Read mbula bwazza Yohana 21 Bible Online

Yohana 21 - mbula bwazza bible

Yohana 21

¹Nǝ nzǝmo ka, Yesu nyar ɗǝm pusǝrǝi aban alaggana male a kun Garang Tiberiya. Ani sǝ gir nî pa.

²Shiman Bitǝrus, sǝ Toma mǝnana à tunǝki ama Pasa ka, andǝ Nataniyel ɓwa Kana mala Galili, andǝ amuna-burana mala Zabadi, andǝ aɓea alaggana mala Yesu ɓari, à nda a tarǝia kat.

³Pǝlǝa Shiman Bitǝrus banggi aɓi ama, “Mim ngga mǝ ndo mǝ nǝ o a taula.” Sǝ aɓi banggi wi gbal ama, “Sǝm nǝ̀ ká ato.” Pǝlǝa yia kat à eauwe a waru malea aban ká taula. Sǝ a bu du mǝno ka à bwal kǝgir ɗang.

⁴Ban kwarǝna, pwari nǝ̀ nggǝ eau ka, Yesu yiu yi came a kun mur sǝ yia alaggana ka à sǝlǝ ama Yesu na ɗang.

⁵Pǝlǝa tunǝban ɗia ama, “Wun alaggana, wu bwal kǝ nji le?” À ear ama, “Awo!”

⁶Pǝlǝa Yesu banggia wia ama, “Wu túr ndámbú ma'wun ata bu mǝli mala waru, wu nǝ̀ bwal nji!” Pǝlǝa à túr ndámbú a mùr sǝ à bwal nji kǝrkǝr, yale à gandǝ nun ndámbú, à eamsǝi aɓa waru ɗang, acemǝnana anji lakki pas aɓa ndámbú.

⁷Sǝ lagga mǝnana Yesu earkiyi ace raka ne Bitǝrus ama, “Mǝtalabangŋo na!” Lang Shiman Bitǝrus oe ama Mǝtalabangŋo na ka, kara twal daura male mǝnana swárí sǝ kuti a turo ka, oasǝi a rǝì, tǎ zurro a mur sǝ oakio aban ká a kun mur.

⁸Acili alaggana ueo aɓa waru aban nunggi ndámbú mǝnana lumsǝ nǝ nji ka, aban ká a nza. Ban mǝnana waru na kam aɓa mur ka sau nǝ nza ɗang; sauwa male na kǝla kusǝu gbǝman-tārú.

⁹Lang à nǝ̀ yia eau a nza ka, à sǝn nkalang bǝsa aban earke nǝ anji-twana amuri andǝ bǝredi abanì.

¹⁰Yesu banggia wia ama, “Wu yiu nǝ aɓea anji aɓalǝ amǝnana wu bwal adyan ngga.”

¹¹Pǝlǝa Shiman Bitǝrus eauwe aɓa waru sǝ kya nun ndámbú eamsǝi a kun nza. Ndámbú lumsǝ nǝ anji mǝgulke gbǝman-nǝ-lumi-tongno nǝ mǝsǝì tārú (153), sǝ kat andǝ lakki mala anji mǝno ka, ko bǝti ndámbú san ɗang.

¹²Yesu pǝlǝa tunǝia ama, “Wu yiu wu lili!” Sǝ kǝɓwa pà kàm ata alaggana male, mǝnana gandǝ ɗi ama, a nda yana le ka ɗang, acemǝnana yia kat ka, à sǝlǝna ama Mǝtalabangŋo na.

¹³Pǝlǝa Yesu twal bǝredi pea wia, anggo gbal sǝ pang nǝ anji.

¹⁴Mǝnia ka nda tāruia pusǝrǝu mala Yesu aban alaggana male anzǝm loapi ɓembe male.

¹⁵Anzǝm mǝnana à lina girlina ka, Yesu pǝlǝa ɗi Shiman Bitǝrus ama, “Shiman muna mala Yohana, a earcem kuti amǝnia ka le?”[104] Bitǝrus eare ama, “E, Mǝtalabangŋo, a sǝlǝna ama ǝn nggǝ earceo.” Yesu banggi wi ama, “Ɗenyi nǝ amuna-nzur mem.”

¹⁶Yesu ɗi ɗǝm ama, “Shiman muna mala Yohana, a earcem le?” Shiman ama, “E, Mǝtalabangŋo, a sǝlǝna ama ǝn nggǝ earceo.” Yesu ne wi ama, “Tsǝkir anzur mem.”

¹⁷Yesu nyare ɗi Shiman Bitǝrus tāruia ɗiban ɗǝm ama, “Shiman muna mala Yohana, a kǝ earcem le?” Bum Bitǝrus kiɗiki nǝ mǝnia yì tāruia ɗiban ngga. Nda sǝ ne Yesu ama, “Mǝtalabangŋo, a surǝ agir kat. A sǝlǝna ama mim ngga ǝn nggǝ earceo!” Pǝlǝa Yesu banggi wi ama, “Tsǝkir anzur mem.

¹⁸Mǝ nda ban banggo mǝsǝcau: mǝnana a kǝ long-nǝ-lo ka, a kǝ gandǝ oasǝ agir a rǝo sǝ a kǝ wari aban mǝnana kat a earce a nǝ ká kam ngga. Sǝ ɓǝ̀ a enà ka, a nǝ sarǝ abuo, sǝ aɓea ɓwana ɗang na à nǝ̀ oasǝo agir a rǝo, sǝ à nǝ̀ ká nǝ we, aban mǝnana a earce ká kam raka.”

¹⁹Yesu na anggo ace mǝnana ɓǝ̀ lǝmndǝ ulang njar mǝnana Bitǝrus nǝ̀ wù nǝi ka, mǝnana nǝ̀ gusǝlǝ lullǝ Ɓakuli ka. Pǝlǝa Yesu ne wi ama, “Yiu atam.”

²⁰Bitǝrus pǝlǝ rǝì sǝ sǝn lagga mǝnana Yesu earkiyi ace raka a nzǝmia, aban yiu atea. Yì nda kǝ lagga mǝnana eangnǝ arǝ Yesu a masǝlǝata ligirlina malea, sǝ ɗikiyi Yesu ama, “Mǝtalabangŋo, yana ɓwe na nǝ̀ meo ka?”

²¹Lang Bitǝrus nǝ̀ sǝni ka, pǝlǝa ɗi Yesu ama, “Mǝtalabangŋo, sǝ lagga man ngga, mana nǝ̀ kumi?”

²²Yesu eari wi ama, “Ɓǝ̀ ǝn eare nǝma yì ka, ɓǝ̀ do nǝ yilǝmu ba nyare mem ngga, mana oasǝo a ɓalǝi? We ka, kpatam!”

²³Kara cau akban aɓalǝ acili amǝkpata Yesu ama mǝnia yì lagga ka, pà nǝ̀ wu ɗang. Sǝ anggo sǝ Yesu na ɗang. Yesu ka bang nǝ bangŋa ama, “Ɓǝ̀ ǝn eare nǝma yì ka, ɓǝ̀ do nǝ yilǝmu ba nyare mem ngga, mana oasǝo?”

²⁴Mǝnia yì lagga ka nda mǝnana bang cau amur agir mǝnia, sǝ gilǝia aɓa Malǝmce ka. Sǝ sǝm sǝlǝna ama cau mǝnana na ka, mǝsǝcau na.

²⁵Aɓea agir nakam pas mǝnana Yesu pea ka, yale ɓǝa na ama, à nǝ̀ kpatea mwashat-mwashat à nǝ̀ gilǝia kat ka, ǝn nggǝ sǝni nǝma ɓanza kat ka, pà nǝ̀ gandǝ bwal amalǝmce mǝnana à nǝ̀ gilǝia ka ɗang.