Read mbula bwazza Amǝ Mishan 26 Bible Online

Amǝ Mishan 26 - mbula bwazza bible

Amǝ Mishan 26

¹Pǝlǝa Agǝripa ne Bulǝs ama, “À pàno dǝmbǝu wu na kuno.” Pǝlǝa Bulǝs loasǝ bui sǝ kuti aban bǝl kuni ama:

²Murǝm Agǝripa, mǝ ndanǝ dǝmcauwa kǝrkǝr mǝnana ama nda a ɓadǝmbǝo sǝ ǝn came mǝ nǝ nakunam yalung, amur agir mǝnana amǝ Yahudi tsǝkam a rǝam ama ǝn pea ka.

³Nggeamurǝmi ata agir mǝnana ɓoar nǝi ka, nda mǝnana ama we ka, a surǝna rǝ cau mala akuncau andǝ akunɓuana mala amǝ Yahudi. Ace mani ka ǝn nggǝ zǝmbǝo, kwaki kiro oem, nǝ munyi.

⁴Amǝ Yahudi kat ka, à sǝlǝna rǝ do mem, lo a muntulo mem aɓa nzali mem andǝ mǝnana a Urǝshalima nǝ nzǝmo ka.

⁵À surǝna rǝam ɗiɗyal, ɓǝà nǝ̀ na ama à nǝ̀ na mǝsǝcau ka, ama, a tite ɗiɗyal a do mem ngga, mǝ nda aɓa nggǝsanyi mala amǝ Farisi, aɓwana mǝnana à kǝ kpata akuncau andǝ anzongcau mala peri ma'sǝm kat, nǝ tsǝk kiru pepe ka.[112]

⁶Sǝ a dyan ngga, mǝ ndya ǝn came à kǝ ɓashiam ace tsǝkɓalǝu mǝnana mǝ ndanǝi arǝ lumsǝo mala cau mala Ɓakuli mǝnana banggi aká sǝm ngga.

⁷Mǝnia ka nda kǝ gir mǝnana atau ma'sǝm lum-nong-ɓari mala amǝ Isǝrayila tsǝk ɓalǝia aban kúndǝo à nǝ̀ sǝn lumsǝo male ka. Nda tsǝa sǝ à kǝ peri a ɓadǝm Ɓakuli du andǝ pwari nǝ rǝɓǝla ka. Ɓǝ̀ rǝo pwalo Murǝm, kat andǝ mǝno ka, à tsǝkam acau a rǝam, à yinǝ mim aban ɓashi ace bwal mǝnia yì tsǝkɓalǝu ka!

⁸Palang sǝ dupa wun nǝ kwano, wun aɓwana mǝnia kani ka, mǝnana wu nǝ̀ earnǝi ama Ɓakuli nǝ̀ loasǝ alú ka?

⁹Ɗiɗyal ka mim nǝ ɓamuram, ǝn nggǝ sǝni nǝma mǝ nǝ pak agir kat mǝnana nǝ̀ tamsǝ lidǝmbǝa mala lullǝ Yesu, ɓwa Nazarat ka.

¹⁰Mǝnia ka nda gir mǝnana ǝn pê a Urǝshalima ka. Ən kum rǝcandǝa aban agbani pǝris, ǝn nggea bwalki aɓwana mala Ɓakuli, ǝn oasǝia a ndàkurban. Anzǝm mǝnana ɓǝa kasǝnia wia ɓashi mala lú ka, ǝn pu anzǝm amǝ wal-luia.

¹¹Kusǝ pas ǝn tsǝa à pea wia tanni arǝ andakpapi, ǝn nggǝ cia ɓǝa makgir kpata Yesu. Acemǝnana ǝn ɓinǝ mǝsǝia kǝrkǝr ka, ǝn zuppi atea arǝ aɓea anggea-là ace ká pea wia tanni.[113]

¹²Ace kǝ pak mǝno yì turo ka, a ɓe pwari ǝn puro mǝ nǝ ká a Damaska. Agbani pǝris mǝnana a Urǝshalima ka à panam rǝcandǝa sǝ à turam.

¹³Amur njargula aban ká, nǝ pwari zǝkia, Ɓǝ̀ rǝo pwalo Murǝm, ǝn sǝn tǎlaban mǝnana tǎ male kuti mala pwari ka, pur a kuli yi ta kàriam a ɓalǝu sǝnǝa aɓwana mǝnana sǝm nda a tarǝ sǝm sǝnǝia ka.

¹⁴Sǝm kat ka sǝm kpa a nzali, sǝ ǝn ok giu ɓeɓwa aban nam cau nǝ kun Ibǝru ama, “Sawul, Sawul! Palang sǝ a kǝ pam tanni le? Walki rǝǔ mo arǝ nkpako ka nda ɓà.”

¹⁵Sǝ ǝn ɗiban nǝma, “A nda yan le, ɓwamǝgule?” Pǝlǝa Mǝtalabangŋo ear ama, “Mǝ nda Yesu, mǝnana a pākiyi wi tanni ka.

¹⁶Sǝ ado ka, lo cam nǝ came amur akusǝo. Ən pusǝ rǝam abano, acemǝnana ǝn twalǝno a dumǝna guro mem, mǝ nakunam. We ka, a nǝ ngga ne aɓwana gir mǝnana kat a sǝni andǝa mǝnana mǝ nǝ lǝmndǝo a dǝmbǝa ka.

¹⁷Mǝ nǝ amsǝo a bu amǝ Isǝrayila andǝ aɓwana mala acili anzali mǝnana ǝn nggǝ turo abania,

¹⁸ace mǝnana wu mǝnbia wia mǝsǝia, ɓǝa puri ɓa pǝndǝa, ɓǝa yiu aɓa tǎlaban ngga. Mǝ ndarǝ túrǒ abania ace mǝnana ɓǝa pǝlǝa ɓǝa puri ɓata parban mala Shetan, sǝ ɓǝa yiu aban Ɓakuli. Anggo ka à nǝ̀ twalia wia ban acauɓikea malea, sǝ nǝ́ paɓamuru malea abanam ngga, à nǝ̀ kum ban-do aɓalǝ aɓwana mǝnana Ɓakuli tàrria ɓǝa duk amale ka.”

¹⁹Anggo, We Murǝm Agǝripa, ǝn kpata mǝnia yì sǝne aɓa Bangŋo ǝn sǝni nǝ kuli ka.

²⁰A tite ka, ǝn hamnǝ cau a Damaska andǝ Urǝshalima andǝ anzali mala amǝ Yahudi kat. Sǝ ǝn hamnǝi gbal aɓalǝ aɓwana mǝnana amǝ Isǝrayila na raka. Ən nea wia nǝma ɓǝa pǝlǝ nzǝmia arǝ cauɓikea ɓǝa pwanzali, ɓǝa nyare aban Ɓakuli, ɓǝa kǝ pak agir mǝnana nǝ̀ lǝmndǝ ama yia ka à nyingŋǝna acauɓikea malea ka.[114]

²¹Nda ace kǝ mǝnia yì gir ka, sǝ amǝ Yahudi mǝnia à bwalam aɓa Ndàmǝgule mala Ɓakuli, à ɓariki ama à nǝ̀ wal-luim.

²²Sǝ ba yalung ngga, Ɓakuli ka bwalàm nggàm, nda gir mǝnana tsǝa ado sǝ ǝn kumo ǝn came akani, ǝn nggǝ nakunam aban aɓwana kat, ɓwa mǝkyauwe andǝ ɓwamǝgule. Sǝ gir mǝno ado ǝn nggǝ na ka nda kǝgir mǝnana amǝ'ɓangna mala Ɓakuli andǝ Musa bangŋa ama nǝ̀ yia pur ka.

²³À bangŋa ama Kǝrǝsti, yì ɓwa mǝnana Ɓakuli turi ka, nǝ̀ nu tanni sǝ nda ɓwa mǝnana nǝ̀ tita loapi ɓembe nǝ yilǝmu ka, nǝ̀ hamnǝ cau mǝnana nǝ̀ pa tǎlaban mala amsǝban aban amǝ Yahudi andǝ aɓwana arǝ acilia anzali.[115]

²⁴Lang Bulǝs na ban bǝl kuni anggo ka, kara Festus sàrǝi ama, “Bulǝs, we ka muro pǝlǝna! Ɓalgir mo mǝkǝrkǝr nì tsǝngŋǝno ɓamuro pǝlǝna!”

²⁵Bulǝs ne wi ama, “Mim ngga, muram pǝlǝ ɗang, Ɓǝ̀ Rǝo Pwalo, mǝgulo Festus! Kǝ mǝsǝcau na mǝno ǝn nggǝ na ka.

²⁶Murǝm Agǝripa! Mǝ nǝ gandǝ no cau ɓangciu pa a rǝam ɗang, acemǝnana we ka a surǝna cau mala amǝnia yì agir ka. Mǝ ndanǝ sǝlǝe kàngkàng ama kǝ mwashat pà kàm aɓalǝ agir mǝnia ka, mǝnana api sǝlǝ mo kà, acemǝnana à pea a kanggari ban ɗang.

²⁷Murǝm Agǝripa, a earnǝ acau mala amǝ'ɓangna mala Ɓakuli mǝnana a gilǝ ka le? Ən sǝlǝna nǝma a ear nǝia!”

²⁸Pǝlǝa Agǝripa ne Bulǝs ama, “Aɓa do mǝnia mgbeatuk ka nda a kǝ sǝni kǝla a nǝ nunam ɓǝn duk kǝrǝsta ka le?”

²⁹Bulǝs ne wi ama, “Ko aɓa do mgbeatuk ko mǝsauwe, hiwi mem aban Ɓakuli ka, nda mǝnana ama, we andǝ acili aɓwana mǝnana ado à kǝ oem yalung ngga, wu nǝ̀ do kǝla mim, sǝa ma, ɓǝ̀ kǝa pa andǝ ansolo man ɗang!”

³⁰Pǝlǝa murǝm, sǝ nggwamna yì Festus, andǝ Banayis, andǝ acili aɓwana kat, à lo à came.

³¹Sǝ kaniama à nǝ̀ puri ban ɓashi ka, à ne a rǝia ama, “Mǝnia yì ɓwa ka, pak ma kǝgir mǝnana à nǝ̀ wal-lui ace, ko à nǝ̀ kùrrì a ndàkurban ace ka ɗang.”

³²Pǝlǝa Agǝripa ne Festus ama, “Ɓǝ̀ a pǝlǝa ama mǝnia yì ɓwa ka almata ká a dǝmbǝa nǝ cau aban Kaisar raka, ɓǝ́ à nǝ̀ panzǝi.”