Read mbula bwazza Amǝ Mishan 8 Bible Online

Amǝ Mishan 8 - mbula bwazza bible

Amǝ Mishan 8

¹Sawul ka ban ɓoari wi arǝ wal-lú Itǝfanu. Àkǝ̀ pwari mǝno ka pàtanni lo arǝ ikǝlisiya mana a Urǝshalima ka. Amǝkwaɗi kat à mesǝki arǝ aban ɗàngɗáng aɓa nzali Yahudi andǝ Samariya, kǝ amǝ'mishan na nǝmurǝia à ueo aɓa Urǝshalima ka.

²Aɓea amǝ'ɓanggi Ɓakuli na à yì tsǝkban Itǝfanu ka. À ɓua ace kǝrkǝr.

³Pǝlǝa Sawul lo wuni adyan aban pe ikǝlisiya tanni, kǝ kutikio arǝ aɓala, kǝ bwalki aburana andǝ amamǝna, kǝ um nǝia a ndàkurban.[58]

⁴Amǝkwaɗi mǝnana à mesǝki ka, à camarǝ hamnǝ Cau Amsǝban a koya ban mǝnana à wari kam ngga.

⁵Filip ka wario a ɓe nggeala aɓa nzali Samariya, kya camarǝ hamnǝ cau mala Kǝrǝsti, Mǝ'amsǝban aban aɓwana.

⁶Ɓwabunda kwaki kiria aban ok cau mǝnana Filip kǝ na ka nǝ ɓabumia kat, lang à sǝn agir-ndǝlǝki mǝnana kǝ pea ka.

⁷Abangŋo mǝɓane kǝ purki rǝ aɓwana pas, nǝ zwalo bang-bang. Sǝ aɓwana mǝnana ɓe barea wú, andǝ agbakǝre ka, à twalia wia ban akwano malea.

⁸Ace mani ka, banɓoarnado sulǝ kǝrkǝr a mǝno yì nggeala ka.

⁹A mǝno yì nggeala ka, ɓeɓwa na kam lullǝi ama Shiman, yì ka, mǝɗikalu na. Kǝ pe aɓwana mǝnana a Samariya ka ndali. Kǝ twali ɓamuri ama yì ka, nggea ɓwa mǝcande na.

¹⁰Ɓwapǝndǝa kat, muna andǝ ɓwamǝgule kǝ kwakikiru a rǝì. À kǝ bangŋa ama, “Yì ka, ndanǝ rǝcandǝa mala Ɓakuli mǝnana à tunǝki ama ‘Rǝcandǝa Mǝgule’ ka.”

¹¹Yia ka à nyesǝ ɗenyicau malea abani acemǝnana banì sauwuna, nda aban pea wia ndali nǝ kutan male.

¹²Sǝ lang aɓwana yi ak cau amsǝban mǝnana Filip kǝ hamnǝi amur Domurǝm mala Ɓakuli andǝ lullǝ Yesu Kǝrǝsti ka, à kya pakkia wia batisǝma, aburana andǝ amamǝna.

¹³Sǝ Shiman nǝ nggearǝì gbal ka, paɓamuri, pǝlǝa à pakki wi batisǝma. Pǝlǝa yì ka, akrǝi ata Filip, à kǝ gya andǝi a koya ban mǝnana wari kam ngga. Kǝ ndali kǝrkǝr lang sǝn agir-ndǝlǝki andǝ agir-gyambǝliban mǝgulke mǝnana Filip kǝ pea ka.

¹⁴Lang amǝ'mishan mǝnana a Urǝshalima, ongŋǝna ama amǝ Samariya angŋǝna cau mala Ɓakuli ka, à tasǝ Bitǝrus andǝ Yohana abania.

¹⁵À yì bwalǝna ka, pǝlǝa à pakkia aɓwana mǝnia mǝnana à loa ak cau mala Ɓakuli ka hiwi, ace mǝnana ɓǝa kum Bangŋo Mǝfele ka.

¹⁶Sǝ Bangŋo Mǝfele ka, malaká sulǝo amur kǝɓwa atea ɗang peatu; kǝ batisǝma na nǝmurǝì à pakkia wia aɓa lullǝ Mǝtalabangŋo Yesu ka.

¹⁷Pǝlǝa Bitǝrus andǝ Yohana tsǝk buia amuria, sǝ à kum Bangŋo Mǝfele.

¹⁸Lang Shiman sǝnǝna amǝ'mishan à tsǝk buia amur aɓwana sǝ à kum Bangŋo Mǝfele ka, pǝlǝa yinǝia wia nǝ boalo,

¹⁹sǝ na ama, “Wu pam mǝnia yì rǝcandǝa gbal, ace mǝnana koyana ǝn tsǝk buam amuri ka, ɓǝ̀ kum Bangŋo Mǝfele.”

²⁰Sǝ Bitǝrus banggi wi ama, “We wunǝ boalo mo ka, wu kya bǝsa, acemǝnana a kǝ sǝni kǝla ɓoro mala Ɓakuli ka, à nǝ̀ kúrí nǝ boalo!

²¹Kǝ gir oasǝo aɓa mǝnia yì turo ka ɗang, acemǝnana ɓabumo pa pepe a ɓadǝm Ɓakuli ɗang.

²²Ado ka, pwanzali, pǝlǝ nzǝmo arǝ mǝnia yì ɓealɓikea ka, sǝ wu pak hiwi aban Mǝtalabangŋo. Ear ka yì ka, nǝ̀ twalo ban mǝnia yì ɗenyicau mala bumo ka.

²³Acemǝnana ǝn sǝni ka a lumsǝ nǝ mwararǝu mǝɓike kǝrkǝr, sǝ cauɓikea marǝkino.”

²⁴Pǝlǝa Shiman ear ama, “Ida, zǝmbǝi Mǝtalabangŋo acem, ace mǝnana ɓǝ̀ ɓe kǝgir mwashat aɓalǝ acau mǝnana a na ka, ɓǝ̀ kǝa kumam ɗang!”

²⁵Anzǝm mana Bitǝrus andǝ Yohana bangŋǝna cau mǝnana à surǝì amur Yesu, sǝ à hamǝna nǝ cau mala Mǝtalabangŋo ka, à nyare a Urǝshalima. Amur njar aban o ka, à camarǝ hamnǝ Cau Amsǝban arǝ amuna-là mala amǝ Samariya pas.

²⁶Ɓe mǝturonjar mala Mǝtalabangŋo ne Filip ama, “Lo, tsǝk muro nǝ njartamur, kyane a njargula njarnza, mǝnana sulǝ a Urǝshalima aban ká Gaza ka.”

²⁷Nda Filip lo, bwal njargula aban ká. Kya je andǝ ɓeɓwa Itiyopiya, bedǝran na. Yì ka, nggea ɓwamǝgule na, mǝnana bwalkiyi ban tsǝk boalo mala Kandis, mamurǝm mala amǝ Itiyopiya ka. Mǝnia yì ɓwa ka, wari a peri aban Ɓakuli a Urǝshalima.

²⁸Sǝ nda rǝ nyare aban o a la ka, do aɓa waru male mǝnana pǝ̀r nǝ̀ nunggiyi ka, sǝ kǝ ɓalgir aɓa malǝmce mala Ishaya mǝɓangna mala Ɓakuli.

²⁹Pǝlǝa Bangŋo mala Ɓakuli ne Filip ama, “Kyane, bwalta mǝno yì waru ka.”

³⁰Filip pǝlǝa ɓangŋa wario, kya ok mǝno yì ɓwa ka nda aban ɓalgir aɓa malǝmce mala Ishaya mǝɓangna mala Ɓakuli. Sǝ Filip ɗi ama, “A bwalta gir mǝnana a ɓalkiyi ka le?”

³¹Pǝlǝa eari Filip ama, “Lang sǝ mǝ nǝ bwalte, yì mǝnana kǝɓwa bǝlam ɓālǝi raka?” Pǝlǝa tunǝ Filip ne wi ama ɓǝ̀ eauwe ɓǝ̀ do ate a waru.

³²Ban mǝnana Bedǝran ɓalkiyi aɓa Malǝmce ka ndya ka: “À nunni kǝla nzur aban ká pwan meali. Kǝla muna nzur a bu amǝ'mwa nyang nzur, loasǝ kuni ɗang.

³³À nyesǝ ce ɓà, à gìrì nǝ mǝsǝcau. Yana nǝ̀ gandǝ bang cau amur amǝkè? Acemǝnana yilǝmi a ɓanza ka, à kasǝi mgbeatuk.[59]”

³⁴Pǝlǝa bedǝran man ɗi Filip ama, “Banggam, yana ɓwe mǝɓangna mala Ɓakuli nakiyi cau amuri, ɓamur rǝì na le, ko ɓeɓwa ɗàng?”

³⁵Filip tite nǝ́ kǝ mǝnia yì ban aɓa Malǝmce ka, pǝlǝa banggi wi Cau Amsǝban mala Yesu.

³⁶À nda ban ká a njargula ka, à yì bwal ɓe ban mǝnana nǝ mur ka. Pǝlǝa bedǝran na ama, “Sǝni! Mur nia ka! Mana nǝ̀ tsǝa sǝ à pà nǝ̀ pakkam batisǝma ɗang?”

³⁷[Filip ne wi ama, “Ɓǝ̀ a paɓamuro nǝ ɓabumo mwashat ka, à nǝ̀ gandǝ pakko.” Pǝlǝa bedǝran eari wi ama, “Ən earǝna nǝma Yesu Kǝrǝsti ka Muna mala Ɓakuli na.”]

³⁸Pǝlǝa bedǝran ne mǝkwak waru ama ɓǝ̀ tamsǝ waru. Filip andǝ bedǝran sulǝo à kutio a mùr, sǝ Filip pakki wi batisǝma.

³⁹Lang à eapini mùr ka, kara Bangŋo mala Mǝtalabangŋo twal Filip um nǝi. Bedǝran nyare sǝni ɗǝm ɗang. Sǝa ma bwal njargula male aban o nǝ bumpwasǝa.

⁴⁰Sǝ Filip, nǝ nzǝmo ka, kya kum ɓamuri a ɓe la mana à tunǝki ama Azotus ka. Pǝlǝa camarǝ hamnǝ Cau Amsǝban arǝ ala aban ká a Kaisariya.