Read mbula bwazza Amǝ Mishan 11 Bible Online

Amǝ Mishan 11 - mbula bwazza bible

Amǝ Mishan 11

¹Amǝ'mishan andǝ aɓea amǝkwaɗi mana a nzali Yahudi ka à o ama aɓwana mana amǝ Yahudi na raka à angŋǝna cau mala Ɓakuli gbal.

²Lang Bitǝrus wario a Urǝshalima ka, amǝ Yahudi mana a paɓamuria aban Yesu ka à loarǝi nǝ cau ama,

³“Palang sǝ a waria ɓala mala aɓwana mǝnana amǝ Yahudi na raka, nyare a li girlina wunǝia!”

⁴Pǝlǝa Bitǝrus bǝlia wia ɓa gir mana kat pak ka, twal a tite, ama:

⁵Mǝ nda aɓa nggeala Jopa, lang mǝ nda ban hiwi ka, kara Ɓakuli mǝn mǝsǝam. Ən sǝn ɓe kǝgir aban sulǝo a nzali kǝla nggurbyau mǝgule mana à mǝnni, à kǝ sulǝi nǝ kuli nǝ abui mana ine ka, pǝlǝa yiu yi came abanam.

⁶Ən sǝn ɓālǝi pepe, kara ǝn sǝn ambalang agirkusǝu-ɓala, andǝ anyam ɓabondo, agir-nzali, andǝ anyal ɓabondo.

⁷Pǝlǝa ǝn ok ɓe giu banggam ama, “Bitǝrus lo, walo she!”

⁸Sǝ ǝn na nǝma, “Pa nǝ̀ pa anggo ɗang, Mǝtalabangŋo! Acemǝnana kǝ girlina mǝɓeami ko mana Nggurcau nyesǝi mǝpǝndǝke na ka malaká kutia kunam ɗang.”

⁹Pǝlǝa giu nî nyare na cau ɗǝm nǝ kuli ama, “Kǝa nyesǝ gir mǝnana Ɓakuli langŋǝni ɓoarnansari ka ama mǝpǝndǝke na ɗang.”

¹⁰Mǝnia pa anggo kusǝ tārú, sǝ a masǝlǝate ka à yì nyesǝ gir ni a kuli.

¹¹Aɓa mǝno anggo ka, aɓwana tārú mǝnana à pur a Kaisariya, à turia abanam ngga, à yì tusǝna a ɓala mana mǝ nda kam nǝ do ka.

¹²Pǝlǝa Bangŋo banggam ama mǝ ngga ɓukibumam ɗang, ɓǝ̀ sǝm o sǝnǝia. Pǝlǝa amǝkwaɗi mǝnia tongno-nong-mwashat a Jopa ka à lo atam aban ká Kaisariya, sǝm kat sǝm wario a ɓala mala Karnilus.

¹³Pǝlǝa bangga sǝm cau mala mǝturonjar mala Ɓakuli mǝnana sǝni aban came a ɓala male, sǝ banggi wi ama, “Tasǝ ɓwa a Jopa aban ɓwa mana lullǝi ama Shiman Bitǝrus ka.

¹⁴Yì nda ɓwa mǝnana nǝ̀ banggo cau mana nǝ̀ amsǝo andǝ amǝɓala mo kat ka.”

¹⁵Lang ǝn tinata na cau ka, kara Bangŋo Mǝfele sulǝo amuria, kǝla mǝnana sulǝo amur sǝm a dǝmbe ka.

¹⁶Pǝlǝa ɓalǝam kasǝ arǝ cau mana Mǝtalabangŋo bangŋa ama, “Yohana pak batisǝma nǝ mur, sǝ ma'wun ngga à nǝ̀ pakka wun batisǝma nǝ Bangŋo Mǝfele.”

¹⁷Sǝ acemǝnana Ɓakuli pea aɓwana mana amǝ Yahudi na raka, ɓoro mǝ'mwashati andǝ mana pa sǝm, sǝm mǝnana sǝm pana ɓamur sǝm aban Mǝtalabangŋo Yesu Kǝrǝsti ka, mǝ nda yana sǝ mǝ nǝ ginǝ pě mala Ɓakuli!

¹⁸Lang à nǝ̀ o ana ka, à pànǝ kun nacau ɗǝm ɗang, kara à tita ɓwangsǝki Ɓakuli. À na ama, “Sǝm sǝnǝni ado, Ɓakuli pani aɓwana mǝnana amǝ Yahudi na raka gbal njargula mala pwanzali a mala pǝlǝ nzǝmia arǝ acauɓikea malea, ɓǝa kum yilǝmu!”

¹⁹Aɓea amǝkwaɗi mǝnana pàtanni mesǝkea anzǝm lú mala Itǝfanu ka, à gali à kya bwal bareban Fonishiya, andǝ Luran Sayipǝrus, andǝ nggeala Antiyok aɓa bu-nzali Suriya. À kǝ hamnǝ Cau Amsǝban, sǝ kǝ amǝ Yahudi na nǝmurǝia à hambia wia ka.[63]

²⁰Sǝa ma aɓea amǝkwaɗi mana à pur nǝ luran Sayipǝrus andǝ nggeala Sayirin ka, à kutio à wario a Antiyok, à kya tita hamnǝ Cau Amsǝban mala Mǝtalabangŋo Yesu aban aɓwana mala aɓea anzali.

²¹Rǝcandǝa mala Mǝtalabangŋo ka nda tea, sǝ aɓwana mala aɓea anzali pas à earnǝ Cau Amsǝban à paɓamuria aban Mǝtalabangŋo.

²²Cau mala mǝnia yì gir ka yi bwal ban amǝkwaɗi a Urǝshalima, pǝlǝa à tasǝ Barnabas a Antiyok.

²³Lang yiu yi bwalǝna Antiyok sǝ sǝnǝna tsǝkbu mala Ɓakuli amur aɓwana ka, bumi pwasǝo, camarǝ kwarkiria ɓǝa cam kàngkàng aɓa paɓamuru malea sǝ ɓǝa do nǝ mǝsǝcau aban Mǝtalabangŋo.

²⁴Barnabas ka ɓwa mǝɓoarne na, lumsǝ nǝ Bangŋo Mǝfele andǝ paɓamuru. Aɓwana pas à ak Mǝtalabangŋo.

²⁵Pǝlǝa Barnabas wario a Tarsus a sǝn ban Sawul.

²⁶Lang kumǝni ka, twali wari nǝi a Antiyok. Yia kǝm à pak pǝlǝa mwashat aban amǝkwaɗi aban kani aɓwana pas cau mala Ɓakuli. Àkǝ̀ Antiyok sǝ à tita tunǝ amǝkwaɗi ama a Kǝrǝsta.

²⁷Àkǝ̀ ɓalǝ anongge mǝno ka aɓea amǝ'ɓangna mala Ɓakuli pur a Urǝshalima sǝ à wario a Antiyok.

²⁸Mwashat aɓalǝia, à tunǝki ama Agabus,[64] lo came aɓa rǝcandǝa mala Bangŋo mala Ɓakuli bangŋa ama, nzala mǝgule na nǝ̀ yia kpa a bu ɓanza mǝno ka kat. (Anggo sǝ gir nî yi lumsǝo, nzala kpa a baku mana Kǝlaudiyus nda murǝm mǝgule ka).

²⁹Pǝlǝa amǝkwaɗi nea rǝia ama, koyan aɓalǝia ka ɓǝ̀ pa ɓoro mana nǝ̀ gandǝi ka, ɓǝa tasǝi ace pa gbasha aban amǝ'eamrǝarǝu mana a nzali Yahudi ka.

³⁰Anggo sǝ à pa, à tasǝ boale aban aɓwana-mǝgule mala amǝkwaɗi nǝ bu Barnabas andǝ Sawul.