Read mbula bwazza Yohana 10 Bible Online

Yohana 10 - mbula bwazza bible

Yohana 10

¹Yesu na ama: Mǝ nda ban bangga wun mǝsǝcau, ɓwa mǝnana kuti aɓa domwan mala anzur nǝ kun-nda raka, sǝ kuti nǝ ɓe kǝ njar ɗàng ngga, mǝn'i na sǝ mǝɓǝmbǝriban na.[47]

²Sǝ ɓwa mǝnana kuti nǝ kun-nda ka, nda mǝyal anzur.

³Mǝtsǝkkir kun-nda nǝ̀ mǝnmbi wi kun-nda; anzur nǝ̀ ok gi mǝyalia ɓǝ̀ tunǝia nǝ lullǝia ka, sǝ nǝ̀ kà nǝia a nza.

⁴Anzǝm mǝnana pusǝna anzur male kat a nza ka, kǝ upia wia a dǝmbǝa, sǝ anzur kǝ kpate acemǝnana à surǝna rǝ gi.

⁵Anzur pa nǝ̀ gya ata bǝriɓwa ɗang; à nǝ̀ ɓanggi wi, acemǝnana à surǝ gi ɗàng.

⁶Yesu nea wia man yì cau aɓa ɓi, sǝ yia ka à bwalta gir mǝnana nakiyi ka ɗang.

⁷Ace mǝno ka Yesu bǝlia wia ɓālǝi ama: Mǝ nda ban na wun mǝsǝcau, mǝ nda kun-nda mala anzur.

⁸Acili aɓwana mǝnana kat à akàm dǝmbǝa à yiu ka, amǝn'i na andǝ amǝ'ɓǝmbǝriban. Anzur mǝ'mǝsǝcau nì okia wia ɗang.[48]

⁹Mǝ ndà kun-nda. Ɓwa mǝnana kat kuti nǝ banam ngga nǝ̀ kum auwa; nǝ̀ kutio sǝ nǝ̀ puro, sǝ nǝ̀ kum girlina.

¹⁰Mǝn'i ka kǝ yiu ace iun'i, ace wal-lú, andǝ kiɗiki gir. Sǝ mim ngga ǝn yiu ace pea aɓwana yilǝmu, andǝ do mǝɓoarne mǝnana lumsǝ a koya njari ka.

¹¹Mǝ nda yalgír mǝɓoarne. Yalgír mǝɓoarne ka kǝ pa yilǝmi, nǝ̀ wu ace anzur male.[49]

¹²Sǝ ɓwa mǝnana à twali à kǝ mbwe, ace tsǝkir anzur, sǝ yì ka, yalgír na ɗang, sǝ anzur ka a male na raka, ɓǝ̀ sǝn nvwa-bondo aban yiu ka, nǝ̀ nying anzur nǝ̀ ɓangŋa, sǝ nvwa-bondo nǝ̀ bwal ata anzur sǝ nǝ̀ mesǝkea.

¹³Ɓwa mǝnana à twali a turoboalo ace yal agir ka, nǝ̀ ɓangŋa acemǝnana yì ka, turo boalo na pakkiyi ka, kǝgir oasǝi arǝ anzur nì ɗang.

¹⁴Mǝ nda yalgir mǝɓoarne; ǝn surǝ anzur mem, sǝ yia gbal ka à surǝam,

¹⁵kǝla mǝnana Tárram surǝam, sǝ ǝn surǝ Tárram ka. Ən pa yilǝmem ace anzur mem.[50]

¹⁶Mǝ ndanǝ aɓia anzur mem mǝnana à pà aɓa domwan man raka. Dumǝna púp mǝ nǝ yinǝia gbal. À nǝ̀ kwaki kiria à nǝ̀ ok giem, sǝ domwan ngga nǝ̀ duk mwashat, nǝ yalgir mwashat.[51]

¹⁷Tárram kǝ earcem acemǝnana ǝn eare mǝ nǝ pà yilǝmem mǝ nǝ wu, ace mana ɓǝn é ɗǝm ɓǝn lo nǝ yilǝmu ka.

¹⁸Kǝɓwa pà nǝ̀ twal yilǝmem a rǝam ɗang. Ən nggǝ pa yilǝmem nǝ eare mem. Mǝ ndanǝ rǝcandǝa mǝ nǝ pà yilǝmem, sǝ mǝ ndanǝ rǝcandǝa mǝnana mǝ nǝ é ɗǝm ngga. Mǝnia ka nda nzongcau mǝnana Tárram pam ama ɓǝ̀ ǝn pak ka.

¹⁹Lang Yesu banggina acau mǝnia ka, kara ɗenyicau mala amǝ Yahudi a rǝi gakya.

²⁰Aɓea aɓwana pas aɓalǝia à bangŋa ama, “Yì ka, ndanǝ kukwar a rǝì! Pà aɓa ɗenyicau male ɗang! Ace man sǝ wu kǝ kwaki kir wun a rǝì?”

²¹Sǝ acili aɓwana ka à bangŋa ama, “Ɓwa mǝnana nǝ kukwar a rǝì ka, pà nǝ̀ bang amǝnia yì acau ka ɗang! Lang sǝ kukwar nǝ̀ mǝn mǝsǝ ante?”

²²Nda nǝ kunɗwal, sǝ yi karǝ nǝ kuni Hanuka, yì Lamsan ace ɗenyi nǝ baku mǝnana à tàr Ndàmǝgule nǝi ace Ɓakuli, aɓa Urǝshalima ka.

²³Ɓe pwari ka, Yesu gya kǝ kutio aɓa ɓe bui mala Ndàmǝgule mala Ɓakuli, mǝnana à tunǝki ama Tara mala Solomon ngga.[52]

²⁴Aɓwana-mǝgule mala amǝ Yahudi yi rambǝa abani, sǝ à ɗi ama, “Lang sǝ a nǝ nying sǝm anggo aɓa pǝndǝa? Ɓǝ̀ a nda Kǝrǝsti ka, Pura sǝm bwāng, bangga sǝm.”

²⁵Yesu nyesǝia wia ama: Ən angŋa dǝmbǝa ǝn nanà wun, sǝ wun ngga, wu earnǝ mim ɗang. Aturo mǝnana ǝn nggǝ pea aɓa rǝcandǝa mala Tárram ngga, à nda à lǝmndǝ ko yan nda mim ngga.

²⁶Sǝ wun ngga wu earnǝ mim ɗang, acemǝnana wu ndaka nzur mem ɗang.

²⁷Anzur mem kǝ ok giem; ǝn surǝia, sǝ à kǝ kpatam.

²⁸Ən nggǝ pea wia yilǝmu mǝnana málá male pà kàm raka, sǝ à pà nǝ̀ kiɗiki à nǝ̀ ueɓà ɗang. Kǝɓwa pà nǝ̀ fea a buam ɗang.

²⁹Tárram mǝnana pam mia ka kuti koyan ngga nǝ rǝcandǝa. Kǝɓwa pà nǝ̀ gandǝ ea a rǝì ɗang.

³⁰Mim sǝnǝ Tárram ka sǝm nda mwashat.

³¹Amǝ Yahudi pwan atali ɗǝm ama à nǝ̀ ɓukki.

³²Sǝ Yesu nea wia ama, “Ən pakkina agir mǝɓoarne pas, a ɓadǝm wun, mǝnana Tárram turam ama ɓǝn pea ka. Nda ace mǝye mwashat aɓalǝia sǝ wu kǝ earce wu nǝ̀ ɓukkiam?”

³³Pǝlǝa à eari wi ama, “Pà ace kǝ agir mǝɓoarne mǝnana à pea, sǝ sǝm earce ama sǝm nǝ̀ ɓukkio ka ɗang. Nda ace cau ɓǝsǝki Ɓakuli mǝnana a na ka. We ka, a nda ɓwamǝpǝnde sǝ a kǝ twal ɓamuro a nda Ɓakuli!”[53]

³⁴Yesu earia wia ama: Pà akàm à gilǝe aɓa Malǝmce Nggurcau ma'wun mbo, mǝnana Ɓakuli bangŋa ama, “Wu nda ka aɓakuli” ka re?[54]

³⁵Wu sǝlǝna ama cau mǝnana Malǝmce bang ngga makgir pà a rǝì ɗang, camǝna anggo pà nǝ̀ nggaɗi ɗang. Sǝ ɓǝa aɓwana mǝno à ak cau mǝno, à tunǝia ama “aɓakuli” ka,

³⁶ace mana sǝ wu twali ama cau ɓǝsǝki Ɓakuli na ǝn na ka, mǝnana ǝn bang nǝma “Mǝ nda Muna mala Ɓakuli,” yì mim mǝnana Ɓakuli taram sǝ tasǝam a ɓanza ka?

³⁷Wu kǝa earnǝ mim ɗang ɓǝ̀ aturo mǝnana ǝn pakkiyi ka a mala Tárram Ɓakuli na raka.

³⁸Sǝ ɓǝ̀ aturo male na ǝn pakkiyi ka, ɓǝ̀ pà wu nǝ̀ earnǝ mim raka, wu earnǝ agir-ndali mǝnana ǝn pea ka, ace mǝnana ɓǝ̀ wu sǝlǝa, sǝ ɓǝ̀ kpaka wun ama, Tárram ngga nda a ɓalǝam, sǝ mim ngga mǝ nda aɓa Tárram.

³⁹Nyar ɗǝm ngga, à ɓariki ama à nǝ̀ bwal Yesu, kara puri ɓabuia.

⁴⁰O kya yàl a nkaring Mur mala Jodan, yi pur aban mǝnana Yohana pakkiyi batisǝma kam ata dǝmbe ka. Akano sǝ kya do.

⁴¹Aɓwana pas yiu abani, à kǝ bangŋa a rǝarǝia ama, “Yohana pak kǝ gir'ndǝlǝki ɗang, sǝa ma acau mǝnana ne amur man yì ɓwa ka, à yì pur a mǝsǝcau.”

⁴²Pas ata aɓwana mǝnana abanì ka à pà ɓamuria aban Yesu.