Read mbula bwazza Amǝ Mishan 10 Bible Online

Amǝ Mishan 10 - mbula bwazza bible

Amǝ Mishan 10

¹A Kaisariya ka ɓeɓwa nakam lullǝi ama Karnilus. Yì ka, ɓwamǝgule soje na, amur asoje mala amǝ Roma mana à tunǝkia ama, “Asoje Italiya” a ɓinalea ka.

²Yì andǝ ɓala male kat à kǝ peri aban Ɓakuli, à kǝ gusǝlǝi, sǝ mǝ'ɓanggi Ɓakuli na. Kǝ pe amǝtǝr ɓoro kǝrkǝr, sǝ usǝlǝkiyi pak hiwi ɗang.

³Ɓe kǝ pwari nakam, a bu-pwari tārú mana pwari pǝlǝna ka, sǝni kǝla lorǝo, sǝ lorǝo na ɗang. Sǝn mǝturonjar mala Ɓakuli aban yiu abani, yi ne wi ama, “Karnilus!”

⁴Yì ka, pǝlǝ mǝsǝì aban mǝturonjar nǝ rǝɓǝla, sǝ ɗiban ama, “Mana gir ni na, Ɓwamǝgule?” Mǝturonjar ne wi ama, “Ahiwi mo andǝ aɓoro mo mǝnana a kǝ pe amǝtǝr ka, Ɓakuli angŋǝnia.

⁵Ado ka, tur aɓwana a Jopa, ɓǝa kya tunǝo ɓeɓwa nakam lullǝi ama Shiman, mǝnana à tunǝki ama Bitǝrus ka.

⁶Yì ka, sulǝo aɓala mala Shiman mǝbangsǝ-nggu, ɓala male na a kun nggeamur.”

⁷Lang mǝturonjar mǝnana ne Karnilus cau umna ka, Karnilus tunǝ ata amǝturo ɓala male ɓari, sǝ ɓe soje mwashat mǝgusǝlǝ Ɓakuli, aɓalǝ amǝgya ate.

⁸Anzǝm mana bǝlǝnia wia ɓacau kat mǝnana mǝturonjar banggi wi ka, sǝ tasǝia a Jopa.

⁹Ban fana ka, aɓwana mana Karnilus tasǝia ka, à nda njar aban ká. À gbashina ban lê ka, pwari malanǝ yiu a ɓamuru. Bitǝrus gbal ka eauna a kurǝm murɓe nǝ̀ pak hiwi.

¹⁰Nzala yi wali, kǝ earce nǝ̀ li girlina, sǝ lang à nda arǝ pak girlina ka, kara Ɓakuli mǝn mǝsǝì.

¹¹Sǝn kuli mǝn bwāng, sǝ sǝn ɓe kǝgir kǝla nggea lagir mǝtangŋe à sulǝni aban yiu a nzali nǝ anggur arǝ akuni ine.

¹²Aɓa mǝnia yì nggea lagir ka, koya mbalang girkusǝu ka, ndakam; amana à kǝ gya amur kusǝia ine ka, andǝ amana à kǝ nun bumia a nzali ka, andǝ anyal mana a bumkuli ka.

¹³Pǝlǝa ok giu aban ne wi ama, “Bitǝrus, lo, walo, sǝ wu she!”

¹⁴Pǝlǝa Bitǝrus bangŋa ama, “Awo, Mǝtalabangŋo! Ən malaká li kǝgir mǝnana Nggurcau nyesǝi mǝpǝndǝke na ko gir-ɓeami na ka ɗang.”

¹⁵Giu nyar ɓaria ama, “Gir mǝnana Ɓakuli gilǝkini ɓoarnansari ka, ce a tunǝi ama gir-ɓeami ɗang.”

¹⁶Mǝnia yì gir ka pa anggo kusǝ tārú, kara à nyesǝ nggea lagir mǝno a kuli.

¹⁷Lang Bitǝrus na aban ndali amur mana nda ɓa mǝnia yì gir mǝnana Ɓakuli mǝn mǝsǝì sǝni ka, aɓwana mana Karnilus tasǝia ka, à yina à ɗina ce ɓala mala Shiman, à yì camǝna a kunɓala.

¹⁸À pak kou, sǝ à ɗiban ko Shiman mǝnana à tunǝki ama Bitǝrus ka, a ɓalae sǝ sulǝo.

¹⁹Sǝ lang Bitǝrus na piu aban pak ɗenyicau amur mǝnia yì gir Ɓakuli mǝn mǝsǝì sǝni ka, Bangŋo mala Ɓakuli ne wi ama, “Shiman, aɓwana tārú à nda kǝ sǝn banio ka.

²⁰Lo, sulǝo, wu kyan wunǝia, ce a ɓukibumo ɗang, acemǝnana mǝ́ nǝ̀ tasǝia.”

²¹Pǝlǝa Bitǝrus sulǝo kya kumia, sǝ nea wia ama, “Mǝ nda ɓwa mǝnana wu sǝnggiyi banì ka. Mana yiu nǝ wun ɗe?”

²²À eare ama, “Ɓwamǝgule soje, yì Karnilus nǝ̀ tur sǝm. Ɓwa mǝɓafoe na, kǝ ɓanggi Ɓakuli. Aɓwana aɓa nzali mala amǝ Yahudi kat kǝ na mǝɓoarne amuri. Mǝturonjar mala Ɓakuli ne wi ama ɓǝ̀ no wu yiu a ɓala male, ace mǝnana ɓǝ̀ kya ok cau mǝnana a nǝ bang ngga.”

²³Bitǝrus pǝlǝa warinia a ɓala, à pak abǝri male. Ban fana ka, lo andǝia. Aɓea mǝkwaɗi mana a Jopa ka, à lo atea.

²⁴Ɓe ban fana ka, à kya bwal Kaisariya. Karnilus ka nda aban kuli muria, angŋǝna dǝmbǝa tunǝna aɓǝla andǝ agyajam-nda male, à yina à yì rǝmǝna.

²⁵Lang Bitǝrus nǝ̀ kutio a ɓala ani ka, Karnilus kara lo kya kpa kūndǝo a ɓadǝmbǝi, aban pe wi gulo.

²⁶Pǝlǝa Bitǝrus loasǝi, ne wi ama, “Lo, mim gbal ka mǝ nda ɓwamǝpǝnde.”

²⁷Bitǝrus na mur ne wi cau, sǝ kutio a ɓala kum ɓwapǝndǝa ramna kǝrkǝr.

²⁸Pǝlǝa nea wia ama, “Wun ngga wu sǝlǝna ama, nggurcau ma'sǝm eare ama ɓwa Yahudi ɓǝ̀ kutio a ɓala mala aɓwana mana amǝ Yahudi na raka, ko ɓǝ̀ kǝgir dapia ɗang. Sǝ Ɓakuli lǝmndǝam ama, mǝ ngga tunǝ kǝɓwa ama ɓwa mǝɓane ko mǝɓeami ka ɗang.

²⁹Nda gir mǝnana tsǝa, sǝ lang à turban atam ngga, ǝn yiu, ǝn ɓinǝ ɗang. Ado ka wu banggam, mana nda ɓa turban atam?”

³⁰Karnilus eare ama: Nongŋo tārú mǝno kuti ka, pwari na anggo kǝla mǝnia ka, a bu-pwari tārú mala pwarikpǝra, mǝ nda ban pak hiwi a ɓala mem, kara ɓeɓwa mana oasǝ agir-nggurǝu mǝlinzame ka, puro yi came a ɓadǝmbǝam.

³¹Na ama, “Karnilus, Ɓakuli ongŋǝna hiwi mo sǝ sǝnǝna aɓoro mǝnana a kǝ pe amǝtǝr ka.

³²Turban a Jopa ata Shiman mana à tunǝki ama Bitǝrus ka. Nda a ɓala mala Shiman mǝbangsǝ-nggu, a kun nggeamur.”

³³Nda sǝ ǝn gbara ǝn turban a to ka, sǝ ndya gbal a pê pepè a yiu ka. Ado ka sǝm ndya kat sǝm nggǝ kundǝo a ɓadǝm Ɓakuli, sǝm nǝ̀ ak cau mana Mǝtalabangŋo no ama wu na sǝm ngga.

³⁴Pǝlǝa Bitǝrus tita na cau ama: Ado ka ǝn sǝlǝna ama ɓafo na Ɓakuli ka earce kǝɓwa kuti ɓe ɗang.[62]

³⁵A koya kun ngga, kǝ ak aɓwana mǝnana à kǝ peri abani, sǝ à kǝ pak gir mana kǝ pwasǝ bumi ka.

³⁶Wu surǝna cau mǝnana Ɓakuli tasǝnaban nǝi aban amǝ Isǝrayila, kǝ nea wia Cau Amsǝban andǝ dorǝpwala nǝban Yesu Kǝrǝsti, yi mǝnana nda Mǝtalabangŋo kat ka.

³⁷Wu sǝlǝna ce gir mana kum ban a nzali Yahudi, tite a nzali Galili anzǝm mana Yohana tinata hamnǝ cau male mala batisǝma ka.

³⁸Wu sǝlǝna ɗǝm ama Ɓakuli tsǝk bui amur Yesu Ɓwa Nazarat nǝ Bangŋo Mǝfele, andǝ rǝcandǝa. Kǝ gya aban pakki agir mǝɓoarne, sǝ kǝ twalban rǝkwana mala aɓwana mǝnana à nda aɓata rǝcandǝa mala Shetan ngga, acemǝnana Ɓakuli na ate.

³⁹Sǝ sǝm, amǝ'mishan ngga, sǝm ndaka amǝnakun mala agir mana sǝm sǝn Yesu pea kat a nzali mala amǝ Yahudi andǝ ɓa Urǝshalima ka. À wal-lui nǝ gbaliban amur nggun-gangndi.

⁴⁰Sǝ Ɓakuli loasǝi a tāruia nongŋo, sǝ nyinggi dǝmbǝu ɓǝ̀ pusǝrǝi ɓǝa sǝni.

⁴¹Pusǝrǝi aban ɓwapǝndǝa kat ɗang, kǝ sǝm mana Ɓakuli ak dǝmbǝa tarki sǝm ama ɓǝ̀ sǝm duk amǝnakun male, yì sǝm mana anzǝm loapi ɓembe male, sǝm lili sǝnǝia, sǝm nu sǝnǝia ka, sǝm nda.

⁴²Pǝlǝa tsǝk sǝm ɓǝ̀ sǝm hamnǝ Cau Amsǝban aban aɓwana sǝ ɓǝ̀ sǝm lǝmndǝia wia ama yì ka, nda mǝnana Ɓakuli twali ɓǝ̀ do mǝɓashi mala aɓwana mana nǝ yilǝmu andǝ amana à wuna ka.

⁴³Yì nda mana amǝ'ɓangna mala Ɓakuli kat ka, à nakun ace ama, koyana kat sǝ paɓamuri abani ka, nǝ̀ kum twalban cauɓikea aɓa lullǝi.

⁴⁴Kun Bitǝrus malaká pwal ɗang, kara Bangŋo Mǝfele sulǝo amur aɓwana mǝnana kat à kǝ ok cau mana nakiyi ka.

⁴⁵Amǝ Yahudi mǝnana amǝkwaɗi na, mana à yiu andǝ Bitǝrus nǝ Jopa ka, à ndali nǝ sulǝo mala Bangŋo Mǝfele amur aɓwana mana amǝ Yahudi na raka.

⁴⁶Sǝ à oea aban naki acau nǝ aɓia kún sǝ à kǝ ɓwangsǝki Ɓakuli. Bitǝrus pǝlǝa na ama,

⁴⁷“Aɓwana mǝnia ka à kumǝna Bangŋo Mǝfele kǝla mana sǝm kum ngga, kǝɓwa nakam nǝ̀ gine ama ɓǝa kǝa pakkia wia batisǝma aɓa lullǝ Yesu raka le?”

⁴⁸Pǝlǝa tsǝa ama ɓǝa pakkia wia batisǝma aɓa lullǝ Yesu Kǝrǝsti. Sǝ Karnilus zǝmbǝi wi ama ɓǝ̀ pakki aɓea anongŋo abania.