Read mbula bwazza Amǝ Mishan 3 Bible Online

Amǝ Mishan 3 - mbula bwazza bible

Amǝ Mishan 3

¹Aɓe pwari mwashat, Bitǝrus andǝ Yohana ka à ndaban eauwe aban ká a Ndàmǝgule mala Ɓakuli, a bu-pwari tārú mala pwari, a pak hiwi.

²Ɓe ɓwa nakam, mǝnana à ɓǝli ka gbakǝre na. Koya pwari ka à kǝ twali à kǝ ci a giriban, a kun Ndàmǝgule mala Ɓakuli, mǝnana à tunǝki ama, Kunɓala Mǝɓoarjami, acemǝnana ɓǝ̀ kǝ zǝmnggi agir a bu aɓwana mana à kǝ kuti aɓa Ndàmǝgule mala Ɓakuli ka.

³Lang nǝ̀ sǝn Bitǝrus andǝ Yohana aban kutio aɓa Ndàmǝgule mala Ɓakuli ka, zǝmbǝia wia boalo.

⁴Pǝlǝa Bitǝrus andǝ Yohana soaki wi mǝsǝu, sǝ Bitǝrus banggi wi ama, “Sǝn sǝm!”

⁵Pǝlǝa gbakǝre-ɓwa tsǝk mǝsǝì a rǝia, kǝ sǝni ama à nǝ̀ pe wi ɓoro.

⁶Sǝ Bitǝrus banggi wi ama, “Ən panǝ boalo mǝ nǝ po ɗang. Sǝa ma gir mǝnana mǝ ndanǝi ka nda ǝn nggǝ po ka. Aɓa lullǝ Yesu Kǝrǝsti ɓwa Nazarat, lo sǝ wu gya!”

⁷Pǝlǝa Bitǝrus bwal bui mǝli, loasǝi tamsǝi. Nǝ̀ pa anggo ka, kara akusǝ ɓwabura man andǝ ankpalkusǝi kum rǝcandǝa,

⁸sǝ yàl a kuli came amur akusǝi, sǝ tita gya! Kǝ gya, kǝ yàl a kuli, aban ɓwangsǝki Ɓakuli. Pǝlǝa kutio atea a Ndàmǝgule mala Ɓakuli.

⁹Aɓwana kat sǝni aban gya, sǝ kǝ ɓwangsǝki Ɓakuli.

¹⁰Lang à yì surǝì ama, nda kǝ gbakǝre, mǝ'zǝmnggiagir mǝnana dukiyi a kunɓala Mǝɓoarjami mala Ndàmǝgule mala Ɓakuli ka, à pak ndali kǝrkǝr nǝ gir mǝnana à pakki wi ka!

¹¹Lang mǝnia yì ɓwa na ban kur arǝ Bitǝrus andǝ Yohana aban mǝnana à tunǝki ama, Tara mala Solomon ngga, aɓwana kat mana aban nì ka, à ɓangŋa à yiu à yì came abania aban pak ndalǝki nǝ mǝnia yì gir ka.

¹²Lang Bitǝrus sǝn ɓwabunda yi ram ka pǝlǝa banggia wia ama: Wun amǝ Isǝrayila, palang sǝ wu kǝ pak ndali, sǝ palang sǝ wu kǝ soa mǝsǝ wun arǝ sǝm? Wu kǝ sǝni kǝla nǝ rǝcandǝa ma'sǝm andǝ cauɓoarna ma'sǝm sǝ mǝnia yì ɓwa ka kǝ gya ado le?

¹³Ɓakuli mala Ibǝrayim, andǝ Ishaku andǝ Yakupu, Ɓakuli mala aká sǝm, nda pe guro male yì Yesu gulo nǝ mǝnia yì gir ka. Sǝ wun ngga wu nǝ̀ twali sǝ wu pea aɓwana ɓǝa wali. Wu ɓinǝkì a ɓadǝm Bilatus, anzǝm mǝnana yì ka, earǝna ama nǝ̀ panzǝi ɓǝ̀ o ka.[17]

¹⁴Wu ginǝki Ɓwa Mǝɓoarne, Guro Mǝfele mala Ɓakuli, sǝ wu banggi Bilatus ama, ɓǝ̀ panzǝa wun mǝ walki alú.[18]

¹⁵Wu wal-lú ɓwa mǝnana nǝ̀ pākiyi yilǝmu ka, sǝ pǝlǝa Ɓakuli loasǝi a ɓembe. Sǝ sǝm ngga sǝm sǝnǝni nǝ mǝsǝ sǝm, nda sǝm nggǝ na cau male ka.

¹⁶Nǝ guliarǝu aɓa lullǝ Yesu, sǝ mǝnia yì gbakǝre ka kum rǝcandǝa. Sǝ wun ngga, wu sǝlǝna rǝ ulang gbakǝri male ɗiɗyal. Sǝ paɓamuru aban Yesu nǝ̀ yinǝi wi nǝ rǝcandǝa mala nggūrǝi, kǝla mǝno ado wun kat wu sǝni ka.

¹⁷Ado ka, wun amǝ'eamrǝarǝu, ǝn sǝlǝna ama gir mǝnana wun, wunǝa aɓwana-mǝgule ma'wun pakki Yesu ka, wu pe aɓa ɗwanyi sǝlǝe.

¹⁸Sǝ Ɓakuli ka, nda aban lumsǝ agir mǝnana bangce nǝ kun amǝ'ɓangna male ama, Kǝrǝsti nǝ̀ nu tanni ka.

¹⁹Wu pwanzali ado, wu pǝlǝ nzǝm wun arǝ acauɓikea ma'wun. Wu nyare aban Ɓakuli, ace mǝnana ɓǝ̀ twala wun ban acauɓikea ma'wun.

²⁰Sǝ Mǝtalabangŋo ka nǝ̀ pa wun apwari mala kum bǝsa rǝcandǝa, sǝ nǝ̀ tasǝa wun Kǝrǝsti Yesu, Mǝ'amsǝban mǝnana turí ace wun ngga.

²¹Dumǝna púp ama Yesu ka nǝ̀ ueo kano a kuli, ba pwari mǝnana Ɓakuli nǝ̀ nyesǝ agir kat ɓǝa pǝlǝ bǝshe, kǝla mǝnana bangce nǝ kun amǝ'ɓangna male amǝfele a pwaryan ngga.

²²Musa bangŋa ama, “Mǝtalabangŋo Ɓakuli ma'wun, nǝ̀ loasǝ ɓe mǝɓangna, kǝla mim aɓalǝ aɓwana ma'wun. Wu tsǝk kir wun arǝ agir mǝnana kat nǝ̀ bangga wun ngga.

²³Sǝ ɓwa mǝnana kat pà nǝ̀ oki mǝnia yì mǝɓangna mala Ɓakuli raka, à nǝ̀ pusǝì aɓalǝ aɓwana mala Ɓakuli ɓǝ̀ kiɗikea.”[19]

²⁴Tite aban Samuyila, amǝ'ɓangna mala Ɓakuli kat, amǝnana Ɓakuli bang cau nǝia ka, à bangŋa cau amur agir mǝnana à kǝ kumban yalung ngga.

²⁵Wu nda ka amuna mala amǝno yia amǝ'ɓangna mala Ɓakuli ka, sǝ wu nda aɓa kurcau mala Ɓakuli mǝnana pakki aká wun ngga. Acemǝnana Ɓakuli banggi Ibǝrayim ama, “Nǝ́ bú mǝkeo sǝ mǝ nǝ tsǝki aɓwana a ɓanza kat buam.”[20]

²⁶Lang Ɓakuli loasǝna guro male Yesu ka, tasǝi aban wun, wun amǝ Isǝrayila peatu, ace mǝnana ɓǝ̀ tsǝka wun bu, a njar mala pǝlǝ koyan ata wun ngga, ɓǝ̀ nying ɓealɓikea male.