Read mbula bwazza Yohana 9 Bible Online

Yohana 9 - mbula bwazza bible

Yohana 9

¹Yesu na ban kutio pǝlǝa sǝn ɓeɓwa mǝnana à ɓǝlì nte na ka.

²Alaggana male ɗi ama, “Malǝm, cauɓikea mala yana tsǝa sǝ à ɓǝl ɓwa mǝnia ka nte? Cauɓikea male na le, ko mala angge na andǝ tarrí?”[43]

³Yesu nea wia ama, “Pà ace cauɓikea male, ko mala tarrí andǝ ngge sǝ à ɓǝlì nte na ka ɗang. À ɓǝlì anggo ace mǝnana ɓǝa lǝmndǝ turo mala Ɓakuli amuri.[44]

⁴Ado mǝnana pwari nakam ngga, dumǝna púp sǝm nǝ̀ pak turo mala Tárram mǝnana tasǝam ngga. Dù na kǝ yiu ka, mǝnana kǝɓwa pà nǝ̀ pak turo raka.

⁵Ado mǝnana mǝ nda a ɓanza ka, mǝ nda tǎlaban mala ɓanza.”[45]

⁶Lang Yesu naná cau anggo ka, pǝlǝa tau ntara a nzali sǝ torǝi pǝlǝ dǝɓang, sǝ hasǝì ɓwabure arǝ amǝsǝì.

⁷Sǝ ne wi ama, “Kyane kya lak ɓamǝsǝo a guguri Silowam.” (Silowam ngga ɓālǝi nda “Mǝnana à tàsǝì ka.”) Pǝlǝa ɓwabure wario, kya lak ɓamǝsǝi. Nǝ̀ nyar ka amǝsǝì longŋǝna à nǝ̀ nggǝ sǝnban.

⁸Aɓi amǝ njarmurkala andǝ aɓwana mǝnana à surǝi ama mǝ zǝmnggi agir na ɗiɗyal ka, à ɗi rǝia ama, “Ɓwa mǝnia na mbo dukiyi kani aban zǝmnggi agir ka?”

⁹Aɓea ɓwana na ama, “Kǝ nda.” Sǝ aɓea ɓwana bangŋa ama, “Awo, nda ɗang, à pur rǝia nǝ puro.” Ɓwabure nǝ ɓamuri pǝlǝa nea wia ama, “Mǝ nda kǝ ɓwe.”

¹⁰Pǝlǝa à ɗi ama, “Sǝ kar lang, sǝ a kǝ sǝnban?”

¹¹Earia wia ama, “Ɓwa mǝnana à tunǝki ama Yesu ka, nda torǝ dǝɓang sǝ hasǝami arǝ amǝsǝam, sǝ nam ama, ɓǝ̀ ǝn kya Silowam mǝ lak ɓamǝsǝam nggam. Pǝlǝa ǝn wario, ǝn lak mǝsǝam, nda sǝ ǝn tita sǝnban ngga.”

¹²À ɗi ama, “Ɓwe ka nda a ke?” Pǝlǝa nea wia ama, “Ən sǝlǝ ɗang.”

¹³Pǝlǝa à twal ɓwabura mǝnia mǝnana nte na ɗiɗyal ka, à wari nǝi aban amǝ Farisi,

¹⁴acemǝnana pwari mǝno Yesu torǝna dǝɓang nǝi sǝ hasǝi ɓwabure arǝ amǝsǝì, sǝ amǝsǝì mǝn ngga, pwari Sabbat na, pwari usǝlǝo mala amǝ Yahudi.

¹⁵Pǝlǝa amǝ Farisi nyare à ɗi ɓwabure lang sǝ kum sǝnban male. Pǝlǝa nea wia ama, “Hasǝam dǝɓang arǝ amǝsǝam, ǝn lak ɓamǝsǝam, sǝ ado ka ǝn nggǝ sǝnban.”

¹⁶Aɓea amǝ Farisi na ama, “Mǝnia yì ɓwa yì Yesu ka, pur nǝ ban Ɓakuli ɗang, acemǝnana gusǝlǝ Sabbat ɗang.” Sǝ aɓea ɓwana ɗiban ama, “Lang sǝ mǝ'cauɓikea nǝ pak a'ulang amǝnia yì agir-ndǝlǝki ka le?” Kara aɗenyicau malea ginggia rǝia ɗàngɗáng.

¹⁷Anzǝm man ngga pǝlǝa à nyare aban ɓwabure à ɗì ɗǝm ama, “We ado ka, mana a na amur mǝno yì ɓwa mǝnana mǝnmbo amǝsǝo ka?” Pǝlǝa earia wia ama, “Yì ka, mǝɓangna mala Ɓakuli na.”

¹⁸Aɓwana-mǝgule mala amǝ Yahudi ka, à ear ama mǝnia yì ɓwa ka nte na ɗiɗyal sǝ ado ka kǝ sǝnban ɗang. Pǝlǝa a turban ɓǝa tunǝ tarrí andǝ ngge.

¹⁹Sǝ à ɗia ama, “Mǝnia yì muna ka wun nǝ̀ ɓǝlì le? Wu na ama à ɓǝlì ka nte na? Sǝ kar lang ado sǝ kǝ sǝnban?”

²⁰A tarrí andǝ ngge eare ama, “Sǝm sǝlǝna ama muna ka ma'sǝm na, sǝ sǝm sǝlǝna gbal ama sǝm ɓǝlì ka nte na.

²¹Sǝ cau mala sǝnban male andǝ ɓwa mǝnana mǝnmbi wi amǝsǝì ka, sǝm sǝlǝ ce ɗang. Wu ɗi, karǝna ɓwa, nǝ̀ gandǝ na kuni.”

²²Atarrí andǝ ngge ka à na mǝnia yì cau ka anggo acemǝnana à kǝ ɓanggi aɓwana-mǝgule mala amǝ Yahudi. Amǝnia yì aɓwana-mǝgule ka à bangŋǝna a dǝmbǝa ama, ɓwa mǝnana earnǝ Yesu ama nda Kǝrǝsti Mǝ'amsǝban ngga, à nǝ̀ pǝri pà nǝ̀ nggǝ yiu aɓa ndakpapi ɗǝm ɗang.

²³Nda gir mǝnana tsǝa sǝ à na ama, “Wu ɗi, acemǝnana yì ka, karǝna ɓwa” ka.

²⁴Aɓwana-mǝgule nyar ɓaria à tunǝ ɓwa mǝno nte na ɗiɗyal ka, sǝ à ne wi ama, “Pe Ɓakuli gulo, na sǝm mǝsǝcau! Sǝm sǝlǝna ama ɓwabura mǝnana mǝnmbo amǝsǝo ka mǝ'cauɓikea na.”

²⁵Ɓwabure earia wia ama, “Ən sǝlǝ ɗang ko mǝ'cauɓikea na, ko mǝ'cauɓikea na ɗang. Gir mǝnana ǝn sǝlǝ ka nda mǝnana ama, ɗiɗyal ka mǝ nda nte, sǝ ado ka ǝn nggǝ sǝnban.”

²⁶À ɗi ɗǝm ama, “Pakko lang sǝ mǝnmbo amǝsǝo?”

²⁷Sǝ earia wia ama, “Ən nanà wun mǝni, sǝ wu ginǝ kwaki kir wun. Ace mana sǝ wu kǝ earce oe ɗǝm? Wu kǝ earce wu nǝ̀ pǝlǝ amǝkpate gbal le?”

²⁸Kara à lo a rǝi nǝ sanggiban, à ne wi ama, “A nda mǝnana a kpakiyi ata mǝno yì ɓwa ka, sǝm ngga sǝm ndaka amǝkpata Musa.

²⁹Sǝm sǝlǝna ama, Ɓakuli na cau nǝ Musa, sǝ mala ɓwabura mǝno ka, yale sǝm surǝ ban mǝnana pur kam ngga ɗang!”

³⁰Sǝ ɓwabure banggia wia ama, “Kúk! Wu okam kǝcau. Wu surǝ ban mǝnana pur kam ngga ɗang, sǝ gandǝ mǝnmbam amǝsǝam!

³¹Sǝm sǝlǝna ama, Ɓakuli pakkiyi gir mǝnana amǝ'cauɓikea na ama ɓǝ̀ pakkia wia ka ɗang; sǝa ma ɓǝ̀ kǝɓwa kǝ pe Ɓakuli gulo sǝ kǝ kpata gir mǝnana kǝ earce ama ɓǝa pe ka, Ɓakuli nǝ̀ kwaki kiri nǝ̀ oki wi.

³²Twal a share ta ɓanza ka, sǝm o àkǝ pwari ama kǝɓwa gandǝ mǝn mǝsǝ kǝɓwa mǝnana à ɓǝli nte na ka ɗang.

³³Ɓǝ̀ man yì ɓwa ka pur aban Ɓakuli raka, pà nǝ̀ gandǝ pe ɗang.”

³⁴Pǝlǝa à ne wi ama, “We mǝnana gbal à ɓǝlo aɓa cauɓikea, sǝ à gulo aɓa cauɓikea ka, a kǝ ɓariki ama, a wu nǝ kania sǝm gir?” Kara à pǝri puri ɓa ndakpapi.

³⁵Lang Yesu ok ce gir mǝnana à pakki ɓwabure ka, kya kum ɓwabure sǝ ɗi ama, “A earǝna nǝ Muna mala Ɓwa le?”

³⁶Ɓwabure eari wi ama, “Ɓwamǝgule, banggam, yana ɓwe nda Muna mala Ɓwa, ace mǝnana ɓǝn earnǝi ɓǝ̀ ǝn pà ɓamuram abani?”

³⁷Yesu ne wi ama, “A angŋa dǝmbǝa a sǝnǝni, mǝ nda kǝ ɓwe mǝnana ado ǝn nakiyio cau ka.”

³⁸Kara ɓwabure kūndǝo a ɓadǝm Yesu peri, sǝ na ama, “Mǝtalem, e, ǝn earǝna, ǝn panà ɓamuram abano.”

³⁹Pǝlǝa Yesu na ama, “Ən yiu aɓa ɓanza man ace ɓashi, ace mǝnana ɓǝ̀ ante kum sǝnban, sǝ aɓwana mǝnana à kǝ sǝnban ngga, ɓǝa pǝlǝ ante.”[46]

⁴⁰Aɓea amǝ Farisi mana aban came tù abanì ka, ok cau mǝnana Yesu na ka, pǝlǝa à ɗi ama, “A nda ban na ama, sǝm nda ka nte le?”

⁴¹Sǝ Yesu pǝlǝia wia ama, “Ɓǝ̀ wu nda ka nte ka, ɓǝ́ mur wun pà nǝ̀ halǝki wun arǝ acauɓikea ma'wun ɗang. Sǝ mǝno ado wu ne nǝ ɓamurǝ wun ama wun nǝ̀ nggǝ sǝnban ngga, lǝmndǝna ama, cauɓikea ma'wun na kam amur wun piu.”