Read mbula bwazza Amǝ Mishan 25 Bible Online

Amǝ Mishan 25 - mbula bwazza bible

Amǝ Mishan 25

¹Anzǝm anongŋo tārú mǝnana Festus yiu nǝi a bu-nzali Kaisariya sǝ ak buno mala Nggwamna ka, kutio wario a Urǝshalima.

²Akano ka agbani pǝris andǝ aɓea aɓwana-mǝgule mala amǝ Yahudi wario abani nǝ acauɓashi mǝnana à ndanǝi arǝ Bulǝs ka.

³À zǝmbǝi Festus ama ɓǝ̀ pakkia wia gir mǝnana nǝ̀ pwasǝbumia ka, ɓǝ̀ eare ɓǝa tusǝ Bulǝs a Urǝshalima ɓǝa yi pakki wi ɓashi kam. À earce anggo acemǝnana yia ka à kùrnakun a rǝia à nǝ̀ wal-lui amur njargula.

⁴Pǝlǝa Festus nea wia ama, “Bulǝs ka nda a ndàkurban a Kaisariya, sǝ mim ngga banì pà nǝ̀ sau ɗang mǝ nǝ nyare abanì.

⁵Ɓǝ̀ nǝ̀ ɓoar ka, ɓǝa aɓwana-mǝgule ma'wun yiu, sǝm nǝ̀ o a tarǝ sǝm sǝnǝ yia, ɓǝa kya na gir mǝnana kwania ka, amur man yì ɓwa ka.”

⁶Anzǝm mǝnana Festus pakkina anonggeo tongno-nong-tārú aban ká lum, abania ka, sǝ kutio wario a Kaisariya. Ban fana ka, pǝlǝa do amur buno ɓashi sǝ turban ama ɓǝa yiu nǝ Bulǝs a ɓadǝmbǝi.

⁷Lang Bulǝs yina ka, amǝ Yahudi mǝnana à pur a Urǝshalima sǝ à yiu ka, à yì kàrǝì a ɓalǝu. À kǝ naki acau mala agir mǝɓane amuri kǝrkǝr, a ɓadǝm Festus, sǝ à gandǝ bang kǝgir mǝnana nǝ̀ lǝmndǝ ama acau mǝnana à nakia amuri ka, mǝsǝcau na ka ɗang.

⁸Pǝlǝa Bulǝs bǝl kuni na ama: “Mim ngga ǝn pak ma kǝgir mǝɓane arǝ Nggurcau mala amǝ Yahudi, ko arǝ Ndàmǝgule mala Ɓakuli, ko arǝ Nggwamnati mala Roma ka ɗang.”

⁹Sǝ acemǝnana Festus kǝ earce pwasǝbum amǝ Yahudi ka, pǝlǝa ɗi Bulǝs ama, “A nǝ eare a nǝ ká a Urǝshalima ace mǝnana ɓǝa kya pakko ɓashi akano a ɓadǝmbǝam amur amǝnia yia acau ka le?”

¹⁰Bulǝs na ama, “Awo! Mim ngga mǝ ndya ǝn cam aɓa ndaɓashi mala Murǝm mǝgule mala amǝ Roma, ban mǝnana ɓoaro ɓǝa pakkam ɓashi kam ngga. We nǝ ɓamuro, a sǝlǝna pepe ama ǝn pak mi amǝ Yahudi ɓe kǝgir mǝɓane ɗang.

¹¹Mǝni ɓǝa na ama ǝn parna nggurcau, ǝn pangŋǝna gir mǝnana dumǝna à nǝ̀ wal luim a rǝì ka, pa mǝ nǝ zǝmbǝa ama ɓǝa kǝa wal luem ɗang. Sǝ ɓǝ̀ mǝsǝcau pa aɓa cau mǝnana a ne a muram raka, kǝɓwa kārǝa nǝ̀ tasǝam a ɓabu amǝnia yia aɓwana ka ɗang. Ado ka, ǝn nggǝ alte ama ɓǝa um nǝ cau mem a dǝmbǝa aban Kaisar[111].”

¹²Anzǝm mǝnana Festus ongŋǝna kun amǝkurcau male ka, nda sǝ pa eare ama, “A zǝmna ama ɓǝa kyan nǝ we aban Kaisar, anggo aban Kaisar sǝ a wu nǝ ká.”

¹³Anzǝm anonggeo bǝti ka, Murǝm Agǝripa andǝ Banayis à yiua makki Festus kun a Kaisariya ace gulo mǝnana kum ka.

¹⁴Aɓalǝ anonggeo mǝnana à nda kano ka, Festus bǝl ɓa cau mala kùrban mala Bulǝs aban murǝm ama: Ɓe ɓwa na kani mǝnana Felis nyi a ndàkurban ngga.

¹⁵Sǝ lang ǝn warina a Urǝshalima ka, agbani pǝris andǝ aɓwana-mǝgule mala amǝ Yahudi yiu nǝ acauɓashi amuri. À nam ama ɓǝ̀ ǝn pakki wi ɓashi mǝnana nǝ̀ mé ɓǝa wal-lui ka.

¹⁶Sǝ ǝn nea wia nǝma, sǝm amǝ Roma ka, sǝm nggǝ mak ɓwa mǝnana à yiu nǝ cau amuri ka ɗang, she ɓǝ̀ sǝm yì kpapina ɓamǝsǝa rǝia andǝ aɓi amǝbura, à pani wi dǝmbǝu náná kuni ka.

¹⁷Lang à yina kani ka, ǝn dǝndi arǝ ce ɗang. Ban fana ka ǝn kutio a ndaɓashi, ǝn tsǝa à yiu nǝ ɓwe, yì Bulǝs a ɓadǝmbǝam.

¹⁸Lang aɓi amǝbura lo à nǝ̀ na cau ka, ko à na kǝcau mǝɓane amuri ulang mǝnana ǝn twali nǝma nda à nǝ̀ na ka ɗang.

¹⁹Kǝcau mǝnana à kutio aban ne ka, nda mǝnana kunia came arǝ ɓua amur cau kpata Ɓakuli malea andǝ ɓeɓwa mǝnana à kǝ tunǝi ama Yesu, mǝnana wuna, sǝ Bulǝs kǝ na ama longŋǝna ndanǝ yilǝmu.

²⁰Sǝ mim ngga ce nì kùr muram, ǝn ɗwanyi njar mǝnana mǝ nǝ kar kam sǝ mǝ nǝ kum agir mǝnana ɓoaro ɓǝn surǝia amur ce nì ka. Nda gir mǝnana tsǝa sǝ ǝn ɗi Bulǝs ko nǝ̀ eare nǝ̀ ká a Urǝshalima, ace mǝnana ɓǝa kya pakki wi ɓashi amur amǝnia yì acau ka kam.

²¹Sǝ Bulǝs ka bangŋǝna ama awo, ɓǝa kyan nǝ cau a dǝmbǝa, Kaisar ɓǝ̀ kya kasǝ cau male. Nda sǝ ǝn tsǝa ɓǝa nyi aɓa ndà a bu asoje ɓǝa kǝ yallí ba pwari mǝnana mǝ nǝ tasǝ te aban Kaisar ka.

²²Agǝripa pǝlǝa banggi Festus ama, “Ən nggǝ earce mǝ nǝ ok cau a kun man yì ɓwa ka nǝ ɓamuram.” Pǝlǝa Festus na ama, “Li ka, a wu nǝ oe.”

²³Ban fana ka, Agǝripa andǝ Banayis pur a puro mala amurǝma aɓa lǝmndǝ jali mala gulo, à yiu à yì kutio aɓa ndà mǝnana ɓwabunda ram nggam ngga, a tarǝia andǝ aɓwana-mǝgule mala asoje andǝ aɓwana-mǝgule mala nggeala. Pǝlǝa Festus bangŋa ama ɓǝa yinǝ Bulǝs.

²⁴Sǝ na ama: Murǝm Agǝripa andǝ aɓwana mǝnana kat akani ata sǝm ngga, mǝnia yì ɓwa wu sǝni ka nda ɓwa mǝnana amǝ Yahudi kat, aman kani andǝ aman a Urǝshalima ka, à yiu nǝ cau amuri abanam, nǝ mak'zwalo a kunia. À earce ama, ɓǝa kǝa nyi ɓǝ̀ auwa ɓǝ̀ do nǝ yilǝmu ɗǝm ɗang.

²⁵Sǝ mim ngga ǝn kumi nǝ kǝ cau mǝɓane mǝnana à nǝ̀ ɓashi wi, ɓashi lú nǝi ka ɗang. Sǝ acemǝnana yì, nǝ́ ɓamuri alta o a dǝmbǝa nǝ cau aban Kaisar, yì murǝm mǝgule ka, ǝn náná, nǝma mǝ nǝ tasǝ te.

²⁶Sǝ mim ngga, ǝn panǝ ɓe kǝgir mǝnana mǝ nǝ gilǝ amuri aban ká aban Kaisar ka ɗang. Nda gir mǝnana tsǝa sǝ ǝn yiu nǝi a ɓadǝm wun, a nggearǝ ɓadǝmbǝo, we Murǝm Agǝripa ka! Anzǝm mǝnana sǝm ongŋǝna, à bǝlkina ɓa cau male ka, mǝ nǝ gandǝ kum gir mǝnana mǝ nǝ gilǝa amuri ka.

²⁷Nda acemǝnana pà nǝ̀ ɓoaro ɓǝ̀ ǝn tasǝ ta pursǝna aban ká aban Murǝm Mǝgule a Roma, sǝ kǝ cau pà kàm ǝn gilǝa, mǝnana nǝ̀ lǝmndǝ acauɓashi mǝnana amuri ka ɗang.