Read mbula bwazza Amǝ Mishan 28 Bible Online

Amǝ Mishan 28 - mbula bwazza bible

Amǝ Mishan 28

¹Lang sǝm eauna jam a nza ka, sǝm yì sǝlǝ ama banì ka luran mǝnana à tunǝki ama Malta ka nda.

²Amǝ'nzali mala mǝno yì luran ka, amǝ earce aɓwana na. À ak sǝm nǝ bumpwasǝa. Acemǝnana mbulo tita nya sǝ ɗwal na kam kǝrkǝr ka, kara à bwal bǝsa sǝ à tunǝ sǝm kat ɓǝ̀ sǝm kya dandǝ rǝ sǝm.

³Bulǝs ram mǝsǝ'nggun, ndaban cie amur bǝsa ka, kara n'yau ɓanggi pi mala bǝsa puro marǝki a garabui.

⁴Lang amǝ luran ni sǝn n'yau aban gyare a bui ka, pǝlǝa à ne a rǝia ama, “Ɓwa man ngga dumǝna mǝ walki alú na, sǝ ‘Pepe mala Mǝsǝcau’ pà nǝ̀ ɗeki ɓǝ̀ api lú ɓà ɗang, kat andǝ amani ama api lú a nggeamur ka.”

⁵Sǝ Bulǝs ka, kǝtǝri bui, n'yau puro kpa aɓa bǝsa, sǝ ko kǝgir bǝti kumi ɗang.

⁶Sǝ yia ka, à twali ama Bulǝs nǝ̀ vwali, ko nǝ̀ kpa a nzali, mǝnana nǝ̀ wu ka. Sǝ lang à kúndǝna zuku sǝ à sǝn ɓe kǝgir kumi raka, kara à nggaɗi ɗenyicau malea, à na ama, “Mǝnia yì ɓwa ka yakǝla ɓe ɓakuli mala amǝ Gǝrik na!”

⁷Lullǝ ɓwamǝgule amur mǝnia yì luran ngga nda Pubǝliyus. Ndanǝ aɓea aɓaban akano tu nǝ ban mǝnana à bwala sǝm bǝsa kam ngga. Yì ka, ak sǝm nǝ bumpwasǝa, pa sǝm ban nongŋo, sǝm pakki anonggeo tārú a ɓala male.

⁸Sǝm yì ok ama tar Pubǝliyus ka nda a kurǝm aban nongŋo nǝ rǝkwana ɓauwa andǝ bumɓangna. Pǝlǝa Bulǝs kutio a kurǝm abani, pak hiwi, tsǝk bui amuri, kara twali wi ban rǝkwana.

⁹Lang gir nî pangŋǝna anggo ka, kara acilia ɓwana mǝnana aɓa luran nǝ arǝkwana gbal ka, à yiu à yì twalia wia ban arǝkwana malea.

¹⁰Aɓwana mǝno lǝmndǝa sǝm gusǝlǝban arǝ anjargula ɗàngɗáng. Sǝm nǝ̀ lo o ka, à pākia sǝm agir mǝnana kat ɓoaro ɓǝ̀ sǝm pang nǝia amur gya ka.

¹¹Anzǝm azongŋo tārú ka sǝm lo gya aɓa nggeamur a ɓe waru mǝnana yi mal kunɗwal a mǝno yì luran ngga. Waru mala amǝ Alizandǝriya na. Ndanǝ aɓǝ̀nzál ɓari mala agirperi mala amǝ Gǝrik, “Kasto andǝ Poluks” mǝnana à shàrria a kundǝmbǝi ka.

¹²Sǝm nggea bik ɓe la ama Sirakiyus, aɓa luran mala amǝ Sisili. Sǝm pak anongŋo tārú kam.

¹³Twal abanì ka sǝm samsǝa sǝm kya bwal ban kpasha mala awaru a Regiyom aɓa nzali Italiya. Ban fana ka kara ɓe gung lo ɓua nǝ nzǝm sǝm a njartamur. Ace mǝno ka, kǝ nongŋo ɓari na twal sǝm sǝ sǝm yì bik la mǝnana à tunǝki ama Putiyoli ka.

¹⁴Akàm ngga, sǝm yì kum aɓea amǝ'eamrǝarǝu mǝnana à zǝmbǝa sǝm ama ɓǝ̀ sǝm do abania limo mwashat ka. Anggo sǝ sǝm yiu sǝm yì bwal Roma.

¹⁵Amǝkwaɗi mǝnana a Roma ka, à okce yiu ma'sǝm, sǝ à purkio arǝ aban mǝsauwe, kǝla ala mǝnana à tunǝkia ama Limo mala Apiyus andǝ Aɓala Bansulǝo Tārú, à yiu à yì kum sǝm. Lang Bulǝs nǝ̀ sǝnia ka, kara ɓwangsǝki Ɓakuli sǝ kum rǝcandǝa.

¹⁶Lang sǝm bwalǝna Roma ka, à nying Bulǝs ɓǝ̀ do aɓa ɓamuri a ɓe ɓala. À tsǝki wi ɓe soje mwashat ɓǝ̀ kǝ yallí.

¹⁷Anzǝm anongŋo tārú ka, Bulǝs tunǝ aɓwana-mǝgule mala amǝ Yahudi mǝnana aban mǝno ka à kpapi. Lang à yì rambǝna ka, pǝlǝa banggia wia ama: Wun amǝ'eambǝam amǝ Isǝrayila, kat andǝ amani ama ǝn pak kǝgir mǝɓane aban aɓwana mem ko arǝ acau mala do kpata kuncau mala aká sǝm raka, à bwalam à kùrram a Urǝshalima. Sǝ à yiu nǝ mim à yì pe amǝ Roma.

¹⁸Anzǝm mǝnana amǝɓashi mala amǝ Roma ɗìkìnam amur ace ka, à earǝna ce ama à nǝ̀ ɗekiam, acemǝnana à kumam nǝ kǝ cau mǝnana à nǝ̀ wal-luem ace ka ɗang.

¹⁹Sǝa ma lang amǝ Isǝrayila ɓinǝna ama ɓǝa kǝa ɗekiam raka, gir nî ciem ǝn zǝm nǝma ɓǝa tusǝ ɓashi mem ɓǝa kyan nǝ mim a ɓadǝm Kaisar,[118] kat andǝ amani ama ǝn panǝ ɓe kǝ cau arǝ aɓwana mem raka.

²⁰Nda gir mǝnana tsǝa sǝ ǝn na nǝma ɓǝa tunǝ wun mǝ nǝ na cau nǝ wun ngga. Aɓa mǝsǝcau ka, nda ace gir mǝnana amǝ Isǝrayila tsǝk ɓalǝia a rǝì ka, sǝ à kùrram nǝ ansolo man.

²¹Pǝlǝa aɓwana-mǝgule nì banggi wi ama, “Sǝm ngga sǝm kum kǝ cautera mǝnana puro a nzali Yahudi aban yiu aban sǝm a muro ka ɗang. Sǝ kǝɓwa pa aɓalǝ amǝ'eam sǝm mǝnana pur kano nǝ ɓe kǝ̀ cau mǝɓane a muro ka ɗang.

²²Sǝa ma sǝm ngga sǝm nggǝ earce surǝ gir mǝnana a ndanǝi a bumo ka, acemǝnana sǝm sǝlǝna ama arǝ aban kat aɓwana kǝ naki acau mǝɓane amur mǝnia yì njargula kpata Yesu ka.”

²³Pǝlǝa à tsǝk pwari mǝnana à nǝ̀ yia dum nǝi andǝa Bulǝs ka. Aɓwana pas yiu a pwari mǝno aban mǝnana Bulǝs duk kam ngga. Twal a dǝmbari yi bwal a pwarikpǝra, Bulǝs bǝlia wia ɓa cau male amur Domurǝm mala Ɓakuli. Bulǝs ɓariki nǝ̀ cia ɓǝa paɓamuria aban Yesu, nǝ̀ nun ɗenyicau malea arǝ acau mǝnana Nggurcau Mala Musa andǝ agir mǝnana amǝ'ɓangna mala Ɓakuli gilǝ ka.

²⁴Pǝlǝa aɓea aɓwana aɓalǝia earnǝ cau male, sǝ aɓea ka, à earnǝi ɗang.

²⁵Pǝlǝa à tita nying banì, nǝ makgir a rǝarǝia. Bulǝs ka angŋa dǝmbǝa bangŋǝnia wia mǝnia yì cau ka ama: Bangŋo Mǝfele banggi aká wun mǝsǝcau nǝ kun Ishaya, mǝɓangna mala Ɓakuli. Nea wia ama:

²⁶“Kyane kya nea aɓwana man ama, Wù nǝ̀ ok cau nǝ kir wun, sǝ ceì pà nǝ̀ kpaka wun ɗang. Wu nǝ̀ sǝnban, nyare wù nǝ̀ sǝnban, sǝ pà wù nǝ̀ sǝn kǝgir ɗang,

²⁷acemǝnana ɓabum mǝnia yì aɓwana ka à candǝkina, sǝ yia ka à girkina akiria sǝ à kùmsǝkina amǝsǝia. Ɓǝ̀ a na raka, amǝsǝia nǝ̀ sǝn ban, akiria nǝ̀ ok ban, ɓabumia nǝ̀ kum sǝlǝe, sǝ à nǝ̀ nyare a banam, sǝ mǝ nǝ nyesǝia a bancame mǝɓoarne malea.”[119]

²⁸Pǝlǝa Bulǝs masǝlǝ cau ama, “Ado ka, wu sǝlǝ ama, Cau Amsǝban mala Ɓakuli ka, à tasǝni aɓwana mǝnana amǝ Yahudi na raka. Yia ka à nǝ̀ kwaki kiria à nǝ̀ o!”[120]

³⁰Arǝ apǝlǝa ɓari Bulǝs bwal ɓala dukam, abanì sǝ kǝ ak aɓwana mǝnana à kǝ yiu abani a sǝne ka.

³¹Kǝ hamnǝ cau mala Domurǝm mala Ɓakuli sǝ kǝ kanigir amur Mǝtalabangŋo Yesu Kǝrǝsti. Kǝ na cau nǝ rǝcandǝa kat, ko ɓangciu pà a rǝì ɗang. Kǝ ɓwa tamsǝì ɗang.