Read mbula bwazza Yohana 13 Bible Online

Yohana 13 - mbula bwazza bible

Yohana 13

¹Ué bǝti à nǝ̀ tita Lamsan Yalimuru, sǝ Yesu sǝlǝna ama bu-pwari male yina mǝnana nǝ̀ nying ɓanza nǝ̀ o aban Tarrí ka. Yì ka, earnace aɓwana male mǝnana à nda a ɓanza man ngga, sǝ ado ka lǝmndǝia wia earcearǝu mǝnana malkiyi raka.

²Yesu andǝ alaggana male ka à nda ban lí nǝ pwarikpǝra. Shetan angŋa dǝmbǝa tsǝngŋǝna ɗenyicau mala mak Yesu a ɓabum Yahuda Iskariyoti muna mala Shiman.[69]

³Yesu sǝlǝna ama Ɓakuli Tarrû pani wi rǝcandǝa amur agir kat, sǝ sǝlǝna gbal ama pur nǝban Ɓakuli, sǝ ndo nǝ̀ nyare nǝ̀ o abani ka.

⁴Ace mani ka loapi mur girlina, swár nggea-daura male, sǝ kùr nggurbyau esǝki rǝǔ a taɓuni.

⁵Pǝlǝa solǝ mur a nkenye, sǝ tita lakki akusǝ alaggana male sǝ kǝ esǝkia nǝ nggurbyau esǝki rǝǔ mǝnana a taɓuni ka.[70]

⁶Lang Yesu yiu aban Shiman Bitǝrus ka, Bitǝrus ɗi ama, “Mǝtalabangŋo, a nda a nǝ lakkam akusǝam ngga le?”

⁷Pǝlǝa Yesu eari wi ama, “A pà nǝ surǝ gir mǝnana ado ǝn pakkiyi ka ɗang, sǝ nǝ nzǝmo ka a nǝ ngga sǝlǝa.”

⁸Shiman Bitǝrus banggi wi ama, “Awo, a pà nǝ lakkam akusǝam ɗang!” Sǝ Yesu ne wi ama, “Ɓǝn lakko akusǝo raka, a pà nǝ duk mǝkpatam ɗǝm ɗang.”

⁹Sǝ Shiman Bitǝrus pe eare ama, “Mǝtalabangŋo, akusǝam na nǝmurǝia a nǝ lak ka ɗang, lakkam abuam andǝ ɓamuram gbal!”

¹⁰Pǝlǝa Yesu na ama, “Ɓwa mǝnana sussǝna ka, akusǝi na à nǝ̀ na ce lea ka. Sǝ wu fànà kat, kǝ ɓwa mwashat na ueo ata wun ngga.”

¹¹Yesu ka angŋa dǝmbǝa surǝna rǝ ɓwa mǝnana nǝ̀ ngga me ka. Nda gir mǝnana tsǝa sǝ bangŋa ama, “Wun kat sǝ wu fà ɗang.”

¹²Anzǝm mǝnana langŋǝnia wia akusǝia ka, pǝlǝa nyesǝ daura male oasǝi a rǝì, sǝ nyare kya do a ban-do male. Pǝlǝa nea wia ama: Wu surǝ gir mǝno ado ǝn pakka wun ngga le?

¹³Wu kǝ tunǝam ama Malǝm, sǝ Mǝtalabangŋo. Sǝ wu ɓwarki ɗang, anggo sǝ ǝn pa.

¹⁴Sǝ mǝnana mim Mǝtala wun andǝ Mǝkania wun gir, ǝn lakka wun akusǝ wun ngga, wun gbal ka dumǝna amur wun, wu nǝ̀ lakki arǝ wun akusǝu.

¹⁵Ado ka, gir mǝnana ǝn pe ka, kusǝu na ǝn tsǝka wun ngga, ace mǝnana ɓǝ̀ wu kǝ pakkia rǝ wun anggo ka.[71]

¹⁶Mǝ nda ban bangga wun mǝsǝcau, kǝ guro pà kàm gulo kuti mǝtala-ɓala male ɗang, sǝ kǝ mǝturonjar pà kàm nǝ́ gulo kuti ɓwa mǝnana turi ka ɗang.

¹⁷Mǝno ado wu surǝna rǝ mǝnia yì mǝsǝcau ka, ɓǝ̀ wu ci aɓa turo ka Ɓakuli nǝ̀ tsǝka wun bui![72]

¹⁸Ən pa aban na cau amur wun kat ɗang, acemǝnana ǝn surǝna rǝ aɓwana mǝnana ǝn tarkia ka. Sǝ cau mǝnana Malǝmce mala Ɓakuli bangŋa ama, “Kǝ yì, yì ɓwa mǝnana oasǝ bui atam a kwar ka nda pǝlǝ a rǝam ngga,”[73] dumǝna púp nǝ̀ lumsǝo.

¹⁹Mǝ nda aban na wun man yì cau ka ado sǝ ɓǝ̀ yi lumsǝo, ace mǝnana ɓǝ̀ yi lumsǝna ka, wun nǝ̀ earnǝ mim ama “Mǝ Nda kǝ ɓwe mǝnana ǝn na nǝma Mǝ nda ka.”

²⁰Sǝ mǝ nda ban bangga wun mǝsǝcau: ɓwa mana kat ak ɓwa mǝnana ǝn turi ka, mǝ nda akiyiam gbal ka, sǝ ɓwa mana kat em ngga, nda rǝ ak Tárram mǝnana tasǝam ngga.[74]

²¹Anzǝm mana Yesu bangŋǝna man yì cau ka, bumkiɗikea ɓákì kǝrkǝr aɓa bangŋo, sǝ ne bwāng ama, “Mǝ nda ban bangga wun mǝsǝcau, ɓeɓwa na aɓalǝ wun nǝ̀ ngga mem.”

²²Kara alaggana male sǝnggi rǝarǝia, à kǝ ndali ko yana atea nakiyi cau amuri.

²³Ɓe lagga mǝnana Yesu earkiyi ace raka nda a ban-do a nkanggari Yesu.

²⁴Pǝlǝa Shiman Bitǝrus lǝmndǝì cau nǝ bui ama ɓǝ̀ ɗi Yesu, ɓǝ̀ na ɓwa mǝnana nakiyi cau amuri ka.

²⁵Pǝlǝa lagga mǝno pǝlǝ rǝi aban Yesu sǝ ɗi ama, “Mǝtalabangŋo, yana ɓwe ata sǝm a nakiyi cau amuri le?”

²⁶Yesu pa eare ama, “Nda ɓwa mǝnana ado mǝ nǝ oasǝ nɗǝmo a mbú mǝ nǝ pe wi ka.” Pǝlǝa Yesu ɓwan nɗǝmo, ɗarǝ mbú, sǝ pe Yahuda muna mala Shiman Iskariyoti.

²⁷Lang Yahuda ak nɗǝmo she ka, kara Shetan kutia rǝì. Sǝ Yesu ne wi ama, “Lo tsuk-tsuk, kya pak gir mǝnana a nǝ pak ka.”

²⁸Sǝ kǝɓwa pà kàm atea a ban-li mǝnana surǝ gir mǝnana tsǝa sǝ Yesu ne wi man yì cau ka ɗang.

²⁹Sǝ acemǝnana Yahuda nda mǝbwal boalo malea ka, aɓea laggana kǝ sǝni kǝla Yesu na ban ne wi ɓǝ̀ kyane ɓǝ̀ kya kur gir mǝnana à nǝ̀ pangŋǝna turo nǝi ace Lamsan ngga. Ko a na raka, ɓǝ̀ kya pe amǝtǝr aɓa boalo mǝnana a bui ka.

³⁰Anzǝm mana Yahuda shekina nɗǝmo ka, pǝlǝa lo tu puro. Sǝ du pǝndǝna.

³¹Anzǝm mana Yahuda nyingŋǝna banì ka, Yesu na ama: Ado ka pwari karǝna mǝnana Muna mala Ɓwa nǝ̀ kutio aɓa gulo male ka, sǝ Ɓakuli ka, nǝ̀ kum gulo ata kusǝì.

³²Sǝ acemǝnana Ɓakuli nǝ̀ kum gulo ata kusǝ Muni ka, banì pà nǝ̀ sau ɗang, Ɓakuli nǝ̀ pe Muni gulo.

³³Wun amunem, mǝ nda mǝ nǝ do ata wun zuku. Wu nǝ̀ altam, sǝ kǝla mǝnana ǝn banggi aɓwana-mǝgule mala amǝ Yahudi ka, ban mǝnana ǝn kákiyi kam ngga, pa wu nǝ̀ gandǝ ká kam ɗang.

³⁴Sǝ ace mǝno ka mǝ ndarǝ pa wun bǝsa nzongcau: Wu earce rǝarǝ wun. Kǝla mǝnana ǝn earce wun ngga, anggo sǝ wu nǝ̀ dum nǝ earcea rǝ wun.

³⁵Ɓǝ̀ wu ndanǝ earcea rǝ wun ngga, aɓwana kat nǝ̀ sǝlǝ ama wu ndaka amǝkpatam.

³⁶Shiman Bitǝrus ɗi Yesu ama, “Mǝtalabangŋo, a nǝ ká a ke le?” Yesu eari wi ama, “Ado ka a pà nǝ gandǝ ká atam aban mǝnana mǝ nǝ ká kam ngga ɗang, sǝ nǝ nzǝmo ka a nǝ gandǝ yiu atam.”

³⁷Pǝlǝa Bitǝrus ɗi ama, “Mǝtalabangŋo, ace mana sǝ pà mǝ nǝ gandǝ ká ato ado ɗang? Ən earǝna mǝ nǝ wu aceo.”

³⁸Yesu ear ama, “A na ama a nǝ pa yilǝmio, a nǝ wu acem ɓafo? Mǝ nda ban banggo mǝsǝcau, kaniama nggǔ nǝ̀ ɓua ka, a nǝ makgirem kusǝ tārú ama a surǝam ɗang.”