Read mbula bwazza Yohana 3 Bible Online

Yohana 3 - mbula bwazza bible

Yohana 3

¹Ɓe ɓwa nakam ata aɓwana-mǝgule, amǝ kurcau mala amǝ Yahudi, mǝnana lullǝi ama Nikodimus ka. Nda aɓalǝ amǝ Farisi.

²Nikodimus yiu aban Yesu nǝ dú, sǝ yi ne wi ama, “Malǝm, sǝm sǝlǝna ama a nda mǝkanigir mǝnana Ɓakuli turi ka. Kǝ ɓwa pà kàm nǝ̀ gandǝ pakki agir-ndǝlǝki mǝnana a pakkiyi ka ɗang, yi mǝnana ɓǝ̀ Ɓakuli pa ate raka.”

³Yesu eari wi ama, “Mǝ nda ban no mǝsǝcau, ɓǝà ɓǝsǝlǝ ɓǝl ɓwa raka, pà nǝ̀ kutio aɓa domurǝm mala Ɓakuli ɗang.”

⁴Nikodimus ɗiban ama, “Lang sǝ à nǝ̀ ɓǝsǝlǝ ɓǝl ɓwa mǝnana gulna ka? Nǝ̀ kuti a bum ngge ɗǝm sǝ à nǝ̀ ɓǝsǝlǝ ɓǝle le?”

⁵Yesu ne wi ama, “Mǝ nda ban no mǝsǝcau, kǝɓwa pà nǝ̀ kuti aɓa domurǝm mala Ɓakuli ɗang, she ɓǝà ɓǝlǝni nǝ mur andǝ Bangŋo mala Ɓakuli ka.

⁶Tarrû andǝ nggeau na à ɓǝlkiyi ɓwapǝndǝa ka, sǝ ɓǝlban ɓa Bangŋo ka, turo mala Bangŋo mala Ɓakuli na.

⁷Kǝa ndali nǝ cau mǝnana ǝn banggo nǝma, ‘Dumǝna púp à nǝ̀ basǝ ɓǝl wun ngga’ ɗang.

⁸Gung kǝ ɓua kǝ o aban mǝnana earce nǝ̀ ká kam ngga. Wu kǝ ok gǝshi, sǝ wu surǝ ban mǝnana purkiyi kam andǝ ban mǝnana kákiyi kam ngga ɗang. Anggo sǝ ɓwa mǝnana à basǝ ɓǝle aɓa Bangŋo mala Ɓakuli ka pa.”

⁹Nikodimus ɗi ama, “Lang sǝ mǝnia yì ɓǝlban ngga nǝ̀ gandǝ pa?”

¹⁰Yesu pǝlǝa eari wi ama, “Nggearǝ we ka a nda ɓwamǝgule aɓa kanigir a nzali Isǝrayila, sǝ a surǝ mǝnia yì gir ka ɗang?

¹¹Mǝ nda ban no mǝsǝcau, gir mǝnana sǝm surǝì, andǝ mǝnana sǝm sǝn ngga, nda sǝm nakiyia wun ce ka. Kat andǝ amani ka wu ɓinǝ ak cau mǝnana sǝm kǝ na wun ngga.

¹²Ən na wun cau mala agir mǝnana a ɓanza man ngga, sǝ wu earnǝ mim ɗang, lang sǝ wu nǝ̀ earnǝ mim yì mǝnana ɓǝ̀ ǝn na wun cau mala agir mǝnana a kuli ka?

¹³Kǝ ɓwa malaká eau a kuli ɗang, she kǝ yì Muna mala Ɓwa mǝnana sulǝ nǝ kuli ka.

¹⁴“Kǝla mǝnana Musa loasǝ n'yau amur gara ɓabondo ka, anggo sǝ à nǝ̀ loasǝ Muna mala Ɓwa a kuli,[11]

¹⁵acemǝnana koya ɓwa mǝnana kat pa ɓamuri abani ka ɓǝ̀ kum yilǝmu mǝnana málá male pà kàm raka.

¹⁶“Ɓakuli ka earce ɓanza kǝrkǝr, sǝ yi pâ kǝ̀ Muna male mwashat ace mǝnana ɓwa mana kat pà ɓamuri abani ka ɓǝ̀ kǝa kiɗiki ɓǝ̀ ueɓà ɗang, ɓǝ̀ kum yilǝmu mǝnana málá male pà kàm raka.

¹⁷Ɓakuli tasǝ Muni ɓǝ̀ yì ɓashì ɓanza ɗang, tasǝì ɓǝ̀ yì amsǝ ɓanza.

¹⁸“Ɓwa mǝnana kat pa ɓamuri aban Muna mala Ɓakuli ka, pà aɓata ɓashi ɗang. Sǝ ɓwa mǝnana kat ɓinǝ pà ɓamuri ka, à angŋa dǝmbǝa à kasǝna ɓashi ɓǝ̀ sulǝo amuri, acemǝnana ɓinǝ paɓamuri aban Muna mwashat ɓǝrɓǝr mala Ɓakuli ka.

¹⁹Tǝ́r ɓashi mala Ɓakuli ka nda mǝnana ama, tǎlaban yiu a ɓanza, sǝ ɓwapǝndǝa earce pǝndǝa kuti tǎlaban, acemǝnana aturo malea ka amǝɓealɓike na.

²⁰Ɓwa mǝnana kat mǝɓealɓikea na ka, kǝ ginǝ tǎlaban, sǝ pà nǝ̀ yiu aban tǎlaban ɗang, ace mǝnana ɓǝ̀ tǎlaban ɓǝ̀ kǝa lǝmndǝ aturo ɓealɓikea male ɗang.

²¹Sǝ ɓwa mǝnana kǝ pak gir aɓa mǝsǝcau ka, kǝ yiu aban tǎlaban, ace mǝnana ɓǝ̀ tǎlaban lǝmndǝ aturo male, mǝnana pea nǝ́ ɓanggi Ɓakuli ka.”

²²Anzǝm man ngga, Yesu andǝ alaggana male nying Urǝshalima sǝ à o arǝ aɓea muna-la aɓa nzali Yahudi. À kya pakkia anonggeo kam, aban pakki aɓwana batisǝma.

²³[12] Yohana gbal ka nda aban pak batisǝma a Ainon mǝnana aban Salim ngga, acemǝnana mur na abanì kpǝm. Ɓwapǝndǝa camarǝ yiu abani, sǝ kǝ pakkia wia batisǝma.

²⁴(Anggo ka à malaká oasǝ Yohana a ndàkurban peatu ɗang.)

²⁵Aɓea alaggana mala Yohana andǝ ɓeɓwa Yahudi, à lo makgir amur kuncau mala laki rǝu andǝ laki agir ace peri aban Ɓakuli.

²⁶Sǝ alaggana mala Yohana yiu abani à yì ne wi ama, “Rabbi, ɓalǝo kasǝa arǝ ɓwa mǝnana wu nda wunǝi a nkaring Nggeasala Jodan, yì mǝnana a bangga sǝm cau amuri ka? Nda kǝ̀ pakki aɓwana batisǝma ka, sǝ aɓwana pwanǝna rǝia kat aban ká abani.”

²⁷Pǝlǝa Yohana na ama: Ɓakuli na kǝ pe ɓwa turo mǝnana nǝ̀ pak ka.

²⁸Wun, nǝ ɓamur rǝ wun ngga, wu nǝ̀ nakunam mǝnana ǝn bang nǝma, “Mǝ nda Kǝrǝsti, Mǝ'amsǝban ɗang. À turam nǝ turo ɓǝn aki wi dǝmbǝa yiu.”

²⁹Manfela ka mala bura-manfela na; sǝ murǝm gyajam mala bura-manfela mǝnana cam aban kundǝe kǝ kwakikiri a rǝì ka, ban kǝ ɓoari wi arǝ ok gi bura-manfela. Mim gbal ka, ban kǝ ɓoaram arǝ cau mǝno wu banggam ngga.

³⁰Dumǝna púp ama, nǝ̀ nggǝ lidǝmbǝa nǝ gulo, sǝ mim ngga mǝ nǝ nggǝ amsǝa.

³¹Ɓwa mǝnana pur nǝ kuli ka, nda mǝnana ndanǝ gulo kuti acili aɓwana kat ka. Ɓwa mǝnana ndakani a ɓanza ka, mala ɓanza na, sǝ acau male ka a mala ɓanza na. Sǝ ɓwa mǝnana sulǝ nǝ kuli ka, ndanǝ gulo kuti aɓwana kat.

³²Yì ka, yiu, yi bǝlkuni amur gir mǝnana sǝna sǝ ok ka, sǝ kǝɓwa ak cau male ɗang.

³³Sǝ ɓwa mǝnana kat ak cau male ka earǝna ama cau mala Ɓakuli ka mǝsǝcau na.

³⁴Ɓwa mǝnana Ɓakuli turi ka, kǝ na gì Ɓakuli, acemǝnana Ɓakuli soapi wi Bangŋo male pupup.

³⁵Ɓakuli earce Muni sǝ nyinggi wi girbunda kat a bui.[13]

³⁶Koya ɓwa na sǝ pà ɓamuri aban Muna mala Ɓakuli ka, ndanǝ yilǝmu mǝnana málá male pà kàm raka. Sǝ ɓwa mǝnana kat ɓinǝ Muna mala Ɓakuli ka pà nǝ̀ kum yilǝmu ɗang, bumlulla mala Ɓakuli ka nǝ̀ ueo amuri.