Read mbula bwazza Yohana 18 Bible Online

Yohana 18 - mbula bwazza bible

Yohana 18

¹Anzǝm mǝnana Yesu malǝna hiwi ka, pǝlǝa lo andǝ alaggana male a eauwe a nkaring mala Ɓangŋaban Kidǝron. À kya kutio a ɓe ɓaban mala anggun olif.[92]

²Yahuda, mǝnana mak Yesu ka, surǝna rǝ banì, acemǝnana kusǝ pas Yesu kǝ kpapi kam andǝ alaggana male.

³Agbani Pǝris andǝ amǝ Farisi tasǝ amǝyal Ndàmǝgule mala Ɓakuli andǝ aɓea soje mala amǝ Roma, ɓǝa kyane ata Yahuda aban mǝnana Yesu nakam ngga. À kur rǝia nǝ agirbura, sǝ à bwal bǝsa arǝ aɓukan, andǝ apitǝla, pǝlǝa à puro à yì tusǝo a ɓabanì.[93]

⁴Sǝ Yesu ka angŋa dǝmbǝa sǝlǝna gir mǝnana nǝ̀ kumi ka, pǝlǝa puro cam a ɓadǝmbǝia, sǝ ɗia ama, “Yana ɓwe na wu alkite?”

⁵À eare ama, “Yesu ɓwa Nazarat.” Banggia wia ama, “Mǝ Nda.”[94] Yahuda, yì ɓwa mǝnana mak Yesu ka, nda aban came atea.

⁶Lang Yesu banggia wia ama, “Mǝ Nda” ka, kara à nyar nǝ nzǝmia à sukki a nzali.

⁷Pǝlǝa Yesu nyare ɗia ama, “Yana ɓwe na wu alkiyite le?” À eare ama, “Yesu Ɓwa Nazarat.”

⁸Yesu eare ama, “Ən nanà wun nǝma Mǝ Nda. Sǝ ɓǝ̀ mǝ nda wu alkiyitam ngga, wu ɗeki alaggana mem mǝnia ka ɓǝa o.”

⁹Mǝnia ka pa anggo ace mǝnana cau mana pur a kuni ka ɓǝ̀ lumsǝo, mǝnana ama, “Dâ, aɓalǝ aɓwana mǝnana a pam ngga, ǝn turta kǝɓwa mwashat ɗang.”[95]

¹⁰Shiman Bitǝrus kwetǝ nggeabyau, kwarǝna guro mala Pǝris Mǝgule nǝi, kasǝ kiri mǝli kpat. (Lullǝ mǝno yì guro nda Malchus.)

¹¹Yesu banggi Bitǝrus ama, “Nyesǝ nggeabyau mo oasǝi a nde! A kǝ sǝni kǝla pa mǝ nǝ nu kwap mala tanni mǝnana Tárram pam ama ɓǝn nu ka re?”[96]

¹²Pǝlǝa asoje andǝ mǝsarǝban malea, andǝ amǝ munagara mala amǝ Yahudi, bwal Yesu, sǝ à taka abui.

¹³A tadǝmbe ka à umnǝ Yesu a ɓadǝm Annas, nkil Kayafas, yì Pǝris Mǝgule a mǝno yì pǝlǝa ka.

¹⁴Kǝ Kayafas mǝno na kwarkir aɓwana-mǝgule mala amǝ Yahudi ama ndanǝ ɓoaro ɓǝ̀ ɓwa mwashat wú a kun aɓwana mala amǝ Yahudi ka.[97]

¹⁵Shiman Bitǝrus andǝ ɓe lagga mala Yesu wario aban mǝnana à kuti nǝ Yesu kam ngga. Mǝnia yì lagga ka Pǝris Mǝgule surǝì pepe, nda sǝ à eari wi kutio aɓa ɓala mala Pǝris Mǝgule ka.

¹⁶Bitǝrus ka ueo aban came a kun-ɓala nǝ nza. Sǝ mǝnia yì lagga mana pǝris mǝgule surǝì ka, nyare yiu yi na cau nǝ muna-ɓwama mǝnana tsǝkiyikir kun-ɓala ka, pǝlǝa eari Bitǝrus ɓǝ̀ kutio.

¹⁷Muna mɓwame ɗi Bitǝrus ama, “A nda gbal aɓalǝ amǝkpata ɓwa mǝno à bwali ka le?” Bitǝrus eari wi ama, “Awo, ǝn pa aɓalǝia ɗang.”

¹⁸Ɗwal na kam kǝrkǝr, pǝlǝa amǝturo palta andǝ amǝ munagara bwal bǝsa, à kǝ dandǝ rǝia. Sǝ Bitǝrus yiu, yi cam abania a kun bǝsa.

¹⁹Pǝlǝa Pǝris Mǝgule tita ɗiki Yesu amur alaggana male andǝ kanigir male.

²⁰Yesu banggi wi ama, “Acau mem ngga ǝn nea bwāng a ɓadǝm ɓwapǝndǝa kat. Sǝ ko aya pwari ka mǝ ndaban kanigir arǝ ndakpapi andǝ Ndàmǝgule mala Ɓakuli, ban rambǝa mala amǝ Yahudi. Ən na kǝ cau aɓa sǝmbǝrǝa ɗang.

²¹Sǝ ace man sǝ à kǝ ɗikiam? Ɗi ka aɓwana mǝnana à ok cau mana ǝn na ka. Yia ka à surǝna rǝ cau mǝnana ǝn na ka.”

²²Lang Yesu bangŋǝna anggo ka, ɓeɓwa aɓalǝ amǝ yal Ndàmǝgule, mǝnana came abanì, kwak Yesu a takiri, sǝ bangŋa ama, “Anggo sǝ a nǝ pǝlǝì Pǝris Mǝgule cau?”

²³Pǝlǝa Yesu ear ama, “Ɓǝ̀ ǝn na cau mǝnana mǝɓane na ka, banggam ɓa ɓwarke, sǝ ɓǝ̀ mǝsǝcau na ǝn na ka, mana nda tǝr kwem a takiram?”

²⁴Anggo, andǝa kǝ tá bu mǝnana à taka abu Yesu ka, sǝ Annas tasǝte aban Kayafas, yì Pǝris Mǝgule.

²⁵Aɓa mǝno anggo ka, Shiman Bitǝrus na àkǝ̀ bancame a kun bǝsa, aban dandǝ rǝì. Sǝ aɓwana abanì ɗi ama, “We ka, a pa aɓalǝ alaggana mala ɓwa mǝno re?” Pǝlǝa yì ka, tǝmce, na ama, “Awo, ǝn pa aɓalǝia ɗang.”

²⁶Sǝ ɓeɓwa mwashat aɓalǝ aguro mala Pǝris Mǝgule, ɓǝla mala ɓwa mǝnana Bitǝrus kasǝ kiri ka, na cau ama, “Ən sǝno mǝni ata Yesu akano a ɓaban re?”

²⁷Bitǝrus nyare tǝmce, ama, “Awo mǝ nda ɗang.” Anggo ka, kara gwakurok ɓua.

²⁸Nǝ dǝmbari ɗiɗyal ka à pusǝ Yesu a ɓala mala Kayafas, à um nǝi aban mǝgule mala Nggwamna, ɓwa Roma. Sǝ aɓwana-mǝgule mala amǝ Yahudi, mǝnana à tsǝki Yesu cau ate ka, à ɓinǝ kutio aɓa palta mala Nggwamna, acemǝnana ɓǝa kuti ka, à nǝ̀ pǝndǝki ɓamuria, mǝnana nǝ̀ tsǝa à pà nǝ̀ kumo à nǝ̀ li girlina Lamsan Yalimuru raka.[98]

²⁹Ace mǝno ka, Bilatus pur abania, sǝ ɗia ama, “Ya cau na wu yiu nǝi amur mǝnia yì ɓwa ka le?”

³⁰Pǝlǝa à eare ama, “Ɓǝ̀ ɓwa mǝnia ka, mǝ'ɓealɓikea na raka, ɓǝ́ pa sǝm nǝ̀ yiu nǝi abano ɗang.”

³¹Bilatus pǝlǝa banggia wia ama, “Ɓǝ̀ nda anggo ka, wu um nǝi, wu kya ɓashi wi nǝ nggurcau ma'wun la.” Pǝlǝa amǝ Yahudi eare ama, “Sǝm pà nǝ́ rǝcandǝa mala kasǝ ɓashi lú amur kǝɓwa ɗang.”

³²Mǝnia ka lumsǝ cau mǝnana Yesu bangŋa amur ulang lú mǝnana nǝ̀ wu ka.[99]

³³Pǝlǝa Bilatus nyare aɓa palta male sǝ turban ɓǝa kuti nǝ Yesu abani. Ɗi Yesu ama, “A nda murǝm mala amǝ Yahudi le?”

³⁴Yesu eari wi ama, “Mǝnia yì ɗiban ngga, a twali a mala ɓamuro le ko aɓea ɓwana na à no cau a muram ngga?”

³⁵Bilatus ne wi ama, “Mim ngga mǝ nda ɓwa Yahudi le? Aɓwana mo andǝ agbani pǝris ma'wun na à yiu nǝ we a ɓashi abanam ngga. Mana ɗe a pa?”

³⁶Yesu eare ama, “Domurǝm mem ngga mala ɓanza mǝnia na ɗang. Ɓǝ̀ pǝlǝ ama mala ɓanza man na ka, ɓǝ́ amǝkpatam nǝ̀ munǝo acem, à pà nǝ̀ eari aɓwana-mǝgule mala amǝ Yahudi ɓǝà bwalam ɗang. Awo, domurǝm mem ngga mala ɓanza man na ɗang.”

³⁷Bilatus pǝlǝa ne Yesu ama, “Ashe a nda murǝm!” Yesu eari wi ama, “A bangŋa ama mǝ nda murǝm. Ace kǝ mani sǝ à ɓǝlam, sǝ yiu mem a ɓanza ka nda ace na mǝsǝcau, sǝ ɓwa mǝnana kat kǝ camata mǝsǝcau ka, kǝ kwaki kiri kǝ ok giem.”

³⁸Pǝlǝa Bilatus ɗi ama, “Mana nda mǝsǝcau?” Bilatus nyare puro aban amǝ Yahudi sǝ banggia wia ama, “Mim ngga ǝn kumi nǝ ɓe kǝ cauɓikea ɗang!

³⁹Sǝ wun amǝ Yahudi ka, ko aya pǝlǝa sǝ ɓǝ̀ yi karǝ nǝ Lamsan Yalimuru ka, pak ka wu kǝ earce ama ɓǝn panzǝa wun ɓwa mwashat ata ɓwana mǝnana à kùria a ndàkurban ngga. Ado ka, wu earce ɓǝn panzǝa wun mǝnia yì ‘Murǝm mala amǝ Yahudi’ ka le?”

⁴⁰Sǝ à nyesǝi wi nǝ loasǝban ama, “Awo, ɓwa mǝnia na à nǝ̀ panzǝa sǝmi ka ɗang! Panzǝa sǝm Barabbas!” (Barabbas ka à bwali acemǝnana yì ka, mǝ'mgbicau na.)