nda Andǝru, mǝ'eam Shiman Bitǝrus.

⁴¹Andǝru pǝlǝa kum mǝ'eambǝi Shiman, sǝ ne wi ama, “Sǝm kumǝna Mezaya (Tǝr Mezaya nda Kǝrǝsti, Mǝ'amsǝban mǝnana Ɓakuli bangŋa ama nǝ̀ tasǝi ka.)”

⁴²Sǝ yinǝ Shiman aban Yesu. Yesu sǝni kyap-kyap, sǝ na ama, “A nda Shiman muna mala Yohana. À nǝ̀ tunǝo ama, Kefas.” (Tǝr Kefas nda Bitǝrus, ɓālǝi ama, Tali.)

⁴³Ɓe ban fana ka, Yesu twali a ɓabumi ama nǝ̀ o a Galili. Yi kum Filip sǝ ne wi ama, “Yiu atam.”

⁴⁴Filip ka ɓwa Beseda na, la mala Andǝru andǝ Bitǝrus.

⁴⁵Filip alta Nataniyel yi kumi sǝ ne wi ama, “Sǝm kumǝna ɓwa mǝnana Musa gilǝgir amuri aɓa malǝmce Nggurcau mala Musa, andǝ mǝnana à gilǝa aɓa malǝmce mala amǝ'ɓangna mala Ɓakuli ka, yì Yesu ɓwa Nazarat, muna mala Yisǝfu.”

⁴⁶Nataniyel na ama, “A Nazarat! Kǝ gir mǝɓoarne nǝ̀ pur a Nazarat gbal?” Filip ne wi ama, “Yiu sǝni.”

⁴⁷Lang Yesu sǝn Nataniyel aban yiu ka, na cau amuri ama, “Mǝnia ka ɓwa Isǝrayila mǝɓafoe na, mǝnana pànǝ nyir a rǝì raka.”

⁴⁸Nataniyel ɗi Yesu ama, “A pak lang sǝ a surǝam?” Yesu eari wi ama, “Mǝnana a nda a tǝta nggun vwari ka, ǝn angŋa dǝmbǝa ǝn sǝnǝ no, sǝ Filip tunǝo.”

⁴⁹Pǝlǝa Nataniyel ne Yesu ama, “Rabbi, a nda Muna mala Ɓakuli! A nda Murǝm mala amǝ Isǝrayila!”

⁵⁰Yesu ne Nataniyel ama, “A earnǝ mim acemǝnana ǝn banggo nǝma, ǝn sǝno a tǝta nggun vwari ka le? A nǝ sǝn agir mǝgulke mǝnana à kuti man ngga.”

⁵¹Yesu nyare nea wia ama, “Ən nggǝ na wun mǝsǝcau, wu nǝ̀ sǝn kuli nǝ mǝnna, andǝ amǝturonjar mala Ɓakuli aban eauwe andǝ sulǝo amur Muna mala Ɓwa.”[7]