Read mbula bwazza Yohana 4 Bible Online

Yohana 4 - mbula bwazza bible

Yohana 4

¹Yesu sǝlǝ ama amǝ Farisi ongŋǝna ce ama yì ka, nda arǝ kum amǝ kwaɗi te pas sǝ nda arǝ pakkia wia batisǝma kuti mala Yohana.

²(Aɓa mǝsǝcau ka, Yesu nǝ ɓamuri ka pakki kǝɓwa batisǝma ɗang, alaggana male na à pakkiyi ka.)

³Lang Yesu yi sǝlǝ ama amǝ Farisi ongŋǝna ama amǝ kpate nǝ̀ nggǝ̀ lakki ka, nying nzali Yahudi, nyare o ɗǝm a nzali Galili.

⁴O male ka dumǝni wi púp nǝ̀ ara aɓa nzali Samariya.

⁵Lang yina a nzali Samariya ka, pǝlǝa yiu a ɓe la mǝnana à tunǝki ama Saika ka; banì sapi nzali mǝnana Yakupu pe muni Yisǝfu a pwaryan ngga ɗang.[14]

⁶Tūli-mùr mala Yakupu ka, nda abanì. Yesu aulǝna nǝ gya nǝ pwari zǝkia ka, yi do a kun tūli-mùrî nǝ̀ usǝlǝo.

⁷Ɓe mɓwama Samariya yiu a to mùr, sǝ Yesu ne wi ama, “Ɗarǝam mur mǝ nu.”

⁸(Anggo ka alaggana male warina a kúr girlina aɓa là.)

⁹Sǝ mɓwame pǝlǝa ne Yesu ama, “A nda ɓwa Yahudi, sǝ mǝ nda ɓwa Samariya. Lang sǝ a nǝ zǝm murnuna a buam yi mǝnana kǝgir kǝ kpapi amǝ Yahudi andǝ amǝ Samariya raka?”[15] [16]

¹⁰Yesu eari wi ama, “Ɓǝ̀ a surǝna rǝ ɓoro mǝnana Ɓakuli ndanǝi aceo, andǝ ɓwa mǝnana zǝmnggiyio mùr nuna ka, ɓǝ a zǝmni wi mùr mǝnana pākiyi yilǝmu ka, sǝ yì ka, nǝ̀ po.”

¹¹Mɓwame na ama, “Ɓwamǝgule, a panǝ gir nun mur ɗang sǝ tūli ka mǝlime na. Ake sǝ a nǝ kum mǝnia yì mur mǝnana kǝ pa yilǝmu ka?

¹²A kuti kà sǝm Yakupu mǝnana pà sǝm mǝnia yì tūli, mǝnana yì nǝ nggearǝì, andǝ amuni, andǝ agirkusǝu malea à nu mur kam ngga le?”

¹³Pǝlǝa Yesu ne wi ama, “Ɓwa mǝnana kat nu mùr man ngga nǝ̀ ok mǝsamur ɗǝm.

¹⁴Sǝ ɓwa mana kat nǝ̀ nu mùr mǝnana mǝ nǝ pe wi ka, pà nǝ̀ ok mǝsamur ɗǝm ɗang. Mùr mǝnana mǝ nǝ pe wi ka, nǝ̀ duk mgbeaɗe mùr a bumi mana nǝ̀ nggǝ pe wi yilǝmu mǝnana te pà nǝ̀ mal raka.”

¹⁵Mɓwame banggi wi ama, “Ɓwamǝgule, pam mǝnia yì mur ka, ace mǝnana mǝsamur ɓǝ̀ kǝa walam ɗǝm ɗang, sǝ ɓǝn ngga nyarki kani aban toki mur raka.”

¹⁶Yesu ne wi ama, “Kyane kya tunǝ burrio wu yiu.”

¹⁷Mɓwame ne Yesu ama, “Ən panǝ burra ɗang.” Yesu banggi wi ama, “A bangŋa mǝsǝcau yì mǝnana a na ama, a panǝ burra raka.

¹⁸Mǝsǝcau ka nda mǝnana ama, a dumǝna nǝ aburana tongno, sǝ ɓwa mǝno ado a nda te ka burrio na ɗang. Cau mǝnana a ne ka mǝsǝcau na.”

¹⁹Mɓwame na ama, “Ɓwamǝgule, ǝn nggǝ sǝni kǝla we ka a nda mǝɓangna mala Ɓakuli.

²⁰Aká sǝm peri aban Ɓakuli amur nkono Gerizim man, sǝ wun amǝ Yahudi ka, wu na ama Urǝshalima nda ban mǝnana duk pup sǝm nǝ̀ peri kam ngga.”

²¹Yesu eari wi ama, “Mɓwama, earnǝ cau mǝnana ǝn nggǝ banggo ka. Pwari na kǝ yiu ka mǝnana peri aban Ɓakuli ka, pà nǝ̀ pa amur nkono man ko aɓa Urǝshalima ka ɗang.

²²Wun amǝ Samariya ka, wu kǝ peri aban ɓwa mǝnana wu surǝì raka, sǝ sǝm, amǝ Yahudi ka, sǝm surǝna rǝ ɓwa mǝnana sǝm nggǝ peri abani ka. Acemǝnana amsǝban ngga pur nǝban amǝ Yahudi.

²³Sǝ pwari na kǝ yiu ka, yale pwari nì yina, mǝnana amǝperi mǝ'mǝsǝcau nì nǝ̀ ngga peri aban Ɓakuli nǝ ɓabumia kat nǝ mǝsǝcau. Yia ka à nda ka ulang amǝperi mǝnana Ɓakuli earkiyi cea ka.

²⁴Ɓakuli ka Bangŋo na, sǝ amǝ peri abani ka, dumǝna púp, à nǝ̀ peri nǝ ɓabumia kat nǝ mǝsǝcau.”

²⁵Pǝlǝa mɓwame ne Yesu ama, “Ən sǝlǝna ama, Mǝ'amsǝban mǝnana à kǝ tunǝi ama Kǝrǝsti ka nǝ̀ yiu. Ɓǝ̀ yina ka, nǝ̀ yia mǝnggia sǝm ɓalǝ agir kat.”

²⁶Sǝ Yesu banggi wi ama, “Mim ɓwa mǝnana ado nakiyi cau nǝ we ka, Mǝ nda kǝ yì.”

²⁷Anggo ka, alaggana mala Yesu yi tusǝo, à ndali mǝnana à yì kumi aban na cau andǝ mɓwama ka. Sǝ kǝɓwa ɗi mɓwame ama, mana a alkite ka ɗang. Sǝ kǝɓwa ɗi gbal ama, ace mana sǝ a kǝ na cau nǝ ɓwame ka ɗang.

²⁸Sǝ mɓwame nying bàng-mùr male nyare o a la kya ne aɓwana ama,

²⁹“Wu yiu, wu yi sǝn ɓwa mǝnana nam koya gir nani ǝn pa aɓa do mem ngga! Ko ɓwa man nda Kǝrǝsti Mǝ'amsǝban le?”

³⁰Pǝlǝa ɓwapǝndǝa puri la à yiu aban Yesu.

³¹Anggo ka, alaggana mala Yesu zǝmbǝi wi ama, “Rabbi, yiu li girlina.”

³²Yesu pǝlǝa nea wia ama, “Mǝ ndanǝ girlina mǝnana wu surǝ kǝgir amuri raka.”

³³Sǝ alaggana male kutia ɗiki rǝia ama, “Kǝ ɓwa yinǝì wi nǝ girlina le?”

³⁴Yesu nea wia ama: Girlina mem nda ɓǝn pak gir mǝnana Tárram mana turam ngga earkiyi ce, sǝ ɓǝn masǝlǝta turo male mǝnana pam ɓǝn pe ka.

³⁵Wun nǝ̀ naki mbak ama, ueo zongŋo ine à nǝ̀ pwan girɓaban? Sǝ ǝn nggǝ na wun, wu loasǝ amǝsǝ wun, wu sǝn agirɓaban, à ɓǝlna, à karǝna pwano.

³⁶Ɓwa mǝnana nda ban pwan girɓaban ngga, Ɓakuli na arǝ pe wi tangnakusǝi, sǝ ndarǝ pwan girɓaban mala yilǝmu mǝnana pà nǝ̀ te mal raka; ace mani ka mǝ ɓeale andǝ mǝ pwan girɓaban ngga ban nǝ ɓoaria wia a tarǝia.

³⁷Anggo ka cau mǝnana à kǝ ne ama, “Ɓe ɓwa ɓeale, sǝ ɓeɓwa pwan” ngga, dumǝna mǝsǝcau.

³⁸Ən tasǝ wun, wu kya pwan girɓaban mǝnana wu nda wu ɓeal raka; aɓea aɓwana na à ɓeale, sǝ wun ngga wu kya kum tangnakusǝ turo mǝnana à pak ka.

³⁹Amǝ Samariya pas a mǝno yì là ka à pa ɓamuria aban Yesu ata cau mala mɓwama mǝnana banggia wia ama, “Nam koya gir nani ǝn pa aɓa do mem ngga.”

⁴⁰Lang amǝ Samariyi yiu aban Yesu ka, à yì zǝmbǝi wi ɓǝ̀ do atea, pǝlǝa Yesu do pak nongŋo ɓari abania.

⁴¹Ɓwamǝpǝnde pas ɗǝm à yì pa ɓamuri aban Yesu ace cau male.

⁴²Pǝlǝa yia ka à ne mǝno yì mɓwama ka ama, “Ado ka pa ace cau mo sǝ sǝm pà ɓamur sǝm abani ka ɗang, nggearǝ sǝm ngga sǝm ongŋǝni nǝ kir sǝm. Sǝm sǝlǝna ama, aɓa mǝsǝcau ka, yì nda Mǝ'amsǝ ɓanza.”

⁴³Anzǝm mǝnana Yesu pangŋǝna nongŋo ɓari abanì ka, lo o a Galili.

⁴⁴Yesu nǝ ɓamuri ka bangŋǝna ama, “À kǝ pê mǝɓangna mala Ɓakuli gulo a la male ɗang.”[17]

⁴⁵Lang yi bwalǝna Galili ka, ɓwapǝndǝa gingsǝi à é nǝ bu ɓari, acemǝnana yia ka à warina a Urǝshalima aban Lamsan Yalimuru, sǝ à sǝnǝna agir mǝnana Yesu pea abanì kat ka.[18]

⁴⁶Aɓa gya mala Yesu aɓa nzali Galili ka kya kuti ɗǝm a Kana, la mǝnana tsǝk mùr pǝlǝ mùr ɓǝlanggun anap kam ngga.[19] Ɓe mǝtamurǝm na kam a Kapanahum, muni ka mǝkwano na.

⁴⁷Lang mǝnia yì ɓwa ongŋǝna ama Yesu nyingŋǝna Yahudi yina a Galili ka, pǝlǝa wario abani kya zǝmbǝi wi ɓǝ̀ yiu a Kapanahum ɓǝ̀ kya twalban rǝkwana mala muni mǝnana nda kúnlú ka.

⁴⁸Sǝ Yesu ne wi ama, “Ɓǝ̀ wu sǝn gir-gyambǝliban andǝ gir'ndǝlǝki raka pà wu nǝ̀ earnǝ mim ɗang.”

⁴⁹Mǝtamurǝmi pǝlǝa ne Yesu ama, “Ɓwamǝgule, yiu atam tu, ce munem masǝlǝa a rǝam ɗang.”

⁵⁰Yesu ne wi ama, “Kyane, munio pà nǝ̀ wu ɗang.” Ɓwabura man earnǝ cau mala Yesu, pǝlǝa nyare aban o.

⁵¹Nda ban o ka, amuna-ɓala male yi kasǝi a njar à ne wi ama, “Munio ka auna, rǝì malǝna.”

⁵²Sǝ ɗia ama, “Nǝ ya bu-pwari sǝ rǝ muna tita mala?” Sǝ à ne wi ama, “Nda yilung nǝ bu-pwari mwashat mala pwari, sǝ ɓauwa nyi.”

⁵³Pǝlǝa ɓalǝ tár muna kasǝa ama, nda aɓa kǝ bu-pwari mǝnana Yesu ne wi nǝi ama, “Kyane, munio pà nǝ̀ wu ɗang.” Pǝlǝa yì andǝ amǝ ɓala male pà ɓamuria aban Yesu.

⁵⁴Mǝnia ka nda ɓaria gir'ndǝlǝki mǝnana Yesu pe ka. Pe anzǝm mǝnana nyingŋǝna Yahudi yina a Galili ka.