Read mbula bwazza Amǝ Mishan 2 Bible Online

Amǝ Mishan 2 - mbula bwazza bible

Amǝ Mishan 2

¹A pwari mala Lamsan mala Pentikos[10] ka, amǝkpata Yesu na a tarǝia aban mǝ mwashati.[11]

²Zuku ka, kara à ok gǝshi gir pur a kuli kǝla gǝshi gung-mbulo mǝcande aban ɓua. Yi lumsǝ ɓala mǝnana à ndakam aban do ka.

³Pǝlǝa à sǝn gir mǝnana nda kǝla alasǝ bǝsa, yi sulǝ amur koyan atea ka kat.

⁴Aɓwana mǝnana kat abanì ka, à lumsǝia nǝ Bangŋo Mǝfele, sǝ à tita na cau nǝ aɓea kún ɗàngɗáng, mǝnana Bangŋo Mǝfele pea wia rǝcandǝa mala ne ka.

⁵A baku mǝno ka, amǝ Yahudi mǝnana amǝ ɓanggi Ɓakuli na, mǝnana à purkio arǝ anzali mala ɓanza kat sǝ à yiu ka, à ndakam nǝ do aɓa Urǝshalima.

⁶Lang à ok mǝnia yì loasǝban ngga, ɓwabunda ɓangŋa yiu yi rambǝa. À ndali acemǝnana koyan atea ok amǝkpata Yesu aban na cau nǝ akún malea.

⁷Gir nî pea wia ndali sǝ dupia wia gir-gyambǝliban kǝrkǝr, sǝ à kǝ na ama: Amǝnia yì aɓwana kat ka, amǝ Galili na re?

⁸Sǝ lang sǝ sǝm oea aban na cau nǝ a kun la sǝm?

⁹Sǝm ngga sǝm purki arǝ anzali Pataya, andǝ Medes, andǝ Elam, andǝ Mesopotamiya, andǝ Yahudi andǝ Kapadosiya. Sǝ aɓea ɓwana ata sǝm ngga à purki arǝ anzali Pwantus andǝ Asiya,

¹⁰andǝ Firigiya, andǝ Pamfiliya, andǝ Masar, andǝ abuban mala amǝ Libiya mǝnana tù nǝ Sayirin ngga, andǝ anzali Roma,

¹¹andǝ Kǝreti, andǝ Arabiya. Aɓea aɓwana ata sǝm ngga amǝ Yahudi na, sǝ acili sǝm ngga aɓwana na mǝnana à pǝlǝ amǝkpata peri mala amǝ Yahudi ka. Sǝm kat ka, sǝm ok aɓwana man aban na cau nǝ a kun la sǝm amur agir-ndǝlǝki mǝnana Ɓakuli pea ka!

¹²Yia kat, à cam abanì aban ndalǝki, muria zuriki, à kǝ ɗiki rǝia ama, “Mana nda ɓa mǝnia yì gir ka?”

¹³Sǝ aɓea ɓwana aɓalǝ aɓwabunda ka à nyesǝ ce gir oalban na, à kǝ na ama, “Mùr-ɓǝlanggun anap na à nu sǝ kǝ walia ka!”

¹⁴Pǝlǝa Bitǝrus lo cam nǝ came andǝ acilia amǝ'mishan mala Yesu lum-nong-mwashat gbal ate, loasǝ gi a kuli bangcau nǝ ɓwabunda ama: Wun aɓwana ma'sǝm, amǝ Yahudi andǝ aɓwana mǝnana kat à ndanǝ do kani aɓa Urǝshalima ka! Wu kwaki kir wun pale wu o, wun kat, ɓǝ̀ ǝn bǝla wun ɓa mǝnia yì gir ka.

¹⁵Aɓalǝ wun ngga, aɓea aɓwana na ban bangŋa ama, aɓwana mǝnia ka mùr-ɓǝlanggun anap na à nu, kǝ walia ka. Ən nggǝ bangga wun, anggo sǝ pak ɗang. Wu sǝlǝ ama, ado ka dǝmbari na. Mùr-ɓǝlanggun anap pà nǝ̀ wal aɓwana a bu-pwari tongno-nong-ine mala dǝmbari ɗang.

¹⁶Awo, gir mǝnana ado wu sǝni ka, à angŋa dǝmbǝa à naná ce, a pwaryan, a kun mǝɓangna mala Ɓakuli kǝla Joyel, ama:

¹⁷“Ɓakuli bangŋa ama, a masǝlǝata apwari ka, Mǝ nǝ sulǝ Bangŋo mem amur ɓwapǝndǝa kat. Amuna-burana andǝ amuna- mamǝna ma'wun, à nǝ̀ na gì Ɓakuli. Alaggana ma'wun nǝ̀ sǝn sǝna aɓa bangŋo, sǝ aɓwana-mǝgule nǝ̀ lorǝ alorǝo.

¹⁸Arǝ apwari mǝno ka, mǝ nǝ sulǝ Bangŋo mem amur aguro mem, aburana andǝ amamǝna, sǝ à nǝ̀ na gì Ɓakuli.

¹⁹Mǝ nǝ pakki agir- gyambǝliban a kuli andǝ agir-ndali a nzali. À nǝ̀ sǝn nkila, andǝ bǝsa, andǝ apǝrɓang-yelebǝsa.

²⁰Pwari nǝ̀ pǝlǝ pǝndǝa, sǝ zongŋo nǝ̀ pǝlǝ mǝbangŋe kǝla nkila, sǝ Pwari Mǝgule andǝ Mǝɓoarɓwe mala Mǝtalabangŋo nǝ̀ yia tusǝo.

²¹Sǝ ɓwa mǝnana kat ɓua aban Mǝtalabangŋo ka, nǝ̀ kum auwa.”[12]

²²Wun amǝ Isǝrayila, wu kwaki kir wun, wu ok acau man. Yesu ɓwa Nazarat ka, ɓwa na mǝnana Ɓakuli earnǝi, sǝ lǝmndǝ ama yì nǝ̀ turi ka, sǝ pe wi rǝcandǝa mala pakki agir-ndǝlǝki andǝ agir-gyambǝliban, andǝ agir-lǝmndǝa amǝgulke. Wun nǝ ɓamur rǝ wun ngga, wu sǝlǝna, acemǝnana akani aɓalǝ wun, àkǝ̀ mǝsǝ wun sǝ pea.

²³Ɓakuli surǝna rǝ gir mǝnana nǝ̀ kumban ngga, sǝ nǝ kani male, sǝ wu mak Yesu aban aɓwana mǝnana amǝ Yahudi na raka, amǝ ɗwanyi kpata Nggurcau, mǝnana à yì gballì amur nggun-gangndi, à wal-lui ka.

²⁴Sǝa ma Ɓakuli panzǝi aɓa bu rǝcandǝa mala lú, pǝlǝa loasǝi a ɓembe, acemǝnana lú kārǝa nǝ̀ bwali a ɓembe ɗang.

²⁵Dauda bangcau amuri ama: “Ən nggǝ sǝn Mǝtalabangŋo a koya pwari ka abanam; ɓangciu pà nǝ̀ pakkam ɗang, acemǝnana nda a girem.

²⁶Ace mani ka, ɓabumam nǝ̀ pakiɗire, sǝ lasǝam ngga lumsǝ nǝ bumpwasǝa; sǝ amur mǝno ka, nggūrǝam nǝ̀ usǝlǝo aɓa tsǝkɓalǝu.

²⁷We ka, a pà nǝ nying yilǝmem ɓǝ̀ ueo aɓalǝ alú[13] ɗang, sǝ a pà wu nǝ nying guro mo Mǝfele ɓǝ̀ rǝmbǝo a ɓembe ɗang.

²⁸A lǝmndǝnam anjar mala yilǝmu, sǝ do mo abanam ngga ndá nǝ̀ lumsǝam nǝ banɓoarnado ka.”[14]

²⁹Wun amǝ'eambǝam, mǝ nǝ gandǝ na wun nǝ rǝcandǝa ama, kà-sǝm Dauda ka wú, sǝ à cì a ɓembe, sǝ ba yalung, ɓembe male nia aban sǝm ngga.

³⁰Sǝ acemǝnana yì ka, mǝɓangna mala Ɓakuli na ka, surǝna rǝ cau mǝnana Ɓakuli banggi wi nǝ kángir ama, nǝ̀ tsǝk mwashat ata amǝkè ɓǝ̀ do a bunomurǝm male ka.

³¹Dauda ka sǝnǝna gir mǝnana Ɓakuli nǝ̀ ngga pa a dǝmbǝa ka, nda gir mǝnana tsǝa sǝ na cau amur loapi ɓembe mala Kǝrǝsti ka. Yi mǝnana bangŋa ama, Ɓakuli nyi a ɓembe ɗang, sǝ nggūrǝi gbal ka rǝm raka.

³²Ɓakuli loasǝ Yesu a ɓembe, sǝm kat ka, sǝm sǝni nǝ mǝsǝ sǝm anzǝm lo male.

³³Ado ka à loasǝni, à tsǝngŋǝni a buno-gulo a bu-mǝli mala Ɓakuli Tarrí. Sǝ Ɓakuli pani wi Bangŋo Mǝfele, kǝla mǝnana bangŋa ama nǝ̀ pà ka. Gir mǝnana ado wu sǝna sǝ wu ok ka, nda ɓoro male mǝnana yi soapa sǝm amur ngga.

³⁴Dauda ka eauwe wari a kuli ɗang, ace mani ka pà aban na cau amur ɓamuri ɗang mǝnana yi na ama: “Mǝtalabangŋo banggi Mǝtalem ama: ‘Do akani a buam mǝli,

³⁵she ɓǝn tsǝngŋǝna aɓeo amǝbura à pǝlǝna abuno tsǝk kusǝu a ɓakusǝo ka.’ ”[15]

³⁶Ace mani ka, aɓwana mala amǝ Isǝrayila kat, ɓǝa sǝlǝa nǝ mǝsǝcau ama, Yesu mǝnana wu gballì amur nggun-gangndi ka, nda ɓwa mǝnana Ɓakuli ci ɓǝ̀ do nda Mǝtalabangŋo, sǝ nda Kǝrǝsti, Mǝ'amsǝban ngga!

³⁷Lang amǝnia yia aɓwana ok anggo ka, cau tǝmia a ɓabumia kǝrkǝr, sǝ à ne Bitǝrus andǝ acilia amǝ'mishan ama, “Amǝ'eam sǝm, mana ɓoaro ɓǝ̀ sǝm pa?”

³⁸Pǝlǝa Bitǝrus earia wia ama, “Koyan aɓalǝ wun ngga, ɓǝ̀ pwanzali ɓǝ̀ vwaki bui arǝ cauɓikea. Ɓǝa pakki wi batisǝma aɓa lullǝ Yesu Kǝrǝsti, ace mǝnana ɓǝ̀ Ɓakuli twala wun ban acauɓikea ma'wun, sǝ wu nǝ̀ kum ɓoro mala Bangŋo Mǝfele.

³⁹Mǝnia yì ɓwamuru Ɓakuli bangce ka, nda ace wun andǝ amuna ma'wun, andǝ aɓwana mǝnana amǝ Yahudi na raka, andǝa mǝnana Mǝtalabangŋo Ɓakuli ma'sǝm nǝ̀ ngga tunǝia ka.”

⁴⁰Pǝlǝa Bitǝrus banggia wia aɓea acau pas sǝ nunkiria ama, “Wu amsǝ ɓamur rǝ wun aɓa nza mǝɓike mǝnia ka!”

⁴¹Aɓwana mǝnana à akcau mala Ɓakuli ka, à pakkia wia batisǝma. Laki mala mǝnia yì aɓwana, à tsǝa amur lakki mala amǝkpata Yesu a pwari mǝno ka à nda á-tārú.

⁴²Pǝlǝa yia ka à paɓamuria aban ak kanigir aban amǝ'mishan, andǝ do a tarǝia, andǝ ligirlina a tarǝia, andǝ pakki ahiwi.

⁴³Ɓwapǝndǝa kat ka do nǝ ɓanggi Ɓakuli, acemǝnana Ɓakuli kǝ pakki agir-ndǝlǝki, andǝ agir-gyambǝliban nǝ abu amǝ'mishan.

⁴⁴Sǝ amǝkpata Yesu kat ka, à kpapi ɓamuria, a do a tarǝia, à kǝ gau agirbunda malea a tarǝia.[16]

⁴⁵À makki agirkuma andǝ agǝna malea, sǝ à pe koya ɓwa nani ka gir mǝnana karǝ arǝ tǝle male ka.

⁴⁶Koya pwari ka, à kǝ yiu a kpapi a tarǝia, aban peri aɓa Ndàmǝgule mala Ɓakuli. À kǝ kpapiki arǝ aɓala malea aban li girlina. À kǝ li girlina a tarǝia nǝ banɓoarnado, nǝ ɓabumia mwashat.

⁴⁷À camarǝ ɓwangsǝki Ɓakuli, sǝ aɓwana kat ka banɓoaria wia a rǝia. Sǝ koya pwari ka, Ɓakuli kǝ tsǝa amur lakki malea nǝ aɓwana mǝnana à kǝ kum amsǝban ngga.