Read mbula bwazza Amǝ Mishan 13 Bible Online

Amǝ Mishan 13 - mbula bwazza bible

Amǝ Mishan 13

¹Aɓa Ikǝlisiya mǝnana a Antiyok mala bu-nzali Suriya ka amǝ'ɓangna mala Ɓakuli nakam, andǝ amǝ kanigir. À nda ka Barnabas, andǝ Shimiyan (mǝnana à tunǝki ama Mǝpǝndǝe ka), andǝ Lukiyus (ɓwa Sayirin), andǝ Maneyan (mǝnana lo a tarǝia andǝ murǝm Hirǝdus ka), sǝ Sawul.

²A ɓe pwari lang à nǝ̀ nggǝ peri aban Mǝtalabangŋo andǝ gilmur ka, Bangŋo Mǝfele na ama, “Wu taram Barnabas andǝ Sawul wu cia ɗàng ace turo mǝnana ǝn tunǝia à nǝ̀ pakkam ngga.”

³Anzǝm gilmur andǝ hiwi ka, pǝlǝa à tsǝk abu amuria sǝ à tasǝia aban o a turo mishan.

⁴Yia kǝm mana Bangŋo Mǝfele turia ka, à pur a Antiyok sǝ à wario a Selusiya, la a kun múr. Abanì ka à kutia waru aban ká a nggeala Salamis aɓa luran Sayipǝrus.

⁵Lang à kya bwalǝna Salamis ka, à hamnǝ cau mala Ɓakuli arǝ andakpapi mala amǝ Yahudi. Yohana Markus wario atea ace mǝnana ɓǝ̀ bwalia wia turo mishan ngga.

⁶À gya arǝ aban pas aɓa luran, à yì bwal la mana à tunǝki ama Pafos ka. Abanì sǝ à kum ɓeɓwa Yahudi mǝmonzǝe, à tunǝki ama Ba-Yesu, mǝnana twal ɓamuri aɓa nyir ama yì ka, mǝɓangna mala Ɓakuli na.

⁷Yì ka, mǝtamurǝm mala nggwamna, Sajiyos Polus na. Sǝ nggwamna ka, ɓwa na ndanǝ sǝlǝe, pǝlǝa turban arǝ Barnabas andǝ Sawul acemǝnana kǝ earce ok cau mala Ɓakuli.

⁸Sǝ mǝɓangna mǝ nyirì mǝno, mana gbal à tunǝki ama Elimas ka, camarǝ zurǝì kusǝcau, kǝ ɓariki nǝ̀ tsǝk nggwamna ɓǝ̀ kǝa surǝ mǝsǝcau ɓǝ̀ paɓamuri ɗang.

⁹Sǝ Sawul, mana à tunǝki ama Bulǝs ka, lumsǝna nǝ Bangŋo Mǝfele, sǝn Elimas kyap-kyap, sǝ banggi wi ama,

¹⁰“We muna mala Shetan! A nda ɓimǝbura mala gir mana kat mǝɓoarne na ka! We ka, a lumsǝ nǝ aɓealɓikea ɗàngɗáng mala swarkiban andǝ ɓosǝkia aɓwana. A pà nǝ nying buo arǝ pūrǝki mǝsǝcau mala Mǝtalabangŋo ama ɓǝ̀ pǝlǝ nyir ɗang?

¹¹Ado ka, ǝn nggǝ banggo, bu Mǝtalabangŋo nǝ̀ sulǝo a muro. We ka, a nǝ duk nte, a nǝ pakki anonggeo pas a pà nǝ sǝn tǎlaban mala pwari ɗang.” Àkǝ̀ banì kara amǝsǝ Elimas twal mbǝrǝm-mbǝrǝm, pǝndǝa sulǝo amuri, came arǝ harǝkiban aban alta ɓwa mana nǝ̀ bwali wi gara ka.

¹²Lang nggwamna nǝ̀ sǝn man yì gir kumban ngga, kara paɓamuri aban Mǝtalabangŋo. Yì ka, ndali kǝrkǝr nǝ mǝnia yì kanigir amur Mǝtalabangŋo ka.

¹³Bulǝs andǝ aɓwana mana andǝ yì ka, à nying Pafos, à kutio a waru à samsǝa aban ká Parga a bu-nzali Pamfiliya. Yohana Markus ɗekia kano nyare o a Urǝshalima.

¹⁴À puri Parga, à eauwe a nza aban ká a Antiyok mala bu-nzali Pisidiya. A pwari Sabbat, pwari usǝlǝo mala amǝ Yahudi ka à kutio aban peri a ndakpapi mala amǝ Yahudi, à kya do.

¹⁵Anzǝm ɓalgir aɓa Nggurcau mala Musa andǝ malǝmce mala amǝ'ɓangna mala Ɓakuli ka, aɓwana-mǝgule mala ndakpapi tasǝ cau abania ama, “Wun amǝ'eamrǝarǝu, ɓǝ̀ wu ndanǝ kǝcau kwarkiru ace aɓwana ka, wu yiu, wu yi ne.”

¹⁶Bulǝs pǝlǝa lo came, loasǝ bui ama ban ɓǝ̀ pwal ka, sǝ na ama: Wun amǝ Isǝrayila andǝ aɓwana mala aɓea anzali, mana wu kǝ peri aban Ɓakuli ka, wu kwaki kir wun wu oem!

¹⁷Ɓakuli mala amǝ Isǝrayila tarki aká sǝm, sǝ cia à lakki sǝ à gul nǝ rǝcandǝa a nzali Masar. Nǝ rǝcandǝa male mǝgule sǝ yi pusǝia aɓa do guro mǝnana a mǝno yì nzali ka.[65]

¹⁸Twal gandǝrǝu nǝ aɓealǝu malea aɓalǝ apǝlǝa lumi-ine mala gya malea a ɓabondo.[66]

¹⁹Lang à bwal nzali Kan'ana ka, twalta aɓea kun tongno-nong-ɓari, pǝlǝa ak anzali malea pea amǝ Isǝrayila ɓǝ̀ pǝlǝ malea.[67]

²⁰Amǝnia yì agir ka à twal apǝlǝa gbǝman-ine nǝ lumi-tongno (450). Anzǝm man ngga, Ɓakuli pea wia amǝla amuria ba baku mala Samuyila mǝɓangna mala Ɓakuli.[68]

²¹Pǝlǝa aɓwana nǝ ɓamuria à zǝmbǝa ama ɓǝà pea wia murǝm. Pǝlǝa Ɓakuli pea wia Sawul muna mala Kishi, a tau mala Benjami, mana duk murǝm amuria pǝlǝa lumi-ine ka.[69]

²²Anzǝm mana Ɓakuli sulǝna Sawul ka, pǝlǝa twal Dauda ɓǝ̀ dupia wia murǝm. Sǝ bangŋa amur Dauda ama, “Ən kum muna mala Jeshi yì Dauda ka, ɓwa na mǝnana kǝ pwasǝ ɓabumam ngga. Kǝ kpata gir mǝnana ǝn ear ce nǝma ɓǝ̀ pak ka.”[70]

²³Nǝban tau mala Dauda sǝ Ɓakuli yi pea amǝ Isǝrayila Mǝ'amsǝban, yì Yesu, kǝla mana bangŋa ama nǝ̀ pak ka.

²⁴Kaniama Yesu ɓǝ̀ yiu ka, Yohana Mǝbatisǝma hamǝna ama amǝ Isǝrayila kat ɓǝa pǝlǝ nzǝmia arǝ acauɓikea, ɓǝa pwanzali, sǝ ɓǝa pakkia wia batisǝma.[71]

²⁵Lang Yohana na rǝ mal turo mana Ɓakuli pe wi ɓǝ̀ pak ka, bangŋa ama, “Wu kǝ sǝni kǝla mǝ nda Kǝrǝsti, yì ɓwa mǝnana Ɓakuli tarrì ka le? Mim ngga mǝ nda yì ɗang. Yì ka, nda kǝ yiu atam tu ka, sǝ anggur ankura male ka ǝn kārǝa mǝ nǝ panzǝia ɗang.”[72]

²⁶Ado ka wun amǝ'eambǝam amǝ Isǝrayila, amǝ kau mala Ibǝrayim, andǝ aɓwana mala acili anzali mǝnana à kǝ ɓanggi Ɓakuli ka, aban sǝm sǝ à turban nǝ mǝnia yì cau amsǝban ngga!

²⁷Aɓwana, mana nǝ́ do a Urǝshalima andǝ aɓwana-mǝgule amǝyalban malea ka, à surǝ Yesu ama yì nda Mǝ'amsǝban mǝnana amǝ'ɓangna mala Ɓakuli gilǝ cau amuri ka ɗang. A kun mani ka, à kasǝi wi ɓashi wal-lui, sǝ aɓa pě anggo ka à lumsǝna acau mala amǝ'ɓangna mala Ɓakuli mana à kǝ ɓalli a koya pwari Sabbat, sǝ a bwalte raka.

²⁸Kat andǝ amani ama à kumi nǝ cauɓikea mana à nǝ̀ wali nǝi raka, à gine, à ne Bilatus ama ɓǝa wal-lui.[73]

²⁹Lang à lumsǝna gir mana kat à gilǝ amuri ama à nǝ̀ pakki wi ki ka, pǝlǝa à sulǝi nggun-gangndi, à kya ci a ɓembe.

³⁰Sǝ Ɓakuli ka loasǝi nǝ yilǝmu!

³¹Aɓalǝ anongŋo pas kǝ pusǝrǝi aban aɓwana mǝnana à kǝ gya andǝia ɗiɗyal, a Galili aban ká Urǝshalima ka. Yia a dyan ngga, à nda ka amǝ nakuni aban amǝ Isǝrayila.[74]

³²Sǝ ado ka, sǝm ndya sǝm yina wun nǝ mǝnia yì Cau Amsǝban ngga. Mǝnia ka nda gir mana Ɓakuli bangŋa ama nǝ̀ pakki aká sǝm ngga.

³³Sǝ ado ka, Ɓakuli lumsǝna sǝmi, sǝm mǝnana sǝm ndaka amǝkea ka, yi mana loasǝ Yesu a ɓembe ka. Mǝnia ka nda cau mana à bangŋa amur Yesu aɓa ɓaria kure mala Anggyal ama: “We ka, a nda Munem; yalung ngga ǝn dumǝna Tarró.”[75]

³⁴Ɓakuli ka bangŋǝna ama nǝ̀ loasǝi, pà nǝ̀ ɗeki ɓǝ̀ rǝmbǝa a tūli ɗang. Mǝnia ka bangŋi aɓa Malǝmce ama: “Mǝ nǝ po atsǝkbu mǝfele, amǝ'mǝsǝcau nì mǝnana ǝn pacau acea aban Dauda ka.”[76]

³⁵Anggo sǝ Malǝmce mala Ɓakuli bang ɗǝm a ɓe ban ama: “A pa nǝ eare a nǝ nying Ɓwa mo Mǝfele ɓǝ̀ rǝmbǝo a tūli ɗang.”[77]

³⁶Mǝnia ka Dauda na à nakiyi cau amuri ka ɗang, acemǝnana anzǝm mana Dauda pangŋǝna gir mana kànì mala Ɓakuli na, a nza male ka, pǝlǝa wu, à ci a ɓembe ata ake, nggūrǝi ka rǝmbǝo.

³⁷Sǝa ma Ɓwa mǝnana Ɓakuli loasǝi a ɓembe ka, nggūrǝi rǝm ɗang.

³⁸Ace mani ka, wun amǝ'eambǝam, wu kwaki kir wun! Wu sǝlǝ ama nǝ bu Yesu sǝ wu nǝ̀ kum twalban cauɓikea ma'wun.

³⁹Ɓwa mǝnana paɓamuri abani ka, à pusǝni aɓata kùrban mala cauɓikea, mǝnana Nggurcau mala Musa pa nǝ̀ gandǝ pe raka.

⁴⁰Wu tsǝk kir wun, ace mǝnana cau mana amǝ'ɓangna mala Ɓakuli na ka, ɓǝ̀ kǝa lumsǝ amur wun ɗang, mǝnana ama:

⁴¹“Wu sǝni, wun amǝ ɓangginǝ cau mala Ɓakuli! Wu ndali, wu kya lú, wu ueɓà! Acemǝnana gir mana ado ǝn nggǝ pe yalung ngga, gir na mǝnana pà wu nǝ̀ earnǝi raka, ko ɓǝa bangŋa ama ɓeɓwa bangga wun ce ka.”[78]

⁴²Lang Bulǝs andǝ Barnabas à nda ban nying ndakpapi ka, ɓwapǝndǝa zǝmbǝia wia ama ɓǝa nyare a pwari Sabbat mana kǝ yiu ka, ɓǝa nea wia cau ɗǝm amur amǝnia yì agir ka.

⁴³Anzǝm mana ɓwapǝndǝa mesǝna ka, amǝ Yahudi pas andǝ aɓwana mana à paɓamuru aɓata kwaɗi mala amǝ Yahudi ka, à akrǝia ata Bulǝs andǝ Barnabas. Sǝ Bulǝs andǝ Barnabas ka, à kwarkiria ama ɓǝa lidǝmbǝa nǝ guli arǝ ɓwamuru mala Ɓakuli.

⁴⁴Pwari Sabbat yi karǝna ka, la pur kat à yì rambǝa aban okcau mala Mǝtalabangŋo.

⁴⁵Lang aɓwana-mǝgule mala amǝ Yahudi nǝ̀ sǝn aɓwabunda ka, kara mɓali pakkia wia, à kǝ makgir nǝ cau kat mǝnana Bulǝs bang ngga, à kǝ sanggì.

⁴⁶Pǝlǝa Bulǝs andǝ Barnabas nea wia nǝ mǝsǝkang-kangŋa ama: Wun amǝ Yahudi, wun nda mǝnana ɓoaro sǝm nǝ̀ bangga wun cau mala Ɓakuli peatu ka. Sǝ acemǝnana wu ɓinǝkini, sǝ wu lǝmndǝna ama wu gattini kum yilǝmu mana málá male pà kàm raka, adyan ngga sǝm ɗekina wun, sǝm nǝ̀ o aban aɓwana mana amǝ Yahudi na raka.

⁴⁷Acemǝnana mǝnia ka nda nzongcau mǝnana Mǝtalabangŋo tsǝka sǝm ama: “Ən tsǝngŋǝna wun, wu ndaka tǎlaban aban aɓwana a ɓanza, acemǝnana ɓǝ̀ ɓanza kat kum amsǝban.”[79]

⁴⁸Lang aɓwana mana amǝ Yahudi na raka nǝ̀ o a na ka, kara banɓoaria wia, à kǝ ɓwangsǝki Mǝtalabangŋo ace cau male. Sǝ aɓwana mana kat Ɓakuli tàrria ace yilǝmu mana pà nǝ̀ mal raka, à paɓamuria, à duk amǝkwaɗi.

⁴⁹Cau mala Mǝtalabangŋo mǝsǝe akiban a nzali mǝno ka.

⁵⁰Pǝlǝa aɓwana-mǝgule mala amǝ Yahudi soakita aɓwana-mǝgule mala nggeala, andǝ aɓea amamǝna amǝgulo mala aɓwana mǝnana amǝ Yahudi na raka, mana à kǝ peri aban Ɓakuli ka. A tita pe Bulǝs andǝ Barnabas tanni, pǝlǝa à pǝria à puri ɓa nzali malea.

⁵¹Sǝ yia amǝ'mishan ngga à kǝtǝri tu kusǝia, ɓǝ̀ lǝmndǝia wia ama à pusǝkina abuia, ɓǝ̀ mana kumia le ka nda amuria, pǝlǝa à kutio aban ká a Ikoniya.[80]

⁵²Amǝkpata Yesu mana a Antiyok ka, à lumsǝ nǝ banɓoarnado andǝ Bangŋo Mǝfele.