Read mbula bwazza Amǝ Mishan 1 Bible Online

Amǝ Mishan 1 - mbula bwazza bible

Amǝ Mishan 1

¹We Tiyofulus, aɓa Malǝmce mem mǝdǝmbe ka, ǝn angŋa dǝmbǝa ǝn gilǝno agir mǝnana kat Yesu tita pea andǝ kane,[1]

²ba pwari mǝnana à twali nǝi aban ká kuli ka. Sǝ kaniama nǝ̀ o a kuli ka, kwarkir amǝ'mishan male mǝnana tàrkia ka, nǝ rǝcandǝa mala Bangŋo Mǝfele.

³Anzǝm tanni andǝ lú mala Yesu ka, yi long nǝ yilǝmu ɗǝm. Aɓalǝ anongŋo lumi-ine, pusǝrǝi kusǝ pas aban alaggana male, arǝ anjar ɗàngɗáng mǝnana lǝmndǝia wia ama kàngkàng longŋǝna ndanǝ yilǝmu ka. À sǝni nǝ mǝsǝia sǝ bangcau nǝia amur Domurǝm mala Ɓakuli.

⁴Sǝ nda peatu abania ka, banggia wia ama: Wu kǝa nying Urǝshalima ɗang. Wu kundǝo, she ɓǝ̀ Tárram pana wun Bangŋo Mǝfele mǝnana wu oem ǝn na nǝma, bangŋa ama nǝ̀ pa wun ngga.

⁵Yohana ka pakki aɓwana batisǝma nǝ múr, sǝ banì pà nǝ̀ sau ɗang aɓalǝ anonggeo bǝti ka, à nǝ̀ pakka wun batisǝma nǝ Bangŋo Mǝfele.[2]

⁶Lang amǝ'mishan yi dapina aban Yesu ka, pǝlǝa à ɗì ama, “Mǝtalabangŋo, ado sǝ a nǝ nyesǝ domurǝm aban amǝ Isǝrayila le?”[3]

⁷Pǝlǝa Yesu banggia wia ama, “Kǝ Tárram na nǝmurǝì mǝnana ndanǝ rǝcandǝa mala tsǝk amǝno yì apwari andǝ abaku ka, sǝ à pa ace wun ɓǝ̀ wu surǝia ka ɗang.

⁸Sǝa ma, wun ngga wu nǝ̀ kum rǝcandǝa, yi mǝnana ɓǝ̀ Bangŋo Mǝfele sulǝna amur wun ngga. Wu nǝ̀ duk amǝ na cau mem a Urǝshalima, andǝ ɓa nzali Yahudi, andǝ nzali Samariya, andǝ ɓanza kat.”[4]

⁹Anzǝm mǝnana Yesu naná cau anggo ka, àkǝ̀ mǝsǝia à nda rǝ sǝne, kara à twali aban ká o a kuli. Kya ko aɓa pǝrɓang, à gandǝ sǝne ɗǝm ɗang.[5]

¹⁰Lang à nda rǝ tsǝk mǝsǝia piu a kuli aban sǝn o male ka, kara aɓwana ɓari nǝ agirkuro mǝpwasǝe, à pusǝ rǝia aban came abania.

¹¹Sǝ à bangŋa ama, “Wun amǝ Galili, palang sǝ wu cam kani aban sǝnban a kuli? Mǝnia yì Yesu à twali arǝ wun aban ká kuli ka, nǝ̀ ngga nyare kǝla mǝno wu sǝni aban o a kuli ka.”

¹²Pǝlǝa amǝ'mishan mǝnia nyari Nkono Olif, mǝnana sauwa mala nrei andǝ Urǝshalima ka, nda kǝla mêl mwashat.[6]

¹³Lang à bwalǝna ɓala ka, pǝlǝa à kutio a kurǝm kuli, ban mǝnana à duki kam ngga. Aɓwana mǝnana à nda abanì ka, à nda ka Bitǝrus, andǝ Yohana, andǝ Jemis, andǝ Andǝru, andǝ Filip, andǝ Toma, andǝ Batalomi, andǝ Matiu, andǝ Jemis muna mala Alfiyus. À nda ata rǝia andǝ Shiman mǝnana earkiyi ace la male raka, andǝ Yahuda muna mala Jemis.

¹⁴Yia a ɓinado malea ka, à uekiyi kpapi nǝ ɓabumia mwashat a tarǝia aban pak hiwi ɗang, andǝ amamǝna, andǝ Maryamu nggea Yesu, andǝ amǝ'eam Yesu.

¹⁵Aɓalǝ anongŋo mǝno ka, amǝkpata Yesu yiu à yì rambǝa abanɓwáná, lakki malea kat ka nda gbǝman nǝ lumi-ɓari. Pǝlǝa Bitǝrus lo came na cau ama:

¹⁶Wun amǝ'eambǝam, dumǝna púp ama à nǝ̀ lumsǝ cau Malǝmce mala Ɓakuli mǝnana Bangŋo Mǝfele bangŋi ɗiɗyal nǝ kun Murǝm Dauda amur Yahuda ka. Yahuda ka nda ɓwa mǝnana lǝmndǝ njar aban ká nǝ́ aɓwana mǝnana à bwal Yesu ka.

¹⁷Ɗiɗyal ka nda aɓalǝ sǝm, sǝ ndanǝ kāmbe male gbal mǝnana à pe wi aɓa turo mishan ngga.

¹⁸(Nǝ boalo mala turo mǝɓane, sǝ Yahuda kúr nzali, pǝlǝa a ɓalǝi sǝ kpa, sok muri wǔ, bumi ara, alungŋe sukkio a nza.[7]

¹⁹Aɓwana mǝnana à do a Urǝshalima kat ka, à ok ce, nda tsǝa sǝ à tunǝ banì nǝ kun malea ama, Akeldama ka, ɓālǝi nda “Nzali Nkila.”)

²⁰Acemǝnana à gilǝa aɓa Malǝmce mala Anggyal ama, “Ɓala male ka ɓǝ̀ do nǝ ɓālǝi atarǝì, kǝɓwa pà nǝ̀ duk kam ɗang.” Ɗǝm ngga à gilǝa ama: “Ɓǝ̀ ɓeɓwa ɗàng ɓǝ̀ ak banturo male.”[8]

²¹Ado ka dumǝna púp ama sǝm nǝ̀ twal ɓeɓwa ɓǝ̀ ak bancame mala Yahuda. Sǝm nǝ̀ twal aɓalǝ aɓwana mǝnana à nda ata sǝm aɓalǝ apǝlǝa kat mǝnana sǝm nda a tarǝ sǝm sǝnǝa Mǝtalabangŋo Yesu ka.[9]

²²Ɓǝ̀ twal a pwari mǝnana Yohana pakki Yesu batisǝma nǝi, yi bwal a pwari mǝnana à twali nǝi arǝ sǝm aban o a kuli ka. Ɓǝ̀ yana sǝ à twali ka, nǝ̀ duk mwashat ata sǝm aban hamnǝ cau mala loapi ɓembe mala Yesu.

²³Pǝlǝa à pa lullǝ aɓwana ɓari: Yisǝfu, mǝnana à kǝ tunǝi ama Barsabas (Sǝ à surǝì gbal nǝ Yustus ka) andǝ Matǝyes.

²⁴Pǝlǝa à pak hiwi ama, “We Mǝtalabangŋo, mǝnana surǝ ɓabum koyan kat ka, lǝmndǝa sǝm yana a twalo aɓalǝ aɓwana mǝnia ɓari ka,

²⁵ɓwa mǝnana nǝ̀ twal banturo mishan a kuni Yahuda, mǝnana nying sǝm o aban mǝnana dupi wi ka.”

²⁶Pǝlǝa à túr mǝsǝboalo a kuli, à nǝ̀ sǝn ɓwa mǝnana nǝ̀ li ka, sǝ yi kpa, lǝmndǝ ama Matǝyes na li ka; nda à twal Matǝyes yi lumsǝ kun lakki mala amǝ'mishan mala Yesu mǝnana à ueo lum-nong-mwashat ka.