Read mbula bwazza Amǝ Mishan 16 Bible Online

Amǝ Mishan 16 - mbula bwazza bible

Amǝ Mishan 16

¹Bulǝs andǝ Silas wario a nggeala Dabe, sǝ à kya kutio à o a nggeala Listǝra. Abanì ka ɓe mǝkwaɗi na kam lullǝi ama Timoti. Ngge yì Timoti gbal ka mǝkwaɗi na, ɓwa Yahudi, sǝ tarrí ka ɓwa Gǝrik na.

²Amǝkwaɗi mana a Listǝra andǝ Ikoniya ka, à kǝ ɓwangsǝi yì Timoti.

³Bulǝs earce nǝ̀ o a tarǝia andǝ Timoti aban turo, pǝlǝa kasǝi wi ɓate. Pe anggo ace mǝnana amǝ Yahudi mana à ndanǝ do arǝ abanì ka, à sǝlǝna ama tar Timoti ka ɓwa Gǝrik na.[90]

⁴Aɓa gya malea arǝ ala ka, à kǝ banggia amǝkwaɗi anzongcau mǝnana amǝ'mishan andǝ aɓwana-mǝgule mana a Urǝshalima earǝna amuria ace aɓwana mala acilia anzali ɓǝa kǝ kpatea ka.

⁵Anggo sǝ amǝkwaɗi kum rǝcandǝa aɓa paɓamuru malea, sǝ à kǝ lakki koya pwari ka.

⁶Bulǝs andǝ aɓi amǝgya à o arǝ abu-nzali Firigiya andǝ Galati, acemǝnana Bangŋo Mǝfele earia wia ama ɓǝa hamnǝ cau a bu-nzali Asiya ɗang.

⁷Lang à yina a nzong-nzali mala amǝ Misiya ka, à ɓariki ama à nǝ̀ kutio a bu-nzali Bitiniya, nyare Bangŋo mala Yesu ɓinǝia wia,

⁸pǝlǝa à ara aɓa bu-nzali Misiya, à dili aban ká a Tǝros.

⁹A bu mǝno yì du ka, Bulǝs kum sǝnǝ aɓa Bangŋo; sǝn ɓeɓwa mala bu-nzali Masǝdoniya aban came, aban zǝmbǝi wi ama, “Yiu a Masǝdoniya, yiu bwala sǝm!”

¹⁰Pǝlǝa sǝm lo aban ká a Masǝdoniya, acemǝnana sǝm sǝlǝna ama Ɓakuli na aban tunǝ sǝm ɓǝ̀ sǝm hamnǝ Cau Amsǝban aban aɓwana mana a bu-nzali Masǝdoniya ka.

¹¹Sǝm nying Tǝros a waru-mur aban ká a luran Samotǝres. Lang ban fana ka, sǝm yì bwal Niyapolis, la a kun nggeamur.

¹²Akano ka sǝm eauwe a nza aban ká a Filipi, ɓe nggeala mǝgule mala bu-nzali Masǝdoniya aɓa nzali domurǝm mala amǝ Roma. Sǝm pakki aɓea anonggeo akano.

¹³A pwari Sabbat ka sǝm puri ɓa nggeala, sǝm wario a kun nggeasala, aban mana sǝm nggǝ sǝni kǝla akàm sǝ amǝ Yahudi kǝ kpapi ace pak hiwi ka. Abanì sǝ sǝm do, sǝm na cau nǝ amamǝna mǝnana sǝm kumia aban rambǝa abanì ka.

¹⁴Ɓe mɓwama mwashat aɓalǝ amamǝna mǝnana ok sǝm ngga, lullǝi ama Lidiya, ɓwa nggeala Tiyatǝra, mǝ makki anggurbyau mǝcande na. Yì ka, mɓwama na mana kǝ peri aban Ɓakuli pepe ka. Lang kwaki kiri aban ok sǝm ngga, Mǝtalabangŋo mǝn ɓabumi ɓǝ̀ ak cau mana Bulǝs kǝ na ka.

¹⁵Anzǝm mana à pangŋǝni batisǝma andǝ amǝ ɓala male ka, pǝlǝa tunǝ sǝm ɓǝ̀ sǝm yiu a ɓala male; na ama, “Ɓǝ̀ wu earnǝ mim ama mǝ nda mǝkwaɗi mǝɓafoe aban Mǝtalabangŋo ka, wu yiu, wu sulǝo a ɓala mem.” Cam arǝ ɓuaki arǝ sǝm gandǝa sǝm eare.

¹⁶A ɓe pwari, sǝm nda rǝ o aban pak hiwi ka, sǝm je sǝnǝ ɓe nsari, guro na. Ndanǝ kukwar a rǝì mǝnana kǝ pe wi sǝne, nǝ̀ gandǝ na gir mǝnana nǝ̀ kumban a dǝmbǝa ka. Yì ka, kǝ kumbi amǝtale gǝna kǝrkǝr nǝ ɓangnǝ-ɓangna.

¹⁷Nsari man kǝ gya ata sǝm sǝnǝa Bulǝs, kǝ loasǝban, kǝ na ama, “Aɓwana mǝnia ka, à ndaka ɓwana mala Ɓakuli mana Karban kat ka! À nda aban hamba wun njar mana wu nǝ̀ kum auwa nǝi ka!”

¹⁸Twal anonggeo pas camarǝ na cau mǝ'mwashati; gandǝa bum Bulǝs lullo sǝ pǝlǝa arǝ banggi kukwar mǝnana arǝ nsari ka ama, “Aɓa lullǝ Yesu Kǝrǝsti sǝ ǝn banggo, puri rǝ nsari man!” Kara kukwar puri rǝ nsarì àkǝ̀ banì.

¹⁹Lang amǝtala guro-nsari man sǝlǝna ama ta kume malea kasǝna ka, kara à bwal Bulǝs andǝ Silas, à nunggia aɓalǝ aɓwana aban ká aban amǝ'talanzali a bankpapi mala la.

²⁰Lang à yina nǝia a ɓadǝmbǝ amǝɓashi ka, à kya na ama, “Aɓwana man ngga amǝ Yahudi na, sǝ à nda à kǝ yiu nǝ loasǝban aɓa la mǝgule ma'sǝm ngga!

²¹À kǝ kania aɓwana agir mǝnana à nda ɗàng andǝ anzongcau ma'sǝm, sǝm mana sǝm ndaka amǝ Roma ka.”

²²Ɓwabunda yi ramǝna a rǝia amur Bulǝs andǝ Silas aban walkia. Pǝlǝa amǝɓashi tsǝa à sanggia agir-nggurǝu mǝnana arǝ Bulǝs andǝ Silas ka, sǝ à kwea nǝ nkamso.

²³Anzǝm mana à kwangnia kǝrkǝr ka, à kya turia aɓa ndàkurban, sǝ à tsǝk mǝyal ndàkurban ɓǝ̀ tsǝk kiri a rǝia pepe.

²⁴Mǝyal ndàkurban pa kǝla mǝnana à banggi wi ka, ram tea a tǝrta ndàkurban, pǝlǝa taka akusǝia arǝ agbǝla-nggun amǝdǝmbǝre.

²⁵Nǝ ɓadu ka Bulǝs andǝ Silas camarǝ pak hiwi, sǝ à kǝ tukia anggyal aban Ɓakuli, sǝ acili aɓwana mana à girria andǝia ka, à kwaki kiria à kǝ oea.

²⁶Anggo ka kara, nzali gǝggǝliki, tsǝk kusǝ ndàkurban dǝkǝri kǝrkǝr. Akunakurǝm mǝnggi kat, sǝ ansolo mana arǝ akusǝu andǝ abu koyan kat a ndàkurban ngga, à ɓunggio à sukki kat.

²⁷Mǝyal ndàkurban lo ndǝring, lang nǝ̀ sǝnban ngga, akunakurǝm kat ka, à mǝnggina. Aɓa ɗenyicau male ka twali ama, aɓwana mana à girria a ndà ka, à ɓangŋǝna à mesǝkina. Nda kwetǝ nggeabyau nǝ̀ wal ɓamuri.

²⁸Sǝ Bulǝs sà a rǝi ɓwam ama, “Came, kǝa wal ɓamuro ɗang! Sǝm ndakani kat!”

²⁹Mǝyal ndàkurban tunǝban ɓǝa yinǝi wi nǝ bǝsa. Pǝlǝa ɓangŋa kutio aɓa ndàkurban, kya kpa a ɓadǝm Bulǝs andǝ Silas, rǝì kǝ ɓǝla.

³⁰Pǝlǝa pusǝia à puro anza, sǝ ɗia ama, “Aɓwana-mǝgule, mana gir ni na mǝ nǝ pa sǝ mǝ nǝ kum amsǝban?”

³¹À eari wi ama, “Paɓamuro aban Mǝtalabangŋo Yesu, sǝ a wu nǝ kum amsǝban, we wunǝ aɓwana mana aɓala mo ka.”

³²Pǝlǝa Bulǝs andǝ Silas ne wi Cau Amsǝban mala Mǝtalabangŋo, yì andǝ aɓwana mana aɓa ɓala male ka.

³³Àkǝ̀ mǝno yì bu du ka, mǝyal ndàkurban ɗenyi nǝia, lakki wia anpenye malea; sǝ yì andǝ koyana aɓa ɓala male ka, à pakkia wia batisǝma.

³⁴Pǝlǝa wari nǝ Bulǝs andǝ Silas a ɓala male, sǝ yi pea wia girlina. Yì andǝ amǝ ɓala male kat ka à lumsǝ nǝ bumpwasǝa, acemǝnana yia kat ka à angŋǝna Ɓakuli.

³⁵Ban fana ka, aɓwana-mǝgule mala la tur amǝ'munagara ɓǝa kya banggi mǝyal ndàkurban ama, “Ɓǝa nying amǝno yì aɓwana ka ɓǝa o.”

³⁶Pǝlǝa mǝyal ndàkurban ne Bulǝs ama, “Aɓwana-mǝgule mala la turban, ama ɓǝa na wun ama, wu o. Ace mani ka wu kyan caca!”

³⁷Sǝ Bulǝs pǝlǝa nea amǝ'munagara ama, “À kwak sǝm a mǝsǝ ɓwapǝndǝa bwāng, sǝ à pakka sǝm kǝ ɓashi ɗang, sǝ à nyare à oasǝ sǝm a ndàkurban, sǝm mǝnana sǝm nda ka amǝ Roma ka! Sǝ ado ka, à kǝ earce ama à nǝ̀ nying sǝm a sǝmbǝrǝa? Mǝnia ka pà nǝ̀ pak ɗang! Ɓǝa yiu nǝ nggearǝia, ɓǝa yi panzǝ sǝm!”

³⁸Lang amǝ'munagara kya banggia aɓwana-mǝgule mala la mǝnia yì cau, sǝ à yì sǝlǝ ama Bulǝs andǝ Silas ka, amǝ Roma na ka, ɓangciu bwalia.

³⁹Pǝlǝa aɓwana-mǝgule mala la lo à yiu a ndàkurban nǝ nggearǝia, à yiu a pwanmbi Bulǝs andǝ Silas nzali. Pǝlǝa à pusǝia, sǝ à zǝmbǝia wia ama ɓǝa o, ɓǝa nying nggeala.

⁴⁰Lang Bulǝs andǝ Silas nyingŋǝna ndàkurban ngga, à nyare a ɓala mala Lidiya. A kam ngga, à kya kum amǝkwaɗi, sǝ à ɓak ɓabumia. Anzǝm man ngga, sǝ à nying lê.